Jehova oha kongo eenghedi, opo a ulike kutya oku hole ovapiya vaye nokwe va hokwa. Ombiibeli oya popya eemhito dopavali omo Jehova a lombwela Jesus kutya oku li Omona waye omuholike nokwe mu hokwa. (Mat. 3:17; 17:5) Mbela owa hala Jehova e ku lombwele kutya okwe ku hokwa? Jehova iha popi nafye odikilila okudja meulu, ashike ohe shi ningi okupitila mOmbiibeli. Jehova ohe tu lombwele kutya okwe tu hokwa, ngeenge hatu lesha eendjovo daJesus odo di li mOmavaengeli. Jesus okwa hopaenena filufilu omaukwatya aXe. Onghee hano, ngeenge hatu lesha nghee Jesus a li a lombwela ovashikuli vaye ovadiinini, ovo va li inava wanenena, kutya okwe va hokwa, ohatu dulu okukala tu udite Jehova a fa te tu lombwele eendjovo odo. (Joh. 15:​9, 15) Ngeenge twa taalela omashongo, itashi ti kutya Kalunga ine tu hokwa. Ponhele yaasho, ohae tu pe eemhito tu ulike kutya otu hole Jehova neenghono notwe lineekela muye. — Jak. 1:12. w24.03 28 ¶10-11

Ngeenge ou li omudali, kwafela ounona voye ve lilongekidile oku ka yandja omatyekosha she likolelela komido davo. Omafimbo amwe, pokwoongala ohapa kundafanwa oikundafanwa ya kwata moiti, ngaashi omaupyakadi omohombo, ile oinima i na sha neenghedi, ndele otashi dulika mu kale okatendo kamwe, ile vavali omo okaana taka dulu okuyandja etyekosha. Shikwao vali, kwafela ounona voye va ude ko kutya omolwashike tashi dulika vaha tumbulwe pomhito keshe va ulika. Ngeenge owe va yelifile ngaho, itava ka uda nai, ngeenge vamwe ovo va tumbulwa ponhele yavo. (1 Tim. 6:18) Atusheni ohatu dulu okulilongekida omatyekosha taa ti sha, oo taa fimanekifa Jehova notaa tu omukumo Ovakriste vakwetu. (Omayel. 25:11) Nonande omafimbo amwe otashi dulika tu yandje oshimoniwa shopaumwene shi li pauxupi, otu na okuhenuka okupopya unene kombinga yetu vene. (Omayel. 27:2; 2 Kor. 10:18) Ponhele yaasho, otu na okukendabala okuyandja elitulemo kuJehova, kEendjovo daye nosho yo koshiwana shaye ashishe. — Eh. 4:11. w23.04 24-25 ¶17-18

Osha fimana okukala tu na ohole, opo tu kale tu li oupafi novanaendunge. (Mat. 22:​37-39) Ohole yokuhola Kalunga otai tu kwafele tu lididimike moilonga yokuudifa, kashi na nee mbudi kutya ohatu shakeneke omaupyakadi elipi. (2 Tim. 1:​7, 8) Molwaashi otu hole yo ovo ihava longele Jehova, ohatu twikile okuudifa hatu yandje nokuli oundombwedi okupitila mongodi nosho yo mokushanga eenhumwafo. Otu na elineekelo kutya ovanhu otava ka ninga omalunduluko nokuhovela okulonga osho sha yuka. (Hes. 18:​27, 28) Ohole yetu yokuhola ovanhu oya kwatela mo yo Ovakriste vakwetu. Ohatu ulike ohole ya tya ngaho ‘mokutwaafana omukumo nokutungafana.’ (1 Tes. 5:11) Ngaashi ovakwaita ovo hava yambididafana molwoodi, nafye ohatu twaafana omukumo. Katu na okweehameka ovamwatate novamwameme owina, ile oku va shunifila owii. (1 Tes. 5:​13, 15) Ohatu ulike yo ohole mokukala twa fimaneka ovamwatate ovo tava kwatele komesho meongalo. — 1 Tes. 5:12. w23.06 10 ¶6; 11 ¶10-11