Mbela ope na ngoo oo e na ko nasha naave shili?

Mbela ope na efimbo limwe wa li u udite owike nouhe na ekwafo lasha, pa fa pehe na oo e udite ko oupyakadi woye? Nonande ope na ovo ve shii oupyakadi woye, oho kala u udite kutya kape na oo e na ko nasha lela naave.

NGEENGE pa holoka oupyakadi, onghalamwenyo yetu otai dulu okukala ya fa oshikungulu osho itashi oka. Omafimbo amwe otashi dulika tu kale tu udite twa wililwa po neenghono koupyakadi wonhumba nokudiladila kutya katwa li twa wana okuhangwa koupyakadi wa tya ngaho. Otashi dulika tu kale tu udite kutya itatu dulu vali oku u lididimikila. Luhapu ohatu kala tu udite ngaho ngeenge twa yahamekwa pamaliudo, twa polimana, twa lemanena moshiponga shonhumba, tu na oudu woshinamenena ile twa hangwa keenghalo da yukila oko. Ohatu kala tu udite tuhe na ekwafo lasha nosho yo eteelelo, noihatu kala tu shii kutya natu ka konge ehekeleko kulyelye. Mbela ope na ngoo oo e na ko nasha nafye shili?

‘Kalunga kehekeleko alishe’ oku na ko nasha nafye

Ombibeli oya popya kutya Kalunga oye ‘Xe yefilonghenda naKalunga kehekeleko alishe.’ (2 Ovakorinto 1:3) Kalunga, oo edina laye Jehova, oku shii kutya otwa pumbwa ehekeleko. Ombibeli oya longifa oshitya “ehekeleko” lwoikando i dule pefele meenghedi di lili noku lili, naasho otashi tu shilipaleke kutya Kalunga ke shii ashike kutya otu li meenghalo da tya ngahelipi ndele okwa hala yo oku tu hekeleka. Osho otashi tu hekeleke okukala tu shii kutya Jehova Kalunga oku na ko nasha nafye, nonande vamwe ova kale va fa vehe udite ko omaupyakadi etu ile vehe na ko nasha nafye.

Oushili oo kutya Jehova oku na ko nasha novanhu pauhandimwe ou liwetikile nawa mOmishangwa. Ombibeli oya ti: “Omesho Omwene e li apeshe, ndee taa tale nokudidilika ava [vai] naava vawa.” (Omayeletumbulo 15:3) Sha faafana, Job 34:21 ota ti: “Omesho aye taa pashukile eendjila domunhu, ndee ta tale eenghatu daye adishe.” Jehova oha kala e wete keshe osho hatu ningi, kutya nee oshiwa ile oshii, noku shii yo eenghalo detu, nomolwaasho ota dulu okuninga keshe osho e wete kutya osha yuka. Osho osha kolekwa yo keendjovo domuprofeti Hanani odo a li a lombwela ohamba yOvajuda Asa, tadi ti: “Osheshi omesho Omwene taa tale edu alishe, opo a kwafe neenghono ovo have liameke kuye nomutima aushe.” — 2 Omafimbo 16:7, 9.

Jehova ohe tu konenene omolwetomheno limwe vali. Jesus okwa ti: “Kape na ou ta dulu okuuya kuame okuninga Tate, ou a tuma nge, te mu shili.” (Johannes 6:44) Jehova oku na ko nasha novanhu noha dulu okumona kutya omunhu okwa hala okushiiva kombinga yaye. Ngeenge omunhu okwa hala okushiiva kombinga yaye, ohe mu kwafele. Pashihopaenenwa, omukainhu umwe wokOrepublika yaDominika, okwa li a ya koshipangelo a ka tandwe omolwoudu wokankela. Fimbo a li moshipangelo, okwa li a ilikana Kalunga e mu kwafele opo a mone elongelokalunga lashili. Konima yaasho, omushamane waye okwa li e mu etela okabroshure ke na oshipalanyole, Kalunga Ota Pula Shike Kufye?a oko a li a pewa ongula yefiku olo kuumwe womEendombwedi daJehova oo a li e mu talela po peumbo laye. Omukainhu oo eshi a lesha okabroshure oko okwa li a mona kutya Kalunga okwa nyamukula eilikano laye. Okwa li a dimina okukonakona Ombibeli pamwe nOndombwedi, nomeni leemwedi hamano, okwa li e liyapulila Kalunga nokuninginifwa.

