Mbela Eendombwedi daJehova odi li ngoo Ovakriste vashili?

Tu li Eendombwedi daJehova, otwa itavela kutya otu li Ovakriste vashili. Omolwashike mbela? Natu ka tale kutya eitavelo letu ola kanghamena kushike, edina olo le tu yoolola ko nosho yo ohole oyo tu na mokati ketu.

1. Eitavelo lEendombwedi daJehova ola kanghamena kushike?

Jesus okwa ti: ‘Eendjovo daKalunga odo oshili.’ (Johannes 17:17) Ngaashi Jesus, eitavelo lEendombwedi daJehova ola kanghamena alushe kEendjovo daKalunga. Pashihopaenenwa, tala nghee twa kala hatu ningi ngaho okuhovela mo 1870 lwaapo, eshi Ovakonakoni vOmbiibeli va li va konakona noukeka Ombiibeli, opo va tale kutya Ombiibeli otai hongo shike. Ova li va tokola okushikula osho Ombiibeli tai ti, ponhele yokulandula osho eengeleka tadi hongo. Opo nee, ova li va hovela okuudifila vamwe oshili yOmbiibeli.a

2. Omolwashike hatu liifana Eendombwedi daJehova?

Jehova okwa popya kutya ovalongeli vaye ove li Eendombwedi daye, molwaashi ohava popi oshili kombinga yaye. (Ovaheberi 11:4–12:1) Pashihopaenenwa, mefimbo lonale, Kalunga okwa li a lombwela oshiwana shaye a ti: “Onye eendobwedi dange.” (Lesha Jesaja 43:10.) Jesus okwa ifanwa “Ondombwedi idiinini.” (Ehololo 1:5) Onghee hano, mo 1931, otwa li twa hoolola okwiifanwa Eendombwedi daJehova. Otwa hafa eshi hatu ifanwa nedina olo.

3. Eendombwedi daJehova ohadi hopaenene ngahelipi ohole yaJesus?

Jesus okwa li e hole ovahongwa vaye neenghono, nova li ashike va fa oilyo youkwaneumbo umwe. (Lesha Markus 3:35.) Sha faafana, Eendombwedi daJehova oda hangana nodi li oukwaneumbo womounyuni aushe. Nomolwaasho hatu liifana ovamwatate novamwameme. (Filemon 1, 2) Ohatu dulika yo koshipango osho tashi ti: “Kaleni mu hole ovamwatate aveshe.” (1 Petrus 2:17) Eendombwedi daJehova ohadi ulike ohole ya tya ngaho meenghedi dihapu, ngaashi mokukwafela ovaitaveli vakwao mounyuni aushe, ngeenge va pumbwa ekwafo.

KONAKONA MOULE

4. Eitavelo letu ola kanghamena kOmbiibeli

Jehova okwa xunganeka kutya oshili yOmbiibeli otai ka hololwa. Lesha Daniel 12:4, ndele tamu kundafana epulo tali shikula:

• Oshike tashi “ka hapupala” mokati koshiwana shaKalunga, eshi tashi twikile okukonakona Ombiibeli?

Lihonga nghee Ovakonakoni vOmbiibeli, mwa kwatelwa Charles Russell, va konakona Eendjovo daKalunga. Dana OKAVIDIO, ndele tamu kundafana epulo tali shikula.

OKAVIDIO: Okumona oshili yOmbiibeli (7:45)

• Ngaashi sha ulikwa mokavidio, ongahelipi Charles Russell nosho yo Ovakonakoni vOmbiibeli vakwao va li hava konakona Ombiibeli?

Owe shi shiiva tuu?

Omafimbo amwe, ohatu pepaleke oinima imwe oyo twa li twa itavela. Omolwashike mbela? Ngaashi ashike ngeenge etango tali piti hali tu kwafele tu mone oinima kanini nakanini, Kalunga naye ohe tu kwafela tu ude ko Eendjovo daye mokweendela ko kwefimbo. (Lesha Omayeletumbulo 4:18.) Nonande Ombiibeli ihai lunduluka, ohatu pepaleke osho twa itavela, eshi hatu ende hatu udu ko nawa Ombiibeli.

