Etukulwa 6
Omolwashike hatu kulupa nohatu fi?
1. Oshike osho ovanongononi inava dula okuyelifa shi na sha nomwenyo womunhu?
OVANONGONONI kave shii kutya omolwashike ovanhu hava kulupa nohava fi. Otashi monika sha fa shi li ngaha kutya eesele detu odi na okukala tadi lipepaleke alushe nokungaha ngeno otu na okukala nomwenyo fiyo alushe. Embo Hyojun Soshikigaku (Ohistologi yopetameko) otali ti: “Ekwatafano pokati kokukulupa kweesele noukulupe nefyo lomunhu oshiholekwa shinene.” Ovanongononi vahapu ova itavela kutya oule wokukalamwenyo kwetu owa ngabekwa kongaba “yopaushitwe.” Mbela oto diladila kutya ove li mondjila?
2. Oshike osho vamwe va ninga omolwouxupi wonghalamwenyo?
2 Ovanhu ova kala alushe va hala onghalamwenyo ile nova kala nokuli tava kendabala ve likongele okuhafya. Okudja efelemido etine K.O.P., omiti odo kwa li da diladililwa okuhafya ku shiive, okwa li da shila elitulemo loidale yOvachina. Ovapangeli vamwe vonale vOvachina ova kendabala okulongifa osho hashi ifanwa omuti muwa womwenyo—wa ningwa moshikunguluki shoshitenda—ndele ova fya! Ovanhu kongonga yedu alishe ova itavela kutya efyo halo exulilo lokukala po kwavo. Ovabuddha, Ovahindu, Ovamoslem navakwao aveshe ove na omateelelo makumwifi okukala nomwenyo konima yefyo. MOukwakriste, vahapu ove na omadiladilo oku ka kala nehafo la wana po meulu konima yefyo.
3. (a) Omolwashike ovanhu va hala omwenyo waalushe? (b) Omapulo e na sha nefyo elipi a pumbwa okunyamukulwa?
3 Omadiladilo okukala nelao konima yefyo otaa ulike ehalo lokukala nomwenyo waalushe. “[Okwa] tula momutima wavo oukwaalushe,” Ombibeli osho tai ti shi na sha nomadiladilo oukwaalushe oo Kalunga a tula mufye. (Omuudifi 3:11) Okwa shita ovanhu votete neteelelo lokukala nomwenyo fiyo alushe kombada yedu. (Genesis 2:16, 17) Omolwashike hano ovanhu hava fi? Ongahelipi efyo le uya mounyuni? Eshiivo lokushiiva Kalunga otali yandje ouyelele komapulo oo.—Epsalme 119:105.
OMHANGELA II
4. Jesus okwa holola ngahelipi omulongi womunyonena oo e na sha nokufya kwovanhu?
4 Omulongi womunyonena oha kendabala okukanifa oikoti yaye. Eshi osho yo sha li ngaho shi na sha naumwe oo e na oshinakuwanifwa shomunyonena oo wa etifa efyo lomamiliyona omayovi. Okwa unganeka oinima opo efyo lovanhu li kale oshiholekwa. Jesus Kristus okwa holola omulongi womunyonena ou eshi A lombwela ovo kwa li tava kendabala oku Mu dipaa ta ti: “Nye omu na xo yeni, Satana, ndele ouhalu waxo yeni mwa hala oku u wanifa. Ye omudipai nghee a dja, ina kala moshili, osheshi muye kamu na oshili.”—Johannes 8:31, 40, 44.
5. (a) Oo a ka ninga Satana Ondiaboli okwa dja peni? (b) Oitya “Satana” na “Ondiaboli” otai ti shike?
5 Heeno, Ondiaboli oyo “omudipai” omuyelani. Ombibeli otai holola kutya ye omunhu wolelalela, ke fi ashike owii oo hau kala momutima womunhu. (Mateus 4:1-11) Ndele nande okwa li a shitwa e li omweengeli omuyuki ye “ina kala moshili.” Inashi yuka tuu eshi a lukwa Satana Ondiaboli! (Ehololo 12:9) Ye oha ifanwa “Satana” ile “omupataneki,” molwaashi okwa li ta pataneke nota kondjifa Jehova. Omulongi womunyonena oo oha ifanwa yo “Ondiaboli,” tali ti “omulundili,” molwaashi okwa sheka Kalunga mokupopya oipupulu.