Membo lOmbibeli lOmapsalme, ohatu hange mo eendjovo dihapu tadi kumu omutima odo da shangwa kovashangi vOmapsalme vonale Ovaheberi, ngaashi ohamba David, odo da popya kutya Jehova oha file oshisho pahole ovapiya vaye. MEpsalme 56:9, ohamba David oya li ya ilikana kuKalunga ya ti: “Omahodi ange, we a pimhila moshimbudju shoye, heeno, shili, owe a nyolela membo loye.” Ngaashi tu shi wete mefaneko olo, otashi ulike kutya David okwa li e shii kutya Jehova ka li ashike e wete okumona oixuna kwaye ndele okwa li yo e shii kutya okwa kuma ngahelipi omaliudo aye. Jehova okwa li e shii kutya David okwa li ta yahama pamaliudo nokwa li a dimbuluka onghalo omo David a li, oyo ya li ye mu kwenifa. Doshili, Omushiti oku na ko nasha novanhu aveshe ovo tava kendabala okulonga ehalo laye, “ovo have liameke kuye nomutima aushe.”

Epsalme 23 olo li shiivike nawa nalo otali ulike kutya Kalunga ohe tu file oshisho pahole. Ovelishe yotete yEpsalme olo oya faafanifa Kalunga nomufita omunahole ya ti: “Omwene Oye omufita wange, ihandi pumbwa sha.” Omufita wokoilongo yokOushilo woPokati oha file oshisho odi keshe yomoufita waye, nohe di luku adishe omadina. Efiku keshe oha ifana odi keshe noku i fefenga nokutala ngeenge oi na apa ya mona oshiponga. Ngeenge okwa mono kutya oi na oshipute, oha xu po omaadi opo shi veluke diva. Ngeenge odi otai vele, omufita otashi dulika e i kwate noku i fininikila omuti. Ndele ite i efa ashike i kale ya nangala ndele tai fi. Efaneko olo otali ulike nawa nghee Jehova ha file oshisho ovo tave mu kongo.

Eilikano nosho yo enyumuko otai ulike kutya Kalunga oku na ko nasha nafye

Omapsalme oo nosho yo makwao vali amwe mahokwifa inaa shangwa ashike tu a leshe ngahenya noku a hafela. Ndele otae tu ulikile nghee ovapiya vaKalunga vonale va li va mbubulila Jehova omitima davo nokuulika kutya ova pumbwa ekwafo laye. Ova li yo va ulika olupandu lavo li na sha newiliko nosho yo omanangeko noupuna oo a li he va pe. Osho otashi ulike kutya ovapiya vaKalunga vonale ova li va itavela filufilu kutya Kalunga oku na ko nasha navo. Okulesha nokudilonga keendjovo davo tadi kumu omutima otashi ke tu kwafela nafye tu kale tu udite kutya Kalunga oku na ko nasha nafye. Oufembanghenda weilikano otau yandje oumbangi wa kola kutya Kalunga oku na ko nasha nafye.

Omafimbo amwe, otashi dulika tu kale twa wililwa po neenghono komaupyakadi ndele katu shii kutya natu ilikane hatu ti ngahelipi. Mbela osho otashi imbi Jehova a shiive omaupyakadi etu? Ovaroma 8:26 otava yandje enyamukulo tava ti: ‘Omhepo otai tu kwafa moungone wetu, osheshi katu shi shii eshi tu noku shi ilikana, ngaashi ngeno tu nokwiilikana, ndelenee omhepo oyo vene tai tu ilikanene nomikemo dihe shi kutumbulwa.’ Omushangwa oo otau tu lombwele kutya omailikano a nwefwa mo ovapiya vaJehova vonale otaa holola nghee hatu kala tu udite, na Jehova, “Omuudi womailikano,” ota dulu oku tu kwafela pakanghameno lomailikano oo. — Epsalme 65:3.

Eteelelo lenyumuko nalo otali tu shilipaleke kutya Kalunga oku na ko nasha novanhu pauhandimwe. Jesus Kristus okwa ti: “Efimbo tali uya, opo aveshe ava va kala meembila otava udu ondaka yaye [yaJesus]. Ndee tava holoka mo.” (Johannes 5:28, 29) Paityo loshitya shOshigreka osho sha li sha longifwa momushangwa oo, oshitya osho sha tolokwa eembila osha li shi na ngeno okutolokwa “eembiladimbuluko” (NW). Outumbulilo eembiladimbuluko otau yandje ediladilo kutya Kalunga ota ka dimbuluka onghalamwenyo aishe yomunhu oo a fya.

