Ulika kutya owa pandula “ovalumenhu” ovo Jehova naJesus tava longifa meongalo

1. Oinima imwe ilipi Jesus e tu ningila?

KAPE na omunhu ha yandje ngaashi Jesus. Eshi a li kombada yedu okwa li ha longo oikumwifilonga, opo a kwafele ovanhu. (Luk. 9:​12-17) Okwa yandja oshali ya denga mbada, eshi e tu yandjela omwenyo waye. (Joh. 15:13) Jesus okwa twikila okukala ha kwafele, nokonima eshi a nyumuka. Ngaashi ashike a undaneka, okwa pula Jehova e tu pe omhepo yaye, opo e tu honge noku tu hekeleka. (Joh. 14:​16, 17, esh.; 16:13) Jesus ota twikile oku tu honga opo tu ninge ovanhu ovahongwa mounyuni aushe, te shi ningi okupitila pokwoongala. — Mat. 28:​18-20.

2. Oolyelye va kwatelwa mo ‘movalumenhu ovo ve li eeshali,’ ovo va popiwa mOvaefeso 4:​7, 8?

² Jesus okwe tu pa vali oshali imwe. Omuyapostoli Paulus okwa shanga a ti kutya konima eshi Jesus a londa a ya meulu okwa yandja “ovalumenhu ve li eeshali.” (Lesha Ovaefeso 4:​7, 8.) Paulus okwa yelifa kutya Jesus okwa yandja ovalumenhu ovo opo va yambidide eongalo meenghedi dihapu. (Ef. 1:​22, 23; 4:​11-13) ‘Ovalumenhu ovo ve li eeshali’ kunena ova kwatela mo ovayakuliongalo, ovakulunhuongalo nosho yo ovapashukilishikandjo.a Oshoshili kutya ovalumenhu ovo inava wanenena, onghee ohava ningi omapuko. (Jak. 3:2) Ashike Omwene wetu Jesus Kristus ohe va longifa opo ve tu kwafele.

3. Ongahelipi atusheni hatu dulu okuyambidida ‘ovalumenhu ovo ve li eeshali’? Yandja oshihopaenenwa.

³ Jesus okwa nangeka po “ovalumenhu ve li eeshali” va pameke eongalo. (Ef. 4:12) Ashike atusheni ohatu dulu oku va yambidida, opo va wanife po oshinakuwanifwa osho sha fimana. Natu shi faneke noilonga yokutunga. Vamwe vomufye ohatu kufa ombinga moilonga yokutunga odikilila. Vamwe ohava yambidida oilonga oyo mokulongekida oikulya, oilongifo, ile okukwafela meenghedi dimwe di lili. Sha faafana, atusheni ohatu dulu okuyambidida ovayakuliongalo, ovakulunhuongalo novapashukilishikandjo okupitila mwaasho hatu popi nosho yo osho hatu ningi. Natu ka kundafaneni nghee hatu mono ouwa moilonga yavo youdiinini, nanghee hatu dulu okuulika kutya otwa pandula ovalumenhu ovo nosho yo Jesus, oo e va yandja “ve li eeshali.”

OVAYAKULIONGALO ‘OHAVA KWAFELE VAMWE’

4. Omeenghedi dimwe dilipi ovayakuliongalo va li ‘hava kwafele vamwe’ pefimbo lovayapostoli?

⁴ Pefimbo lovayapostoli, ovamwatate vamwe ova li va nangekwa po ve li ovayakuliongalo. (1 Tim. 3:8) Otashi dulika ovo va popiwa kuPaulus va li ‘hava kwafele vakwao.’ (1 Kor. 12:28) Ovayakuliongalo otashi dulika ovo va li hava longo oilonga ihapu, opo ovakulunhuongalo va dule okuyandja elitulemo kokuhonga nokuninga omatalelepo oufita. Pashihopaenenwa, otashi dulika va li hava kwafele mokuninga eekopi dOmishangwa, ile va lande oinima oyo ya li ya pumbiwa opo ku ningwe eekopi.

