OSHITUKULWA SHOKUKONAKONWA 7
EIMBILO 15 Tanga Omona waJehova wOshiveli!
Ongahelipi hatu dulu okumona ouwa mediminepo laJehova?
“Pwoove ope na ediminepo lashili.” — EPS. 130:4.
ENENEDILADILO
Ohatu ka tala komafaneko amwe mOmbiibeli, oo taa yelifa monghedi ididilikwedi nghee Jehova he tu dimine po. Oshitukulwa eshi otashi ke tu kwafela tu kale tu na olupandu omolwediminepo laJehova.
1. Omolwashike shidjuu okushiiva kutya omunhu okwa hala okutya ngahelipi, ngeenge ta ti kutya okwe ku dimina po?
“ONDE ku dimina po.” Eendjovo odo itadi ka kala tuu tadi hekeleke, unene tuu ngeenge ou shii kutya owa popya sha, ile owa ninga sha osho sha udifa umwe nai! Mbela outumbulilo “onde ku dimina po” owa hala naanaa okutya shike? Mbela osho osha hala okutya natango omu li ookaume naao wa udifa nai? Ile mbela ina hala ashike okupopya kombinga yaasho she mu udifa nai? Ovanhu ove na omataleko a yoolokafana, ngeenge tashi uya pokudimina po.
2. Ongahelipi ediminepo laJehova la yelifwa mOmishangwa? (Tala yo eshangelo lopedu.)
2 Onghedi omo Jehova he tu dimine po, tu li ovanhu inatu wanenena, oya yooloka ko kwaayo hatu diminafana po. Ediminepo laye ole likalekelwa. Omupsalme okwa popya kombinga yaJehova, a ti: “Pwoove ope na ediminepo lashili, opo u fimanekwe neenghono.”a (Eps. 130:4) ‘Ediminepo laJehova olashili.’ Oye e tu ulikila kutya okudimina po otaku ti lela shike. Peemhito dimwe, ovashangi vOmbiibeli ova longifa oshitya shOshiheberi osho inashi longifwa nande onale, opo va yelife onghedi omo Jehova he tu dimine po.
3. Ongahelipi ediminepo laJehova la yooloka ko kuletu? (Jesaja 55:6, 7)
3 Ngeenge Jehova a dimina po umwe, omatimba aye ohaa dimwa po filufilu. Ohatu dulu natango okukala nekwatafano lopofingo naJehova. Otwa pandula neenghono, eshi Jehova he tu dimine po filufilu lwoikando. — Lesha Jesaja 55:6, 7.
4. Ongahelipi Jehova e tu kwafela tu ude ko kutya ediminepo lashili oshike?
4 Ngeenge ediminepo laJehova ola yooloka ko kuletu, ongahelipi tu li ovanhu inatu wanenena hatu dulu okuuda ko ediminepo lashili? Jehova okwa longifa omafaneko, opo e tu kwafele tu ude ko nghee he tu dimine po. Moshitukulwa eshi, ohatu ka kundafana amwe omuo. Otae ke tu kwafela tu mone kutya ngeenge otwe lidilulula, Jehova ota ka dima po omatimba etu note ke tu pitika tu ninge vali ookaume kaye kopofingo. Eshi hatu kundafana omafaneko oo, ohatu ka kala tu na olupandu laTate yetu omunanghenda, oo he tu dimine po meenghedi dihapu.
JEHOVA OHA KUFA PO OMATIMBA ETU
5. Oshike hashi ningwa po, ngeenge Jehova e tu dimina po omatimba etu?
5 MOmbiibeli, omatimba luhapu okwa faafanifwa nomitengi didjuu. Ohamba David oya popya shi na sha nomanyono ayo, ya ti: “Omapuko ange, oo taa ingaana kombada yomutwe wange, omahapu unene kwaame nokulididimikila, ngaashi omutengi mudjuu.” (Eps. 38:4) Ashike Jehova oha dimi po omatimba aavo ve livela ombedi. (Eps. 25:18; 32:5) Oshitya shOshiberi osho sha tolokwa “okudimina po” otashi ti “okukufa po.” Otashi dulika tu diladile kuJehova a fa omulumenhu omunaenghono, oo e tu kufa pafaneko omitengi didjuu komapepe etu noku di ehenifa kokule nafye.
