Opa li ovalumenhu vamwe va dja koushilo. Ovalumenhu ovo ovanyanekeli veenyofi, nohava konakona eenyofi nohava ti kutya otava dulu okumona eityo laasho tashi ningwa monghalamwenyo yovanhu. (Jesaja 47:13) Ofimbo ve li koshilongo shavo, ova mona “onyofi” ndele tave i landula va finda kuJerusalem ndele hakuBetlehem.

Eshi va fika kuJerusalem ova pula va ti: “Ohamba yOvajuda ei opo ya dalwa oi li peni? Osheshi otwa mona onyofi yayo eshi twa li koushilo, notwe uya okulinyongamena ohamba oyo.” — Mateus 2:1, 2.

Mbela olyelye a li ta wilike “onyofi” oyo ya li i kwetele komesho ovanyanekeli veenyofi? Dimbuluka kutya onyofi oyo kaya li ye va twala odikilila kuJesus muBetlehem. Ponhele yaasho oya li ye va twala kuJerusalem, oko va li va shakena nohamba Herodes, oyo ya li ya hala okudipaa Jesus. Ngeno Kalunga ka li a ya mo olunyala a londwele ovanyanekeli veenyofi vaha shune kuJerusalem, ngeno Herodes okwa dipaa Jesus. Osha yela kutya Satana oo e li omutondi waKalunga oye a li a hala okudipaa Jesus, nokwa li ta kendabala okulongifa onghedi oyo opo a wanife po elalakano laye.