Hafela ekonakono lopaumwene lEendjovo daKalunga

TU LI ovahongwa vaJesus Kristus, otu na okukala tu na ko nasha unene nekwatafano letu naKalunga nosho yo omatomheno etu oku mu longela. Ndelenee kunena, ovanhu vahapu ove lipyakidila unene nomolwaasho ihave litulile po efimbo lokudilonga. Ove litula filufilu momalipyakidilo okulalakanena omaliko, okulandifa nosho yo okukonga omalihafifo kwa nyika oulai. Ongahelipi hatu dulu okuhenuka eenghendabala doshimha da tya ngaho? Ngaashi ashike hatu tula po efimbo lonhumba lokondadalunde efiku keshe omolwoilonga ya fimana, ngaashi okulya nokukofa, otu na yo okutula po efimbo efiku keshe tu dilonge oilonga yaJehova.—Deuteronomion 8:3; Mateus 4:4.

1, 2. (a) Omolwashike tu na okutula po efimbo lokudilonga? (b) “Okudilonga” otashi ti ngahelipi?

² Mbela oho kanghama ngoo ndele to dilonga? Okudilonga osha hala okutya ngahelipi? Emboitya limwe otali fatulula oshitya osho shi li “okuyukifa omadiladilo oye kusha: okudiladila moule woshinima.” Osho oshi na eityo lashike kufye?

3. Okuninga eehenokomesho lopamhepo okwa pambafana filufilu nashike?

³ Oshinima shimwe oshosho kutya oshi na oku tu dimbulukifa osho omuyapostoli Paulus a shangela omupiya mukwao Timoteus, ta ti: “Fiyo ohandi uya, diinina oku va leshela noku va kumaida noku va longa. . . . Aishe ei i [dilonga, NW], ove u kale muyo, opo okweehena kwoye komesho ku monike kuaveshe.” Heeno, okweehena komesho okwa li kwa teelelwa, neendjovo daPaulus oda ulika kutya opa li pe na ekwatafano filufilu pokati kokudilonga oinima yopamhepo nokuninga eehenokomesho. Osho osha faafana kunena. Opo tu hafele embilipalelo lokuninga eehenokomesho lopamhepo, otu na okutwikila “okudilonga” ‘nokukala’ moinima oyo i na sha nEendjovo daKalunga.—1 Timoteus 4:13-15.

4. Oilongifo ilipi to dulu okulongifa i ku kwafele u dilonge alushe Eendjovo daJehova?

⁴ Efimbo liwa kwoove lokudilonga ole likolelela kwoove nosho yo kelandulafano loukwaneumbo omo u li. Vahapu ohava dilonga komushangwa wOmbibeli ongula inene ngeenge tava lesha mokambo Konakona Omishangwa keshe efiku. Doshili, ovaliyambi 20 000 momaumbo aBetel mounyuni aushe ohava hovele efiku lavo nokukonakona omushangwa wOmbibeli wefiku ominute 15. Omanga ovanhu ashike vanini moukwaneumbo waBetel hava yandje eekomenda ongula keshe, oukwaneumbo aushe ohau dilonga kwaasho tashi popiwa notashi leshwa. Eendombwedi dimwe ohadi dilonga kombinga yEendjovo daJehova fimbo di li mondjila tadi i koilonga. Ohadi pwilikine koukaseta vOmbibeli nosho yo voifo yOshungonangelo noAwake! ovo ve li momalaka amwe. Ovakainhu vahapu ohave shi ningi fimbo tava longo oilonga yomeumbo. Doshili, otava hopaenene omupsalme Asaf oo a shanga ta ti: “Onda hala okudimbulukwa oinenelonga yOmwene, heeno, okudimbulukwa oikumifilonga yoye yonale, onda hala ndi diladile okulonga kwoye nokufekaafeka oiningwa yoye inene.”—Epsalme 77:12, 13.

