Mbela owe “lihonga oshiholekwa” shokukala wa wanenwa?

1. Osha hala okutya shike okukala wa wanenwa, noina shi hala okutya shike?

MBELA owa wanenwa kwaasho u na? Omunhu, oo a wanenwa, oha kala a hafa noku na ombili, molwaashi oha kala a pandula omanangekonoupuna oo a pewa kuJehova. Iha kala a kenyanana, ile a handuka molwaashi ehe na oinima yonhumba. Ndele nande ongaho, osho inashi hala okutya ke na ko nasha nonghedi yaye yokukalamwenyo. Pashihopaenenwa, inashi puka okukala twa hala okulonga shihapu moilonga yaJehova. (Rom. 12:1; 1 Tim. 3:1) Ashike ngeenge otwa wanenwa, ihatu kanifa ehafo letu, molwaashi inatu mona oshinakuwanifwa osho twa hala.

2. Omolwashike sha nyika oshiponga okukala inatu wanenwa kwaasho tu na?

² Okukala inatu wanenwa otaku dulu oku tu etela oilanduliko ya kwata moiti. Pashihopaenenwa, vamwe ovo inava wanenwa kwaasho ve na, otashi dulika va longe eevili dihapu, opo va dule okulanda oinima yopamaliko oyo inava pumbwa naanaa. Shi nyikifa oluhodi, Ovakriste vamwe ova vaka nokuli oimaliwa nosho yo oinima oyo va hala. Otashi dulika ve lipopila tava ti, ‘Onda hala oshinima eshi,’ ‘Onda kala nda teelela oule wefimbo lile,’ ile ‘Ohandi shi futile po nale.’ Ashike, Jehova ina hokwa okuvaka kwoludi keshe, noihaku mu fimanekifa. (Omayel. 30:9) Vamwe ova uda nai, molwaashi inava mona oshinakuwanifwa osho va li va hala, ndele tava efa po nokuli okulongela Jehova. (Gal. 6:9) Omolwashike omupiya waJehova ta dulu okuninga oshinima sha tya ngaho? Otashi dulika omunhu a tya ngaho ina wanenwa vali kwaasho e na.

3. Oshilihongomwa tashi tu omukumo shilipi hatu lihongo mOvafilippi 4:​11, 12?

³ Atusheni ohatu dulu okukala twa wanenwa kwaasho tu na. Omuyapostoli Paulus okwa shanga kutya okwe ‘lihonga okukala a wanenwa monghalo yaye keshe.’ (Lesha Ovafilippi 4:​11, 12.) Okwa shanga eendjovo odo, ofimbo a li modolongo. Ashike nande ongaho, ka li a kanifa ehafo laye. Okwe “lihonga oshiholekwa” shokukala a wanenwa. Ngeenge ohatu mono shidjuu okukala twa wanenwa kwaasho tu na, eendjovo daPaulus nosho yo oshihopaenenwa shaye otai ulike kutya nafye ohatu dulu okukala twa wanenwa, kashi na nee mbudi kutya otu li meenghalo da tya ngahelipi. Inatu pumbwa okukala twa teelela shi kale shipu kufye okukala twa wanenwa kwaasho tu na. Ndele ponhele yaasho, otwa pumbwa okulihonga okukala twa wanenwa. Ngahelipi mbela? Natu ka kundafaneni omaukwatya, oo tae tu kwafele tu lihonge oshiholekwa shokukala twa wanenwa.

KALA U NA OLUPANDU

4. Ongahelipi okukala tu na olupandu taku tu kwafele tu kale twa wanenwa kwaasho tu na? (1 Ovatessalonika 5:18)

⁴ Omunhu, oo e na olupandu, oha kala a wanenwa kwaasho e na. (Lesha 1 Ovatessalonika 5:18.) Pashihopaenenwa, ngeenge otu na olupandu molwaashi tu na oinima oyo twa pumbwa monghalamwenyo, ihatu lipula unene shi na sha noinima oyo twa hala ashike katu i kwete. Ngeenge otwa pandula Jehova omolwoinakuwanifwa oyo tu na paife, ohatu ka yandja elitulemo kokulonga ngaashi hatu dulu moinakuwanifwa oyo, ponhele yokukala hatu diladila unene kombinga yanghee hatu dulu okumona oinakuwanifwa imwe oyo twa hala. Nomolwaasho Omishangwa tadi tu ladipike tu kale hatu pandula Jehova momailikano etu. Okukala tu na olupandu ohaku tu kwafele tu kale tu udite tu na “ombili yaKalunga oyo i dule eendunge adishe.” — Fil. 4:​6, 7.

