Rut
3 Naomi okwa lombwela oshitenya shaye Rut a ti: “Omumwange, ohandi ku kongele eumbo* u kale mo wa hafa. 2 Boas omupambele. Oye omwene wovakainhu ovanyasha ovo wa li pamwe navo. Ota ka xwa oilya yo-barley poshipale konguloshi yonena. 3 Onghee likosha nokuvava omaadi edimba liwa, ndele to djala* u ye koshipale. Ino mu lihololela fiyo osheshi a mana okulya nokunwa. 4 Tala kutya Boas ota nangala peni, opo nee ngeenge a nangala, inda puye, mu uvukulula keemhadi, ndele to nangala. Ote ke ku lombwela osho u na okuninga.”
5 Rut okwa nyamukula a ti: “Ohandi ka ninga ashishe osho wa lombwela nge.” 6 Opo nee okwa ya koshipale nokwa ninga ashishe osho a lombwelwa kuinamweno. 7 Lwanima, Boas okwa lya, ndele ta nu nokwa li a hafa. Eshi a mana, okwa ka nangala pomunghulo wonduba yoilya. Konima yaasho, Rut okwe lihonyaeka nokwa uvukulula Boas keemhadi, ndele ta nangala. 8 Mokati koufiku Boas okwa hovela okukakama, ndele ta tanauka nokwa mona omukainhu a nangala peemhadi daye. 9 Okwa tya kuye: “Oove lyelye?” Omukainhu okwa nyamukula a ti: “Aame Rut omupiya woye. Uvika* omupiya woye noshikutu shoye, osheshi oove omukulili* wetu.” 10 Boas okwa ti: “Omumwange, Jehova ne ku nangeke noupuna. Paife owa ulika ohole i na oudiinini shi dulife nale, eshi ino shikula ovalumenhu ovanyasha, kutya nee eehepele, ile oipuna. 11 Omumwange, ino tila. Ohandi ke ku ningila keshe osho to pula, osheshi ovanhu aveshe moshilando ove shii kutya ove omukainhu e likalekelwa. 12 Oshoshili kutya ame omukulili,* ndele ope na omukulili omukweni wopopepi elela. 13 Kala apa oufiku wonena, nongeenge okwe ku kufa po ongula e ke ku file oshisho, oshi li nawa, ne ku kufe po. Ashike ngeenge ina hala oku ku kufa po, ame ohandi ke ku kufa po; ohandi ane medina laKalunga omunamwenyo, Jehova. Nangala apa fiyo otaku shi.”
14 Rut okwa nangala peemhadi daBoas fiyo ongula, nokwa penduka fimbo inaku yela nawa, opo aha dimbulukiwe. Boas okwa ti: “Hamunhu nande a shiiva kutya poshipale opa li pe uya omukainhu.” 15 Okwa ti vali: “Pe nge oshikutu shoye shokombada osho wa djala, ndele to shi tonyununa mo.” Rut okwe shi tonyununa mo, na Boas okwa tula mo oimbale ihamano* yoilya yo-barley, ndele te shi mu twike, opo nee Boas okwa ya moshilando.
16 Rut okwa ya kuinamweno, na inamweno okwe mu pula a ti: “Omumwange, osha enda ngahelipi?” Rut okwe mu lombwela ashishe osho Boas e mu ningila. 17 Okwa weda ko vali a ti: “Boas okwa pa nge oimbale ihamano yoilya yo-barley, ndele ta ti, ‘Ino ya kunyokomweno eenyala dongaho.’” 18 Opo nee Naomi okwa ti: “Omumwange, kala apa fiyo osheshi wa uda osho tashi ningwa po, osheshi Boas ita fuwa nena ofimbo ina yukifa oinima.”