Okukonakona Ombiibeli ohashi eta ouwa, ashike haalushe hashi kala shipu. Omafimbo amwe, otashi dulika u kale to lipula ngeenge oto ka dula ngoo okutwikila okukonakona Ombiibeli. Omolwashike sha fimana okuninga eenghendabala u twikile? Oshike tashi dulu oku ku kwafela u twikile, nonande ope na eenghalo didjuu?

1. Omolwashike ekonakonombiibeli la fimana?

“Eendjovo daKalunga odi na omwenyo neenghono.” (Ovaheberi 4:12) Ombiibeli oya fimana molwaashi otai tu hololele omadiladilo aKalunga nosho yo nghee ha kala e tu uditile. Itai ku kwafele ashike u mone eshiivo, ndele otai ku kwafele yo u mone ounongo washili neteelelo. Osho sha fimanenena unene oshosho kutya, Ombiibeli otai ku kwafele u ninge kaume kaJehova. Eshi to konakona Ombiibeli, oto efa eenghono dayo di xwepopaleke onghalamwenyo yoye.

2. Omolwashike sha fimana okukala wa lenga oshili yOmbiibeli?

Oshili oyo i li mOmbiibeli oya faafanifwa nomamona e na ondilo. Nomolwaasho Ombiibeli ye tu ladipika tu ‘lande oshili, nokuhe i landifa po.’ (Omayeletumbulo 23:23) Ngeenge otwa kala twa lenga oshili yOmbiibeli, ohatu ka twikila okukonakona, nokuli nonande otwa taalela omaudjuu.— Lesha Omayeletumbulo 2:4, 5.

3. Jehova ota dulu ngahelipi oku ku kwafela u twikile okukonakona?

E li Omushiti woye omunaenghono naKaume koye, Jehova okwa hala e ku kwafele u lihonge kombinga yaye. Ohe ku kwafele ‘u kale wa hala okulonga ehalo laye.’ (Lesha Ovafilippi 2:13.) Onghee hano, omafimbo amwe ngeenge owa hala okutuwa omukumo eshi to konakona, ile okutula moilonga osho we lihonga, ota dulu oku ku kwafela. Ota dulu oku ku pa eenghono da wedwa po, ngeenge owa hala okufinda omashongo, ile omapataneko. Pula Jehova pandjikilile okupitila meilikano e ku kwafele u twikile okukonakona Ombiibeli.— 1 Ovatessaloniki 5:17.

KONAKONA MOULE

4. Kala wa lenga ekonakonombiibeli loye

Omafimbo amwe ohatu kala twe lipyakidila neenghono nohashi tu ningifa tu kale tu wete tuhe na efimbo la wana lokukonakona Ombiibeli. Oshike tashi dulu oku ku kwafela? Lesha Ovafilippi 1:10, ndele tamu kundafana omapulo taa shikula:

• Mbela oto diladila kutya “oinima oyo ya fimanenena” monghalamwenyo oilipi po?

• Ongahelipi to dulu okulitulila po elalakano lokukonakona Ombiibeli?

1. Ngeenge owa tula mokavela edu, ndele to kendabala okutula mo omamanya, omamanya itaa ka wana mo

2. Ngeenge owa tula mo tete omamanya, oto ka dula okuweda mo edu. Sha faafana, ngeenge owa kala wa pitifa komesho “oinima oyo ya fimanenena” monghalamwenyo yoye, oto ka dula oku i wanifa po, noto ka dula vali okukala u na efimbo loinima imwe

Okukonakona Ombiibeli ohaku wanifa po omhumbwe yetu yopamhepo, omhumbwe yokushiiva nokulongela Kalunga. Lesha Mateus 5:3, ndele tamu kundafana epulo tali shikula:

• Ohatu mono ouwa ngahelipi ngeenge otwe litulile po elalakano lokukonakona Ombiibeli?