6. Omolwashike Satana a tukululila Kalunga oshibofa?
6 Mbela oshike she linyengifa Satana a tukululile Kalunga oshibofa? Olwisho. Okwa li a halelela nolwisho okulongelwa kovanhu ngaashi Jehova. Ondiaboli inai ekelashi okahalu kokukala tai longelwa pamukalo wa tya ngaho, oko pauyuki ku na ashike okupewa Omushiti. (Yelekanifa Hesekiel 28:12-19.) Ponhele yaasho, omweengeli oo a ka ninga Satana okwa kulika okahalu kondubo fiyo ka fimbapala noka dala oulunde.—Jakob 1:14, 15.
7. (a) Oshike hashi etifa efyo lovanhu? (b) Oulunde oshike?
7 Otwa mona mo nee omushima oo oilonga yaye yomunyonena ya etifa efyo lovanhu. Ndele oshike naanaa hashi etifa efyo lovanhu? Ombibeli otai ti: “Oshitwifo shefyo osho oulunde.” (1 Ovakorinto 15:56) Ndele oulunde oshike? Opo tu ude ko oshitya eshi, natu tale eityo lasho momalaka opehovelo Ombibeli. Oityalonga yOshiheberi nOshigreka oyo luhapu ya tolokwa “oulunde” otai ti “okushekuna,” mondunge yokushekuna oshishonekwa ile oku ha hanga elalakano. Oshishonekwa shilipi po osho atusheni twa shekuna? Oshishonekwa osho okudulika kwa wanenena kuKalunga. Ndele ongahelipi oulunde we uya mounyuni?
NGHEE OMHANGELA OYO YA WANIFWA
8. Ongahelipi Satana kwa li a kendabala opo ovanhu ve mu longele?
8 Satana okwa longekida nekoto omhangela oyo kwa li a diladila kutya otai ke mu ninga omupangeli kombada yovanhu aveshe nokulongelwa kuvo. Okwa tokola a heke ovalihomboli votete, Adam naEva, va nyone kuKalunga. Jehova okwa yandja eshiivo kovakulunhu vetu votete olo kwa li tali ke va twala komwenyo waalushe. Okwa li ve shii kutya Omushiti wavo omuwa molwaashi okwe va nangeka moshikunino shiwa shaEden. Unene tuu Adam okwa mona ouwa waXe yomeulu eshi Kalunga e mu pa omukainhu muwa nomukwafi. (Genesis 1:26, 29; 2:7-9, 18-23) Okukala nomwenyo kwovanhu vavali votete okwa li kwe likolelela kokudulika kuKalunga.
9. Oshipango shilipi Kalunga kwa li a pa ovanhu votete, nomolwashike eshi kwa li shi li pandjele?
9 Kalunga okwa lombwela Adam: “Lya komiti adishe domoshikunino ngaashi wa hala, ndelenee komuti wokushiiva ouwa nowii, ino u lya. Osheshi efiku tuu olo to li kuwo, ove u noku ka fya shili.” (Genesis 2:16, 17) Molwaashi ye Omushiti, Jehova Kalunga oku na oufemba okutula po omifikamhango dopamikalo nokutokola osho shiwa naasho shii koishitwa yaye. Elombwelo laye ola li pandjele, molwaashi Adam naEva okwa li va manguluka okulya oiimati aishe ikwao yomoshikunino. Okwa li tava dulu okuulika olupandu lavo omolwoufemba waJehova wokupangela, mokudulika komhango ponhele yokutula po nounhwa omifikamhango davo vene dopamikalo.
