“Omhango youwanghenda” nai amene elaka loye

‘Okanya kaye te ka makulile eendjovo dounongo, nomhango youwanghenda i li kelaka laye.’ — OMAYEL. 31:26, yelekanifa no-NW.

1, 2. (a) Ovalongeli vaJehova otava ladipikwa va kulike oukwatya ulipi? (b) Oshike tashi ka kundafanwa moshitukulwa eshi?

OHAMBA Lemuel yonale oya li ya pewa kuina omayele a kwata moiti oo a li a kwatela mo omaukwatya mawa oo e na okukala e niwe komukulukadi muwa. Lemuel okwa li a lombwelwa taku ti: ‘Okanya kaye te ka makulile eendjovo dounongo, nomhango youwanghenda i li kelaka laye.’ (Omayel. 31:1, 10, 26, yelekanifa no-NW.) Ouwanghenda oo oukwatya muwa oo omukainhu omunaendunge nosho yo aveshe ovo va hala okuhafifa Jehova Kalunga ve na okukala hava ulike mokupopya kwavo. (Lesha Omayeletumbulo 19:22.) Ouwanghenda ou na okukala u liwetikile mokupopya kwovalongelikalunga vashili aveshe.

² Ouwanghenda oshike? Oolyelye ve na okuulikilwa ouwanghenda? Oshike tashi ke tu kwafela tu kale tu na ‘omhango youwanghenda’ kelaka letu? Ongahelipi okuninga ngaho taku dulu okukuma onghedi omo hatu kundafana noilyo yomaukwaneumbo etu nosho yo Ovakriste vakwetu?

Ouwanghenda oo hau ulikwa komunhu te linyengifwa kohole i na oudiinini

3, 4. (a) Ouwanghenda oshike? (b) Ouwanghenda owa yooloka ko ngahelipi kolune lopanhu?

³ Ouwanghenda owa kwatela mo omaukwatya ngaashi ohole nolune. Owa kwatela mo olune, sha hala okutya, okukala u na ko nasha navamwe noku shi ulika moku va kwafela nokupopya navo eendjovo da diladilwa nawa. Molwaashi ohole nayo oya kwatelwa mo mouwanghenda, okuulika ouwanghenda otashi pula omunhu a kale e na ko nasha nonghalonawa yavamwe molwaashi e va hole. Ndele oshitya shomelaka lopehovelo osho sha tolokwa ouwanghenda otashi ti shihapu shihe fi ashike olune olo la dja mohole. Ouwanghenda oo okukala wa hala okuningila umwe ouwa, to shi ningi nehalo liwa nokukala omudiinini kuye fiyo osheshi osho wa lalakanena shi na sha nomunhu oo sha wanifwa.

⁴ Ashike ouwanghenda owa yooloka ko kolune monghedi imwe vali. Olune lopanhu olo inali kanghamena kohole i na oudiinini ohali dulu okuulikilwa novaendanandjila. Omuyapostoli Paulus nosho yo ovanhu 275 ovo va li pamwe naye moshikepa ya teka ova li va ulikilwa olune lopanhu kovakalimo vokokanhunhu kaMelite, nonande ovanhu va tya ngaho kava li ve va shii nande onale. (Oilonga 27:37–28:2) Mepingafano naasho, ouwanghenda ohau ulikilwafana kovanhu ovo ve na nale ekwatafano la kola nove li nale ookaume.a Ovakeni ova li va ulikila ouwanghenda “ovana aveshe Ovaisrael eshi va dja muEgipti.” — 1 Sam. 15:6.