5. Twikila okukonakona, nonande owa taalela omapataneko

OKAVIDIO: Okwa mona ondjabi omolwelididimiko (5:22)

• Ngaashi twa tala mokavidio, ookaume kaFrancesco novapambele vaye ova li ve linyenga ngahelipi eshi e va lombwela kombinga yaasho a li te lihongo?

• Okwa li a pewa ondjabi ilipi omolwelididimiko laye?

Lesha 2 Timoteus 2:24, 25, ndele tamu kundafana omapulo taa shikula:

• Ovapambele voye nookaume koye ove uditile ngahelipi osho to lihongo?

• She likolelela keevelishe edi, oto ke linyenga ngahelipi ngeenge umwe ina hafa eshi to konakona Ombiibeli? Omolwashike to tile ngaho?

6. Lineekela muJehova e ku kwafele

OKAVIDIO: Jehova okwa kwafela nge ndi ninge omalunduluko (3:56)

• Ngaashi twa mona mokavidio, omalunduluko elipi Jim a ninga opo a hafife Jehova?

• Oshike she ku kumwifa moshihopaenenwa shaye?

Lesha Ovaheberi 11:6, ndele tamu kundafana omapulo taa shikula:

• Jehova ota ka ningila shike ovo “tave mu kongo va mana mo,” sha hala kutya, ovo tava kendabala noudiinini ve mu shiive nove mu hafife?

• Osho otashi ku hongo shike kombinga yanghee Jehova ha kala e udite, ngeenge e ku wete to ningi eenghendabala u konakone Ombiibeli?

ENGONGO

Nonande haalushe hashi kala shipu, okukonakona Ombiibeli otaku dulu oku ku kwafela u hafele onghalamwenyo fiyo alushe. Twikila okukala we lineekela muJehova, note ke ku nangeka noupuna.

Eendululo

• Omolwashike oshili yOmbiibeli i na ondilo kwoove?

• Ongahelipi to dulu ‘okushiiva oinima oyo ya fimanenena’?

• Omolwashike wa pumbwa okupula Jehova e ku kwafele u twikile okukonakona Ombiibeli?

TALA OUYELELE WA WEDWA PO

Natu tale keenghedi nhee odo da kwafela ovanhu vahapu va longife nawa efimbo lavo.

“Oshike tashi dulu oku ku kwafela u longife nawa efimbo loye” (Kala oupafi!, Februali 2014)

Didilika nghee Jehova a kwafela omukulukadi umwe oo omushamane waye a li ina hafa eshi te lihongo kombinga yaJehova.

Jehova ohe tu pameke tu humbate omitengi detu (5:05)

Natu tale nghee omulumenhu umwe a mona ouwa melididimiko lomukulukadi waye.

Onda konakona oshili moule (6:30)

Eendombwedi daJehova omafimbo amwe ohadi lundilwa kutya ohadi tukaula omaukwaneumbo. Ndele mbela osho oshoshili ngoo?

“Mbela Eendombwedi daJehova ohadi tukula omaukwaneumbo, ile ohadi a tungu?” (Oshitukulwa shi li ko jw.org)

Atushe otu na omatokolo oo twa pumbwa okuninga. Amwe omomatokolo oo otaa dulu okukala mawa, ile mai notaa dulu okukuma oukaume wetu naJehova. Pashihopaenenwa, otashi dulika twa pumbwa okutokola kutya openi hatu ka kala, oilonga oyo hatu ka longa tu liyambidide pashimaliwa nosho yo ngeenge natu hombolwe, ile natu hombole. Ngeenge otwa ningi omatokolo e li mondjila, ohatu dulu okukala twa hafa monghalamwenyo, nohatu ka hafifa Jehova.

