Ombiibeli oya tumbula ovakainhu vahapu va didilikwedi, ovo va li ve hole Jehova nova li have mu longele. Ova li “ve na ondjele novadiinini moinima aishe.” (1 Tim. 3:11) Kakele kaasho, ovamwameme otava dulu okumona oihopaenenwa yovakainhu meongalo lavo, ovo ve hole Jehova neenghono nosho yo ovo tava dulu okulihonga kuvo oinima ihapu. Ovamwameme ovanyasha, diladileni shi na sha novamwameme ovo mu shii, ovo ve li oshihopaenenwa shiwa, osho tamu dulu okushikula. Didilikeni omaukwatya avo mawa, opo nee tamu diladila shi na sha nanghee tamu dulu okuulika omaukwatya a faafana. Otwa pumbwa okukala ovalininipiki, opo tu kale Ovakriste va pyokoka. Ngeenge omukainhu omulininipiki, ota ka kala e na ekwatafano lopofingo naJehova nosho yo novanhu vakwao. Pashihopaenenwa, omukainhu oo e hole Jehova ota ka hoolola nelininipiko okuyambidida efinamhango li na sha noukwamutwe, olo la tulwa po kuXe womeulu. (1 Kor. 11:3) Mefinamhango olo, Jehova okwa yelifa kutya olyelye a pa oshinakuwanifwa shokukwatela komesho meongalo nosho yo meumbo. w23.12 18-19 ¶3-5

Jehova okwa teelela omushamane a kale e hole omukulukadi waye, noku mu fila oshisho palutu, pamaliudo nosho yo pamhepo. Okudiladila pandunge, okukala wa fimaneka ovakainhu nosho yo okukala omulineekelwa, otaku dulu oku mu kwafela mu li ovalihomboli. Ngeenge owa hombola, otashi dulika u ka ninge xe omudali. Oshike to dulu okulihonga kuJehova shi na sha nokukala xe omudali muwa? (Ef. 6:4) Jehova okwa lombwela omonamati waye, Jesus, sha yukilila kutya oku mu hole nokwe mu hokwa. (Mat. 3:17) Ngeenge owa ningi xe omudali, shilipaleka alushe kutya oho lombwele ovana voye kutya ou va hole. Kala ho va pandula omolwoinima iwa oyo tava ningi. Ooxe ovadali ovo tava shikula oshihopaenenwa shaJehova, ohava kwafele ovana vavo va kale ovakainhu novalumenhu Ovakriste va pyokoka. Oto dulu okulilongekidila oshinakuwanifwa osho paife, mokukala ho file oshisho pahole ovaneumbo leni nosho yo vamwe meongalo moku va ulikila ohole noku va pandula. — Joh. 15:9. w23.12 28-29 ¶17-18

Tu li ovapiya vaJehova ovadiinini, ohatu shakeneke omaudjuu nosho yo omauvela, ngaashi ashike ovanhu aveshe. Otashi dulika yo hatu lididimikile omapataneko, ile omahepeko okudilila kwaavo ve tonde oshiwana shaKalunga. Nonande Jehova ihe tu amene komaudjuu aeshe oo, okwa udaneka oku tu kwafela. (Jes. 41:10) Kekwafo laye, ohatu dulu okukaleka po ehafo letu, okuninga omatokolo opandunge nokukala ovadiinini kuye, nonande ohatu piti meenghalo didjuu. Jehova okwa udaneka oku tu pa osho sha popiwa mOmbiibeli, “ombili yaKalunga.” (Fil. 4:​6, 7) Ombili ya tya ngaho, otai ulike kokungungumana kwomadiladilo nosho yo kwomutima oko haku etifwa kokukala tu na ekwatafano lopofingo naye. Ombili oyo ‘oi dule eendunge adishe;’ oya denga mbada i dulife osho hatu diladila. Pashihopaenenwa, mbela ope na efiku limwe wa li wa ilikana wa mana mo kuJehova, ndele konima owa li wa kumwa, eshi wa ngungumana? Omaliudo a tya ngaho, oo “ombili yaKalunga.” w24.01 20 ¶2; 21 ¶4