Otwa pumbwa okudilonga nokwiilikana opo tu dule okuulika ouwanghenda

5. Oshike tashi dulu oku tu kwafela tu kale hatu pangele elaka letu?

⁵ Kashipu okuulika ouwanghenda ngeenge hatu popi. Omuhongwa Jakob okwa popya shi na sha nelaka a ti: “Elaka kape na ou ta dulu oku li deula; olo owii u he na nande etulumuko, li yadi oudiyo tau dipaa.” (Jak. 3:8) Ndele mbela oshike tashi dulu oku tu kwafela tu pangele elaka letu olo lidjuu neenghono okupangela? Eendjovo daJesus odo a li a ula ovawiliki vomalongelokalunga vopefimbo laye otadi tu kwafele shi na sha naasho. Okwa ti: “Eshi shi yadi momutima, osho tashi popifa okanya.” (Mat. 12:34) Ngeenge otwa hala okukala hatu ulike ouwanghenda mokupopya kwetu, otwa pumbwa okukulika oukwatya wa tya ngaho momitima detu. Paife natu ka taleni nghee okudilonga nosho yo eilikano tai dulu oku tu kwafela tu ninge ngaho.

6. Omolwashike tu na okudilonga nolupandu kombinga yoilonga yaJehova youwanghenda?

⁶ Ombibeli oya ti kutya Jehova Kalunga ‘omunene mouwanghenda.’ (Ex. 34:6) Omupsalme umwe okwa imba a ti: “Omwene, edu oli yadi ndoo ouwanghenda woye.” (Eps. 119:64) Omishangwa odi na omahokololo mahapu e na sha nanghee Jehova a li a ulikila ovalongeli vaye ouwanghenda. Okudilonga nolupandu ‘koinenelonga yOmwene’ otaku dulu okufindila mufye ehalo lokukulika oukwatya oo wopakalunga. — Lesha Epsalme 77:12.

7, 8. (a) Jehova okwa li a longela Lot noukwaneumbo waye oilonga youwanghenda ilipi? (b) David okwa li e udite ngahelipi eshi a li a ulikilwa ouwanghenda kuKalunga?

⁷ Pashihopaenenwa, diladila kombinga yanghee Jehova a li a xupifa omutekulu waAbraham, Lot noukwaneumbo waye eshi a li pokuhanauna po Sodom, oshilando omo va li hava di. Eshi efimbo lehanauno la li la ehena popepi, ovaengeli ovo va li ve uya kuLot ova li ve mu ladipika a dje mo moshilando osho diva pamwe noukwaneumbo waye. Ombibeli oya ti: “[Lot] okwa ongaaonga natango. Opo nee [ovaengeli] ve mu kwata nomwalikadi waye novana vaye oukadona vavali momaoko, osheshi Omwene okwa li a hala oku mu fila onghenda. Ndele vo ve va pitifa mo ndele ve va twala pondje yoshilando.” Mbela omitima detu ihadi kumwa ngeenge hatu dilonga koshiningwanima sha tya ngaho nokulinyengifwa tu dimine kutya osha li euliko louwanghenda waKalunga? — Gen. 19:16, 19.

⁸ Tala yo koshihopaenenwa shohamba David yaIsrael shonale oyo ya imba ya ti: “[Jehova ota] dimi po owii aushe, ndee te ku velula komaudu oye aeshe.” David kali tuu a hafa eshi a li a diminwa po kuJehova omolwokunyona kwaye naBatseba! David okwa li a tanga Jehova a ti: “Apa pe fike oule weulu kombada yedu, opo ope fike yo ounene wouwanghenda waye kombada yaava have mu tila.” (Eps. 103:3, 11) Okudilonga komahokololo oo opamishangwa nosho yo amwe vali, otashi tu linyengifa tu kale tu na olupandu lokupandula ouwanghenda waJehova noku mu tanga noku mu pandula. Ngeenge otwa kala tu na omitima di na olupandu, ohatu ka kala twa hala okuhopaenena Kalunga kashili. — Ef. 5:1.

9. Oshinima sha fimana shilipi shi na okulinyengifa ovapiya vaJehova va kale hava ulike ouwanghenda monghalamwenyo yavo yakeshe efiku?