5. Oinima imwe ilipi ovayakuliongalo hava longo kunena?

⁵ Diladila koinima imwe ya fimana oyo ovayakuliongalo hava ningi meongalo leni. (1 Pet. 4:10) Otashi dulika va pewe oshinakuwanifwa shokuvalula omayambidido meongalo, ile okuunganeka oitukulwa oko taku ka longelwa, okumbestela oishangomwa, okulonga koikwamawi, okuyakula ovaenda pokwoongala, ile okukwafela mokukaleka Olupale lOuhamba monghalo iwa. Oinima aishe oyo ohai kwafele eongalo li kale la unganekwa nawa. (1 Kor. 14:40) Shikwao vali, ovayakuliongalo vamwe ohava yandje oipopiwa pokwoongala kwomokati koshivike nosho yo oipopiwa yomoipafi. Omuyakuliongalo tashi dulika yo a nangekwe po, a kwafele omupashukili wongudu yoilonga yomomapya. Omafimbo amwe, ovayakuliongalo, ovo va pyokoka, otava dulu okuwaimina ovakulunhuongalo pomatalelepo oufita.

6. Omolwashike twa pumbwa okupandula ovayakuliongalo omolwoilonga yavo youdiinini?

⁶ Eongalo ohali mono ouwa ngahelipi moilonga yovayakuliongalo? Omumwameme wedina Beberlyb wokoBolivia okwa ti: “Ohandi pandula ovayakuliongalo vetu, molwaashi ohandi tyapula okwoongala. Omolwoilonga yavo, ohandi dulu okwiimba, okuyandja omatyekosha, okupwilikina koipopiwa nokulihonga sha mouvidio nomomafano. Ohava shilipaleke kutya otu li meameno, ngeenge tu li pokwoongala nohava kwafele okutema ozoom. Konima yokwoongala, ohava kwatele komesho oilonga yokuwapaleka, hava kwafele mokuvalula omayambidido nokushilipaleka kutya otu na oishangomwa oyo twa pumbwa. Ohandi va pandula neenghono.” Leslie, oo hadi moColombia e na omushamane e li omukulunhuongalo, okwa ti: “Omushamane wange okwa pumbwa ekwafo lovayakuliongalo. Nopehe na ekwafo lavo, otashi dulika a kale e lipyakidila neenghono. Onghee ohandi pandula ouladi wavo nosho yo eshi va halelela oku tu kwafela.” Nopehe na omalimbililo, naave osho ho kala u udite ngaho. — 1 Tim. 3:13.

7. Ongahelipi hatu dulu okuulika kutya otwa pandula ovayakuliongalo? (Tala yo efano.)

⁷ Nonande otashi dulika tu pandule ovayakuliongalo, Ombiibeli nayo otai tu ladipike: ‘Tu kale tu na olupandu.’ (Kol. 3:15) Kristofer, omukulunhuongalo wokoFinland, okwa popya onghedi omo ha ulike olupandu laye, a ti: “Ohandi tumu okakalata, ile etumwalaka omo mu na etofwemo lomushangwa nokupopya kondadalunde nghee omuyakuliongalo a twa nge omukumo, ile kutya omolwashike nda pandula oilonga yaye.” Pascal naJael, ovo hava di moNew Caledonia, ohava ilikanenene ovayakuliongalo. Pascal okwa ti: “Efimbo opo la di ko, otwa kala hatu ilikanene ovayakuliongalo nokupandula Jehova eshi tu va na; hatu mu pula a kale pamwe navo noku va kwafela.” Jehova oha udu omailikano a tya ngaho, neongalo ohali mono mo ouwa. — 2 Kor. 1:11.

