Tu li ovapiya vaJehova ovadiinini, ohatu shakeneke omaudjuu nosho yo omauvela, ngaashi ashike ovanhu aveshe. Otashi dulika yo hatu lididimikile omapataneko, ile omahepeko okudilila kwaavo ve tonde oshiwana shaKalunga. Nonande Jehova ihe tu amene komaudjuu aeshe oo, okwa udaneka oku tu kwafela. (Jes. 41:10) Kekwafo laye, ohatu dulu okukaleka po ehafo letu, okuninga omatokolo opandunge nokukala ovadiinini kuye, nonande ohatu piti meenghalo didjuu. Jehova okwa udaneka oku tu pa osho sha popiwa mOmbiibeli, “ombili yaKalunga.” (Fil. 4:​6, 7) Ombili ya tya ngaho, otai ulike kokungungumana kwomadiladilo nosho yo kwomutima oko haku etifwa kokukala tu na ekwatafano lopofingo naye. Ombili oyo ‘oi dule eendunge adishe;’ oya denga mbada i dulife osho hatu diladila. Pashihopaenenwa, mbela ope na efiku limwe wa li wa ilikana wa mana mo kuJehova, ndele konima owa li wa kumwa, eshi wa ngungumana? Omaliudo a tya ngaho, oo “ombili yaKalunga.” w24.01 20 ¶2; 21 ¶4

Ovo ve hole Jehova ova hala okutanga edina laye nomutima wavo aushe. Ohamba David oya li i shii kutya okutanga edina laJehova osha faafana ashike nokutanga Jehova mwene. Ngeenge twa udu edina laJehova, ohatu diladila kutya oku li omunhu a tya ngahelipi, hatu diladila komaukwatya aye nokoilonga yaye ya denga mbada. David okwa li a hala okutala ko edina laXe liyapuki noku li tanga. Okwa li a hala okuninga ngaho “naashishe shomeni” laye, sha hala okutya, nomutima waye aushe. Sha faafana, Ovalevi navo ova li hava kwatele komesho mokutanga Jehova. Ova li va dimina nelininipiko kutya eendjovo davo itadi dulu okutanga pauyadi edina laJehova liyapuki ngaashi shi na okukala. (Neh. 9:5) Nopehe na omalimbililo, elininipiko la tya ngaho nokutanga Jehova tashi di komutima, osha li sha hafifa omutima waYe. w24.02 9 ¶6

Jehova ite ke ku tala ko ino pondola, molwaashi ino hanga elalakano olo ito dulu okuhanga. (2 Kor. 8:12) Tala ko einda li li omhito yokulihonga. Kaleka momadiladilo osho wa pondola nale. Ombiibeli oya ti “Kalunga ke fi omuhenouyuki a dimbwe ngeno oilonga yeni.” (Heb. 6:10) Onghee ku na yo okudimbwa osho wa longa. Diladila kwaasho wa pondola nale kutya nee okupanga oukaume naJehova, okupopya navamwe kombinga yaye, ile okuninginifwa. Ngaashi ashike wa ninga exumokomesho nowa hanga omalalakano opamhepo monakudiwa, oto dulu okutwikila okuninga exumokomesho fiyo osheshi wa hanga elalakano olo we litulila po paife. Kekwafo laJehova, oto dulu okuhanga elalakano loye. Eshi to twikile okulalakanena okuhanga elalakano loye lopamhepo, ino dimbwa okuhafela okumona nghee Jehova te ku kwafele noku ku nangeka noupuna. (2 Kor. 4:7) Ngeenge owa pula komesho, oto ka mona nokuli omanangeko noupuna mahapu. — Gal. 6:9. w23.05 31 ¶16-18