“Dima po” (Eps. 32:5)
6. Jehova oha ehenifa kokule ngahelipi omanyono etu?
6 Ombiibeli oya longifa vali efaneko limwe, olo tali ulike kutya Jehova oha ehenifa kokule omanyono etu. Epsalme 103:12 ola ti: “Ngaashi ashike oushilo u li kokule nouninginino, osho naye ha ehenifa omanyono etu kokule nafye.” Oushilo nouninginino ou lili kokule. Kau na efiku u shakene. Noitya imwe, Jehova oha kufa po omatimba etu monghedi omo inatu shi diladila. Osho otashi tu kwafele tu mone kutya Jehova ohe tu dimine po omatimba etu filufilu.
“Ngaashi ashike oushilo u li kokule nouninginino” (Eps. 103:12)
7. Ombiibeli oya yelifa ngahelipi nghee Jehova ha ungaunga nomanyono etu? (Mika 7:18, 19)
7 Nonande Jehova oha twala omatimba etu kokule oku shi popya pafaneko, mbela osho osha hala okutya ohe a dimbuluka? Hasho. Ohamba Hiskia oya popya ya ti: “Ove owa ekelashi omatimba ange aeshe konima yoye.” (Jes. 38:9, 17, KB-13) Osho osha hala okutya Jehova oha kupulashi omatimba aao e lidilulula noihe a dimbuluka vali. Eendjovo odo otadi dulu yo okutolokwa kutya: “Owa ningifa nge di kale nda fa inandi nyona.” Ombiibeli oya divilika oshitwa sha faafana mefaneko olo li li muMika 7:18, 19. (Lesha.) Eevelishe odo oda popya kutya Jehova oha kupulashi omatimba etu mokule mefuta. Pefimbo lonale, osha li hashi kala shidjuu kuumwe okumona oshinima osho sha umbilwa mokule mefuta.
“Ove owa ekelashi omatimba ange aeshe konima yoye” (Jes. 38:17, KB-13)
“Omatimba avo aeshe Ove to ke a ekela mokule mwi mefuta” (Mika 7:19, KB-13)
8. Otwe lihonga shike fiyo opapa?
8 Ombiibeli oya ulika kutya, ngeenge Jehova e tu dimina po omatimba etu, ohe a kufa po filufilu, onghee inatu pumbwa okukala tu udite ondjo. David okwa popya a ti: “Omunhu oo a diminwa po omolwoilonga yaye ii, nomatimba aye a tuvikwa, ota kala a hafa. Omunhu oo omatimba aye itaa dimbulukiwa kuJehova, ota kala a hafa.” (Rom. 4:6-8) Osho otashi ulike kediminepo lashili.
JEHOVA OHA DIMI PO OMATIMBA ETU
9. Ongahelipi Ombiibeli ye tu kwafela tu mone nghee Jehova he tu dimine po filufilu?
9 Jehova okwa longifa vali efaneko limwe, opo e tu kwafele tu kale tu na olupandu lekuliloyambo, olo hali kufa po omatimba omunyoni. Jehova okwa popiwa pafaneko ha kosho noha feta po omanyono oo. Nokungaho, oha koshola omunyoni. (Eps. 51:7; Jes. 4:4; Jer. 33:8) Jehova okwa popya ye mwene a ti: “Omatimba eni nande naa tilyane ngaashi ohonde, otaa ka toka ngaashi outokele weemhawe; nonande naa kale a tilyana pyu, otaa yela ngaashi omalududi a toka.” (Jes. 1:18, KB-13) Oshidjuu filufilu okukufa ko onhongo koshikutu. Ashike okutala kefaneko olo, Jehova ote tu shilipaleke kutya ota dulu filufilu okukufa po omatimba etu, noitaa dimbulukiwa vali.
“Omatimba eni nande naa tilyane ngaashi ohonde, otaa ka toka ngaashi outokele weemhawe” (Jes. 1:18, KB-13)
10. Jehova okwa longifa vali efaneko lilipi, opo e tu yelifile nghee he tu dimine po monghedi ididilikwedi?
10 Ngaashi sha popiwa moshitukulwa sha tetekela, omatimba okwa faafanifwa yo ‘noikolo.’ (Mat. 18:32-35) Onghee efimbo keshe hatu nyono kuJehova, otwa fa hatu weda ko keengunga detu. Otu na eendjo dihapu daye. Ashike ngeenge Jehova e tu dimina po, oha kala a fa ta ti kutya katu na vali eendjo daye. Ihe tu fininike tu fute omatimba, oo twa diminwa po. Ngaashi ashike omunhu ha kala e udite a pepelelwa, ngeenge eendjo daye da futwa, nafye ohatu kala twa pepelelwa, ngeenge Jehova e tu dimina po.