OVAKULUNHUONGALO OHAVA “LONGO NOUDIININI MOKATI KENI”

8. Omolwashike Paulus a ti kutya ovakulunhuongalo vakwao ova li “hava longo noudiinini”? (1 Ovatessalonika 5:​12, 13)

⁸ Ovakulunhuongalo vopefimbo lovayapostoli ova li hava longo noudiinini meongalo. (Lesha 1 Ovatessalonika 5:​12, 13; 1 Tim. 5:17) Ova li hava “kwatele komesho” meongalo, ngaashi okukwatela komesho okwoongala nokuninga omatokolo ve li olutu lovakulunhuongalo. Ova li hava “kumaida” ovamwatate novamwameme noku va pa omayele nopehe na oku va lila okafima koluko, ashike ohave shi ningi pahole, opo va amene eongalo. (1 Tes. 2:​11, 12; 2 Tim. 4:2) Oshoshili kutya ovalumenhu ovo ova li yo hava longo noudiinini, opo va file oshisho omaukwaneumbo avo nova kaleke ekwatafano lavo naJehova la kola. — 1 Tim. 3:​2, 4; Titus 1:​6-9.

9. Oinakuwanifwa imwe ilipi ovakulunhuongalo hava wanifa po kunena?

⁹ Ovakulunhuongalo vokunena, ove lipyakidila. Ove li ovaudifi vonghundana iwa. (2 Tim. 4:5) Ohava tula po oshihopaenenwa shiwa moukalele, okuunganeka oilonga yokuudifa moitukulwa yavo noku tu deula tu kale ovahongi ovanekeka. Ove li yo ovatokoli vehe na okatongo. Ngeenge Omukriste okwa nyono sha kwata moiti, ovakulunhuongalo ohave mu kwafele opo a kale vali e na ekwatafano liwa naJehova. Nopefimbo opo tuu opo, ohava kaleke eongalo la koshoka. (1 Kor. 5:​12, 13; Gal. 6:1) Ovakulunhuongalo ove li yo ovafita. (1 Pet. 5:​1-3) Ohava yandje oipopiwa ye lilongekidwa nawa ya kanghamena kOmbiibeli, nohava ningi eenghendabala opo va shiive keshe umwe meongalo nokuninga omatalelepo oufita. Ovakulunhuongalo vamwe ohava kwafele mokutunga Omalupale Ouhamba noku a kaleka monghalo iwa, mokuunganeka oyoongalele, ve li oilyo yokOmitiye yOkukwatafana nOipangelo nove li mEengudu dOkutalela po Ovanaudu. Ovakulunhuongalo ohava longo noudiinini.

10. Omolwashike twa pumbwa okupandula ovakulunhuongalo ovo hava longo noudiinini?

¹⁰ Jehova okwa xunganeka kutya ovafita otave ke tu fila oshisho noitatu ka kala twa ‘tila vali, ile tu haluke.’ (Jer. 23:4) Omumwameme wedina Johanna, wokoFinland, okwa li a mona oushili weendjovo odo konima eshi meme waye a li a kwatwa koudu wa kwata moiti. Okwa ti: “Nonande onda li handi mono shidjuu okulombwela vamwe omaliudo ange, omukulunhuongalo umwe, oo nda li ndihe shii lela nawa, okwa li a pwilikina kwaame nelididimiko, a ilikana pamwe naame nokwa shilipaleka nge kutya Jehova oku hole nge. Ita dimbuluka naanaa kutya okwa li a popya shike, ashike ohandi dimbuluka kutya onda li ndi udite nda pepelelwa. Ondi shii kutya Jehova oye a li e mu tuma, opo a kwafele nge pefimbo la wapala.” Ovakulunhuongalo vomeongalo leni ova li ve ku kwafela ngahelipi?

