Ohatu ka kala nokweenda medina laJehova Kalunga ketu

“Fye ohatu ka kala nokweenda medina [laJehova, NW] Kalunga ketu alushe fiyo alushe.” — MIKA 4:5.

1. Shi na sha nelihumbato lopaenghedi, onghalo oya li ngahelipi pefimbo laNoa, na Noa okwa li a yooloka ko ngahelipi kovanhu vopefimbo laye?

OMULUMENHU wotete oo a tumbulwa mOmbibeli a enda pamwe naKalunga okwa li Henok. Omutivali okwa li Noa. Ombibeli otai tu lombwele tai ti: “Noa okwa li omulumenhu omuyuki nokwa li e he noshipo mokati kovanhu vomounyuni waye. Noa okwa enda pamwe naKalunga.” (Genesis 6:9) Pefimbo laNoa, ovanhu vahapu ova li va efa po elongelokalunga la koshoka. Onghalo ii oya li ya naipikwa neenghono kovaengeli ve he fi ovadiinini ovo va li va ya momilele di he fi dopaushitwe novakainhu ndele tava dala oludalo hali ifanwa Ovanefilim, “ovanaenghono,” ile “ovalumenhu va tumbala” vopefimbo olo. Hano kashi kumwifa eshi ounyuni wa li wa yada elongifo leenghono! (Genesis 6:2, 4, 11) Ndele nande ongaho, Noa ka li e na oshipo nokwa li “omuudifi wouyuki.” (2 Petrus 2:5) Eshi Kalunga a li e mu lombwela a tunge onguluwato omolwokuxupifa eemwenyo, Noa okwa dulika ndele ta ‘ningi naanaa ngaashi Kalunga a tonga.’ (Genesis 6:22) Doshili, Noa okwa enda pamwe naKalunga.

2, 3. Noa okwe tu tulila po oshihopaenenwa shiwa shilipi kunena?

² Paulus okwa kwatela mo Noa momusholondodo waye weendombwedi didiinini, eshi a shanga a ti: “Meitavelo Noa, eshi a shiivifilwa inya inai monika natango, metilo liyapuki okwa tunga ongulu yomomeva, a xupife eumbo laye, nomeitavelo okwa tokola ounyuni nokwa ninga omufyuululi wouyuki tau di meitavelo.” (Ovaheberi 11:7) Kashi fi tuu oshihopaenenwa shiwa! Molwaashi Noa okwa li e na elineekelo kutya eendjovo daJehova otadi ka wanifwa, okwa li a longifa efimbo laye, eenghono daye nosho yo oiniwe yaye opo a wanife po oipango yaKalunga. Sha faafana, vahapu kunena ova efa po eemhito dokukala va tumbala mounyuni ou, ndele tava longifa efimbo lavo, eenghono davo nosho yo oiniwe yavo mokudulika keemhango daJehova. Eitavelo lavo olididilikwedi notali ka tya exupifo kuvo nosho yo kuvamwe. — Lukas 16:9; 1 Timoteus 4:16.

³ Okukala neitavelo tali longo osha li shidjuu kuNoa nosho yo koukwaneumbo waye ngaashi ashike sha li shidjuu kuHenok, xekulululwa yaNoa, oo a kundafanwa moshitukulwa sha tetekela. Pefimbo laNoa nosho yo pefimbo laHenok, ovalongelikalunga vashili ova li vanini momuvalu — ovanhu ashike vahetatu va li ovadiinini nova xupa mEyelu. Noa okwa li a udifa ouyuki mounyuni omo mwa li elongifo leenghono noluhaelo. Kakele kaasho, ye noukwaneumbo waye ova li va tunga onguluwato inenenene mokulilongekidila eyelu lomounyuni aushe, nonande kapa li oo a mona nale eyelu la tya ngaho. Osho osha li shikumwifa neenghono kovanhu ovo vali have va mono.

