Kwafela ovakonakonimbiibeli voye va tokole okulongela Jehova

1-2. (a) Omolwashike ovakonakonimbiibeli vamwe hava ongaonga okupopila oshili? (b) Oshike hatu ka kundafana moshitukulwa eshi?

MBELA opa li oinima yonhumba, oyo wa li to lipula kombinga yayo, ye ku ningifa u ongaonge okuninga Ondombwedi yaJehova? Tashi dulika wa li wa tila okuhandukilwa kovanailonga pamwe naave, kookaume koye, ile kovapambele voye. Ile tashi dulika wa li u udite kutya oshidjuu okudulika komifikamhango daKalunga. Ngeenge osho wa li u udite ngaho, ou shii nghee ovakonakonimbiibeli ve udite nosho yo kutya omolwashike shidjuu kuvo okuninga etokolo va ninge Eendombwedi daJehova.

² Jesus okwa li e shii kutya oinima ya tya ngaho otai dulu okukelela umwe a longele Jehova. (Mat. 13:​20-22) Ashike ka li a ongaonga okukwafela ovo va li tava ongaonga oku mu shikula. Ponhele yaasho, okwa li e va kwafela (1) va didilike mo oinima oyo tai va imbi va ninge exumokomesho, (2) va kale ve hole Jehova, (3) va pitife komesho okulongela Jehova monghalamwenyo yavo nosho yo (4) va finde omashongo. Ongahelipi hatu dulu okuhopaenena Jesus, eshi hatu longifa embo Nghee to dulu okuhafela onghalamwenyo fiyo alushe!, opo tu kwafele ovakonakonimbiibeli va popile oshili?

KWAFELA OMUKONAKONI WOYE A DIDILIKE MO OSHO TASHI MU IMBI A NINGE EXUMOKOMESHO

3. Omolwashike tashi dulika sha li shidjuu kuNikodemus okuninga omuhongwa waJesus?

³ Nikodemus, oo a li omupangeli wOvajuda a fimana, okwa li a mona shidjuu okuninga umwe womovahongwa vaJesus. Nikodemus okwa li a didilika kutya Jesus omukalelipo waKalunga, konima ashike yeemwedi hamano eshi Jesus a hovela oukalele waye. (Joh. 3:​1, 2) Molwaashi Nikodemus okwa li a “tila Ovajuda,” okwa li a shakena naJesus meholeko. (Joh. 7:13; 12:42) Otashi dulika Nikodemus a li a tila okukanifa ondodo yaye nosho yo oupuna waye, ngeenge okwa ningi omuhongwa waJesus.a

4. Ongahelipi Jesus a kwafela Nikodemus, opo a ude ko kutya Kalunga okwa teelela a ninge shike?

⁴ Nikodemus okwa li e shii Omhango yaMoses, ashike okwa li a pumbwa okukwafelwa a ude ko kutya Jehova okwa teelela a ninge shike. Jesus okwa li e mu kwafela ngahelipi? Jesus okwa li a halelela okukala efimbo naNikodemus, nokuli nokushakena naye konguloshi. Jesus okwa li a yelifila nawa Nikodemus osho a li e na okuninga, opo a ninge omuhongwa. Okwa li e mu lombwela e lidilulule, a ninginifwe momeva, nokukala e na eitavelo mOmona waKalunga. — Joh. 3:​5, 14-21.

5. Ongahelipi hatu dulu okukwafela ovakonakonimbiibeli vetu va didilike mo oinima oyo tai va imbi va longele Jehova?

⁵ Nokuli nonande omukonakonimbiibeli oku shii Ombiibeli, otashi dulika twa pumbwa oku mu kwafela opo a didilike mo oinima oyo tai mu imbi aha longele Jehova. Oinima ngaashi oilonga yokulikongela omboloto, ile omafininiko okudja kovapambele otai dulu oku mu imba a ninge Ondombwedi yaJehova. Onghee konga efimbo u kwafele omukonakonimbiibeli woye. Oto dulu oku mu shiva mu nwe okoofi pamwe, ile mu ka ende mo. Ngeenge omwa kala hamu ningi oinima ya tya ngaho pamwe, otashi dulika u mu kwafele a kale e ku mangulukila, opo e ku lombwele omashongo oo a taalela. Ladipika omukonakonimbiibeli woye a ninge omalunduluko oo a pumbiwa, opo a ulike kutya oku hole Jehova, ndele ite shi ningi opo e ku hafife.