11. Ongahelipi hatu dulu okuulika kutya otwa pandula ovakulunhuongalo? (Tala yo efano.)

¹¹ Jehova okwa hala tu ulikile ovakulunhuongalo olupandu “omolwoilonga yavo.” (1 Tes. 5:​12, 13) Henrietta, oo naye hadi moFinland, okwa ti: “Ovakulunhuongalo ohave tu kwafele nehalo liwa, ashike osho inashi hala okutya ove na eenghono, ile efimbo la wedwa po noihava shakeneke omashongo monghalamwenyo yavo. Omafimbo amwe, ohandi va lombwele ashike handi ti: ‘Omu li lela ovakulunhuongalo ve li nawa.’” Omumwameme wedina Sera wokoTürkiye, okwa ti: “Ovakulunhuongalo ova pumbwa etwomukumo, opo va twikile noilonga yavo. Onghee ohatu dulu oku va shangela okakalata, oku va shiva tu lye pamwe navo, ile okuya pamwe navo moukalele.” Mbela ope na omukulunhuongalo oo wa hala okupandula kondadalude omolwoilonga yaye youdiinini? Mu lombwela kutya owa pandula oilonga yaye. — 1 Kor. 16:18.

OVAPASHUKILISHIKANDJO OHAVE TU TU OMUKUMO

12. Elongekido lilipi la li la ningwa po, opo omaongalo a tuwe omukumo pefimbo lovayapostoli? (1 Ovatessalonika 2:​7, 8)

¹² Kristus Jesus okwa pa eongalo “ovalumenhu ve li eeshali,” ovo hava longo monghedi imwe i lili. Koshi yewiliko laye, ovakulunhuongalo muJerusalem ova li va tuma Paulus, Barnabas nosho yo vamwe ve li ovapashukili ovaendi. (Oil. 11:22) Omolwashike mbela? Ngaashi ovayakuliongalo novakulunhuongalo, navo ova nangekwa po, opo va pameke omaongalo. (Oil. 15:​40, 41) Ovalumenhu ovo ova li va ninga omaliyambo manene, nova tula nokuli eemwenyo davo moshiponga, opo va honge nokutwa vamwe omukumo. — Lesha 1 Ovatessalonika 2:​7, 8.

13. Ovapashukilishikandjo ove na oinakuwanifwa imwe ilipi?

¹³ Ovapashukilishikandjo ohava talele po omaongalo e lili noku lili. Vamwe ohava ende oinano ile, opo va talele po omaongalo. Oshivike keshe, omupashukilishikandjo oha yandje oipopiwa, ha ningi omatalelepo oufita, ha kwatele komesho okwoongala kwovakokolindjila, kwovakulunhuongalo nosho yo oilonga yomomapya. Ohe lilongekidile oipopiwa nokuunganeka oyoongalele inini nai yakula. Oha hongo keefikola dovakokolindjila, ha unganeke okwoongala kwe likalekelwa kwovakokolindjila moshitukulwa shavo nosho yo oinakuwanifwa imwe ya wedwa po, oyo tashi dulika a pewe koshitaimbelewa.

14. Omolwashike twa pumbwa okupandula ovapashukilishikandjo omolwoilonga yavo youdiinini?

¹⁴ Omaongalo ohaa mono ouwa ngahelipi momatalelepo ovapashukilishikandjo? Omumwatate wokoTürkiye okwa popya shi na sha netalelepo lovapashukilishikandjo, a ti: “Efimbo keshe tave tu talele po ohava tu nge omukumo ndi kwafele ovamwatate novamwameme. Onda shakena novapashukilishikandjo vahapu, ashike kape na nande oumwe a kalele e lipyakidila unene, ile ina hala okupopya naame.” Johanna, oo a tumbulwa metetekelo, okwa li a longa pamwe nomupashukilishikandjo moukalele, ashike kava li va popya nande onaumwe, eshi va li tava longo eumbo neumbo. Okwa ti: “Ohandi dimbuluka alushe efiku olo. Ovakulu vange opo ashike va tembukile koshitukulwa shimwe nonde va djuulukwa neenghono. Omupashukilishikandjo okwa li a twa nge omukumo nokukwafela nge ndi mone kutya otashi dulika paife tu kale kokule novapambele vetu nosho yo nookaume ketu, ashike mounyuni mupe ohatu ka hafela okukala pamwe.” Vahapu ohatu hafele okukala pamwe novapashukilishikandjo. — Oil. 20:37–21:1.