5. Ohatu kala metwokumwe nedina letu

OKAVIDIO: Edina olo tali holola oilonga yetu (2:40)

• Omolwashike edina Eendombwedi daJehova tali wapalele?

Omolwashike Jehova a hoolola ovanhu va ninge eendombwedi daye? Opo ve mu holole kutya oku li Kalunga kashili, molwaashi ovanhu ova lombwelwa oipupulu kombinga yaye. Natu ka konakone ashike oipupulu yopavali yomwaayo.

Omalongelokalunga amwe okwa honga oilyo yao kutya Kalunga okwa hala va longife oihongwafano, eshi tave mu longele. Ashike lesha Leviticus 26:1, ndele tamu kundafana omapulo taa shikula:

• Oshili oilipi? Jehova oku uditile ngahelipi oihongwafano?

Ovawiliki vomalongelokalunga vamwe ohava hongo kutya Jesus oye Kalunga. Ashike lesha Johannes 20:17, ndele tamu kundafana omapulo taa shikula:

• Oshili oilipi? Mbela Kalunga naJesus omunhu umwe?

• Ou udite ngahelipi eshi wa shiiva kutya Jehova okwa tuma Eendombwedi daye di udife oshili kombinga yaye nosho yo Omona?

6. Otu holafane

Ombiibeli oya faafanifa Ovakriste noilyo yolutu ya yoolokafana. Lesha 1 Ovakorinto 12:25, 26, ndele tamu kundafana omapulo taa shikula:

• Ovakriste vashili ove na okulinyenga ngahelipi, ngeenge Ovakriste vakwao tava mono oixuna?

• Oshike wa didilika shi na sha nohole oyo i li mokati kEendombwedi daJehova?

Ngeenge Eendombwedi dimwe koshitukulwa shimwe tadi mono oixuna, Eendombwedi dikwao mounyuni aushe ohadi katuka diva, opo di kwafele. Opo u mone oshihopaenenwa shimwe, dana OKAVIDIO, ndele tamu kundafana epulo tali shikula.

OKAVIDIO : Ovahaiti tave lididimikile oshikungulu shedina Matthew (5:29)

• Ongahelipi oikwafa oyo hai yandjwa kEendombwedi daJehova tai ulike ohole?

ENGONGO

Eendombwedi daJehova odi li Ovakriste vashili. Otu li ovalongelikalunga vomounyuni aushe ovo va kanghamekela eitavelo lavo kOmbiibeli, nohava shiivifa oshili kombinga yaKalunga.

Eendululo

• Omolwashike twa hoolola edina Eendombwedi daJehova?

• Ohatu ungaunga ngahelipi nOvakriste vakwetu?

• Mbela oto diladila kutya Eendombwedi daJehova odi li Ovakriste vashili?

TALA OUYELELE WA WEDWA PO

Lihonga shihapu kombinga yondjokonona yetu.

Eendombwedi daJehova— Eitavelo tali longo, Oshitukulwa 1: Twa dja mo momilaulu (1:00:53)

Tala oshihopaenenwa shimwe nghee Eendombwedi daJehova da nyaneka pomutenya omahongo oipupulu.

Oshiwana tashi fimanekifa edina laye (7:08)

Mona omanyamukulo komapulo oo tashi dulika u na kombinga yEendombwedi daJehova.

“Omapulo oo haa pulwa luhapu kombinga yEendombwedi daJehova” (oshitukulwa shi li ko jw.org)

Stephen okwa li e tonde ovanhu vomihoko dimwe di lili nokwa li he va ponokele. Lihonga kutya oshike a mona mokati kEendombwedi daJehova osho she mu kwafela a lunduluke.

“Onghalamwenyo yange oya kala nokunaipala” (Oshungonangelo, 1 Juli 2015)