‘Yandja elitulemo li dule loshito’

OIPONGA yeetuwa ohai twaalele eemwenyo dovanhu 37 000 omudo keshe mOilongo yaHangana amuke. Ovashiivi nawa otava ti kutya mahapu omomafyo oo okwa li taa dulu okukelelwa ngeno ovashingi ova yandjele elitulemo la wana mondjila. Ovanaihauto vamwe ohava piyaanekwa komadidiliko nosho yo koipelende yomafano ile kokulongifa eengodi davo dopeke. Ope na yo ovo ve liefela mokukala tava li fimbo tava shingi. Meenghalo adishe odo, omapiyaaneko otaa dulu okweeta oshiponga.

2, 3. Ekumaido lilipi Paulus a yandja kOvakriste Ovaheberi, nomolwashike omayele aye a li a wapala?

² Konyala omido 2 000 fimbo eetuwa da li inadi totwa po, omuyapostoli Paulus okwa ulika koludi limwe lomapiyaaneko olo la li oshiponga kOvakriste vamwe Ovaheberi. Paulus okwa divilika kutya omunyumunwa Jesus Kristus okwa pewa ondodo yopombada i dule yovaengeli aveshe, omolwaashi okwa li e li omutumba kolulyo laKalunga. Opo nee omuyapostoli okwa ti: “Otwa pumbwa okuyandja elitulemo li dule loshito koinima oyo twa uda, opo tu ha twalwaatwalwe nande.”—Ovaheberi 2:1, NW.

³ Omolwashike Ovakriste Ovaheberi va li va pumbwa ‘okuyandja elitulemo li dule loshito koinima oyo va uda’ i na sha naJesus? Omolwaashi opa pita konyala omido 30 okudja eshi Jesus a fiya po edu. Omolwokuhakala po kOmwene wavo, Ovakriste vamwe Ovaheberi ova li va tameka okutwalwaatwalwa okudja meitavelo lashili. Ova li va piyaanekwa keitavelo lOshijuda, onghedi yavo yonale yokulongela Kalunga.

Ova li va pumbwa okuyandja elitulemo noukeka

4. Omolwashike tashi dulika Ovakriste vamwe Ovaheberi va li va yelekwa va shune keitavelo lOshijuda?

⁴ Omolwashike Omukriste kwa li ta dulu okuyelekwa a shune keitavelo lOshijuda? Doshili, onghedi yokulongelakalunga koshi yOmhango okwa li ya kwatela mo oinima oyo hai monika. Ovanhu ova li tava dulu okumona ovapristeri nosho yo okuuda edimba lomaxwikiloyambo. Ndelenee moinima yonhumba, Oukriste owa li wa yooloka ko. Ovakriste ova li ve na Omupristeri Omukulunhu, Jesus Kristus, ndelenee ina monika kombada yedu oule womido omilongo nhatu. (Ovaheberi 4:14) Ova li ve na otembeli, ndelenee onhele yayo iyapuki oya li eulu lo vene. (Ovaheberi 9:24) Mepingafano nepitotanda lopambelela koshi yOmhango, epitotanda lopaKriste ola li ‘lomomutima, okupitila momhepo.’ (Ovaroma 2:29, yelekanifa NW.) Onghee hano, kOvakriste Ovaheberi, Oukriste otashi dulika wa li wa tameka okumonika wa fa oshinima shi he li paushili.

5. Ongahelipi Paulus a ulika kutya onghedi yokulongela Kalunga oyo ya dikwa po kuJesus okwa li i dule oyo ya li koshi yOmhango?