10. (a) Ongahelipi Satana a ehena kovanhu opo e va kokele kombinga yaye? (b) Ongahelipi Satana a popila Jehova momutyanai? (c) Oto diladila ngahelipi shi na sha neponokelo laSatana okuponokela Kalunga?
10 Ondiaboli oya ninga omhangela okupilamenifa ovanhu votete kuKalunga. Opo e va hongolole va ame kombinga yaye, Satana okwa popya oipupulu. Mokulongifa eyoka, ngaashi omupopi ta popi okupitila moshipopifa, Ondiaboli oya pula Eva tai ti: “Kalunga okwa tile tuu shili: nye inamu lya komiti adishe domoshikunino?” Eshi Eva a endulula elombwelo laKalunga, Satana okwa ti: “Nye itamu ka fya shili.” Opo nee okwa popila Jehova momutyanai ta ti: “Kalunga oku shi shii nokutya, ngenge tamu li [kuo], omesho eni taa pashuka, opo mu shiive ngaashi Kalunga ouwa nowii.” (Genesis 3:1-5) Ondiaboli kungaha oya yandja ediladilo kutya Kalunga okwa li ta ngungunine sha osho shiwa. Kali fi tuu eponokelo okulundila Tate omunashili nomunahole womeulu, Jehova!
11. Adam naEva ongahelipi va ninga ovalongi vowii pamwe naSatana?
11 Eva okwa tala vali komuti, noiimati yao okwa li tai monika ya fa ihokwifi unene. Onghee hano okwa kufa ko oshiimati ndee ta li. Konima yefimbo, omulumenhu waye naye okwa longa owina oshilonga eshi shoulunde shokuhadulika kuKalunga. (Genesis 3:6) Ndele nande Eva okwa li a pukifwa, ye nosho yo Adam ova yambidida omhangela yaSatana yokupangela ovanhu aveshe. Doshili, vo ova ninga ovalongi vowii pamwe naye.—Ovaroma 6:16; 1 Timoteus 2:14.
12. Oshike sha dja mounashibofa oo wa tukululilwa Kalunga kovanhu?
12 Adam naEva okwa li ve na okutaalela oilanduliko yoilonga yavo. Inava ninga va fa Kalunga, oo e na eshiivo le likalekelwa. Ponhele yaasho, okwa li ve udite ohoni ndee tava hondama. Jehova okwa hokololifa Adam nokwa popya ehandukilo eli ta ti: “Omungome woye oto u li noshinhwi moshipala shoye fiyo ove oto shuna medu, osheshi omo wa kufwa. Osheshi oove edu, ndee to ka ninga edu.” (Genesis 3:19) ‘Efiku olo’ ovakulunhu vetu votete va lya komuti wokushiiva ouwa nowii, okwa li va pewa ehandukilo kuKalunga nova li va fya momesho aye. Opo nee ova tewa mo mOparadisa nova hovela okumbulukila kwavo mefyo pambelela.
NGHEE OULUNDE NEFYO LA TANDAVELA
13. Ongahelipi oulunde wa tandavela movanhu aveshe?
13 Osha yela kutya Satana okwe shi pondola momhangela yaye yokufimanekwa kovanhu. Ndelenee kakwa li ta dulu okukaleka ovalongeli vaye nomwenyo. Eshi oulunde wa hovela okulonga movalihomboli votete, kakwa li tava dulu vali okutambekida ewaneneno koludalo lavo. Ngaashi eshangelo la shangwa memanya, oulunde owa shangelwa moule momaufyuululwakwatya omalutu ovakulunhu vetu votete. Kungaha, okwa li ashike tava dulu okudala oludalo inali wanenena. Nomolwaashi ounona vaAdam naEva ove va dala konima eshi va nyona, oludalo lavo ola fyuulula oulunde nefyo.—Epsalme 51:7; Ovaroma 5:12.
14. (a) Ovo tave likale kutya kave na oulunde ohatu va yeleke nalyelye? (b) Ongahelipi Ovaisrael kwa li va shivifilwa oulunde wavo?
