5. Finda omashongo oo tae ku imbi u ninginifwe

Atushe ohatu shakeneke omashongo, konima ngeenge twa tokola okuliyapulila Jehova nokuninginifwa. Opo u mone oshihopaenenwa shaumwe oo a finda omashongo, dana OKAVIDIO, ndele tamu kundafana omapulo taa shikula.

OKAVIDIO: Ngeenge otwa kala tu hole Jehova, ohatu ka finda omashongo (5:22)

• Ngaashi sha ulikwa mokavidio, omashongo elipi Narangerel a li a pumbwa okufinda, opo a dule okulongela Jehova?

• Ongahelipi ohole yaye yokuhola Jehova ye mu kwafela a dule okufinda omashongo a tya ngaho?

Lesha Omayeletumbulo 29:25 nosho yo 2 Timoteus 1:7, ndele tamu kundafana epulo tali shikula:

• Oshike hashi tu tu omukumo, opo tu dule okufinda omashongo?

Otwa pumbwa okupameka elineekelo letu muJehova paife. Kala ho kongo efimbo efiku keshe u ilikane kuye nokulesha Eendjovo daye. Kala ho ongala pandjikilile. Ngeenge owa kala ho ningi oinima aishe oyo, otashi ke ku pameka u lididimikile omahepeko nomupondo, nonande otashi dulika taa dilile kovapambele voye. Omuyapostoli Paulus, oo a li a hepekwa lwoikando, okwa shanga a ti: “Jehova oye omukwafi wange; itandi tila sha.”— Ovaheberi 13:6.

Okuudifa pandjikilile ohaku tu kwafele tu kale tu na ouladi. Ohaku tu kwafele yo tu kale twe lineekela muJehova notu finde oumbada wokutila ovanhu. (Omayeletumbulo 29:25) Ngeenge owa kala u na ouladi wokuudifa paife, otashi ke ku kwafela u kale we lilongekida okuudifa, nonande epangelo oli shilike oilonga yetu.— 1 Ovatessaloniki 2:2.