⁵ Ovakriste Ovaheberi ova li va pumbwa okudidilika oshinima osho sha li sha tongomana unene kombinga yonghedi yokulongela Kalunga oyo kwa li ya dikwa po kuKristus. Oya li ya kanghamekelwa unene meitavelo shi dulife mokumona, ndelenee oya li i dule Omhango oyo ya yandjwa okupitila momuprofeti Moses. Paulus okwa shanga ta ti: “Ohonde yeemhedi noyoikombo ya shashamenwa nomute wondema yondjelipa wa undwa kuava va nyata, ngenge tau va yapula, otava koshoka pambelela, unene hano ohonde yaKristus, ou a li e he na nande oshipo, e liyandja Ye mwene eyambo kuKalunga okOmhepo yaalushe, oyo tai ka kosha omaliudo etu okoilonga ei ya fya okulongela Kalunga omunamwenyo.” (Ovaheberi 9:13, 14) Heeno, ediminepo olo tali monika okupitila meitavelo mekuliloyambo laJesus Kristus oli dule kokule meenghedi dihapu ediminepo olo la li la kanghamena komayambo oo a yandjwa koshi yOmhango.—Ovaheberi 7:26-28.

6, 7. (a) Onghalo ilipi ye shi ninga sha endelela opo Ovakriste Ovaheberi ‘va yandje elitulemo li dule loshito koinima oyo va uda’? (b) Eshi Paulus a shangela Ovaheberi onhumwafo, efimbo olo la li la fyaala ko omolwaJerusalem okwa li li fike peni? (Tala eshangelo lopedu.)

⁶ Opa li etomheno limwe vali kutya omolwashike Ovakriste Ovaheberi va li va pumbwa okuyandja elitulemo va mana mo koinima oyo va uda shi na sha naJesus. Okwa xunganeka kutya Jerusalem otashi ka hanaunwa po. Jesus okwa ti: “Omafiku otae ke ku uya, ovatondi voye tave ku fele omikangha ndee tave ku dingilile, ndele otave ku fininike keembinga adishe, ndele tave ku ngumauna po fiyo okomikangha, novamwoye vomuove, vo itava fii po emanya la londekwa kulikwao, osheshi ove ino koneka efimbo lekongo loye.”—Lukas 19:43, 44.

⁷ Mbela osho okwa li tashi ka ningwa naini? Jesus ina popya efiku notundi. Ponhele yaasho, okwa yandja elombwelo eli, ta ti: “Ngenge tamu mono Jerusalem sha kondekelwa komatanga ovakwaita, opo nee shiiveni ehanauno laJerusalem ola fika popepi; opo nee ava vomuJudea nava fadukile keemhunda naava ve li moshilando nava dje mo, naava tava hangika komikunda va ha ye musho.” (Lukas 21:20, 21) Oule womido 30 konima eshi Jesus a popya eendjovo odo, Ovakriste vamwe muJerusalem kava li ve wete vali efimbo la endelela nova piyaanekwa. Oku shi popya pafaneko, ova kufa ko omesho avo kondjila, va fa va piyaanekwa fimbo va li tava shingi. Ngeno kava lundululile okudiladila kwavo, oshiponga ngeno oshe va hanga. Kutya nee osho va li va diladila ile hasho, ehanauno laJerusalem ola li li li popepi unene nokuningwa!a Otwe lineekela kutya ekumaido laPaulus ola yandja edidiliko lelondwelo kOvakriste vomuJerusalem ovo kwa li tava kofa pamhepo.

Natu yandje “elitulemo li dule loshito” kunena

8. Omolwashike twa pumbwa “okuyandja elitulemo li dule loshito” koshili yEendjovo daKalunga?

⁸ Ngaashi Ovakriste vomefelemudo lotete, otwa pumbwa “okuyandja elitulemo li dule loshito” koshili yEendjovo daKalunga. Omolwashike mbela? Omolwaashi nafye otwa taalelwa kehanauno olo li li popepi unene nokuningwa, olo li he fi ashike loshiwana shimwe ndelenee olonghalelo aishe yoinima. (Ehololo 11:18; 16:14, 16) Doshili, katu shii efiku nosho yo otundi yokondadalunde eshi Jehova ta ka katuka onghatu oyo. (Mateus 24:36) Ndele nande ongaho, otu li ovamoni nomesho vewanifo lomaxunganeko Ombibeli oo taa ulike sha yela kutya otu li ‘momafiku axuuninwa.’ (2 Timoteus 3:1-5) Onghee hano, otu na okukala twe livangeka keshe shimwe osho tashi dulu oku tu piyaaneka. Otwa pumbwa okuyandja elitulemo kEendjovo daKalunga nosho yo okukala tu wete efimbo la endelela. Omokuninga ashike ngaho hatu ka ‘ya onhapo aishe oyo tai ka ningwa.’—Lukas 21:36.