⁹ Oihopaenenwa yopamishangwa otai ulike kutya Jehova oha ulikile ovanhu ouwanghenda waye ile ohole yaye i na oudiinini ovo ve na nale ekwatafano naye. Ndele mbela ongahelipi kwaavo vehe na ekwatafano naKalunga omunamwenyo? Mbela Jehova oku li omukwanyanya noke na olune novanhu va tya ngaho? Hasho nandenande! Lukas 6:35 okwa ti: “[Kalunga] oku na onheni naava ve he shii okupandula naava [vai].” Ombibeli oya ti vali: ‘Etango laye ote li pitifile ava vai naava vawa, nodula ote i lokifile ovayuki naava vehe fi ovayuki.’ (Mat. 5:45) Fimbo twa li inatu lihonga oshili noku i tula moilonga, otwa li hatu ulikilwa olune kuKalunga olo ha ulikile ovanhu aveshe. Ndele eshi twa ninga ovalongeli vaye, ohe tu ulikile ohole i na oudiinini ile ouwanghenda waye tau kalelele. (Lesha Jesaja 54:10.) Inatu pandula tuu omolwoshinima sha tya ngaho! Osho oshi na oku tu linyengifa neenghono tu kale hatu ulike ouwanghenda mokupopya kwetu nosho yo meembinga dikwao donghalamwenyo yetu yakeshe efiku.

10. Omolwashike eilikano tali dulu oku tu kwafela neenghono tu kulike ouwanghenda?

¹⁰ Eilikano otali dulu oku tu kwafela neenghono tu kulike ouwanghenda. Ohatu dulu okukulika ouwanghenda momitima detu ngeenge otwa efa tu nwefwe mo komhepo iyapuki yaJehova. Onghedi ya denga mbada omo hatu dulu okupewa omhepo iyapuki yaJehova oyo eilikano. (Luk. 11:13) Oshiwa okukala hatu ilikana Kalunga lwoikando opo e tu pe omhepo yaye nokutambula ko ewiliko layo. Hano osha yela kutya, osha fimanenena okukala hatu dilonga nokwiilikana ngeenge otwa hala omhango youwanghenda i kale kelaka letu.

Nghee ovalihomboli tava dulu okuulikilafana ouwanghenda mokupopya kwavo

11. (a) Otu shi shii ngahelipi kutya Jehova okwa hala ovashamane va kale hava ulikile ovakulukadi vavo ouwanghenda? (b) Omonghedi ilipi omhango youwanghenda tai dulu okukwafela omushamane a pangele elaka laye?

¹¹ Omuyapostoli Paulus okwa kumaida ovashamane a ti: “Holeni ovakainhu veni ngaashi Kristus e hole eongalo, nokwe liyandja molwalo.” (Ef. 5:25) Paulus okwa dimbulukifa yo ovashamane osho Jehova a li a lombwela Adam naEva, a ti: “Omulumenhu e nokufiya po xe naina nokulimangela komukainhu waye, vo vavali tava ningi omunhu umwe.” (Ef. 5:31) Osha yela kutya Jehova okwa teelela ovashamane va kale ovadiinini kovakulukadi vavo, tave va ulikile alushe ouwanghenda. Omushamane oo elaka laye hali wilikwa kohole i na oudiinini iha nyaneke pomutenya omapuko omukulukadi waye pokati kovanhu ile a popye naye nodino, ndele oha kala a hala oku mu pandula. (Omayel. 31:28) Ngeenge opa holoka okuhaudafana kwonhumba, ouwanghenda ohau linyengifa omushamane a pangele elaka laye opo aha fife ohoni omukulukadi waye.