6. Ongahelipi to dulu okukwafela omukonakonimbiibeli a kale e na ouladi wokupopila oshili? (1 Ovakorinto 16:13)

⁶ Ngeenge omukonakonimbiibeli okwa kala e na elineekelo kutya Jehova ota dulu oku mu kwafela a kale metwokumwe nomifikamhango dOmbiibeli, ota ka kala e na ouladi wokutula moilonga osho te lihongo. (Lesha 1 Ovakorinto 16:13.) Onghandangala oyo to dana otai dulu okuyelekanifwa naayo yomuhongifikola. Eshi wa li mofikola, omuhongi elipipo wa li u hole unene? Otashi dulika wa li u hole omuhongi oo a li e ku kwafela nelididimiko u kale u na elineekelo mokudula kwoye. Sha faafana, omuhongi muwa wOmbiibeli iha hongo ashike osho Kalunga a hala tu ninge, ndele oha shilipaleke yo omukonakonimbiibeli waye kutya kekwafo laJehova ota dulu okuninga omalunduluko monghalamwenyo yaye. Oshike vali hatu dulu okuninga, opo tu kwafele omukonakonimbiibeli wetu?

KWAFELA OMUKONAKONIMBIIBELI WOYE A KALE E HOLE JEHOVA

7. Jesus okwa li a kwafela ngahelipi ovo va li tava pwilikine kuye va kale ve hole Jehova?

⁷ Jesus okwa li e shii kutya ngeenge ovahongwa vaye ova kala ve hole Kalunga, otashi ke ve linyengifa va tule moilonga osho tave lihongo. Luhapu okwa li ha hongo oinima oyo tai dulu okukwafela ovahongwa vaye va kale ve hole Xe yavo womeulu. Pashihopaenenwa, Jesus okwa yelekanifa Jehova nomudali oo ha pe ovana oinima iwa. (Mat. 7:​9-11) Vamwe vomovapwilikini vaJesus otashi dulika inava ulikilwa ohole ya tya ngaho kooxe. Diladila nghee va li ve udite eshi Jesus a li e va pa efaneko li na sha naxe omunanghenda oo a li a tambula ko omonamati waye, oo a li a longa oinima ihapu ii. Jesus okwa li a kwafela ovanhu va mone kutya Jehova oku va hole neenghono nokwa hala oku va kwafela. — Luk. 15:​20-24.

8. Ongahelipi to dulu okukwafela omukonakonimbiibeli woye a kale e hole Jehova?

⁸ Naave oto dulu okukwafela omukonakonimbiibeli woye a kale e hole Jehova neenghono, mokukala ho popi lwoikando kombinga yomaukwatya aKalunga. Pekonakonombiibeli keshe, mu kwafela a mone efaafano olo li li pokati kaasho te lihongo nosho yo nohole yaJehova. Ngeenge tamu kundafana kombinga yekulilo, mu kwafela a mone kutya naye okwa kwatelwa mo pauhandimwe. (Rom. 5:8; 1 Joh. 4:10) Ngeenge omukonakonimbiibeli okwa mono kutya Jehova oku mu hole shi fike peni pauhandimwe, osho otashi ke mu kwafela naye a kale e mu hole. — Gal. 2:20.

9. Oshike sha kwafela omulumenhu wedina Michael a ninge omalunduluko monghalamwenyo yaye?

⁹ Diladila koshimoniwa shaMichael, wokoIndonesia. Okwa kulila moshili, ashike ka li a ninginifwa. Eshi a li e na omido 18, okwa li a ya koshilongo shimwe a ka longa e li omushingi weloli. Lwanima okwa ka hombola moIndonesia, ashike okwa ka twikila noilonga yaye koshilongo shimwe shi lili osho shi li kokule noukwaneumbo waye. Mokweendela ko kwefimbo, omukulukadi waye nosho yo omonakadona waye ova li va hovela okukonakona Ombiibeli, ndele tava ningi exumokomesho. Konima eshi ina yaMichael a xulifa, okwa li a tokola okushuna keumbo opo a ka file xe oshisho, nokwa li a dimina a hovele okukonakona Ombiibeli. Eshi va konakona oshitukulwa “Konakona Moule” moshileshwa 27 membo Nghee to dulu okuhafela onghalamwenyo fiyo alushe!, osha li she mu kuma neenghono. Michael okwa li a lila eshi a li a diladila kombinga yanghee Jehova a li e udite eshi a mona Omonamati waYe ta hepekwa. Eshi Michael a li a mona kutya Jehova naJesus ove mu hole shi fike peni, osha li she mu linyengifa a kale e na olupandu, nokwa ninga omalunduluko monghalamwenyo yaye, ndele ta ninginifwa.