9, 10. (a) Ongahelipi hatu dulu okuyandja elitulemo koinima yopamhepo? (b) Ongahelipi eendjovo daKalunga di li ngaashi ‘olamba yeemhadi detu’ nongaashi ‘ouyelele mondjila yetu’?

⁹ Momafimbo aa taa ti sha, ongahelipi hatu dulu okuulika kutya ohatu yandje ‘elitulemo li dule loshito’ koinima yopamhepo? Onghedi imwe oyo okukala pokwoongala kwopaKriste nosho yo poyoongalele inini naayo ya kula nope he na okufaula. Otu na yo okukala ovakonakoni vOmbibeli ovaladi opo tu dule okweehena kOmushangi wayo, Jehova. (Jakob 4:8) Ngeenge ohatu mono eshiivo lokushiiva Jehova okupitila mekonakono lopaumwene nosho yo mokwoongala, ohatu ka kala ngaashi omupsalme oo a ti kuKalunga: “Ondjovo yoye oyo olamba yeemhadi dange, nouyelele mondjila yange.”—Epsalme 119:105.

¹⁰ Ombibeli otai longo i li ‘ouyelele mondjila yetu’ ngeenge tai tu lombwele omalalakano aKalunga omonakwiiwa. Oi li yo ‘olamba yeemhadi detu.’ Noitya imwe, otai dulu oku tu kwafela shi na sha nanghee tu na okukatuka ngeenge hatu shakeneke omaupyakadi omonghalamwenyo a nyikifa oluhodi. Hano omolwaasho sha fimanenena kufye tu ‘yandje elitulemo li dule loshito’ ngeenge hatu ongala novaitaveli vakwetu omolwokuhongwa nosho yo ngeenge hatu lesha Eendjovo daKalunga paumwene. Ouyelele oo hatu mono mo otau ke tu kwafela tu ninge omatokolo opandunge notaa eta ouwa, oo taa wapalele Jehova notaa hafifa omutima waye. (Omayeletumbulo 27:11; Jesaja 48:17) Ongahelipi hatu dulu okulelepeka okudula okuyandja elitulemo kwetu efimbo lile pefimbo lokwoongala nosho yo pefimbo lekonakono lopaumwene opo tu mone omauwa manene taa di momafiloshisho opamhepo aKalunga?

Xwepopaleka okuyandja elitulemo kwoye pokwoongala

11. Omolwashike omafimbo amwe hashi kala shi li eshongo okuyandja elitulemo pokwoongala kwopaKriste?

¹¹ Omafimbo amwe, okuyandja elitulemo pokwoongala kwopaKriste ohaku kala ku li eshongo. Omadiladilo otaa dulu okupiyaanekwa noupu, tashi dulika kokaana taka kwena ile komunhu oo ine uya pefimbo ta kongo onhele yokukala omutumba. Konima yoilonga yomomukokomoko wefiku, otashi dulika twa loloka. Oo ta popi komutune otashi dulika a kale e he fi omupopi muhokwifa unene, nofimbo inatu shi mona, omadiladilo etu otaa dulu okutwalwaatwalwa koinima imwe i lili—tashi dulika hatu kofa nokuli! Moku shi talela momauyelele a fimanenena oo taa yandjwa, ohatu ningi nawa ngeenge hatu xwepopaleke eenghono detu dokudula okuyandja elitulemo pokwoongala kweongalo. Ndelenee ongahelipi mbela hatu dulu oku shi ninga?