5. Omolwashike Ovaisrael va li va pumbwa okukala ve na olupandu? (Tala yo efano.)

⁵ Diladila kwaasho sha li sha ningilwa Ovaisrael. Ova li hava ngongotele Jehova oikando ihapu, molwaashi va li va hala oikulya oyo va li hava hafele muEgipiti. (Num. 11:​4-6) Oshoshili kutya onghalamwenyo kaya li ipu kuvo, eshi va li mombuwa. Oshike sha li tashi dulu oku va kwafela, opo va kale va wanenwa kwaasho ve na? Ova li ve na okudiladila kwaasho Jehova a li e va ningila nale noku mu pandula. Ova li ve na okudimbuluka kutya eshi va li moupika muEgipiti, Jehova okwa li a tumina Ovaegipiti omahandukilo omulongo nokwa li a xupifa Ovaisrael. Konima eshi Ovaisrael va dja mo muEgipiti, Jehova okwa li e va kwafela va ‘kufe mo omaliko Ovaegipiti’ ngaashi oshisilveri, oshingoli noikutu. (Ex. 12:​35, 36) Eshi Ovaegipiti va li ve va taataa fiyo opEfuta Litilyana, Jehova okwa li a tukula omeva pashikumwifilonga. Eshi va li tava ende mombuwa, Jehova okwe va pa omana efiku keshe. Ndele omolwashike Ovaisrael va li tava ngongota shi na sha noikulya? Ovaisrael kava li va wanenwa kwaasho va li ve na, hamolwaashi kutya kava li ve na oikulya oyo va pumbwa, ndele omolwaashi kutya kava li ve na olupandu laasho va li ve na.

6. Oshike tashi dulu oku tu kwafela tu kale hatu ulike olupandu?

⁶ Oshike tashi dulu oku ku kwafela u kale u na olupandu? Shotete, konga efimbo efiku keshe u diladile koinima iwa oyo to hafele monghalamwenyo. Oto dulu nokuli okushanga oinima ivali, ile itatu oyo wa pandula. (Omaimb. 3:​22, 23) Oshitivali, ulika olupandu loye. Katuka onghatu u pandule vamwe omolwoinima oyo ve ku ningila. Naasho sha fimanenena, kala ho pandula Jehova efiku keshe. (Eps. 75:1) Oshititatu, panga oukaume novanhu ovo hava ulike olupandu. Ngeenge ookaume ketu kave na olupandu, otava dulu oku tu nwefa mo tu kale tuhe li na, ashike ngeenge ohava ulike olupandu, otave ke tu nwefa mo nafye tu kale hatu ulike olupandu. (Deut. 1:​26-28; 2 Tim. 3:​1, 2, 5) Ngeenge otwa kala hatu kongo eemhito tu ulike olupandu, otashi ke tu kwafela tuha kale tu udite unene nai omolwomaupyakadi oo hatu piti muo, ile omolwoinima oyo twa hala ndele katu i kwete.

7. Oshike sha li sha kwafela Aci a kale e na olupandu, nosha eta oidjemo ilipi?

⁷ Natu ka taleni osho sha li sha ningilwa Aci, oo ha di moIndonesia. Okwa ti: “Pefimbo lomukifi wekomba wo-COVID-19, onda li nda hovela okuyelekanifa eenghalo dange naado dovaitaveli vakwetu. Oshidjemo, onda li nda hovela okukala inandi wanenwa kwaashi ndi na.” (Gal. 6:4) Oshike she mu kwafela a lundulule onghedi yaye yokudiladila? Aci okwa ti: “Onda li nda hovela okudiladila komanangekonoupuna oo Jehova a li ta pe nge efiku keshe, nonda li yo handi diladila moule kombinga yoinima aishe iwa oyo ndi na, molwaashi ndi li oshitukulwa shehangano laKalunga. Opo nee onda li nda pandula Jehova omolwoinima aishe oyo. Oshidjemo, osho osha kwafela nge ndi kale nda wanenwa shili.” Ngeenge owa wililwa po komaliudo mai, omolwashike ito ningi osho sha li sha ningwa kuAci, opo u dule okukala u na olupandu?

