Omapulo a dja kovaleshi
Onaini epangelo lopamuhanga enaenghono mounyuni laAmerika naBritania la ninga ohamba onhiheyali oyo ya xunganekwa mOmbibeli?
▪ Oshihongwafano shoshivela shinenenene osho sha li sha monika kohamba Nebukadnesar, itashi faneke omapangelo aeshe omanaenghono mounyuni. (Dan. 2:31-45) Otashi faneke ashike omapangelo atano oo a pangela okudja pefimbo laDaniel okuyuka komesho nokwa dana onghandangala yonhumba mokukalamwenyo kwoshiwana shaKalunga.
Efatululo laDaniel li na sha noshihongwafano osho shoshivela otali yandje ediladilo olo kutya epangelo lopamuhanga enaenghono mounyuni laAmerika naBritania ola li tali ka dja mwaali laRoma, ndele kala li tali ka umba ko eli laRoma koshipundi. Daniel okwa ti kutya omaulu oshihongwafano osho okwa li a longwa moshivela shilaula osho sha li sha ya fiyo keemhadi nokominwe. (Eemhadi nominwe doshihongwafano oda li oshivela shilaula sha lumbakanifwa mumwe nomunoko.)a Ouyelele wa tya ngaho otau ulike kutya epangelo lopamuhanga enaenghono mounyuni laAmerika naBritania ola li tali ka dja mwaali tali fanekwa komaulu oshivela shilaula. Ondjokonona otai koleke oushili woshinima osho. Britania, oo a li nale oshipangelwalongo shaRoma, okwa li a hovela okukala a tumbala pexulilo lo 1700 nasha. Opo nee, Oilongo ya Hangana yaAmerika nayo oya ka ninga oshiwana oshinaenghono. Ndele pefimbo opo, epangelo etiheyali enaenghono mounyuni olo la xunganekwa mOmbibeli kala li natango la totwa po. Omolwashike hatu tile ngaho? Omolwaashi pefimbo opo, Britania nOilongo ya Hangana kava li natango va hovela okulongela kumwe monghedi ididilikwedi. Osho osha ka ningwa ashike pefimbo lOita yOtete yOunyuni.
Pefimbo opo, “[ovana, NW] vouhamba” ova li tava longo noudiinini unene tuu mOilongo ya Hangana, neembelewa davo da kula oda li moBrooklyn, shomuNew York. (Mat. 13:36-43) Oilyo yokangudu kovavaekwa oya li hai udifa nouladi moilongo oyo ya li i li koshi yepangelo laBritania. Pefimbo lOita yOtete yOunyuni, epangelo laBritania nolaAmerika okwa li a hovela okukala nekwatafano le likalekelwa opo a dule okukondjifa ovatondi vao vopapolitika ovo va li ve limanga oukuni kumwe. Molwaashi oita oyo oya li ya etifa oukwamuhoko, omapangelo oo nao okwa li a hovela okukala e tonde ovo ve li oshitukulwa sholudalo ‘lomwalikadi’ waKalunga, a shilika oishangomwa oyo hava nyanyangida nokwa li yo a tulifa modolongo ovakwatelikomesho voilonga yokuudifa. — Eh. 12:17.
Onghee hano, pakutala kexunganeko lOmbibeli, epangelo etiheyali enaenghono inali dikwa po pexulilo lo 1700 nasha eshi Britania a hovela okukala epangelo la tumbala. Ndele ponhele yaasho, ola totwa po pehovelo lefiku lOmwene.b
[Omashangelo opedu]
a Omunoko oo wa lumbakanifwa mumwe noshivela shilaula otau faneke oilyo imwe yepangelo lopamuhanga enaenghono mounyuni laAmerika naBritania. Momukokomoko womido, omunoko oo owa ka kala tau shi ningi shidjuu kuAmerika naBritania okupangela ngaashi va hala.
b Eyelifo olo ola pepaleka ouyelele oo wa kundafanwa membo Daniel’s Prophecy, epandja 57, okatendo 24 nosho yo oo u li pefano olo li li pepandja 56 ne-139.
[Efano pepandja 19]
MuJuni 1918, ovamwatate vahetatu vokeembelewa da kula doWatchtower ova li va tulwa modolongo