Nghee hatu dulu okuhanga omitima dovapambele vetu ovo vehe fi ovaitaveli

JESUS KRISTUS okwa ti: “Inda keumbo kovakweni, ove u va hepaululile, Omwene nhumbi e ku ningila oilonga inene, ndele te ku filonghenda.” Jesus okwa li a lombwela omulumenhu umwe oo a li a hala okuninga omushikuli waye eendjovo odo fimbo a li muGadara, osho tashi dulika sha li koushilolukadi lEfuta laGalilea. Eendjovo odo otadi ulike kutya Jesus oku shii nawa eamo lovanhu, olo kutya ohava kala va halelela okulombwela ovapambele vavo oinima oyo ihokwifa noya fimana kuvo. — Mark. 5:19.

Eamo la tya ngaho oli li apeshe kunena, nonande oli liwetikile unene momaputuko amwe. Ngeenge umwe okwa tambula ko elongelokalunga lashili, oha kala a halelela okulombwela ovapambele vaye kombinga yeitavelo laye lipe. Ndele mbela oku na oku shi enda ngahelipi? Ongahelipi ta dulu okuhanga omitima dovapambele vaye ovo ve li melongelokalunga la yooloka ko kulaye ile vehe na nokuli eitavelo nandenande muKalunga? Ombibeli otai yandje omayele mawa noku shii okulineekelwa.

“OTWA MONA MESSIAS”

Mefelemudo lotete, Andreas oye wotete oo a li a didilika kutya Jesus oye Messias. Mbela okwa ka lombwela lyelye diva eshi e shi didilika mo? Ombibeli oya ti: “Ye [Andreas] okwa shakena tete nomumwaina Simon, ndee ta ti kuye: Fye otwa mona Messias, otashi ti Kristus.” Andreas okwa li a twala Petrus kuJesus, nokungaho okwa li a kwafela Petrus a ninge umwe womovashikuli vaJesus. — Joh. 1:35-42.

Omido 6 konima yaasho eshi Petrus a li muJoppe, okwa li a lombwelwa a ye kuKesarea kombinga yokolundume a ka talele po Kornelius, omukulunhu wetangakwaita. Mbela Petrus meumbo laKornelius okwa hanga mo oolyelye? Ombibeli oya ti: “Kornelius okwa hangika e va teelela [Petrus novaendi pamwe naye], okwa ifana ko ovakwao nookaume vaye.” Kungaho Kornelius okwa li a yandja omhito kovapambele vaye opo va ude osho Petrus ta popi vo va ninge omatokolo she likolelela kwaasho va uda. — Oil. 10:22-33.

Oshike hatu lihongo monghedi omo Andreas naKornelius va ungaunga novapambele vavo?

Andreas naKornelius ova li va katuka eenghatu va kwafele ovapambele vavo. Pashihopaenenwa, Andreas okwa li a twala Petrus kuJesus, naKornelius okwa li a ninga omalongekido opo ovapambele vaye ve uye va pwilikine kwaasho Petrus a li ta popi. Ashike Andreas naKornelius kava li va fininika ovapambele vavo ile ve va heke opo va ninge ovashikuli vaKristus. Mbela oshike hatu lihongo mwaasho? Otashi ka kala shiwa ngeenge nafye otwa katuka monghedi ya faafana. Otashi dulika tu mone omhito yokulombwela ovapambele vetu kombinga yoshili yOmbibeli nokukonga eemhito ve lishiive novaitaveli vakwetu. Ashike pefimbo opo tuu opo otwa fimaneka emanguluko lavo lokuninga omatokolo nokuhenuka oku va fininika. Opo tu mone kutya ongahelipi hatu dulu okukwafela ovapambele vetu, natu ka taleni koshihopaenenwa shaJürgen naPetra, ovalihomboli vokuNdowishi.