Oikala ya yuka ohai eta oidjemo iwa

5. Omolwashike ekonakono lopaumwene li na okukala la fimana kufye?

⁵ Mefimbo letu lonena leeTV, eevidio nosho yo leekombiuta, ovanhu vahapu ihava lesha vali unene. Osho kashi na okukala ngaho mokati kEendombwedi daJehova. Doshili, okulesha Ombibeli okwa fa ongodi yomwenyo oyo tai tu kwatakanifa naJehova. Omido omayovi da pita, Josua okwa shikula Moses e li omuwiliki waIsrael. Opo a mone omanangeko noupuna aJehova, Josua okwa li e na okulesha Eendjovo daKalunga. (Josua 1:8; Epsalme 1:1, 2) Osho oshi li natango oshiteelelwa kunena. Ndelenee omolwehongo la ngabekwa, vamwe otashi dulika ve na oudjuu wokulesha ile haku va lolokifa. Hano, oshike tashi dulu oku tu kwafela tu kale twa hala okulesha nokukonakona Eendjovo daKalunga? Enyamukulo otali dulu okuhangwa meendjovo dohamba Salomo da shangwa mOmayeletumbulo 2:1-6. Pandja Ombibeli yoye ndele to lesha eevelishe odo. Opo nee ohatu ke di kundafaneni pamwe.

6. Oikala ilipi tu na okuulika shi na sha neshiivo lokushiiva Kalunga?

⁶ Shotete, ohatu mono ekumaido eli, tali ti: “Omumwange, ove ngenge ho tambula eendjovo dange noipango yange ho i tuvikile muove, opo u pakalekele omatwi oye okupwilikina ounongo nokulemena omutima woye keendunge; . . . ” (Omayeletumbulo 2:1, 2) Oshike hatu lihongo meendjovo odo? Oshosho kutya keshe umwe womufye oku na oshinakuwanifwa. Didilika elombwelo olo “ngenge ho tambula eendjovo dange.” Outumbulilo oo “ngenge” owa fimana molwaashi ovanhu vahapu ihava yandje elitulemo kEendjovo daKalunga. Opo tu mone ehafo mokukonakona Eendjovo daKalunga, otu na okukala twa hala okutambula eendjovo daJehova nokukala nado ngaashi emona olo inatu hala okukanifa. Katu na nande okweefa elandulafano letu lakeshe efiku li tu kaleke unene twe lipyakidila ile twa piyaanekwa ndele hatu tameke okukala tu he na ko nasha nEendjovo daKalunga ile twe di limbililwa nokuli.—Ovaroma 3:3, 4.

7. Ngeenge tashi dulika, omolwashike tu na okukala nosho yo okuyandja elitulemo pokwoongala kwopaKriste?

⁷ Mbela ohatu “pakalekele omatwi” nokupwilikina nawa ngeenge Eendjovo daKalunga tadi fatululwa pokwoongala kwetu kwopaKriste? (Ovaefeso 4:20, 21) Mbela ohatu ‘lemene omitima’ detu keendunge? Otashi dulika omupopi ke na owino muhapu, ndele fimbo ta tukula Eendjovo daKalunga, okwa wana okupewa elitulemo letu alishe. Doshili, opo tu yandje elitulemo kounongo waJehova, otu na okukala alushe pokwoongala kwopaKriste ngeenge otashi dulika. (Omayeletumbulo 18:1) Diladila kenyeme olo la li niwe kwaavo tashi dulika va li inave uya kokwoongala monduda yopombada muJerusalem pOpentekoste 33 O.P.! Nonande okwoongala kwetu kaku fi kukonekwedi ngaashi oko, ohaku kundafanwa elongifwambo letu la fimana, Ombibeli. Kungaha, okwoongala keshe otaku dulu okukala enangeko noupuna kufye ngeenge ohatu yandje elitulemo nokushikula pamwe mEembibeli detu.—Oilonga 2:1-4; Ovaheberi 10:24, 25.

8, 9. (a) Ekonakono lopaumwene otali tu pula shike? (b) Ongahelipi to dulu okuyeleka ongushu yoshingoli neudeko leshiivo lokushiiva Kalunga?