12. Oshike tashi dulu oku shi ninga shipu kufye opo tu yandje elitulemo pokwoongala?

¹² Luhapu ohashi kala shipu okuyandja elitulemo pokwoongala ngeenge otwe lilongekida nawa. Onghee hano, omolwashike ito tula po efimbo u lilongekide komesho yefimbo shi na sha nouyelele oo tau ka konakonwa? Otashi kufa ashike ominute dinini efiku keshe okulesha nosho yo okudilonga oshitukulwa shomatukulwa oo a yandjwa e na sha nelesho lOmbibeli lokoshivike. Ngeenge hatu longekida oinima yetu, ohatu dulu yo okumona efimbo tu lilongekidile Ekonakono lEmbo lomEongalo nosho yo Ekonakono lOshungonangelo. Kutya nee elandulafano lilipi twa hoolola, oshinima shimwe sha yela osheshi kutya: Okulilongekida otaku tu kwafele tu yandje elitulemo kouyelele oo tau kundafanwa pokwoongala kweongalo.

13. Oshike tashi dulu oku tu kwafela opo tu kale hatu yukifa elitulemo letu kouyelele oo hau kundafanwa pokwoongala?

¹³ Kakele kokukala ve lilongekida nawa, vamwe ohava mono kutya ohava yandje nawa elitulemo pokwoongala ngeenge ve li omutumba komesho mOlupale lOuhamba. Okukala twa tala komupopi, okushikula mOmbibeli ngeenge omishangwa tadi leshwa nosho yo okushanga omalidimbulukifo odo eenghedi dimwe vali omo hatu dulu okukelela omadiladilo etu a ha twalwaatwalwe. Ndele nande ongaho, okukala nomutima wa longekidwa osha fimana unene shi dulife onghedi keshe yonhumba yokondadalunde i na sha nokuyandja elitulemo. Otwa pumbwa okuuda ko elalakano lokwoongala kwetu pamwe. Shotete ohatu ongala novaitaveli vakwetu opo tu longele Jehova. (Epsalme 26:12; Lukas 2:36, 37) Okwoongala oko onghedi ya fimana omo hatu palulwa pamhepo. (Mateus 24:45-47) Natango, ohaku tu pe eemhito opo tu “twafane omukumo mohole nomoilonga iwa.”—Ovaheberi 10:24, 25.

14. Oshike tashi ningi lelalela okwoongala ku kale ku na omupondo?

¹⁴ Vamwe otashi dulika va kale neamo lokuyeleka ongushu yokwoongala nomaunghulungu okuhonga ovakufimbinga. Ngeenge ovapopi ove na ounghulungu, otashi dulika ku tiwe okwoongala okwa li kuwa. Ndelenee ngeenge otava monika va fa itava hongo monghedi i na omupondo, otashi dulika tu kale tu na etaleko kutya kakwa li kuwa. Oshoshili kutya ovo ve li moprograma ove na okuninga ngaashi tava dulu opo va longife ounghulungu wavo wokuhonga unene tuu opo va hange omitima. (1 Timoteus 4:16) Ndelenee fye ovo hatu pwilikine katu na okukala ovayandji voushima sha pitilila. Nonande ounghulungu wokuhonga wovakufimbinga owa fimana, hao oshinima sha fimana unene osho tashi ningi okwoongala taku pondola. Mbela ito dimine kutya oshinima osho tu na okukala tu na ko nasha nasho unene kashi na okukala nghee omupopi ta yandje oshipopiwa shaye, ndelenee onghee hatu pwilikine? Ngeenge hatu kala pokwoongala nokupwilikina nawa kwaasho tashi popiwa, ohatu longele Kalunga metwokumwe nehalo laye. Osho osho tashi ningi okwoongala ku na omupondo. Ngeenge otu na ehalo okumona eshiivo lokushiiva Kalunga, ohatu ka mona ouwa mokwoongala, kashi na nee mbudi kutya ounghulungu womupopi ou li ngahelipi. (Omayeletumbulo 2:1-5) Onghee hano, natu kale twa tokola toko “okuyandja elitulemo li dule loshito” pokwoongala kwetu.