Petra okwa konakona Ombibeli nEendombwedi daJehova nomokweendela ko kwefimbo okwa li a ninginifwa. Omushamane waye Jürgen, okwa li omukulunhu wetangakwaita. Pehovelo, Jürgen ka li a hafa eshi omukulukadi waye a li a ninga etokolo la tya ngaho. Ndele mokweendela ko kwefimbo, okwa li a didilika kutya Eendombwedi ohadi udifa oshili yOmbibeli. Ashike naye lwanima okwe ke liyapulila Jehova, nopaife oku li omukulunhuongalo meongalo lavo. Mbela paife oha yandje omayele elipi e na sha nokuhanga omitima dovapambele vetu ovo ve na eitavelo la yooloka ko kuletu?

Jürgen okwa ti: “Katu na okukenyananeka nokufininikila ovapambele vetu oinima yopamhepo. Osho otashi ke va tundika ashike. Otashi dulika shiwa ashike okukala hatu va kufile ko kanini nelungi omalupita. Osha fimana yo kovapambele vetu okulishiiva novamwatate vepupi lavo nove na ohokwe moinima ya faafana. Okuninga ngaho otaku dulu okweetifa ekwatafano liwa.”

Omuyapostoli Petrus nosho yo ovapambele vaKornelius ova li ve linyenga nawa diva ketumwalaka lOmbibeli. Vamwe vali vomefelemudo lotete ovo va li ve lihonga oshili ova li va pumbwa efimbo la wana opo va ninge omatokolo.

ONGAHELIPI KOMBINGA YOVAMWAINA VAJESUS?

Vahapu vomovapambele vaJesus ova li ve mu itavela pefimbo loukalele waye womoipafi. Pashihopaenenwa, otashi dulika omuyapostoli Jakob naJohannes va li va pamba Jesus molwaashi ina yavo Salome okwa li omumwaina waina yaJesus. Otashi dulika oye omukainhu umwe oo a li “noovakwao vahapu ava ve va yakula [Jesus novayapostoli] noinima yavo.” — Luk. 8:1-3.

Ashike vamwe vomoukwaneumbo wooJesus inave mu itavela diva. Ombibeli oya ti: “Ovakwao eshi ve mu uda, ova ya ko ve ke mu kwate, osheshi okwa tiwa: Ota i eenghwengu.” Efimbo lonhumba konima yaasho, eshi ovamwaina vaJesus va li tave mu pula kombinga yeemhangela domalweendo aye, Jesus ka li e va pa enyamukulo lofaafaa. Omolwashike mbela? Ombibeli oya ti: “Osheshi novamwaina ova li yo inave mu itavela.” — Mark. 3:21; Joh. 7:5.

Oshike hatu lihongo monghedi omo Jesus a li a ungaunga novapambele vaye? Jesus ka li a handuka eshi a li a ulwa kutya otai eenghwengu. Nokuli nokonima eshi a li a dipawa nokunyumuka, Jesus okwa li a twa omukumo ovapambele vaye mokulihololela mumwaina Jakob. Elihololo la tya ngaho otashi dulika la li la kwafela Jakob navamwaina vaJesus vakwao va kale va tomhwa filufilu kutya oye Messias. Onghee hano, ovamwaina vaJesus ova li pamwe novayapostoli monduda yopombada muJerusalem nova li va tililwa omhepo iyapuki. Mokweendela ko kwefimbo, Jakob, Judas navamwaina vaJesus vakwao ova ka hafela omaufembanghenda makumwifi. — Oil. 1:12-14; 2:1-4; 1 Kor. 15:7.

VAMWE OTASHI VA PULA EFIMBO

Ngaashi ashike mefelemudo lotete, vamwe otashi va pula efimbo opo va tambule ko oshili oyo tai twala komwenyo. Diladila koshihopaenenwa shaRoswitha oo a li a kanyatela kongeleka yaKatolika kaRoma eshi omushamane waye a ninginifwa e li Ondombwedi yaJehova mo 1978. Molwaashi okwa li omuladi melongelokalunga laye, potete Roswitha okwa li ha pataneke omushamane waye. Ndele konima yomido donhumba, okupataneka kwaye okwa li kwa oka nokwa ka mona kutya Eendombwedi ohadi hongo oshili. Mo 2003, naye okwa li a ninginifwa. Oshike mbela sha li sha etifa omalunduluko a tya ngaho? Ponhele yokukala a handuka omolwomapataneko opehovelo, omushamane okwa li a pa Roswitha omhito opo a lundulule etaleko laye. Mbela omayele elipi Roswitha a yandja? Okwa ti: “Ohatu ka pondola ashike ngeenge otwa twikile okukala hatu lididimike twa mana mo.”