⁸ Eendjovo dohamba inaendunge tadi shikula otadi ti: “Heeno, ngenge ho ifana [eudeko, NW] ho yelulile ondaka yoye keendunge, . . . ” (Omayeletumbulo 2:3) Eendjovo odo otadi tu lombwele oikala ile eamo lilipi? Doshili, otadi tu lombwele shi na sha nehalo la mana mo lokuuda ko Eendjovo daJehova. Otadi popi ehalo lokukonakona nelalakano lokumona eendunge, okuuda ko kutya ehalo laJehova olilipi. Doshili, osho otashi pula eenghendabala, naashi otashi tu twala keendjovo nosho yo kefaneko laSalomo la landula ko.—Ovaefeso 5:15-17.

⁹ Ota twikile ko ta ti: ‘Ngenge to kongo eudeko ngaashi oshisilveri ndee to li shitilile ngaashi omamona a holekwa, . . . ’ (Omayeletumbulo 2:4) Eshi otashi tu diladilifa oilonga yovalumenhu ovo va konga osho hashi ifanwa oivela i na ondilo yoshisilveri noyoshingoli oule womafelemido. Ovanhu vamwe ova dipaa vakwao omolwoshingoli. Vamwe ova kala onghalamwenyo yavo aishe tava kendabala oku shi mona. Ndele mbela oshingoli oshi na ongushu yashili i fike peni? Ngeno owa li nee wa kanena mombuwa nowa li to hale okufya kenota, ngeno oto ka kala wa hala shike, oshingoli ile ehalasha lomeva? Ndelenee ovalumenhu ovaladi ova konga oshingoli nonande ongushu yasho kai fi yolelalela noihai kalelele.a Inatu pumbwa tuu ouladi muhapu opo tu konge ounongo, eendunge nosho yo eudeko li na sha naKalunga nosho yo nehalo laye! Ndele mbela omauwa elipi taa di mokukonga kwa tya ngaho?—Epsalme 19:8-11; Omayeletumbulo 3:13-18.

10. Oshike hatu dulu okumona ngeenge ohatu konakona Eendjovo daKalunga?

¹⁰ Okupopya kwaSalomo otaku twikile, taku ti: “Opo nee to ka uda ko etilo lokutila Omwene nokumona eshiivo lokushiiva Kalunga.” (Omayeletumbulo 2:5) Kali fi tuu ediladilo likumwifa—kutya fye tu li ovanhu ovalunde ohatu dulu okumona “eshiivo lokushiiva Kalunga,” Jehova, Omwene Omunamapangelo weshito alishe! (Epsalme 73:28; Oilonga 4:24) Ovafilosofi nosho yo ovo hava ifanwa ovanaendunge vounyuni ova kendabala oule womafelemido opo va ude ko oiholekwa i na sha nokukalamwenyo nosho yo neshito alishe. Ndelenee ova dopa okumona “eshiivo lokushiiva Kalunga.” Omolwashike? Nonande opo la kala oule womido omayovi mEendjovo daKalunga, Ombibeli, ove li ekelashi li li la nafangwa unene nokungaha ova dopa oku li tambula ko noku li uda ko.—1 Ovakorinto 1:18-21.

11. Omauwa amwe elipi taa di mekonakono lopaumwene?

¹¹ Etwomukumo vali limwe olo Salomo a divilika otali ti: “Omwene ta yandje ounongo, mokanya kaye tamu di eshiivo neendunge.” (Omayeletumbulo 2:6) Jehova oha yandje nehalo liwa ounongo, eshiivo nosho yo eendunge kukeshe umwe oo a hala oku i konga. Doshili, otu na omatomheno a wana okukala tu hole ekonakono lopaumwene lEendjovo daKalunga, nokuli nonande otashi pula eenghendabala, elipangelo mwene nosho yo eliyambo. Otu na nokuli Eembibeli da nyanyangidwa noinatu pumbwa okushanga eekopi nomake ngaashi vamwe va ninga momafimbo onale.—Deuteronomion 17:18, 19.

