Omapulo a dja kovaleshi
Eshi Jesus a dika po Ouvalelo wOmwene, ovahongwa 70 ova hangwa peni, ovo a li a tuma va ka udife? Mbela ova li ve mu fiya po?
Molwaashi ovahongwa 70 kava li pamwe naJesus eshi a dika po Ouvalelo wOmwene, inashi hala okutya kali vali e va hokwa, ile kutya ova li ve mu fiya po. Jesus okwa li ashike a hala okukala pamwe novayapostoli vaye pomhito opo.
Ovayapostoli 12 novahongwa 70 aveshe okwa li e va hokwa. Tete, Jesus okwa li a hoolola movahongwa vaye, ovalumenhu 12, ndele te va luku ovayapostoli. (Luk. 6:12-16) Okwa hangwa muGalilea eshi a ‘ifana ovayapostoli 12, nokwe va tuma va ka udife kombinga yOuhamba waKalunga nokuvelula ovanaudu.’ (Luk. 9:1-6) Lwanima, eshi va li muJudea, okwa li a “hoolola ovahongwa vamwe 70, ndele te va tumu oovavali.” (Luk. 9:51; 10:1) Osho otashi ulike kutya Jesus okwa li e na ovahongwa moitukulwa ya yoolokafana, ovo va li tava udifa kombinga yaye.
Ovajuda ovo va li va ninga ovahongwa vaJesus ova li natango hava dana Opaasa lumwe momudo, notashi dulika va li have shi ningi pamwe nomaukwaneumbo avo. (Ex. 12:6-11, 17-20) Eshi Jesus a li pokufya, okwa li a ya pamwe novayapostoli vaye kuJerusalem. Ashike kali a shiva ovahongwa vaye aveshe kOpaasa okudja kuJudea, kuGalilea nosho yo kuPerea. Osho otashi ulike kutya Jesus okwa li ashike a hala okukala pamwe novayapostoli vaye pomhito opo. Okwe va lombwela a ti: “Onda halelela okulya pamwe nanye ouvalelo wOpaasa ofimbo inandi ka hepekwa.” — Luk. 22:15.
Osho okwa li e shi ninga omolwetomheno liwa. Jesus okwa li e li pokufya e li “Odjona yaKalunga oyo tai kufa po omatimba ounyuni!” (Joh. 1:29) Osho osha li tashi ka ningilwa muJerusalem, omo mwa li hamu yambelwa Kalunga omayambo. Efyo laJesus ola li tali ka eta emanguluko linenenene li dule olo la li la monika kOvaisrael omolwodjona oyo ya li ya liwa komaukwaneumbo Ovaisrael moufiku omo va li va mangululwa muEgipiti. (1 Kor. 5:7, 8) Osho Jesus a ninga osha li sha ningifa ovayapostoli 12 va ninge eengudi deongalo lopaKriste. (Ef. 2:20-22) Shihokwifa, oshilando shiyapuki Jerusalem oshi na “omamanya 12 ekanghameno,” oko kwa li “kwa shangwa omadina 12 ovayapostoli 12 vOdjona.” (Eh. 21:10-14) Ovayapostoli ovadiinini ova li tava ka dana onghandangala ya fimana mokuwanifwa po kwelalakano laKalunga. Onghee hano, oshi shii okuudiwa ko eshi Jesus a li a hala okukala pamwe navo pOpaasa oyo yaxuuninwa nosho yo pOuvalelo wOmwene oo wa ka landula ko.
Ovahongwa 70 nosho yo vakwao vamwe kava li pamwe naJesus pouvalelo oo. Ndele nande ongaho, ovahongwa aveshe ovo va kala ovadiinini otava mono ouwa mOuvalelo wOmwene oo Jesus a dika po. Ovahongwa aveshe ovo lwanima va ka ninga Ovakriste ovavaekwa, ova li va ninga oshitukulwa shehangano louhamba olo Jesus a lombwela ovayapostoli vaye onguloshi oyo. — Luk. 22:29, 30.