Diladila ashike shi na sha nokunyumuna omunhu, Kalunga oku na okukala e shii keshe shimwe kombinga yomunhu oo ta nyumunwa, mwa kwatelwa olupe laye, omaufyuululwakwatya aye nosho yo omaukwatya oo a li a kulika monghalamwenyo noinima aishe oyo a li e shii. (Markus 10:27) Kalunga iha dimbwa ovanhu va tya ngaho, nonande napa pite omido omayovi. (Job 14:13-15; Lukas 20:38) Onghee hano, ovanhu omamiliyona omayovi ovo va fya ove li medimbuluko laJehova Kalunga, naasho oshi li oumbangi kutya Kalunga oku na ko nasha nafye pauhandimwe.

Jehova oha yandje ondjabi

Oshike tu na okuninga opo Kalunga e tu file oshisho pahole noku kale e na ko nasha nafye? Tete, otu na okuulika kutya otwe mu lineekela nohatu dulika kuye notu na eitavelo muye. Omuyapostoli Paulus okwa popya kutya okukala tu na eitavelo osha pambafana nokufilwa oshisho kuKalunga. Okwa ti: “Kape na ou ta dulu okuwapalela Kalunga, ngenge kape neitavelo, osheshi ou ta ehene kuKalunga e nokwiitavela nokutya, oko e li, naava tave mu kongo, ote va pe ondjabi.” — Ovaheberi 11:6.

Didilika kutya eitavelo olo hali hafifa Kalunga ola kwatela mo oinima yopavali. Shotete, otu na ‘okwiitavela kutya Kalunga oko e li’ nonokutya oye Omupangeli wetu Munenenene, oo twa wana okukala hatu dulika kuye noku mu longela. Oshitivali, otu na okwiitavela kutya ‘ava tave mu kongo, ote va pe ondjabi.’ Eitavelo lashili ola kwatela mo okwiitavela kutya Kalunga oku na ko nasha nonghalonawa yovanhu aveshe ovo tava kendabala okulonga ehalo laye note ke va pa ondjabi. Ngeenge owa kala ho lesha Eendjovo daKalunga nokukala ho endafana naavo hava dulika kuye, naave oto ka kala u na eitavelo olo tali ke ku pe fa ondjabi kuKalunga note ke ku fila oshisho pahole.

Ovanhu vahapu kunena ova itavela kutya Kalunga ke na ko nasha novanhu. Ndele ngaashi twe shi mona, Ombibeli oya popya sha yela kutya Kalunga oku na ko nasha filufilu naavo tava ulike kutya ove mu itavela. Nonande onghalamwenyo kunena oi yadi omaupyakadi noisho, nope na oinima ihapu oyo hai tu nyemateke noku tu yahameka pamaliudo, inatu pumbwa okuteka omukumo, molwaashi Jehova Kalunga oku na ko nasha nafye. Onghee hano, ote tu shivi pahole tu konge ekwafo kuye. Omupsalme umwe okwa ti: “Omutengi woye u undulila kOmwene, Ye ote ku kalele noshisho. Oye ita efa nande omuyuki a kale alushe nokutengauka.” — Epsalme. 55:23.

[Eshangelo lopedu]

[Oshimhungu/Efano pepandja 27]

Omishangwa odo tadi dulu okupameka eitavelo loye kutya Kalunga ohe ku file oshisho pahole

“Omesho Omwene taa tale edu alishe, opo a kwafe neenghono ovo have liameke kuye nomutima aushe.” — 2 OMAFIMBO 16:9

“Omahodi ange, we a pimhila moshimbudju shoye, heeno, shili, owe a nyolela membo loye.” — EPSALME 56:9

“Omwene Oye omufita wange, ihandi pumbwa sha.” — EPSALME 23:1

“Oove, Omuudi womailikano, ombelela aishe i nokuuya kuove.” — EPSALME 65:3

“Ove ngeno u ifane, ame nohandi ku nyamukula, Ove ho djuulukwa oshilonga shomake oye.” — JOB 14:15

“Ou ta ehene kuKalunga e nokwiitavela nokutya, oko e li, naava tave mu kongo, ote va pe ondjabi.” — OVAHEBERI 11:6

“Omutengi woye u undulila kOmwene, Ye ote ku kalele noshisho. Oye ita efa nande omuyuki a kale alushe nokutengauka.” — EPSALME 55:23