14 Ndelenee kunena vahapu ihava diladila kutya vo ovalunde. Moitukulwa imwe yomounyuni, ediladilo loufyuululwalunde kali shiivike apeshe. Ndele eshi itashi ti kutya oulunde kau ko. Okamati ke na oshipala sha kaka otashi dulika ka tye kutya oka yela, notashi dulika ashike ka ka itavele kutya osha kaka ngeenge ke litalele moshitengelelo. Ovaisrael vonale okwa li ve li ngaashi okamati ka tya ngaho eshi va mona Omhango yaKalunga okupitila momuprofeti waYe Moses. Omhango okwa li ye shi yelifa nawa kutya oulunde oko u li. “Osheshi ngeno hamhango ya li po, ngeno inandi shiiva oulunde,” osho omuyapostoli Paulus a yelifa. (Ovaroma 7:7-12) Ngaashi okamati take litalele moshitengelelo, mokulongifa Omhango mokulitala vo vene, Ovaisrael okwa li tava dulu okumona kutya kakwa li va koshoka momesho aJehova.
15. Oshike tashi hololwa ngeenge hatu litalele moshitengelelo shEendjovo daKalunga?
15 Mokulitalela moshitengelelo shEendjovo daKalunga nosho yo okudidilika omifikamhango dado, ohatu dulu okumona kutya fye inatu wanenena. (Jakob 1:23-25) Pashihopaenenwa, diladila kwaasho Jesus Kristus kwa li a lombwela ovahongwa vaye shi na sha nokuhola Kalunga nosho yo vakwao, ngaashi sha shangwa muMateus 22:37-40. Ovanhu inava shekuna tuu luhapu oshishonekwa moinima ei! Vahapu ihava kala nande nouyahame washa wopamaliudo molwaashi va dopa okuulika ohole yokuhola kuKalunga ile yokuhola vakwao.—Lukas 10:29-37.
LUNGAMENA OMAKOTO ASATANA!
16. Oshike hatu dulu okuninga opo tu henuke okukala oshihakanwa shomhangela yaSatana, nomolwashike eshi shidjuu?
16 Satana ota kendabala oku tu ningifa tu nyonene owina. (1 Johannes 3:8) Mbela ope na onghedi yonhumba yokuhenuka okukala oshihakanwa sheemhangela daye? Heeno, ndele eshi otashi tu pula opo tu kondjife oikala yokunyonena owina. Eshi kashipu molwaashi oikala yetu youlunde oyo twa dalwa nayo oi na eenghono. (Ovaefeso 2:3) Paulus okwa li e na okukondja a mana mo. Omolwashike? Omolwaashi oulunde owa kala muye. Ngeenge otwa hala okuhokiwa kuKalunga, nafye yo otu na okukondjifa oikala youlunde oyo i li mufye.—Ovaroma 7:14-24; 2 Ovakorinto 5:10.
17. Oshike hashi djuupaleke unene ekondjo okukondjifa oikala yetu youlunde?
17 Molwaashi Satana oha kongo alushe eemhito opo e tu hongolole tu tauluke eemhango daKalunga, okukondjifa oulunde kashi fi shipu. (1 Petrus 5:8) Mokuulika kutya oku na oshisho nOvakriste vakwao, Paulus okwa ti: “Onda tila, ngaashi Eva a hongaulwa kekotokelo leyoka, osho omadilongo eni taa nyonauka notaa efa ouyuki noukoshoki mokukala kweni naKristus.” (2 Ovakorinto 11:3) Satana ota longifa omakoto a faafana kunena. Ota kendabala opo a kune eembuto domalimbililo okulimbililwa ouwa waJehova nosho yo omauwa oo haa di mokudulika koipango yaKalunga. Ondiaboli otai kendabala okulongifa oikala yetu youfyuululwalunde noku tu shikulifa ondjila younhwa, olwisho, outondwe nosho yo okayova.