Opo okweenda kwetu ku wapalele Jehova

12. Oshike shi na okukala elinyengotomheno mokulalakanena kwetu eshiivo lokushiiva Kalunga?

¹² Oshike shi na okukala elinyengotomheno letu li na sha nekonakono letu lopaumwene? Okukala mbela hatu monika tu li xwepo tu dule vamwe? Mbela okukala hatu ulike eshiivo linene? Doshili, mbela okuninga omunhu oo e shii unene Ombibeli? Ahowe. Elalakano letu olo okukala Ovakriste mokweenda kwetu, mokupopya kwetu nosho yo mokukala kwetu, tu kale alushe twe lilongekida okukwafela vamwe, momhepo tai tulumukifa ya fa yaKristus. (Mateus 11:28-30) Omuyapostoli Paulus okwa londwela ta ti: “Okushiiva otaku nenepekifa, ndele ohole otai tungu.” (1 Ovakorinto 8:1) Onghee hano, otu na okukala noikala yelininipiko oyo ya ulikwa kuMoses eshi a popya kuJehova ta ti: “Shiivifile nge eendjila doye, opo ndi shiive oku ku shiiva, opo ndi shiive [okufilwa onghenda] momesho oye.” (Exodus 33:13) Heeno, otu na okukala twa hala eshiivo opo tu dule okuhafifa Kalunga, ndele hakukumwifa ovanhu. Otwa hala okukala ovapiya vaKalunga ve lininipika notave mu wapalele. Ongahelipi hatu dulu okuhanga elalakano olo?

13. Oshike sha pumbiwa opo omunhu a kale omupiya waKalunga te mu wapalele?

¹³ Paulus okwa pa Timoteus omayele kombinga yanghee ta dulu okuhafifa Kalunga, ta ti: “Diinina, u monike kuKalunga oove omufindani [momayeleko], omulongi ita fi ohoni oshilonga shaye, e shii [okulongifa nawa eendjovo doshili, NW].” (2 Timoteus 2:15) Outumbulilo “okulongifa nawa” owa dja koshityalonga shOshigreka sha kwatakanifwa noitya ikwao, osho petameko sha li tashi ti ‘okuteta wa yukilila.’ (Kingdom Interlinear) Pavahongwanhu vamwe, osho otashi yandje ediladilo lomuhondji ta tete oshiyata she likolelela kopatolona ile lomunafalama ta pulula eefola mepya, nosho tuu. Kashi na nee mbudi kutya omushike, oshidjemo, oshinima oshi na okukala sha yukilila. Oshitwa oshosho kutya opo Timoteus a kale omupiya waKalunga e mu wapalela nokwa hokiwa kuye, okwa li e na ‘okudiinina’ opo a kale noushili kutya omahongo aye nelihumbato laye okwa li tai tu kumwe neendjovo doshili.—1 Timoteus 4:16.

14. Ongahelipi ekonakono letu lopaumwene li na okunwefa mo osho hatu ningi nosho yo osho hatu popi?

¹⁴ Paulus okwa yandja oshitwa sha faafana eshi a ladipika Ovakriste vakwao muKolossi opo ‘okweenda kwavo ku wapalele Omwene, ve mu hafife mwaaishe shili mokwiimika oiimati moshilonga keshe shiwa, nokukula mokushiiva Kalunga.’ (Ovakolossi 1:10) Opo Paulus okwa kwatakanifa kumwe okuwapalela Jehova “nokwiimika oiimati moshilonga keshe shiwa” nosho yo ‘okukula mokushiiva Kalunga.’ Noitya imwe, osho sha talika ko kuJehova sha fimana kashi fi ashike kutya otwa fimaneka eshiivo shi fike peni, ndelenee onghee yo hatu kanyatele filufilu kEendjovo daKalunga mwaasho hatu ningi nosho yo osho hatu popi. (Ovaroma 2:21, 22) Eshi osha hala okutya ekonakono letu lopaumwene oli na okunwefa mo okudiladila kwetu nosho yo elihumbato letu ngeenge otwa hala okuhafifa Kalunga.

