OSHILESHWA 04
Kalunga oye lyelye?
Ovanhu ova kala hava longele oikalunga ihapu, hanga okukalamwenyo kwavo akushe. Ashike Ombiibeli oya popya kombinga yaKalunga umwe oo ‘munene, e dule oikalunga aishe.’ (2 Omafimbo 2:5) Oye lyelye mbela? Noshike she mu ningifa a kale munene e dule oikalunga aishe oyo hai longelwa kovanhu? Moshileshwa eshi, ohatu ke lihonga osho Kalunga a hala u shiive kombinga yaye.
1. Edina laKalunga olyelye, noshike tashi ulike kutya okwa hala tu li shiive?
Kalunga okwe tu shiivifila edina laye mOmbiibeli. Okwa ti: “Aame Jehova, olo edina lange.” (Lesha Jesaja 42:5, 8, NW.) “Jehova” edina la tolokwa okudja mOshiheberi olo tali ti, “Oha ningifa.” Jehova okwa hala tu shiive edina laye. (Exodus 3:15, NW) Otu shi shii ngahelipi? Omolwaashi edina laye ola holoka mOmbiibeli lwoikando i dulife 7 000.a Edina Jehova ‘olaKalunga kashili meulu nokombada yedu.’— Deuteronomion 4:39.
2. Ombiibeli otai tu lombwele shike kombinga yaJehova?
Ombiibeli oya popya kutya mokati kookalunga aveshe ovo hava longelwa kovanhu, Jehova oye aeke e li Kalunga kashili. Omolwashike mbela? Ope na omatomheno mahapu. Jehova oye e na eenghonopangelo da shiya ko, navali oye aeke “Okombadambada medu alishe.” (Lesha Epsalme 83:18.) Ombiibeli oya popya kutya oku li “Omunaenghono adishe,” molwaashi ota dulu okuninga keshe osho a hala. Okwa “shita oinima aishe,” mwa kwatelwa oinima oyo i na omwenyo kombada yedu. (Ehololo 4:8, 11) Jehova oye aeke a kala ko okudja nale nota kala po fiyo alushe.— Epsalme 90:2.
KONAKONA MOULE
Shiiva eyooloko pokati komadinafimaneko aKalunga nosho yo edina laye mwene. Lihonga yo kutya ongahelipi nomolwashike e tu shiivifila edina laye.
3. Kalunga oku na omadinafimaneko mahapu, ndele oku na ashike edina limwe
Opo u mone eyooloko pokati kedinafimaneko olo omunhu e na nosho yo edina laye mwene, dana OKAVIDIO, ndele tamu kundafana epulo tali shikula.
Eyooloko lilipi li li pokati kedinafimaneko ngaashi “Omwene,” nosho yo edina lo vene?
Ombiibeli oya ti kutya ovanhu vahapu ohava longele oikalunga nosho yo oovene. Lesha Epsalme 136:1-3, ndele tamu kundafana epulo tali shikula:
Olyelye ‘Kalunga kookalunga nOmwene woovene’?
4. Jehova okwa hala tu shiive edina laye noku li longifa
Otu shi shii ngahelipi kutya Jehova okwa hala tu shiive edina laye? Dana OKAVIDIO, ndele tamu kundafana omapulo taa shikula.
Mbela oto diladila kutya Jehova okwa hala edina laye li shiivike? Omolwashike to tile ngaho?
Jehova okwa hala ovanhu va longife edina laye. Lesha Ovaroma 10:13, ndele tamu kundafana omapulo taa shikula:
Osha fimana shi fike peni okulongifa edina laKalunga, Jehova?
Oho kala u udite ngahelipi, ngeenge umwe te ku tumbula kedina?
Mbela oto diladila kutya Jehova oha kala e udite ngahelipi, ngeenge to tumbula edina laye?
5. Jehova okwa hala u ninge kaume kaye
Omukainhu umwe wokuCambodia wedina Soten okwa ti kutya eshi a shiiva edina laKalunga, oshe mu kwafela “a kale a hafa.” Dana OKAVIDIO, ndele tamu kundafana epulo tali shikula.
Ngaashi twa mona mokavidio, Soten okwa li e udite ngahelipi, eshi a shiiva edina laKalunga?
Ofimbo ino panga oukaume nomunhu wonhumba, oho shiiva tete edina laye. Lesha Jakob 4:8a, ndele tamu kundafana omapulo taa shikula:
Jehova ote ku shivi u ninge shike?
Okukala tu shii nohatu longifa edina laKalunga otaku tu kwafele ngahelipi tu ehene popepi naye?
VAMWE OHAVA TI: “Oku na ashike Kalunga umwe, ashike kashi na mbudi kutya oto mu ifana edina lilipi.”
Mbela oto tu kumwe kutya edina laKalunga oJehova?
Ongahelipi to dulu okuyelifa kutya Kalunga okwa hala tu kale hatu longifa edina laye?
ENGONGO
Jehova olo edina laKalunga kashili. Okwa hala tu kale tu shii nohatu longifa edina laye opo tu dule okweehena popepi naye.
Eendululo
Oshike sha ningifa Jehova a kale a yooloka ko koikalunga oyo hai longelwa kovanhu vamwe?
Omolwashike twa pumbwa okukala hatu longifa edina laKalunga?
Oshike tashi ulike kutya Jehova okwa hala tu ehene popepi naye?
TALA OUYELELE WA WEDWA PO
Konakona omaumbangi opatano oo taa ulike kutya Kalunga oko e li.
“Mbela oku na ngoo shili Kalunga?” (Oshitukulwa shi li ko jw.org)
Omolwashike shi li pandunge okwiitavela kutya Kalunga oko a kala nale.
“Olyelye a shita Kalunga?” (Oshungonangelo, 1 Septemba 2014)
Lihonga kutya omolwashike sha fimana okulongifa edina laKalunga, nonande katu shii naanaa kutya ola li hali tumbulwa ngahelipi pefimbo lonale.
Mbela otashi dengele ngoo kutya Kalunga ohatu mu ifana nedina lilipi? Natu tale kutya omolwashike taku tiwa oku na ashike edina limwe.
“Kalunga oku na omadina angapi?” (Oshitukulwa shi li ko jw.org)
a Opo u mone ouyelele muhapu kombinga yeityo ledina laKalunga nonokutya omolwashike ovatoloki ve li dima mo mEembiibeli dimwe, tala Oshitukulwa 1 Okalongifwambo kokukonakona Eendjovo daKalunga.