KWAFELA OMUKONAKONIMBIIBELI WOYE A PITIFE KOMESHO OKULONGELA JEHOVA

10. Jesus okwa li a kwafela ngahelipi ovahongwa vaye, opo va longele Jehova? (Lukas 5:​5-11) (Tala yo efano.)

¹⁰ Vamwe ovo va li va udifilwa kuJesus ova li va didilika diva kutya Jesus oye Messias, ashike ova li va pumbwa okukwafelwa opo va pitife komesho oukalele. Petrus naAndreas ova hangika va kala nale ovahongwa vaJesus oule wefimbo, eshi Jesus e va shiva ve mu shikule. (Mat. 4:​18, 19) Ova li hava longo pamwe naJakob nosho yo Johannes ve li ovayuli veeshi, nongeshefa yavo oya li tai ende nawa. (Mark. 1:​16-20) Eshi Petrus naAndreas ‘va li va fiya po diva eenete davo,’ otashi dulika va li va ninga omalongekido va dule okukala tava file oshisho ovapambele vavo eshi tava shikula Jesus. Oshike sha li she va kwafela va pitife komesho okuudifa ponhele yokulikongela oimaliwa ihapu? Ehokololo olo li li muLukas ola popya kutya Jesus okwa li a longa oshikumwifilonga osho sha li she va kwafela va kale ve na elineekelo kutya Jehova ota dulu oku va kwafela. — Lesha Lukas 5:​5-11.

11. Ongahelipi hatu dulu okulongifa oimoniwa yetu, opo tu pameke eitavelo lovakonakonimbiibeli vetu?

¹¹ Itatu dulu okulonga oikumwifilonga, ngaashi Jesus a li a ninga, ashike ohatu dulu okulongifa oimoniwa i na sha nanghee Jehova a li a yambidida ovo va li va pitifa komesho oku mu longela. Pashihopaenenwa, mbela oto dimbuluka nghee Jehova a li e ku kwafela eshi wa hovela okuya kokwoongala? Tashi dulika wa li wa ya komuyandji woye woilonga, noku mu yelifila kutya ito ka kala vali to longo olutaima, ngeenge otali i moshipala okwoongala kwoye. Eshi to lombwele omukonakonimbiibeli oimoniwa yoye, mu yelifila nghee eitavelo loye la li la pamekwa eshi wa mona nghee Jehova ta yambidida etokolo loye lokupitifa komesho oku mu longela.

12. (a) Omolwashike twa pumbwa okushiva ovaudifi va yoolokafana ve tu waimine pekonakonombiibeli letu? (b) Oshike vali to dulu okulongifa, opo u kwafele omukonakonimbiibeli woye a pitife Jehova komesho? Yandja oshihopaenenwa.

¹² Omukonakonimbiibeli woye ota ka dula okumona ouwa mokuuda oimoniwa yovamwatate novamwameme, i na sha nanghee va dula okulundulula onghalamwenyo yavo, opo va pitife Jehova komesho. Onghee kala ho shivi ovaudifi va dja momaputuko a yoolokafana ve ku waimine pekonakonombiibeli leni. Va pula va popye nghee ve uya moshili nosho yo osho va ninga, opo va pitife Jehova komesho monghalamwenyo yavo. Shikwao vali, kala ho kongo efimbo, opo mu tale ouvidio nomukonakonimbiibeli woye ovo ve li koshi yoshitukulwa “Konakona moule,” ile ngeenge otashi shiiva, taleni ovo ve li koshi yoshitukulwa “Tala ouyelele wa wedwa po” membo Nghee to dulu okuhafela onghalamwenyo fiyo alushe!. Ngeenge tamu kundafana oshileshwa 37, oto dulu okudivilika omafinamhango, oo e li mokavidio Jehova oha file oshisho eemhumbwe detu.

KWAFELA OMUKONAKONIMBIIBELI WOYE A FINDE OMASHONGO

13. Jesus okwa li a kwafela ngahelipi ovahongwa vaye va kale ve lilongekidila omapataneko?

¹³ Jesus okwa li a lombwela ovashikuli vaye lwoikando kutya otava ka shakeneka omapataneko okudja kuvamwe, nokuli nokovapambele vavo. (Mat. 5:11; 10:​22, 36) Diva ofimbo Jesus ina fya, okwa li a lombwela ovashikuli vaye kutya otashi dulika va ka dipawe, molwaashi tava longele Jehova. (Mat. 24:9; Joh. 15:20; 16:2) Okwe va ladipika va kale va lungama eshi ve li moukalele. Pashihopaenenwa, okwe va lombwela vaha tangune nande onaumwe oo ta popile mowii eitavelo lavo, nokulungamena osho tava popi, ile tava ningi, opo va dule okutwikila nokuudifa.