15. Ongahelipi hatu dulu okwaamena nokupangela omadiladilo etu?

¹⁵ Kunena, Satana okwa tokola toko okuhanauna po oupamhepo wetu mokuxumifa komesho oita yomomadiladilo. (Ovaroma 7:14-25) Onghee hano, otu na okwaamena nosho yo okupangela omadiladilo etu opo tu wapalele Kalunga ketu, Jehova. Oshilwifo osho tu na osho “okushiiva Kalunga,” osho tashi dulu ‘okutula ediladilo keshe meti li dulike kuKristus.’ Osho oshi li natango etomheno kufye lokuyandja elitulemo kokukonakona Ombibeli efiku keshe, molwaashi otwa hala okukufa mo filufilu omadiladilo okulihola mwene noopambelela momadiladilo etu.—2 Ovakorinto 10:5, yelekanifa OB-1986.

Ekwafo okuuda ko

16. Ongahelipi hatu dulu okulimonena ouwa eshi Jehova te tu hongo?

¹⁶ Omahongo aJehova otaa eta omauwa opamhepo nosho yo opalutu. Kae fi itaa hokwifa ile e he na ongushu tai longo. Onghee hano, ohatu lesha taku ti: “Aame Omwene Kalunga koye, ou handi ku longo [u limonene ouwa, NW], ndele handi ku tula mondjila ei u nokweenda nayo.” (Jesaja 48:17) Ongahelipi Jehova te tu ningi tu ende mondjila yaye i na ouwa? Shotete, otu na Eendjovo daye da nwefwa mo, Ombibeli Iyapuki. Oyo elongifwambo letu la fimana, omo hatu kongo alushe omayele. Omolwaasho shiwa okushikula pokwoongala kwopaKriste tu na Eembibeli da patuluka. Oidjemo iwa yoku shi ninga otai dulu okumonika mehokololo lelenga lokuEtiopia, la shangwa mOilonga etukulwa eti-8.

17. Oshike sha ningwa po shi na sha nelenga lokuEtiopia, naashi otashi yelifa shike?

¹⁷ Elenga lokuEtiopia okwa li le lidilululifwa ndele tali ningi leitavelo lOshijuda. Ola li omwiitaveli washili muKalunga nola konakona Omishangwa. Okwa li tali ende netemba lalo nokwa li tali lesha eendjovo daJesaja, eshi Filippus a tondokela kulo ndele te li pula ta ti: “Ove u udite ko tuu eshi to lesha?” Elenga ola nyamukula ngahelipi? “Handi udu ko ngahelipi, ngenge kape na ou ta tula nge mondjila? Ndele okwa ifana Filippus a londe metemba, ye a kale omutumba pamwe naye.” Opo nee Filippus, mokuwilikwa komhepo iyapuki, okwa kwafela elenga li ude ko exunganeko laJesaja. (Oilonga 8:27-35) Eshi otashi yelifa shike mbela? Otashi yelifa kutya okulesha kwetu Ombibeli paumwene inaku wana. Jehova ota longifa ongudu yomupiya omudiinini nomunaendunge okupitila momhepo yaye oku tu kwafela tu ude ko Eendjovo daye pefimbo la wapala. Eshi otashi ningwa ngahelipi?—Mateus 24:45-47; Lukas 12:42.