Mona ouwa pauyadi mokukonakona paumwene

15. Ongahelipi okukonakona nosho yo okudilonga taku dulu oku tu etela ouwa?

¹⁵ Ohatu mono ouwa munene ‘mokuyandja elitulemo li dule loshito’ pefimbo lekonakono lopaumwene nosho yo lokudilonga. Okulesha nokudilonga shi na sha nOmbibeli nosho yo oileshomwa yopaKriste otaku ke tu pa omhito i na ondilo tu findile mo oshili yEendjovo daKalunga momitima detu. Naashi otashi ka kala yo shi na enwefemo li na eenghono monghedi oyo hatu diladila nosho yo oyo hatu katuka. Doshili, otashi ke tu kwafela tu mone ehafo mokulonga ehalo laJehova. (Epsalme 1:2; 40:9) Onghee hano, otwa pumbwa okukulika eenghono detu dokudula okuyandja elitulemo opo di dule oku tu kwafela ngeenge hatu konakona. Oshipu unene okupiyaanekwa! Omapiyaaneko manini—ongodi tai lili ile omaweelelo otaa dulu oku tu kanififa elitulemo letu. Ile otashi dulika hatu mono shidjuu okuyandja elitulemo efimbo lile. Doshili, otashi dulika tu kale omutumba tu na elalakano lokulipalula pamhepo, ndelenee konima yokafimbo kanini otashi dulika omadiladilo etu a kale taa twalwatwalwa koinima imwe i lili. Ongahelipi hatu dulu “okuyandja elitulemo li dule loshito” pefimbo lekonakono lopaumwene lEendjovo daKalunga?

16. (a) Omolwashike sha fimana kufye okutula po elandulafano lefimbo lekonakono lopaumwene? (b) Ongahelipi wa tula po efimbo lokukonakona Eendjovo daKalunga?

¹⁶ Oshi na ouwa okuninga elandulafano nosho yo okuhoolola onghalo oyo tai pitike ekonakono li ende nawa. Kuvahapu vomufye, efimbo nelimweneneno lopaumwene ola pumba lela. Otashi dulika tu kale tu udite oiningwanima yefiku tai endelele notai tu twaalele ngaashi okanyapi koshitai ke li momeva taa kunguluka neendelelo. Doshili, oku shi popya pafaneko, otwa pumbwa okulwifa ekunguluko lomeva nokukonga okanhunhu kanini kelimweneno. Itatu dulu okuteelela ashike omhito keshe yokukonakona i liete yo vene. Ponhele yaasho, otwa pumbwa okupangela onghalo mokukonga efimbo lokukonakona. (Ovaefeso 5:15, 16) Vamwe ova tula po efimbo linini ongula ngeenge pe na omapiyaaneko manini. Vamwe ova mona kutya efimbo lokonguloshi otali yandje omhito i li xwepo. Oshitwa osho kutya katu na okulipwililikila omhumbwe ya fimanenena yokumona eshiivo lashili lokushiiva Kalunga nosho yo Omona waye. (Johannes 17:3) Onghee hano, natu tule po elandulafano lefimbo lekonakono lopaumwene nokukanyatela kelandulafano olo.

17. Okudilonga oshike, nongahelipi taku dulu oku tu etela ouwa?

¹⁷ Okudilonga oko onghedi i he fi okuyelekwa yokudiladila osho twe lihonga okudja mokukonakona. Otaku tu kwafele tu tule momitima detu omadiladilo aKalunga oo a shangwa momapandja Ombibeli. Okudilonga otaku tu kwafele tu mone nghee hatu dulu okutula moilonga omayele Ombibeli opo tu dule okuninga ‘ovawanifi veendjovo, ndele havapwilikini vongaho.’ (Jakob 1:22-25) Natango, okudilonga otaku tu kwafele tu ehene popepi naJehova, omolwaashi otaku tu dulifa tu diladile shi na sha nomaukwatya aye nosho yo nghee a divilikwa mouyelele oo tau kundafanwa pefimbo lekonakono.