KALA OMULININIPIKI

8. Oshike sha li sha ningilwa Baruk?

⁸ Pomhito imwe, hamushanga womuprofeti Jeremia, Baruk, okwa li a wila momwiyo oule wokafimbo kanini. Baruk okwa li e na oshinakuwanifwa shidjuu shokuyambidida Jeremia, eshi a li ta ka lombwela oshiwana, osho shihe na olupandu, etumwalaka la kwata moiti. Pomhito imwe, Baruk ka li vali ta yandje elitulemo. Ponhele Baruk a yandje elitulemo kwaasho Jehova a li a hala a ninge, okwa li a hovela okudiladila unene kombinga yaye mwene nokwaasho a li a hala. Jehova okwa li a longifa Jeremia a lombwele Baruk, a ti: “Ove oto lihalele oinima inene? Ino i lihalela.” (Jer. 45:​3-5) Noitya imwe, Jehova okwa li te mu lombwele ta ti: “Kala wa wanenwa kwaasho u na.” Baruk okwa li a pwilikina kuJehova, nokwa twikila okukala kaume kaye kopofingo.

9. 1 Ovakorinto 4:​6, 7, otave tu kwafele ngahelipi tu kale tu na etaleko la yuka li na sha noinakuwanifwa yetu? (Tala yo omafano.)

⁹ Omafimbo amwe, otashi dulika Omukriste a kale e udite a wana okupewa oshinakuwanifwa shonhumba. Otashi dulika a kale e udite ngaho, molwaashi e na owino muhapu, ha longo noudiinini, ile a longela Jehova oule womido dihapu. Ashike vamwe otashi dulika va pewe oshinakuwanifwa osho a li a hala okupewa. Oshike tashi dulu oku mu kwafela aha kale e udite nai kombinga yaasho? Ota dulu okudiladila keendjovo domuyapostoli Paulus, odo tadi hangwa mo 1 Ovakorinto 4:​6, 7. (Lesha.) Oshinakuwanifwa keshe nosho yo owino keshe oo tu na aishe oya dja kuJehova. Jehova ihe tu pe oinima ya tya ngaho molwaashi twe likalekelwa tu dule vamwe. Ndele ohe tu pe oinima oyo, molwaashi oku tu hole nomolwefilonghenda laye. — Rom. 12:​3, 6; Ef. 2:​8, 9.

10. Ongahelipi hatu dulu okukulika elininipiko?

¹⁰ Ohatu dulu okukulika elininipiko mokukala hatu diladila moule koshihopaenenwa osho Jesus e tu tulila po. Diladila kwaasho sha li sha ningwa po, eshi Jesus a li a kosha eemhadi dovayapostoli vaye. Omuyapostoli Johannes okwa shanga, a ti: “Jesus okwa li e shi shii kutya okwa pewa oinima aishe kuXe nonokutya okwa dja kuye nota shuna kuye, . . . ta hovele okukosha eemhadi dovahongwa vaye.” (Joh. 13:​3-5) Jesus okwa li ta dulu okukala e udite kutya ovayapostoli vaye ovo ve na okukosha eemhadi daye. Jesus ka li e udite kutya molwaashi ye Omona waKalunga, oku na okukala e na eumbo liwa, oimaliwa ihapu nosho yo onghalamwenyo iwa. (Luk. 9:58) Jesus okwa li omulininipiki; okwa li a wanenwa kwaasho e na. Okwe tu tulila po oshihopaenenwa shiwa. — Joh. 13:15.

