Osoondaxa, 2 Novemba
“Onghee hano, inatu kaleni twa kofa ngaashi vamwe, ndele natu kaleni oupafi novanaendunge.” — 1 Tes. 5:6.
Osha fimana okukala tu na ohole, opo tu kale tu li oupafi novanaendunge. (Mat. 22:37-39) Ohole yokuhola Kalunga otai tu kwafele tu lididimike moilonga yokuudifa, kashi na nee mbudi kutya ohatu shakeneke omaupyakadi elipi. (2 Tim. 1:7, 8) Molwaashi otu hole yo ovo ihava longele Jehova, ohatu twikile okuudifa hatu yandje nokuli oundombwedi okupitila mongodi nosho yo mokushanga eenhumwafo. Otu na elineekelo kutya ovanhu otava ka ninga omalunduluko nokuhovela okulonga osho sha yuka. (Hes. 18:27, 28) Ohole yetu yokuhola ovanhu oya kwatela mo yo Ovakriste vakwetu. Ohatu ulike ohole ya tya ngaho ‘mokutwaafana omukumo nokutungafana.’ (1 Tes. 5:11) Ngaashi ovakwaita ovo hava yambididafana molwoodi, nafye ohatu twaafana omukumo. Katu na okweehameka ovamwatate novamwameme owina, ile oku va shunifila owii. (1 Tes. 5:13, 15) Ohatu ulike yo ohole mokukala twa fimaneka ovamwatate ovo tava kwatele komesho meongalo. — 1 Tes. 5:12. w23.06 10 ¶6; 11 ¶10-11
Omaandaxa, 3 Novemba
“Ye [Jehova] a tonga sha ngeno, ndelenee ite shi ningi mbela?” — Num. 23:19.
Onghedi imwe omo hatu dulu okupameka eitavelo letu, omokudilonga kekulilo. Ekulilo otali tu shilipaleke kutya omaudaneko aKalunga otaa ka wanifwa shili. Ngeenge otwa diladila noukeka kutya omolwashike ekulilo la li la yandjwa, nonokutya ola kwatela mo shike, ohatu ka pameka eitavelo letu olo kutya eudaneko laKalunga li na sha nomwenyo waalushe mounyuni mupe otali ka wanifwa shili. Omolwashike hatu tile ngaho? Ekulilo ola kwatela mo shike? Jehova okwa tuma Omona waye omuholike woshiveli, kaume kaye kopofingo, okudja meulu, a dalwe e li omunhu a wanenena kombada yedu. Eshi Jesus a li kombada yedu, okwa li e lididimikila omaudjuu oludi keshe. Opo nee okwa mona oixuna nokufya efyo linyanyalifi. Jehova ka li tuu a futa ofuto inene! Kalunga ketu omunahole ina efa ashike Omona waye a mone oixuna nokufya, opo ngeno tu dule okuhafela onghalamwenyo oule wokafimbo kaxupi. (Joh. 3:16; 1 Pet. 1:18, 19) Molwaashi Jehova okwa futa ofuto oyo inene, ota ka shilipaleka kutya ohatu ka mona shili omwenyo waalushe mounyuni mupe. w23.04 27 ¶8-9
Etivali, 4 Novemba
“Efyo, oudu woye u nolutapo u li peni?” — Hos. 13:14.
Mbela Jehova okwa halelela ngoo okunyumuna oonakufya? Kape na omalimbililo, okwa halelela. Okwa nwefa mo ovashangi vonhumba vOmbiibeli va shange eudaneko laye li na sha nenyumuko lomonakwiiwa. (Jes. 26:19; Eh. 20:11-13) Ngeenge Jehova a udaneka sha, alushe ohe shi wanifa po. (Jos. 23:14) Jehova okwa halelela okwaalulila ovafi momwenyo. Diladila keendjovo datatekulululwa Job. Okwa li e shii kutya nokuli nonande oku fye, Jehova okwa hala vali oku ke mu mona e li momwenyo. (Job 14:14, 15) Jehova okwa halelela okuningila sha faafana ovapiya vaye aveshe ovo va fya. Okwa halelela oku va nyumuna ve na oukolele muwa nova hafa. Ongahelipi shi na sha novanhu omabiliyona ovo va fya inava mona omhito yokulihonga oshili kombinga yaJehova? Kalunga ketu omunahole navo okwa hala oku va nyumuna. (Oil. 24:15) Okwa hala va mone omhito va ninge ookaume kaye nova kale fiyo alushe kombada yedu. — Joh. 3:16. w23.04 9 ¶5-6