12. Ongahelipi okupopya kwomukulukadi taku dulu okuulika kutya omhango youwanghenda ohai pangele elaka laye?

¹² Omhango youwanghenda oi na yo okukala tai pangele elaka lomukulukadi. Okupopya kwaye kaku na okunwefwa mo komhepo younyuni. Ngeenge omukulukadi oha ‘fimaneke omulumenhu waye,’ ohe mu popile mouwa puvamwe, naasho otashi ka ningifa vamwe va kale ve mu fimaneka neenghono shi dulife nale. (Ef. 5:33) Omukulukadi oha henuka okuhatwakumwe nomushamane waye ile okupataneka omaetepo aye moipafi younona, opo aha ningife ounona va kale va dina xe. Ponhele yaasho, oha kendabala oku ka kundafana naye ngeenge ve li ovo aveke. Ombibeli oya ti: “Ounongo wovalikadi tau diki eumbo.” (Omayel. 14:1) Eumbo lavo ohali kala onhele ihafifa notai tulumukifa oukwaneumbo aushe.

13. Openi unene tu na okuulika ouwanghenda, nongahelipi hatu dulu oku shi ninga?

¹³ Ovalihomboli ove na okutwikila okulongifa elaka lavo monghedi oyo tai ulike kutya ova fimanekafana nokuli nongeenge ve li ovo aveke momaumbo avo. Paulus okwa ti: “Efeni paife ei aishe: ehandu nepiyaano nowii nesheko neendjovo dohoni tadi piti momakanya eni.” Okwa weda ko vali a ti: ‘Djaleni efilonghenda lomomutima, ombili, elininipiko, engungumano noutalanheni, djaleni ohole, oyo oshimangifo sha wana shoku mu manga kumwe.’ (Kol. 3:8, 12-14) Ngeenge ounona ohava mono ovadali vavo tava ulikilafana ouwanghenda monghedi yavo yokupopya, ohava kala va pepelelwa noshi na oupu va ka hopaenene onghedi yokupopya yovadali vavo.

14. Omonghedi ilipi omitwe domaukwaneumbo tadi dulu okulongifa elaka lado di hekeleke ovo ve li mepashukilo lado?

¹⁴ Omupsalme umwe okwa shanga kombinga yaJehova a ti: ‘Kwafa, onghenda [“ouwanghenda,” NW] yoye i hekeleke nge.’ (Eps. 119:76) Onghedi imwe ya tongomana omo Jehova ha hekeleke oshiwana shaye oyo oku shi kumaida noku shi wilika. (Eps. 119:105) Ongahelipi omitwe domaukwaneumbo tadi dulu okumona ouwa moshihopaenenwa shaTate yetu womeulu nokulongifa elaka lado okuhekeleka ovo ve li mepashukilo lado? Otadi dulu okuninga ngaho mokuyandja ewiliko nosho yo etwomukumo olo la pumbiwa. Ekonakono lOukwaneumbo oli li omhito iwa yokumona omamona opamhepo. — Omayel. 24:4

Kala ho ulikile ovaitaveli vakweni ohole i na oudiinini

15. Ongahelipi ovakulunhuongalo nosho yo ovo va pyokoka pamhepo tava dulu okulongifa elaka lavo opo va amene vamwe meongalo?

¹⁵ Ohamba David oya li ya ilikana ya ti: “Onghenda noudiinini woye ohau amene nge alushe.” (Eps. 40:12) Ongahelipi ovakulunhuongalo Ovakriste nosho yo vamwe ovo va pyokoka pamhepo meongalo tava dulu okuhopaenena Jehova shi na sha naasho? Okukala hatu longifa elaka letu tu kwafele vamwe va shiive osho Ombibeli tai ti oshi li euliko louwanghenda. — Omayel. 17:17.

16, 17. Omeenghedi dimwe dilipi hatu dulu okuulika kutya elaka letu ohali pangelwa komhango youwanghenda?

