Otashi dulika ovashikuli vaJesus va shakeneke omahepeko a kwata moiti, ashike okwe va udanekela a ti: “Ngeenge ove mu twala kovapangeli, inamu kala mu noshisho kutya otamu ka popya ngahelipi ile mu tye shike, molwaashi osho tamu ka popya otamu ke shi pewa pefimbo opo; osheshi hanye ashike vene tamu ka popya, ndele omhepo yaXo yeni oyo tai ka popya munye.” Okwa weda ko vali a ti: “Omumwaxe ota ka yandja omumwaxe a dipawe, naxe omona waye, nounona otava ka kala ve li omhinge novadali vavo, ndele tave va dipaifa. Ndele otamu ka tondwa kovanhu aveshe omolwedina lange, ashike ou te lididimike fiyo okexulilo ota ka xupifwa.” — Mateus 10:19-22.

Jesus okwa li a pa ovayapostoli vaye 12 omalombwelo, omalondwelo nosho yo etwomukumo la denga mbada. Oto dulu okukala u na olupandu molwaashi eendjovo odo oda nuninwa yo ovo tava ka kufa ombinga moilonga yokuudifa konima yefyo laJesus nosho yo yenyumuko laye. Osho okwe shi ulika yo eshi a pa ovahongwa vaye omalombwelo kutya otava ka ‘tondika kovanhu aveshe,’ ndele hakovanhu ashike ovo ovayapostoli va lombwelwa va ka udifile. Shikwao vali, inatu lesha kutya ovayapostoli ova li va twalwa komesho yovapangeli noyeehamba momukokomoko wefimbo lixupi olo va kala tava udifile muGalilea ile va dipaifwa kovapambele vavo.

Osha yela kutya Jesus okwa li e na momadiladilo osho sha li tashi ka ningwa monakwiiwa eshi a li ta lombwele ovahongwa vaye oinima oyo. Diladila kwaasho a li a lombwela ovahongwa vaye kutya itava ka mana okuudifila moshitukulwa shavo “fiyo Omona womunhu ote uya.” Jesus okwa ulika kutya ovahongwa vaye itava ka mana okuudifa kombinga yOuhamba waKalunga ofimbo omutumbalekwa Jesus Kristus ine uya e li omutokoli oo a nangekwa po kuKalunga.