1, 2. Outumbulilo “oshilyatelo sheemhadi” mOmishangwa dOshiheberi otau ulike kushike?

JEHOVA KALUNGA okwa ti: “Eulu olo olukalwapangelo lange, nedu olo oshipundi [ile oshilyatelo] sheemhadi dange.” (Jesaja 66:1) Kalunga okwa ti yo: “Oshilyatelo sheemhadi ohandi ke shi fimanekifa.” (Jesaja 60:13) Mbela ongahelipi ha fimanekifa oshilyatelo sheemhadi daye ile he shi ningi shi kale tashi monika nawa? Osho otashi ti shike kwaavo ve li kedu olo li li oshilyatelo sheemhadi daye?

² MOmishangwa dOshiheberi, outumbulilo “oshipundi sheemhadi” ile “oshilyatelo sheemhadi” owa longifwa yo tau ulike kotembeli yomuIsrael shonale. (1 Omafimbo 28:2; Epsalme 132:7) Otembeli oya li ya wapala neenghono momesho aJehova molwaashi oyo ya li ondingandinga yelongelokalunga lashili. Noya li hai longifwa okufimanekifa Jehova kombada yedu.

3. Ondingandinga yelongelokalunga lashili kunena oshike, noya hovela naini?

³ Ondingandinga yelongelokalunga lashili kunena oilipi? Kashi fi vali etungo ngaashi otembeli oyo ya li ko. Otembeli yopamhepo oyo tai tumbalekifa Jehova shi dulife etungo keshe la li hali mu fimanekifa. Otembeli yopamhepo oshike? Oyo elongekido laKalunga olo hali pitike ovanhu va ninge ookaume kaye noku mu longela. Elongekido olo ola ningwa ashike tali shiiva omolwekulilo laJesus. Ola hovela momudo 29 eshi Jesus a ninginifwa nokwa vaekwa e li Omupristeri Omukulunhu wotembeli yaJehova yopamhepo. — Ovaheberi 9:11, 12.

4, 5. (a) PaPsalme 99, oshike osho ovalongeli vaJehova vashili va hala okuninga? (b) Epulo lilipi tu na okulipula?

⁴ Otwa pandula neenghono omolwelongekido laKalunga lelongelokalunga lashili. Ohatu ulike olupandu letu mokulombwela vamwe kombinga yedina laJehova nosho yo oshali yaye ikumwifi yekulilo. Otwa hafa eshi pe na Ovakriste vashili ve dulife pomamiliyona ahetatu tava tange Jehova efiku keshe. Fimbo ovanhu vahapu vomalongelokalunga hava diladila papuko kutya otava ka tanga Kalunga meulu shimha va fi, oshiwana shaJehova oshi shii nghee sha fimana oku mu tanga shi li kombada yedu notashi shi ningi paife.

⁵ Ngeenge hatu tange Jehova, ohatu hopaenene oshihopaenenwa shovapiya vaKalunga ovadiinini ovo va popiwa mEpsalme 99:1-3, 5-7. (Lesha.) Ovalumenhu ovadiinini ngaashi Moses, Aron naSamuel ova li hava yambidida pauyadi elongekido laKalunga lelongelokalunga lashili. Kunena, fimbo ovavaekwa ovo ve li kombada yedu inava ya meulu va ka longe ve li ovapristeri pamwe naJesus, otava longele Jehova noudiinini motembeli yopamhepo kombada yedu. Omamiliyona “eedi” dimwe ohaa yambidida ovavaekwa noudiinini. (Johannes 10:16) Eengudu odo dopavali ohadi longele Jehova da hangana. Ashike otwa pumbwa okulipula kutya, ‘Mbela ohandi yambidida ngoo pauyadi elongekido laJehova lelongelokalunga lashili?’

⁷ Momudo 1919, ovo va tambulwa ko kuKalunga notave mu longele motembeli yopamhepo ove ke limonikila mo nawa. Ova li va ninga omalunduluko opo elongelokalunga lavo li tambulwe ko kuJehova. (Jesaja 4:2, 3; Malakia 3:1-4) Onghee hano, emoniko olo omuyapostoli Paulus a hangwa a mona konima yomido omafele ola li la hovela okuwanifwa.

8, 9. ‘Oparadisa’ oyo Paulus a mona memoniko oshike?

⁸ Emoniko laPaulus otali hangwa mo 2 Ovakorinto 12:1-4. (Lesha.) Memoniko olo, Jehova okwa li a ulikila Paulus oshinima osho sha li tashi ka ningwa monakwiiwa. ‘Oparadisa’ oyo ya monika kuPaulus oshike? Paulus okwa li ta popi oinima itatu ya yoolokafana. Shotete, oparadisa yo venevene oyo i li pokuuya kombada yedu. (Lukas 23:43) Oshitivali, oparadisa yopamhepo oyo tai ka hafelwa pauyadi mounyuni mupe. Oshititatu, onghalo ikumwifi yomeulu ‘moparadisa yaKalunga.’ — Ehololo 2:7.

⁹ Omolwashike Paulus a ti kutya “okwa uda eendjovo kadi shii kutumbulwa, omunhu ina itavelelwa oku di tonga”? Omolwaashi halo la li efimbo lokuyelifa moule oinima ihokwifa oyo a mona memoniko. Ashike kunena Jehova okwe tu pitika tu lombwele vamwe kombinga yomanangekonoupuna oo taa hafelwa koshiwana shaye paife.

10. Omolwashike oparadisa yopamhepo notembeli yopamhepo dihe fi oshinima shimwe?

¹⁰ Mbela oparadisa yopamhepo oyo luhapu hatu popi oshike? Oyo ombili noukumwe oo Kalunga ha pe oshiwana shaye. Onghee hano, oparadisa yomhepo notembeli yopamhepo kai fi oshinima shimwe. Otembeli yopamhepo oyo elongekido laKalunga lelongelokalunga lashili. Oparadisa yopamhepo oya holola pouyelele ovo va hokiwa kuKalunga nohave mu longele motembeli yaye yopamhepo. — Malakia 3:18.

11. Otu na oufembanghenda washike kunena?

¹¹ Oshitunhula okushiiva kutya mo 1919, Jehova okwa pitika ovanhu inava wanenena va longe, va pameke nova tamunune mo otembeli yopamhepo. Oto yambidida ngoo mokulonga oilonga oyo itunhula? Owa pandula ngoo koufembanghenda wokulonga naJehova oilonga oyo tai mu tumbalekifa kombada yedu?