18. Ongudu yomupiya omudiinini nomunaendunge ohai tu kwafele ngahelipi?

¹⁸ Nonande ongudu yomupiya oya popiwa i li “omudiinini nomunaendunge,” Jesus ina tya kutya otai ka kala ya wanenena. Ongudu oyo yovamwatate ovavaekwa ovadiinini natango oya fikama po movamwatate Ovakriste inava wanenena. Nokuli nonande ove na omalalakano mawa elela, otava dulu okupuka, ngaashi ovalumenhu vomefelemudo lotete va li omafimbo amwe va puka. (Oilonga 10:9-15; Ovagalati 2:8, 11-14) Ndelenee elinyengotomheno lavo ola koshoka, na Jehova ote va longifa oku tu pa oikwafifo yokukonakona Ombibeli opo tu tunge eitavelo letu mEendjovo daKalunga nosho yo momaudaneko aye. Oshilongifo shinene omolwekonakono lopaumwene osho sha yandjwa komupiya osho oNew World Translation of the Holy Scriptures. Paife otai monika i li aishe ile moitukulwa, momalaka 42 noya nyanyangidwa meekopi omamiliyona 114 momanyanyangido e lili noku lili. Ongahelipi hatu dulu oku i longifa nomupondo mekonakono letu lopaumwene?—2 Timoteus 3:14-17.

19. Omaukwatya amwe elipi oNew World Translation—With References taa dulu okukala ekwafo mekonakono lopaumwene?

¹⁹ Pashihopaenenwa, diladila koNew World Translation of the Holy Scriptures—With References. Oi na omisholondodo domaulikokwatakanifo, omashangelo opedu, euliko loitya li li pauxupi molupe ‘lOshiulikifo shOitya yOmbibeli’ ‘nOshiulikifo shOitya yOmashangelo opedu’ nosho yo Oiwedelwako pamwe nomahokololo a tamununwa mo oipalanyole 43, mwa kwatelwa ouwaalita nosho yo omisholondodo. Oi na natango “Etwalemo,” li na omayelifo eedjo dihapu odo da longifwa okweeta po etoloko lOmbibeli olo le likalekelwa. Ngeenge oi li melaka olo to dulu okuuda ko, kendabala ngaashi to dulu u shiive nawa omaukwatya oo noku a longifa. Ashike, mokukonakona kwetu otu na okutameka alushe nOmbibeli, noNew World Translation oi li elundululo olo tali divilike nawa edina laKalunga eshi tali divilike epangelo lOuhamba waKalunga.—Epsalme 149:1-9; Daniel 2:44; Mateus 6:9, 10.

20. Omapulo elipi paife e na sha nekonakono lopaumwene a pumbwa enyamukulo?

²⁰ Paife, otashi dulika tu pule: ‘Ekwafo lilipi natango twa pumbwa opo tu ude ko Ombibeli? Ongahelipi hatu dulu okutula po efimbo lekonakono lopaumwene? Ongahelipi hatu dulu okuninga ekonakono letu li kale li na omupondo munene? Ongahelipi ekonakono letu li na okukuma vamwe?’ Oshitukulwa tashi landula otashi ka yelifa oinima oyo ya fimanenena i na sha neehenokomesho letu lopaKriste.

[Omashangelo opedu]

[Efano pepandja 21]

Oilyo youkwaneumbo waBetel ohai mono tashi pameke pamhepo okutameka efiku keshe nokukonakona omushangwa wOmbibeli

[Efano pepandja 21]

Efimbo li na ondilo otali dulu okulongifwa mokupwilikina koungalo vOmbibeli omanga hatu ende

[Efano pepandja 22]

Ovalumenhu ova longa noudiinini nosho yo oule wefimbo opo va mone oshingoli. Eenghendabala di fike peni mbela ho ningi opo u konakone Eendjovo daKalunga?

[Efano pepandja 22]

Courtesy of California State Parks, 2002

[Efano pepandja 23]

Ombibeli oyo emona olo tali dulu okutwala komwenyo waalushe

[Efano pepandja 24]

Oto dimbuluka?

• “Okudilonga” osha hala okutya ngahelipi?

• Oikala ilipi tu na okukala tu na shi na sha nokukonakona Eendjovo daKalunga?

• Elinyengotomheno lilipi tu na okukala tu na mokukonakona kwetu kwopaumwene?

• Oikwafifo ilipi yokuuda ko Ombibeli tu na?