11. Elininipiko ola kwafela ngahelipi Dennis a kale a wanenwa?

¹¹ Omumwatate Dennis, wokoNetherlands, okwa popya kutya oha kendabala neenghono okukala omulininipiki ngaashi Jesus, ashike haalushe hashi kala shipu. Okwa ti: “Ngeenge umwe a pewa oshinakuwanifwa osho nda li nda hala, omafimbo amwe ohandi kala ndi udite nai, molwaashi ohandi kala ndi udite kutya aame nda li nda wana oku shi pewa. Ngeenge osho sha ningwa, ohandi konakona oikundafanwa i na sha nelininipiko. Ohandi didilike omishangwa donhumba mo JW Library di na sha nelininipiko, opo ndi dule oku di mona noupu noku di leshulula. Onda tapela yo oipopiwa i na sha nelininipiko mongodi yange, nohandi i pwilikine lwoikando.a Onde lihonga kutya keshe osho handi ningi nashi kale tashi fimanekifa Jehova, ndele haame. Jehova oha pitike keshe umwe womufye a longe oshilonga shonhumba, ashike oYe ha ningifa oilonga ya tya ngaho i pondole.” Ngeenge owa hovele okukala u udite ino wanenwa monghalamwenyo yoye, katuka eenghatu opo u kulike elininipiko. Osho otashi ka pameka ekwatafano loye naJehova, noto ka kala wa wanenwa kwaasho u na. — Jak. 4:​6, 8.

DILONGA KETEELELO OLO U NA

12. Eteelelo li na sha nonakwiiwa lilipi tali tu kwafele tu kale twa wanenwa? (Jesaja 65:​21-25)

¹² Ohatu kala tu udite twa wanenwa, ngeenge hatu dilonga komaudaneko matunhula oo e tu tuvikililwa. Jehova okwe tu lombwela membo laJesaja kutya oku shii kutya ohatu piti momaupyakadi mahapu, ashike okwe tu udanekela yo kutya ote ke a kufa po aeshe. (Lesha Jesaja 65:​21-25.) Ohatu ka kala meameno notu na omaumbo mawa. Ohatu ka kala tu na oilonga tai ti sha, nohatu ka lya oikulya i na oukolele notai tokola elaka. Itatu ke lipula noinima ii, oyo tashi dulika i tu ningilwe, ile i ningilwe ounona vetu. (Jes. 32:​17, 18; Hes. 34:25) Ohatu dulu okukala noushili kutya, eudaneko keshe li na sha nonakwiiwa itunhula, otali ka wanifwa shili.

13. Omaupyakadi elipi tu na paife, nongahelipi okudiladila kombinga yeteelelo li na sha nonakwiiwa taku tu kwafele?

¹³ Otwa pumbwa okuyandja elitulemo keteelelo letu paife shi dulife nale. Omolwashike? Omolwaashi otu li “momafiku axuuninwa” nohatu hangwa atushe komaupyakadi, oo ‘madjuu okuungaungiwa nao.’ (2 Tim. 3:1) Efiku keshe Jehova ohe tu pe ewiliko, eenghono nosho yo ekwafo olo twa pumbwa, opo tu lididimike. (Eps. 145:14) Shikwao vali, eteelelo letu ohali tu kwafele, ngeenge twa taalela omaupyakadi. Otashi dulika ho longo noudiinini, opo u file oshisho oukwaneumbo woye palutu. Mbela osho osha hala okutya oto ka kala alushe to kondjo, opo u wanife po eemhumbwe da tya ngaho? Hasho nandenande! Jehova okwa udaneka kutya mOparadisa ote ke ku pa shihapu shi dulife pwaasho wa pumbwa. (Eps. 9:18; 72:​12-14) Otashi dulika ho ehama efiku keshe, wa polimana, ile wa kwatwa komukifi wa kwata moiti. Mbela oto kala to mono oixuna fiyo alushe, uhe na eteelelo? Hasho nandenande. Mounyuni mupe waKalunga itamu ka kala vali ouyehame nosho yo efyo. (Eh. 21:​3, 4) Eteelelo la tya ngaho otali tu kwafele, opo tuha kale twa kenyanana, ile twa handuka omolwoinima oyo tai tu ningilwa paife. Ohatu dulu okukala tu udite twa wanenwa kwaasho tu na, nonande ohatu ningilwa okuhenouyuki, ile twa filwa, hatu lididimikile ouyehame, ile omashongo amwe vali. Omolwashike? Omolwaashi, kutya nee otwa taalela omaupyakadi a kwata moiti paife, otu shii kutya “omaudjuu oo oopakafimbo” nosho yo kutya mounyuni mupe itatu ka mona vali oixuna. — 2 Kor. 4:​17, 18.