4. Jesus okwa popya shi na sha nepuko lilipi olo la li la ningwa kovanhu vopefimbo laNoa?

⁴ Shihokwifa, eshi Jesus a popya shi na sha nefimbo laNoa, ka li a popya kombinga yelongifo leenghono, yomalongelokalunga oipupulu ile yoluhaelo — nonande oinima oyo oya li omanyono a kwata moiti. Epuko olo Jesus a divilika ola li okuhapwilikina kwovanhu kelondwelo olo va li tava pewa. Okwa ti kutya ova li “hava li nohava nu, hava hombola nohava hombolifa, fiyo efiku olo Noa a ya mo monguluwato.” Oshike sha li sha puka shi na sha nokulya, nokunwa nosho yo okuhombola ile okuhombolwa? Ovanhu ova li ashike tava hafele onghalamwenyo “yakwalukeshe.” Ndele eyelu ola li tali ke uya, na Noa okwa li ta udifa ouyuki. Eendjovo daye nosho yo elihumbato laye oya li ngeno i na oku va londwela. Ndele nande ongaho, “inave shi shiiva, fiyo eyelu le uya nole va hanauna po aveshe.” — Mateus 24:38, 39.

5. Noa noukwaneumbo waye ova li va pumbwa omaukwatya elipi?

⁵ Ngeenge hatu diladila shi na sha nefimbo olo, otu wete kutya Noa okwa li a katuka onghatu yopandunge. Ndelenee fimbo Eyelu la li inali uya, osha li tashi pula ouladi okukala omunhu wa yooloka ko kuvamwe. Osha li sha pula Noa noukwaneumbo waye eitavelo la kola opo va tunge onguluwato inenenene nokutula mo oinamwenyo yomaludi aeshe. Mbela vamwe vomokangudu kovadiinini ovo ova li omafimbo amwe hava diladila kutya otava dulu okukala ve he na ko nasha, ndele tava kala ashike nokuhafela onghalamwenyo “yakwalukeshe”? Nokuli nonande otashi dulika oshinima osho sha li she ya momadiladilo avo, kasha li nande sha nghundipaleka oudiinini wavo. Konima yomido dihapu — omido dihapu di dule odo keshe umwe womufye te lididimike monghalelo ei yoinima —eitavelo laNoa ole mu xupififa mEyelu. Ndele Jehova okwa hanauna po ovanhu aveshe ovo va li tava hafele onghalamwenyo “yakwalukeshe” noinava shiiva eityo lefimbo olo vali mulo.

Ohatu pwilikine komalondwelo aJehova

9. Ongahelipi ounyuni wonena wa faafana naao wa li ko fimbo Eyelu inali uya?

⁹ Mefimbo laNoa, Jehova okwa hanaunine po ovanhu omolwelongifo leenghono linene lovanhu ovakolokoshi olo la li tali xwaxwamekwa kOvanefilim. Ongahelipi kunena? Mbela oku na elongifo leenghono linini shi dulife nale? Hasho nandenande! Natango, ngaashi ashike sha li pefimbo laNoa, ovanhu kunena ove lipyakidila noinima yavo yonghalamwenyo, tava kendabala okukala nonghalamwenyo “yakwalukeshe,” noinava hala okupwilikina komalondwelo oo taa yandjwa. (Lukas 17:26, 27) Mbela ope na etomheno olo tali tu ningifa tu kale twa limbililwa kutya Jehova ita ka hanauna po vali ovanhu? Ahowe.

10. (a) Elondwelo lilipi la yandjwa lwoikando momaxunganeko Ombibeli? (b) Otu na okukatuka onghatu yopandunge ilipi kunena?

¹⁰ Omido omafele fimbo Eyelu la li inali uya, Henok okwa li a xunganeka shi na sha nehanauno olo kwa li tali ke uya pefimbo letu. (Judas 14, 15) Jesus naye okwa popya shi na sha ‘noudjuu munene,’ oo tau ke uya. (Mateus 24:21) Ovaprofeti vamwe navo ova londwela shi na sha nefimbo olo. (Hesekiel 38:18-23; Daniel 12:1; Joel 2:31, 32) Membo lEhololo namo ohatu lesha mo efaneko la yela li na sha nehanauno olo laxuuninwa. (Ehololo 19:11-21) Tu li oohandimwe, ohatu hopaenene Noa notu li ovaudifi vouyuki. Ohatu pwilikine komalondwelo aJehova nohatu kwafele pahole ovanhu vakwetu opo navo ve a ude. Onghee hano, ngaashi Noa, ohatu ende pamwe naKalunga. Doshili, osha fimanenena opo keshe oo a hala omwenyo a twikile okweenda pamwe naKalunga. Ongahelipi hatu dulu oku shi ninga nonande ohatu shakeneke omafininiko efiku keshe? Otwa pumbwa okukala tu na eitavelo la kola mokuwanifwa kwelalakano laKalunga. — Ovaheberi 11:6.