1. Ongahelipi to dulu okulongifa Ombiibeli, opo i ku kwafele u ninge omatokolo e li mondjila?

Ofimbo ino ninga etokolo lonhumba, ilikana kuJehova e ku kwafele nokukonakona Ombiibeli, opo u mone etaleko laye li na sha noshinima osho. (Lesha Omayeletumbulo 2:3-6.) Peemhito dimwe, Jehova okwa yandja oshipango shokondadalunde. Opo u ninge etokolo li li mondjila, oshiwa okudulika koshipango sha tya ngaho.

Ongahelipi ngeenge kape na oshipango shopaMbiibeli shokondadalunde, osho tashi ku lombwele osho u na okuninga? Jehova ote ke ku wilika “mondjila ei u nokweenda nayo.” (Jesaja 48:17) Ngahelipi mbela? Otashi dulika pe na omafinamhango oo taa dulu oku ku wilika. Omafinamhango Ombiibeli oo oshili ya fimanenena, oyo hai holola omadiladilo nomaliudo aKalunga. Ohatu lihongo luhapu nghee Kalunga ha kala e uditile oshinima shonhumba, ngeenge hatu lesha ehokololo mOmbiibeli. Ngeenge otwa didilike nghee Jehova ha kala e udite, ohatu dulu okuninga omatokolo oo tae mu hafifa.

2. Owa pumbwa okudiladila kushike ofimbo ino ninga etokolo?

Ombiibeli oya ti: “Omunamayele ta diinine eenghatu daye.” (Omayeletumbulo 14:15) Osho osha hala okutya, ofimbo inatu ninga etokolo otwa pumbwa okukonga efimbo, opo tu diladile kwaasho twa hala okuninga. Eshi to konakona osho wa diladila oku ka ninga, lipula kutya: ‘Omafinamhango Ombiibeli elipi handi dulu okutula moilonga? Osho nda hala okuninga otashi ka pa nge ngoo ombili yopamadiladilo? Etokolo lange otali ka kuma ngahelipi vamwe? Naasho sha fimanenena, mbela otali ka hafifa ngoo Jehova?’— Deuteronomion 32:29.

Jehova oye e na oufemba woku tu lombwela osho shi li mondjila naasho sha puka. Ngeenge otwa shiiva nawa eemhango nomafinamhango aye nokutokola oku a shikula, kungaho ohatu deula eliudo letu. Eliudo olo oukwatya wetu womeni, oo hau tu kwafele tu mone kutya oshinima shonhumba oshi li mondjila, ile osha puka. (Ovaroma 2:14, 15) Eliudo la deulwa otali ke tu kwafela tu ninge omatokolo e li mondjila.

KONAKONA MOULE

3. Efa Ombiibeli i ku wilike

OKAVIDIO: Efa omafinamhango Ombiibeli e ku wilike (5:54)

• Emanguluko lokuninga omatokolo oshike?

• Omolwashike Jehova e tu pa emanguluko lokuninga omatokolo?

• Okwe tu pa shike, osho tashi tu kwafele tu longife emanguluko letu lokuninga omatokolo monghedi ya denga mbada?

Opo u mone oshihopaenenwa shi na sha nefinamhango lopaMbiibeli, lesha Ovaefeso 5:15, 16, ndele tamu kundafana “nghee to dulu okulongifa nawa efimbo” . . .

• u kale ho lesha Ombiibeli pandjikilile.

• u ninge kaume kopahombo, omudali, omonamati, ile omonakadona e li xwepo.

• u kale ho kala pokwoongala.

4. Deula eliudo loye, opo u kale ho ningi omatokolo e li mondjila

OKAVIDIO: ‘Kaleni mu neliudo liwa’ (5:13)

• Ngaashi wa mona mokavidio, omumwameme okwa katuka eenghatu dilipi, opo a deule eliudo laye noku ninge etokolo olo tali hafifa Jehova?

Omolwashike tuhe na okupula vamwe ve tu ningile ko omatokolo? Lesha Ovaheberi 5:14, ndele tamu kundafana omapulo taa shikula:

• Ponhele yokupula vamwe ve tu ningile ko omatokolo, osho hashi monika alushe sha fa shipu okuninga, oshike twa pumbwa okuninga, opo tu tokole fye vene?