14. Ongahelipi hatu dulu okupameka eteelelo letu?

¹⁴ Molwaashi eteelelo letu li na sha nonakwiiwa otali dulu oku tu kwafela tu kale twa wanenwa, oshike tashi dulu oku tu kwafela tu kale noushili kutya omaudaneko aJehova otaa ka wanifwa shili? Ngaashi ashike tashi dulika omunhu a pumbwa okudjala omakende, opo a mone nawa oshinima osho shi li kokule, nafye otashi dulika twa pumbwa okukatuka pandunge tu pameke eteelelo letu, opo tu kale tu na efano la twa li na sha nOparadisa. Ohatu dulu okufaneka momadiladilo nghee onghalamwenyo tai ka kala, eshi itatu ka kala vali twa pumbwa oimaliwa noitapa kala vali oo a hepa. Ngeenge otu udite nai molwaashi tuhe na oinakuwanifwa yonhumba, ohatu dulu okudiladila kunghee oinima oyo itai ka kala vali ya fimana, eshi hatu ka kala twa wanenena, nokukala hatu longele Jehova oule womido omayovi. (1 Tim. 6:19) Potete otashi dulika tu mone shidjuu okukala hatu dilonga kombinga yonakwiiwa, ponhele yokulipula keenghalo odo hatu piti mudo. Ashike mokweendela ko kwefimbo, otashi ka kala shipu kufye okukala hatu diladila kombinga yonakwiiwa oyo Jehova e tu udanekela.

15. Oshike to lihongo kwaasho Christa a popya?

¹⁵ Diladila kunghee eteelelo la kwafela Christa oo a hombolwa kuDennis, oo a popiwa metetekelo. Okwa ti: “Ondi na omukifi womeenhumba oo hau kufa nge eenghono nohau ningifa nge ndi longife okatemba nokukala ashike nda nangala efimbo lihapu. Ohandi kala mouyehame efiku keshe. Mefimbo opo la di ko, ndokotola wange okwa lombwela nge kutya onghalo yange itai ka xwepopala. Ashike onde li popila kutya, ‘Ke shii onakwiiwa oyo ndi shii.’ Ohandi yandje elitulemo keteelelo olo ndi na, nohashi kwafele nge ndi kale ndi na ombili yopamadiladilo. Kunena, otashi dulika handi lididimikile omaupyakadi mahapu, ashike ohandi ka hafela onghalamwenyo itunhula mounyuni mupe.”

“OVO HAVE MU TILA ITAVA PUMBWA SHA”

16. Omolwashike ohamba David ya li ya shanga kutya ovo hava tila Jehova “itava pumbwa sha”?

¹⁶ Nonande omupiya waJehova okwa wanenwa kwaasho e na, natango oku na ashike okuhangwa komaupyakadi. Ohamba David oya li ya filwa ounona vayo vatatu. Okwa li a lundilwa, a kengelelwa kookaume kaye, nokwa kala ta kongwa kohamba oule womido i mu dipae. Nonande okwa li ta piti momaupyakadi aeshe oo, okwa li a wanenwa, nokwa popya shi na sha naJehova, a ti: “Ovo have mu tila itava pumbwa sha.” (Eps. 34:​9, 10) Omolwashike a li a popya ngaho? Omolwaashi, nonande tu li oshiwana shaJehova, inatu teelela okukala nonghalamwenyo ihe na omaupyakadi, otu na oushili kutya Jehova ote ke tu pa ashishe osho twa pumbwa. (Eps. 145:16) Ohatu dulu okukala nelineekelo kutya Jehova ote tu kwafele tu lididimikile omashongo. Ohatu dulu okukala twa wanenwa kwaasho tu na.

17. Omolwashike wa tokola toko okulihonga oshiholekwa shokukala wa wanenwa?

¹⁷ Jehova okwa hala u kale wa wanenwa. (Eps. 131:​1, 2) Onghee ninga ngaashi to dulu u lihonge oshiholekwa shokukala wa wanenwa. Ngeenge owa longo noudiinini opo u kale u na olupandu, u kale omulininipiki nou pameke elineekelo loye meteelelo, oto ka dula okutya: “Heeno, onda wanenwa.” — Eps. 16:​5, 6.