Hoolola omalihafifo oo taa hafifa Jehova

Jehova ‘oKalunga oo ha kala alushe a hafa.’ (1 Timoteus 1:11) Okwa hala tu kale twa hafa, notu tyapule onghalamwenyo. Ohashi mu hafifa, ngeenge otwa kongo efimbo lokufuda po, ngeenge twa dja koilonga. Moshileshwa eshi, ohatu ka tala nghee hatu dulu okulongifa efimbo letu moinima oyo tai tu etele ehafo notai hafifa Jehova, ngeenge hatu fuda po.

1. Oshike twa pumbwa okudiladila kombinga yasho, ngeenge hatu hoolola omalihafifo?

Oshike u hole okuninga pefimbo lefudepo? Vamwe ove hole okulongifa efimbo lavo lefudepo mokukala meumbo tava lesha omambo, tava pwilikine omusika, tava tale eemuvi, ile nokuli tava longifa ointaneta. Vamwe ove hole okulongifa efimbo lavo lefudepo mokuhafela pamwe nookaume, oku ka enda, oku ka yowa, ile okudana omaudano onhumba. Kashi na nee mbudi kutya otwa hoolola okuninga shike, otwa pumbwa okushilipaleka kutya omalihafifo oo twa hoolola otaa “wapalele Omwene.” (Ovaefeso 5:10) Osha fimana okuuda ko nawa oshinima osho, molwaashi omalihafifo mahapu kunena ohaa kala a kwatela mo oinima oyo Jehova e tonde, ngaashi elongifo leenghono, oluhaelo, ile oumhulile. (Lesha Epsalme 11:5.) Oshike tashi dulu oku tu kwafela tu hoolole omalihafifo etu pandunge?

Ngeenge otwa hoolola ookaume ovo ve hole Jehova, otava dulu oku tu nwefa mo nawa notava dulu oku tu kwafela tu hoolole omalihafifo oo taa wapalele. Moshileshwa sha dja ko, otwe lihonga kutya ‘otu na okweenda novanongo, opo nafye yo tu ninge ovanongo.’ Mepingafano naasho, ngeenge otwa kala hatu endafana novanhu ovo vehe hole omifikamhango daKalunga, ohatu “ka laipala.”— Omayeletumbulo 13:20.

2. Omolwashike sha fimana okukala twa lungama tuha longife unene efimbo lihapu momalihafifo?

Nonande omalihafifo oo twa hoolola inaa nyika oshiponga, otwa pumbwa okukala twa lungama, opo tuha longife unene efimbo lihapu muo. Ngeenge otwe lipwililikile oshinima osho, otashi dulika tuha ka mone efimbo la wana lokuninga oinima oyo ya fimanenena. Ombiibeli oye tu ladipika tu kale hatu ‘longifa nawa efimbo letu.’— Lesha Ovaefeso 5:15, 16.

KONAKONA MOULE

Lihonga nghee to dulu okuhoolola omalihafifo oye pandunge.

3. Henuka omalihafifo oo a nyika oshiponga

Omolwashike twa pumbwa okuhoolola omalihafifo etu pandunge? Dana OKAVIDIO, ndele tamu kundafana omapulo taa shikula.

OKAVIDIO: Ondi na okuhoolola omalihafifo oludi lilipi? (4:39)

• Ongahelipi omaudano okulidenga, oo a li haa ningwa muRoma shonale, a faafana nomalihafifo amwe okunena?

• Ngaashi sha ulikwa mokavidio, oshike osho Danny e lihonga kombinga yomalihafifo?

Lesha Ovaroma 12:9, ndele tamu kundafana epulo tali shikula:

• Ongahelipi ovelishe ei tai ku kwafele u hoolole omalihafifo taa wapalele?

Oinima imwe ilipi Jehova e tonde? Lesha Omayeletumbulo 6:16, 17 nosho yo Ovagalati 5:19-21. Konima eshi mwa lesha omushangwa keshe, kundafaneni epulo tali shikula:

• Oinima ilipi ya tumbulwa meevelishe odo tai hangwa momalihafifo kunena?

Nghee to dulu okuhoolola omalihafifo pandunge

Lipula kutya:

• Okwa kwatela mo shike? Mbela okwa kwatela mo oinima oyo Jehova e tonde?

• Onaini ndi na okukufa ombinga muo? Mbela ohaa i moshipala oinima oyo ya fimanenena?

• Oolyelye ndi na okukufa ombinga navo? Mbela ohaa ningifa nge ndi kale ndi na ekwatafano novanhu ovo vehe hole Jehova?

Osha fimana okulikaleka kokule noinima oyo ya nyika oshiponga. Onghee otwa pumbwa okuhenuka okukufa ombinga momalihafifo oo tashi dulika itae tu wapalele

4. Longifa efimbo loye pandunge

OKAVIDIO: Efimbo loye oho li longifa mushike? (2:45)

• Nonande omumwatate, oo a ulikwa mokavidio, ka li ta tale sha sha puka, mbela oupyakadi owa li peni shi na sha nanghee ha longifa efimbo laye lefudepo?

Lesha Ovafilippi 1:10, ndele tamu kundafana epulo tali shikula:

• Ongahelipi ovelishe ei tai dulu oku tu kwafela tu hoolole kutya efimbo li fike peni hatu ka longifa momalihafifo?

5. Hoolola omalihafifo oo taa wapalele

Nonande Jehova ina hokwa omalihafifo amwe, ope na oinima ihapu oyo hatu dulu okuhafela. Lesha Omuudifi 8:15 nosho yo Ovafilippi 4:8, ndele tamu kundafana epulo tali shikula:

• Mbela ou hole omalihafifo elipi, oo inaa nyika oshiponga?

ENGONGO

Jehova okwa hala tu hoolole nokuhafela omalihafifo oo mawa.

Eendululo

• Omalihafifo oludi lilipi Ovakriste ve na okuhenuka?

• Omolwashike wa pumbwa okulungamena efimbo olo ho longifa momalihafifo?

• Omolwashike sha fimana okuhoolola omalihafifo oo taa hafifa Jehova?

TALA OUYELELE WA WEDWA PO

Konakona kutya olyelye e na oshinakuwanifwa shoku tu hoololela omalihafifo oo ohatu kufa ombinga muo.

“Mbela Eendombwedi daJehova ohadi tula po eendjidikila di na sha neemuvi donhumba, omambo ile omaimbilo?” (Oshitukulwa shi li ko jw.org)

Tala nghee to dulu okuhoolola pandunge omalihafifo oo to dulu okukufa ombinga muo.

“Omalihafifo oo ho kufa ombinga muo ohae ku etele ngoo ouwa?” (Oshungonangelo, 15 Oktoba 2011)

Mehokololo “Onda li yo nda efa po outondwe wokutonda oilumbu,” tala nghee omulumenhu umwe a lundulula omalihafifo oo kwa li ha kufa ombinga muo.

“Ombibeli ohai lundulula onghalamwenyo yovanhu” (Oshungonangelo, 1 Marsa 2010)

Tala nghee ina omudali a ninga etokolo lopandunge li na sha nokuhenuka okuhoolola omalihafifo oo a kwatela mo omahokololo e na sha neendemoni.

Henuka omalihafifo oo a kwatela mo oumhulile (2:02)