“Tu dimina po omatimba etu” (Mat. 6:12)
11. Osha hala okutya ngahelipi, ngeenge Ombiibeli tai ti kutya omatimba etu okwa ‘dimwa po’? (Oilonga 3:19)
11 Jehova oha dimi po omadimba etu filufilu. (Lesha Oilonga 3:19.) Oku shi popya pafaneko, diladila kuumwe ta tende omufinda pomuvalu woimaliwa weendjo odo wa lya. Ashike omuvalu oo wa tendwa po, otashi dulika u kale u wetike kukeshe umwe. Ndele okudima po oshinima shonhumba, osha yooloka ko kwaasho. Opo tu ude ko efaneko olo, otwa pumbwa okudimbuluka kutya, ohinga oyo ya li hai longifwa pefimbo lonale oya li hai dulu okudimwa po noupu. Omunhu okwa li ta dulu okukufa okalapi ka tuta nokudima po osho sha shangwa. Onghee ngeenge eendjo da ‘dimwa po,’ ohadi dimwa po filufilu. Ovanhu ihava dulu okumona osho sha li sha shangwa po nale. Oho kala ashike wa fa wa li uhe na eendjo. Inatu pandula tuu eshi tu shii kutya, ngeenge Jehova a dima po omatimba etu, okwe a dima po filufilu! — Eps. 51:9.
“Omatimba eni a dimwe po” (Oil. 3:19)
12. Ohatu lihongo mo shike mefaneko olo la kwatela mo oshilemo?
12 Jehova okwa longifa vali efaneko limwe, opo a yelife nghee ha dimi po omatimba etu. Okwa ti: “Ame ohandi dimi po omatauluko oye ngaashi omudidimbe nomatimba oye ongaashi oshilemo.” (Jes. 44:22, KB-13) Ngeenge Jehova te tu dimine po, okwa fa ta longifa oshilemo, opo a holeke omanyono etu.
‘Ame ohandi dimi po omatauluko oye ngaashi oshilemo’ (Jes. 44:22, KB-13)
13. Ngeenge Jehova e tu dimina po omatimba etu, ohatu kala tu udite ngahelipi?
13 Omafaneko oo otae tu hongo shike? Ngeenge Jehova a dima po omatimba etu, inatu pumbwa okukala tu udite ondjo omolwomanyono etu. Eendjo detu oda dimwa po filufilu, okupitila mohonde yaJesus Kristus. Ngeenge Jehova a dima po omatimba etu, ihe a dimbuluka vali. Jehova osho he tu dimine po ngaho, ngeenge otwe lidilulula shili.
JEHOVA OHE TU TAMBULA KO VALI TU LI OOKAUME KAYE KOPOFINGO
Ediminepo laTate yetu womeulu ohali tu kwafele tu kale tu na ekwatafano liwa naye (Tala okatendo 14)
14. Omolwashike twa pumbwa okulineekela ediminepo laJehova? (Tala yo omafano.)
14 Ediminepo lashili, olo hali di kuJehova, ohali tu kwafele tu kale tu na ekwatafano lopofingo naye. Ohali tu kwafele tu henuke okukala tu udite ondjo. Inatu pumbwa okukala twa tila, hatu diladila kutya natango Jehova okwe tu handukila. Osho kashi na efiku shi ningwe. Omolwashike twa pumbwa okulineekela Jehova, eshi a ti ote tu dimine po? Jehova okwa lombwela omuprofeti Jeremia a ti: “Ame ohandi ka dima po omanyonauno avo, ndele itandi dimbulukwa vali omatimba avo.” (Jer. 31:34, KB-13) Omuyapostoli Paulus okwa li a tofa eendjovo odo a ti: ‘Itandi ka dimbuluka vali omatimba avo.’ (Heb. 8:12) Ndele mbela osho otashi tu hongo shike?