• Oshike tashi dulu oku ku kwafela u deule eliudo loye nou ninge omatokolo e li mondjila?

5. Kala wa fimaneka omaliudo avamwe

Molwaashi ovanhu ova yoolokafana, ohava ningi omatokolo a yoolokafana. Ongahelipi hatu dulu okuulika kutya otwa fimaneka omaliudo avamwe? Tala keenghalo dopavali:

Onghalo 1: Omumwameme, oo e hole okulivaeka oinima moshipala, okwa tembukila keongalo oko ku na ovamwameme vahapu hava ningilwa nai, ngeenge ova mono vamwe va vava oinima moshipala.

Lesha Ovaroma 15:1 nosho yo 1 Ovakorinto 10:23, 24, ndele tamu kundafana omapulo taa shikula:

• She likolelela keevelishe odo, omumwameme oo otashi dulika a li ta dulu okuninga po shike? Oshike to ka ninga po ngeenge ou li nomunhu oo eliudo laye itali shi pitike a ninge oshinima osho eliudo loye tali shi pitike u ninge?

Onghalo 2: Omumwatate oku shii kutya Ombiibeli inai tokola okulongifa oikunwa yoalkoholi pandjele, ashike okwa tokola okuhe i nwa. Okwa shivwa koshivilo, oko a mona ovamwatate tava nu oikunwa yoalkoholi.

Lesha Omuudifi 7:16 nosho yo Ovaroma 14:1, 10, ndele tamu kundafana omapulo taa shikula:

• She likolelela keevelishe odo, omumwatate oo otashi dulika a li ta dulu okuninga po shike? Oshike to ka ninga po ngeenge owa mono vamwe tava ningi oshinima osho eliudo loye itali ku pitike u ninge?

Eenghatu dilipi tadi dulu oku ku kwafela u ninge omatokolo e li mondjila?

1. Pula Jehova e ku kwafele u ninge etokolo li li mondjila.— Jakob 1:5.

2. Ninga omapekapeko mOmbiibeli nosho yo moishangomwa oyo ya kanghamena kOmbiibeli, opo u mone omafinamhango oo to dulu okutula moilonga. Oto dulu yo okupula Ovakriste va pyokoka.

3. Konakona nghee etokolo loye tali ka kuma eliudo loye, nosho yo omaliudo avamwe.

ENGONGO

Ohatu ningi omatokolo e li mondjila, ngeenge otwa mono nghee Jehova ha kala e uditile oshinima shonhumba, nokukonakona ngeenge eenghatu detu otadi ka kwafela vamwe, ile otadi ke va yahameka.

Eendululo

• Ongahelipi to dulu okuninga omatokolo oo taa hafifa Jehova?

• Ongahelipi to dulu okudeula eliudo loye?

• Ongahelipi to dulu okuulika kutya owa fimaneka omaliudo avamwe?

TALA OUYELELE WA WEDWA PO

Ongahelipi to dulu okuninga omatokolo oo taa pameke oukaume weni naKalunga?

“Kala ho ningi omatokolo oo taa fimanekifa Kalunga” (Oshungonangelo, 1 Aprili 2011)

Lihonga shihapu shi na sha nanghee Jehova he tu pe omayele.

Jehova oha wilike oshiwana shaye (9:50)

Tala osho sha kwafela omulumenhu umwe, opo a ninge etokolo la kwata moiti.

Jehova oha yandje ashishe osho shiwa (5:46)

Lihonga shihapu shi na sha nanghee to dulu okuhafifa Jehova, nonande kape na oshipango shokondadalunde shi na sha naasho u na okuninga.

“Mbela oho kala alushe wa pumbwa omhango yokondadalunde?” (Oshungonangelo, 1 Desemba 2003)