15. (a) Metwokumwe 3 Johannes 5-8, ongahelipi hatu dulu okuulika kutya otwa pandula ovapashukilishikandjo? (Tala yo efano.) (b) Omolwashike twa pumbwa okupandula ovakulukadi vovamwatate ovo hava longo noudiinini momaongalo, nongahelipi hatu dulu okuninga ngaho? (Tala oshimhungu “Dimbuluka ovakulukadi vavo.”)

¹⁵ Omuyapostoli Johannes okwa li a ladipika Gaius a yakule ovamwatate ovatalelipo noku ‘va lekela monghedi oyo tai hafifa Kalunga.’ (Lesha 3 Johannes 5-8.) Onghedi imwe omo atushe hatu dulu okuninga ngaho, omokushiva omupashukilishikandjo a lye pamwe nafye. Onghedi imwe vali, omokuyambidida omalongekido e na sha noilonga yomomapya pefimbo omupashukilishikandjo ta talele po. Leslie, oo a popiwa metetekelo, oha ulike olupandu laye meenghedi vali dimwe. Okwa ti: “Ohandi ilikana kuJehova opo a file oshisho eemhumbwe davo. Ame nomushamane wange ohatu va shangele yo onhumwafo, hatu va lombwele nghee etalelepo lavo le tu kwafela.” Dimbuluka kutya, ovapashukilishikandjo navo ohava loloka nohava shakeneke omaupyakadi, ngaashi fye. Omafimbo amwe, ohava kwatwa kounghundi, koshisho nohava kala nokuli va teka omukumo. Otashi dulika eendjovo doye donghenda, ile oshali i li paunafangwa i kale enyamukulo keilikano lavo. — Omayel. 12:25.

OTWA PUMBWA “OVALUMENHU VE LI EESHALI”

16. Metwokumwe nOmayeletumbulo 3:​27, omapulo elipi ovamwatate tava dulu okulipula?

¹⁶ Otwa pumbwa ‘ovalumenhu vahapu ve li eeshali’ mounyuni aushe. Ngeenge ou li omumwatate a ninginifwa, mbela ito ‘dulu okukwafela’? (Lesha Omayeletumbulo 3:27.) Mbela ino hala okulitulila po elalakano lokuninga omuyakuliongalo? Ngeenge ou li nale omuyakuliongalo, mbela ito dulu okulitulila po elalakano lokuninga omukulunhuongalo?c Mbela ito dulu okuninga omalunduluko monghalamwenyo yoye, opo u ninge eindilo lokuya kOfikola yOvaudifi vOuhamba? Ofikola oyo otai ke ku deula noku ku kwafela u longifwe pauyadi kuJesus. Ngeenge ou udite ino wana, ilikana kuJehova. Mu pula e ku kwafele omhepo yaye iyapuki u dule okuwanifa po oshinakuwanifwa keshe to pewa. — Luk. 11:13; Oil. 20:28.

17. ‘Ovalumenhu ovo ve li eeshali’ otava ulike shike shi na sha nOhamba yetu Kristus Jesus?

¹⁷ Ovamwatate, ovo Jesus a nangeka po ve li “ovalumenhu ve li eeshali,” otava ulike kutya ote tu wilike momafiku aa axuuninwa. (Mat. 28:20) Inatu hafa tuu eshi tu na Ohamba inahole nohai yandje, i shii osho twa pumbwa noye tu pa ovamwatate ve tu kwafele! Onghee otwa pumbwa okukonga eemhito tu ulike kutya otwa pandula ovalumenhu ovo hava longo noudiinini. Inatu dimbwa okupandula Jehova, molwaashi oku li Odjo ‘yoshali keshe noinima aishe iwa.’ — Jak. 1:17.