14. Ongahelipi hatu dulu okukwafela omukonakonimbiibeli e lilongekidile omapataneko? (2 Timoteus 3:12)

¹⁴ Ngaashi Jesus, nafye ohatu dulu okuyelifila omukonakonimbiibeli wetu osho ovanailonga pamwe naye, ookaume kaye nosho yo ovapambele vaye tava dulu okupopya, ile okuninga molwaashi ta konakona Ombiibeli. (Lesha 2 Timoteus 3:12.) Ovanailonga pamwe naye otashi dulika ve mu shinde, molwaashi a lundulula onghedi yaye yokukalamwenyo. Vamwe, nokuli novapambele vaye vopopepi elela, otashi dulika va popile mowii eitavelo laye. Ngeenge otwa kwafele diva ovakonakonimbiibeli vetu shi na sha nanghee tava dulu okuungaunga nomapataneko, otashi ke va kwafela va mone nghee tava dulu oku a finda, ngeenge okwa holoka.

15. Oshike tashi dulu okukwafela omukonakonimbiibeli a ungaunge nomafininiko okudja kovapambele?

¹⁵ Ngeenge omukonakonimbiibeli woye ota patanekwa kovapambele, mu kwafela a diladile kutya omolwashike vamwe vomovapambele vaye va handuka eshi ta konakona Ombiibeli nEendombwedi daJehova. Otashi dulika tava diladila kutya ota pukifwa, ile tava diladila kutya Eendombwedi daJehova ovanhu vai. Nokuli novapambele vamwe vaJesus kava li va hafela osho a li ta ningi. (Mark. 3:21; Joh. 7:5) Kwafela omukonakonimbiibeli woye e lididimike, nokupopya navamwe nelungi, mwa kwatelwa ovapambele vaye.

16. Ongahelipi hatu dulu okukwafela ovakonakonimbiibeli va yelife eitavelo lavo nelungi?

¹⁶ Nokuli nonande ovapambele otava ulike ohokwe, omukonakonimbiibeli ke na okuyelifa oinima aishe poshikando. Ngeenge okwa ningi ngaho, ovapambele vaye otashi dulika va ka kale va wililwa po noitava ka kala vali va hala okupopya naye kombinga yeitavelo laye. Onghee ladipika omukonakonimbiibeli woye a yelife eitavelo laye monghedi oyo tai ka ningifa ovapambele vaye va ka pwilikine vali. (Kol. 4:6) Pashihopaenenwa, ota dulu okulombwela ovapambele vaye va ye ko-jw.org. Osho otashi ke va pitika ve lihonge shihapu kombinga yEendombwedi daJehova efimbo keshe va hala oku shi ninga.

17. Ongahelipi to dulu okukwafela omukonakonimbiibeli woye a kale e shii nghee ta dulu okunyamukula omapulo, oo vamwe tashi dulika tava pula, e na sha nEendombwedi daJehova? (Tala yo efano.)

¹⁷ Oto dulu okulongifa oitukulwa “Omapulo oo haa pulwa luhapu” oyo i li ko-jw.org, opo u kwafele omukonakonimbiibeli woye a mone omanyamukulo omapulo oo tashi dulika ovapambele vaye, ile ovanailonga pamwe naye va pule. (2 Tim. 2:​24, 25) Pexulilo loshileshwa keshe, endululeni oshitukulwa “Vamwe ohava ti,” ile “Umwe otashi dulika a pule kutya” membo Nghee to dulu okuhafela onghalamwenyo fiyo alushe!. Ladipika omukonakonimbiibeli woye a kale te liendifa po nghee ta ka yelifila ovanhu osho a itavela. Ino ongaonga oku mu pa omaetepo e na sha nanghee ta dulu okuyelifa eitavelo laye. Ngeenge omwe liendifa po, osho otashi ke mu kwafela a popile eitavelo laye nouladi.