18. Satana oha longifa ngahelipi ounyuni mokuxumifa komesho oulunde?
18 Limwe lomomakoto oo Ondiaboli hai longifa oku tu kondjifa olo ounyuni oo u li mepangelo layo. (1 Johannes 5:19) Ngeenge inatu lungama, ovanhu va nyonauka nove he fi ovayuki mounyuni ou we tu dingilila, otave ke tu fininika tu ye mondjila youlunde oyo tai nyono omifikamhango daKalunga dopaenghedi. (1 Petrus 4:3-5) Vahapu ohave lipwililikile eemhango daKalunga nohava anye nokuli okupwilikina komaliudo avo nohauxuuninwa otave a kukutike. (Ovaroma 2:14, 15; 1 Timoteus 4:1, 2) Vamwe mokweendela ko kwefimbo ohava tameke okushikula ondjila oyo nokuli nomaliudo avo inaa wanena itae va pitike ve i shikule.—Ovaroma 1:24-32; Ovaefeso 4:17-19.
19. Omolwashike inashi wana okukala ashike nonghalamwenyo ya koshoka?
19 Okukala nonghalamwenyo ya koshoka mounyuni ou oshinima sha denga mbada. Ndelenee shihapu osha pumbiwa opo tu hokiwe kOmushiti wetu. Otu na okukala twa itavela muKalunga notu na okukala tu udite tu na ongunga kuye. (Ovaheberi 11:6) Omuhongwa Jakob okwa shanga ta ti: “Ou e shii okulonga ouwa, ndele ye ite shi ningi, oye e netimba.” (Jakob 4:17) Heeno, okulipwililikila Kalunga noipango yaye owina oko oludi limwe loulunde.
20. Ongahelipi tashi dulika Satana a kendabale e ku imbe u longe osho sha yuka, ndele oshike tashi ke ku kwafela u kondjife omafininiko a tya ngaha?
20 Satana otashi dulika e ku tukululile epataneko okupataneka eenghendabala doye dokumona eshiivo lokushiiva Kalunga okupitila mokukonakona kwoye Ombibeli. Otwe lineekela shili kutya omafininiko a tya ngaha itae ke ku kelela u longe eshi sha yuka. (Johannes 16:2) Ndele nande ovapangeli vahapu kwa li va itavela Jesus pefimbo loukalele waye, inave mu hepaulula molwaashi okwa li va tila va kale tava henukwa kovanhu vomoulikumwe wavo. (Johannes 12:42, 43) Satana oha kendabala noku he na onghenda opo a tilife keshe oo ta kongo eshiivo lokushiiva Kalunga. Ndelenee ou na okudimbuluka alushe nokukala nolupandu loinima ikumwifi oyo Jehova a ninga. Otashi dulika nokuli to dulu okukwafela ovapataneki va kale nolupandu la faafana.
21. Ongahelipi hatu dulu okufinda ounyuni nosho yo oikala yetu vene youlunde?
21 Fimbo ashike inatu wanenena, ohatu kala hatu nyono. (1 Johannes 1:8) Ndele nande ongaho, otu na ekwafo molwoodi eli. Heeno, ohatu dulu okukala ovafindani mekondjo letu okukondjifa omunawii, Satana Ondiaboli. (Ovaroma 5:21) Pexulilo loukalele waJesus kombada yedu, okwa ladipika ovashikuli vaye neendjovo edi: “Mounyuni omu li mo mu noudjuu, ndelenee kaleni nomwenyo muwa, Ame onda finda ounyuni.” (Johannes 16:33) Nokuli novanhu ovo inava wanenena, otava dulu okufinda ounyuni kekwafo laKalunga. Satana iha kwata ko ovo tave mu kondjifa ‘notava dulika kuKalunga.’ (Jakob 4:7; 1 Johannes 5:18) Ngaashi hatu ka mona, Kalunga okwa yandja omhito yokudja mo moulunde nefyo.
KONAKONA ESHIIVO LOYE
Satana Ondiaboli oye lyelye?
Omolwashike ovanhu hava kulupa nohava fi?
Oulunde oshike?
Satana oha kokele ngahelipi ovanhu va nyone owina kuKalunga?
[Efano la mana ko epandja pepandja 54]