¹⁶ Mbela otu na okuninga po shike ngeenge otwa didilike kutya Omukriste mukwetu umwe ota katuka onghatu oyo ihe li metwokumwe nomafinamhango Ombibeli? Mbela ouwanghenda kau na oku tu linyengifa tu longife elaka letu opo tu mu pukulule? (Eps. 141:5) Ngeenge otwa shiiva kutya omwiitaveli mukwetu umwe okwa nyona enyono la kwata moiti, ohole i na oudiinini oi na oku tu linyengifa tu ladipike omunyoni oo a “ifane ovakulunhu veongalo,” opo va dule oku mu ‘ilikanena ndele tave mu vaeke omaadi medina lOmwene.’ (Jak. 5:14) Ngeenge omunyoni oo okwa kala ina ya ko kovakulunhuongalo, ndele hatu kala inatu lombwela ovakulunhuongalo kombinga yenyono olo, kungaho itatu ulike ouwanghenda. Vamwe vomufye otashi dulika va teka omukumo, va fya oudja, ve udite vehe na oshilonga ile va nyematekwa neenghono. Onghedi iwa omo hatu dulu okuulika kutya otu na ouwanghenda kelaka letu oyo ‘okupopya nehekeleko neemwenyo da polimana.’ — 1 Tes. 5:14, NW.

¹⁷ Mbela otu na okulinyenga ngahelipi ngeenge otwa udu omalwaambo onhumba e na sha novaitaveli vakwetu taa tandavelifwa kovatondi vaKalunga? Ponhele yokukala twa limbililwa oudiinini wovamwatate, katu na okutambula ko omapopyo a tya ngaho, ile okutya sha ile ngeenge otashi shiiva, natu pule omunhu oo ngeenge oku na ngoo oushili waasho ta popi. Ngeenge ovatondi voshiwana shaKalunga otava kongo ovamwatate vonhumba opo ve va ningile owii, ohole yetu i na oudiinini yokuhola ovamwatate oi na oku tu linyengifa tuha yandje ouyelele wa tya ngaho. — Omayel. 18:24.

Omunhu oo ha ulike ‘ouwanghenda ota ka mona omwenyo’

18, 19. Omolwashike omhango youwanghenda i na alushe okukala kelaka letu ngeenge hatu ungaunga novalongelikalunga vakwetu?

¹⁸ Otu na alushe okuulika ohole i na oudiinini ngeenge hatu ungaunga novalongelikalunga vakwetu. Otu na yo okukala hatu ulike alushe ouwanghenda mokupopya kwetu, nokuli nomeenghalo didjuu. Jehova okwa li a nyemata eshi ouwanghenda wOvaisrael wa li wa ninga ‘ngaashi omume tai yaumuka.’ (Hos. 6:4, 6) Mepingafano naasho, Jehova oha hokwa ovanhu ovo hava ulike alushe ouwanghenda. Natu ka tale nghee ha nangeke noupuna ovo hava lalakanene ouwanghenda.

¹⁹ Omayeletumbulo 21:21 okwa ti: “Ou ta lalakanene ouyuki [nouwanghenda, NW], ota ka mona omwenyo, ouyuki nefimano.” Omunhu a tya ngaho ota ka mona omanangeko noupuna mahapu, mwa kwatelwa omwenyo waalushe. Jehova ote mu kwafele opo a ka “mone omwenyo waalushe.” (1 Tim. 6:12, 19) Onghee hano, natu kendabaleni ngaashi hatu dulu tu kale hatu “ulikilafaneni ouwanghenda.” — Sak. 7:9, NW.

[Eshangelo lopedu]

Oto dulu okuyelifa?

• Ouwanghenda oshike?

• Oshike tashi ke tu kwafela tu kale hatu wilikwa komhango youwanghenda ngeenge hatu popi navamwe?

• Ongahelipi ovalihomboli tava dulu okuulikilafana ohole i na oudiinini mokupopya kwavo?

• Oshike hashi ulike kutya omhango youwanghenda oi li kelaka letu ngeenge hatu ungaunga novaitaveli vakwetu?

[Efano pepandja 25]

David okwa li ha tange ouwanghenda waJehova

[Efano pepandja 26]

Mbela ohamu ningi ngoo Ekonakono lOukwaneumbo pandjikilile?