18. Ongahelipi to dulu okuladipika omukonakonimbiibeli woye a lombwele vamwe kombinga yeitavelo laye moukalele? (Mateus 10:27)

¹⁸ Jesus okwa li a lombwela ovahongwa vaye va udife onghundana iwa moipafi. (Lesha Mateus 10:27.) Ngeenge omukonakonimbiibeli woye okwa hovele diva okuhepaulula eitavelo laye, ote ke lihonga diva okukala e lineekela muJehova. Ongahelipi to dulu okukwafela omukonakonimbiibeli woye a hange elalakano olo? Ngeenge eongalo leni ola shiivifilwa kutya ope na oshikonga, kwafela omukonakonimbiibeli woye a mone kutya oshike e na okuninga opo a ninge omuudifi. Mu yelifila kutya omolwashike vahapu va li va hovela okuudifa pefimbo loikonga ya tya ngaho. Otashi dulika yo a mone ouwa mokuyandja oipopiwa pokwoongala kwomokati koshivike. Eshi ta kendabala okuhanga elalakano olo, ote ke lihonga nghee ta dulu okuhepaulula eitavelo laye a tomhwa.

ULIKA KUTYA OWE LINEEKELA OMUHONGWA WOYE

19. Jesus okwa li a ulika ngahelipi kutya oku na elineekelo movahongwa vaye, nongahelipi hatu dulu oku mu hopaenena?

¹⁹ Ofimbo Jesus ina ya meulu, okwa li a lombwela ovahongwa vaye kutya otava ka hangana vali naye. Kava li ve udite ko kutya Jesus okwa li ta popi kombinga yefimbo olo eshi tava ka ya meulu. Nonande ovahongwa vaye kava li ve udite ko oinima aishe, Jesus okwa li e shii kutya ova li va hala oku mu shikula. (Joh. 14:​1-5, 8) Okwa li e shii kutya ova pumbwa efimbo, opo va ude ko oinima yonhumba, ngaashi eteelelo li na sha nokuya meulu. (Joh. 16:12) Ngaashi Jesus, nafye ohatu dulu okuulikila ovakonakonimbiibeli vetu kutya otu shii kutya ova hala okuhafifa Jehova.

20. Omumwameme wokoMalawi okwa li a ulika ngahelipi elineekelo momukonakonimbiibeli waye?

²⁰ Kala u na elineekelo kutya omukonakonimbiibeli woye okwa hala okulonga osho shi li mondjila. Pashihopaenenwa, Chifundo, omumwameme wokoMalawi, okwa li a hovela ekonakonombiibeli membo Nghee to dulu okuhafela onghalamwenyo fiyo alushe! nomukainhu omunyasha Omukatoolika wedina Alinafe. Eshi va mana okukonakona oshileshwa 14, Chifundo okwa li a pula omukonakonimbiibeli waye kutya okwa tala ko ngahelipi okulinyongamena oihongwafano. Alinafe okwa li a uda nai neenghono, ndele ta nyamukula ta ti: “Olo etokolo lopaumwene!” Chifundo okwa li ta diladila kutya otashi dulika ekonakonombiibeli lavo li xulile opo. Ashike okwa li a twikila nelididimiko okukonakona naAlinafe, e na elineekelo kutya mokweendela ko kwefimbo ota ka uda ko oshitwa. Konima yeemwedi donhumba, Chifundo okwa li a pula Alinafe epulo olo li li moshileshwa 34 tali ti: “Ouwa ulipi wa mona fiyo opapa, eshi to konakona Ombiibeli nosho yo eshi we lihonga kombinga yaKalunga kashili, Jehova?” Chifundo okwa popya kombinga yanghee Alinafe a li a nyamukula, a ti: “Okwa li a tumbula oitwa ihapu itunhula, shimwe shomuyo oshosho kutya Eendombwedi daJehova ihadi longo oilonga oyo ya tokolwa kOmbiibeli.” Diva konima yaasho, Alinafe okwa li a efa po okulongifa oihongwafano, nokwa li a wana okuninginifwa.

21. Ongahelipi hatu dulu okukwafela ovakonakonimbiibeli va ninge etokolo lokulongela Jehova?

²¹ Nokuli nonande Jehova oye ha “kulike,” nafye ohatu dana onghandangala mokukwafela ovakonakonimbiibeli va ninge exumokomesho. (1 Kor. 3:7) Ohatu ningi shihapu shi dulife ashike oku va honga osho Kalunga a hala va ninge. Ohatu va kwafele va kale ve hole Jehova neenghono. Ohatu va ladipike yo va ulike kutya ove mu hole moku mu pitifa komesho monghalamwenyo yavo. Ohatu va hongo ve lineekele muJehova, ngeenge va taalela omashongo. Ngeenge otwa ulike kutya otwe ve lineekela, ohatu ke va kwafela va kale ve na elineekelo kutya otava dulu okukala metwokumwe nomifikamhango daJehova, nokupopila oshili.