“Itandi dimbulukwa vali omatimba avo” (Jer. 31:34, KB-13)
15. Omeityo lilipi Jehova iha dimbuluka vali omatimba etu?
15 MOmbiibeli, outumbulilo “dimbuluka” haalushe hau yukifwa koshinima osho sha ningwa mefimbo la pita. Ndele otau dulu yo okuyukifwa komunhu ta ningi oshinima shonhumba. Omukolokoshi, oo a li a valelwa pamwe naJesus, okwe mu lombwela, a ti: “Jesus, dimbulukwe nge ngeenge wa i mOuhamba woye.” (Luk. 23:42, 43) Ka li ta lombwele Jesus e mu ningile sha pefimbo opo. Onghedi omo Jesus a li a nyamukula omukolokoshi, otai ulike kutya ota ka katuka onghatu, opo e mu nyumune. Onghee eshi Jehova a ti kutya ita dimbuluka vali omatimba etu, osha hala okutya ite ke tu katukila onghatu. Ite ke tu handukila monakwiiwa omolwomatimba oo e tu dimina po.
16. Ombiibeli oya yelifa ngahelipi emanguluko olo hali di mediminepo lashili?
16 Ombiibeli oya longifa vali efaneko limwe, olo tali tu kwafele tu ude ko emanguluko olo hali di mediminepo lashili. Molwaashi inatu wanenena, otwa faafanifwa ‘novapika voulunde.’ Ashike ngeenge Jehova e tu dimina po, otwa fa ovapika ovo va “mangululwa moulunde.” (Rom. 6:17, 18; Eh. 1:5) Ngeenge otu shii kutya Jehova okwe tu dimina po, ohatu kala twa hafa, twa fa omupika oo a mangululwa moupika.
‘Omwa mangululwa moulunde’ (Rom. 6:18)
17. Ongahelipi ediminepo le tu kwafela tu velulwe pamhepo? (Jesaja 53:5)
17 Lesha Jesaja 53:5. Efaneko la xuuninwa ole tu faafanifa novanhu ovo ve na omukifi omudipai. Omolwekuliloyambo, olo Jehova a yandja okupitila mOmona waye, okwe tu velula oku shi popya pafaneko. (1 Pet. 2:24) Ekuliloyambo ole shi ningifa tashi shiiva, opo tu kale tu na ekwatafano lopofingo naJehova, olo la li la nyonwa po. Ngaashi ashike omunhu ha kala a hafa ngeenge a velulwa komukifi omudipai, nafye ohatu kala twa hafa, ngeenge twa velulwa pamhepo, nokukala vali twa hokiwa kuJehova omolwediminepo laye.
“Ndele twa velulwa molwoipute yaye” (Jes. 53:5, KB-13)
NGHEE EDIMINEPO LAJEHOVA LE TU KUMA
18. Oshike twe lihonga eshi twa konakona omafaneko oo taa hangwa mOmbiibeli, e na sha nediminepo laJehova? (Tala yo oshimhungu “Nghee Jehova he tu dimine po.”)
18 Oshike twe lihonga eshi twa konakona omafaneko, oo taa hangwa mOmbiibeli, e na sha nediminepo laJehova? Ngeenge Jehova te tu dimine po, ohe shi ningi filufilu. Naasho, ohashi tu kwafele tu kale tu na ekwatafano liwa naTate yetu womeulu. Ashike otwa pumbwa okudimbuluka kutya ediminepo laJehova lashili oli li oshali oyo he tu pe, molwaashi oku tu hole noha yandje, ndele hamolwaashi twa wana okudiminwa po. — Rom. 3:24.
19. (a) Otu na okukala tu na olupandu lashike? (Ovaroma 4:8) (b) Oshike hatu ka kundafana moshitukulwa tashi shikula ko?
19 Lesha Ovaroma 4:8. Inatu hafa tuu eshi Jehova he tu ‘dimine po shili’! (Eps. 130:4) Ashike opo e tu dimine po, otwa pumbwa okuninga po sha. Jesus okwe shi yelifa a ti: “Ngeenge ihamu dimine po ovanhu omanyono avo, Xo yeni naye ite ke mu dimina po.” (Mat. 6:14, 15) Onghee osha fimana okuhopaenena ediminepo laJehova. Ndele ongahelipi hatu dulu okuninga ngaho? Moshitukulwa tashi shikula ko ohatu ka kundafana osho sha kwatelwa mo.
EIMBILO 46 Ohatu ku pandula, Jehova
a Elaka lOshiheberi, omo mwa li mwa shangwa tete Ombiibeli, ola longifa outumbulilo “okudimina po,” oo tau ulike kediminepo lashili, nonande ope na eenghedi dihapu dokudimina po. Omatoloko mahapu Ombiibeli inaa toloka nawa outumbulilo oo u li mEpsalme 130:4, ashike Ombiibeli — Etoloko lounyuni mupe lOmishangwa Diyapuki oye u toloka nawa.