18. Eenghalo dilipi da pumbiwa omolwokudilonga ku na omupondo?

¹⁸ Opo tu mone ouwa pauyadi mokukonakona nosho yo mokudilonga, inatu efa omadiladilo etu a piyaanekwe. Opo tu ude ko ouyelele mupe ngeenge hatu dilonga, otwa pumbwa okulivangeka omapiyaaneko onghalamwenyo yonena. Oku shi ninga otashi kufa efimbo notashi pula okukala ofye atuke, ndele nande ongaho, itashi talaleke tuu okulya eendja dopamhepo nosho yo okunwa omeva oshili taa hangika mEendjovo daKalunga!

19. (a) Shi na sha nekonakono lopaumwene, oshike sha kwafela vamwe va hapupaleke efimbo lavo lokudula okuyandja elitulemo? (b) Otu na okukala tu na oikala ya tya ngahelipi shi na sha nokukonakona, nomauwa elipi hatu mono moilonga oyo ya fimana?

¹⁹ Ongahelipi ngeenge okudula okuyandja elitulemo kwetu ihaku kwata efimbo lile nosho yo kutya omadiladilo etu ohaa hovele okutwalwaatwalwa konima yokafimbo kanini kokukonakona? Vamwe ova mona kutya otava dulu okuhapupalifa eenghono davo dokudula okuyandja elitulemo fimbo tava konakona mokutameka okukonakona oule wefimbo lixupi poshikando nokukala tava wedele ko koule wefimbo mokweendela ko kwefimbo. Elalakano letu olo okulongifa efimbo la wana mokukonakona ponhele yokweendelela. Otwa pumbwa okukulika ohokwe nomutima aushe moshinima osho tashi konakonwa. Nohatu dulu okukonga omauyelele a wedwa po moileshomwa ihapu oyo ya yandjwa komupiya omudiinini nomunaendunge. Oshi na ouwa munene okutala ‘moinima yomoule yaKalunga.’ (1 Ovakorinto 2:10, NW) Oku shi ninga otashi tu kwafele tu hapupalife eshiivo letu lokushiiva Kalunga nosho yo okukulika eenghono detu dokukoneka. (Ovaheberi 5:14, NW) Ngeenge otu li ovakonakoni vEendjovo daKalunga ovaladi, ohatu ka kala yo twa ‘wana okulonga vamwe.’—2 Timoteus 2:2.

20. Ongahelipi hatu dulu okukulika nokukaleka po ekwatafano lopofingo naJehova Kalunga?

²⁰ Okukala pokwoongala kwopaKriste nosho yo okukonakona paumwene otaku tu kwafele unene tu kulike nokukaleka po ekwatafano lopofingo naJehova. Osha yela kutya osho osho sha li ngaho komupsalme oo a popya kuKalunga ta ti: “Omhango yoye ondi i hole shi fike peni! Efiku alishe ohandi i dilonga.” (Epsalme 119:97) Onghee hano, natu kaleni pokwoongala, poyoongalele inini naai ya kula nope he na okufaula. Nosho yo natu longifeni efimbo omolwokukonakona Ombibeli nosho yo oku i dilonga. Ohatu ka nangekwa noupuna omolwokuyandja “elitulemo li dule loshito” kEendjovo daKalunga.

[Omashangelo opedu]

1. Yelifa nghee omapiyaaneko taa dulu okweeta oshiponga.

[Efano pepandja 9]

Ovakriste Ovaheberi ova li va pumbwa okukala oupafi shi na sha nehanauno laJerusalem olo la li popepi unene

[Efano pepandja 11]

Ovadali otava dulu okukwafela ovana vavo va mone ouwa pokwoongala kwopaKriste

[Efano pepandja 12]

Oto dimbuluka?

• Omolwashike Ovakriste Ovaheberi va twalwaatwalwa okudja meitavelo lashili?

• Ongahelipi hatu dulu okuyandja elitulemo pokwoongala kwopaKriste?

• Oshike tashi ke tu kwafela tu mone ouwa mokukonakona Ombibeli paumwene nosho yo oku i dilonga?