Monika okwa ninginifwa mo 1974, novanamati vavali ova ka ninga Eendombwedi konima yomido 10 lwaapo. Nonande omushamane waye Hans ke na efiku e mu patanekele omolweitavelo laye, Hans okwa ka ninginifwa ashike mo 2006. Mokukwafelwa kokutala kwaasho sha ningwa po, oukwaneumbo otau yandje omayele elipi? Owa ti: “Kala omudiinini kuJehova noino efa po nandenande eitavelo loye.” Oshoshili kutya osha li sha fimana opo va kale alushe tava shilipaleke Hans kutya ove mu hole, nova kala alushe ve na omukumo kutya efiku limwe lomomafiku ota ka tambula ko oshili.

OVA TALALEKWA KOMEVA OSHILI

Jesus okwa li a popya shi na sha netumwalaka loshili kutya ola fa omeva oo taa yandje omwenyo waalushe. (Joh. 4:13, 14) Otwa hala ovapambele vetu va talalekwe mokunwa omeva oshili, matalala nokwa yela. Inatu hala nande va henwe komeva molwaashi twe va pa va nwe neulumo. Okutalalekwa ile okuhenwa okwe likolelela kunghee hatu va yelifile eitavelo letu. Ombibeli oya ti kutya “omutima womuyuki otau diladila osho tau shi nyamukula,” nosho yo kutya “omutima womunongo tau mu nongeke mokanya kaye ndee tau hapupalifa elongo lomilungu daye.” Ongahelipi hatu dulu okutula moilonga omayele oo? — Omayel. 15:28; 16:23.

Omukulukadi otashi dulika a kale a hala okuyelifila omushamane waye kombinga yeitavelo laye. Ndele ngeenge okwa ‘diladila osho ta ka nyamukula,’ ota ka dula okulongifa oitya ya hoololekeka nota ka popya a ngungumana. Ina kala e lishii ouyuki ile ta ulike a fa e shii shihapu e dule omushamane waye. Okupopya kwaye kwa diladilwa nawa otaku ka talaleka nokuxumifa komesho ombili. Omukulukadi oku na okunongela kutya onaini omushamane waye a fuwa nota dulu okupopiwa naye noupu. Omushamane oha hafele eenghundafana doludi lilipi ile oku hole okulesha kombinga yashike? Mbela oku na ohokwe moinima younongononi, opolitika ile omaudano? Ongahelipi omukulukadi ta dulu okupendula ohokwe yOmbibeli momushamane waye nopefimbo opo tuu opo okwa fimaneka omaliudo nomadiladilo aye? Okudiladila kombinga yoinima aishe oyo otaku ka kwafela omukulukadi a popye noku katuke pandunge.

Okuhanga omitima doilyo yomaukwaneumbo etu oyo ihe fi natango Eendombwedi okwa kwatela mo shihapu shihe fi ashike oku va yelifila kombinga yeitavelo letu. Osho hatu popi oshi na okuyambididwa kelihumbato liwa.

ELIHUMBATO LI SHII OKUHOPAENENWA

Jürgen oo a popiwa metetekelo okwa ti: “Kala alushe ho tula moilonga omafinamhango Ombibeli monghalamwenyo yoye yakeshe efiku. Oyo oyo onghedi ya denga mbada yokukwafela ovapambele va didilike kutya ope na eyooloko nokuli nonande otashi dulika vaha dimine shihapu.” Hans oo a ka ninginifwa pa pita omido 30 lwaapo okudja eshi omukulukadi waye a kala moshili, okwa ti: “Elihumbato liwa lOvakriste ola fimana opo ovapambele vetu va mone nghee oshili ya nwefa mo nawa okukalamwenyo kwetu.” Ovapambele vetu otava ka mona kutya eitavelo letu ole tu kwafela tu kale twa yooloka ko kuvamwe omolwelihumbato letu liwa.

Omuyapostoli Petrus okwa yandja omayele taa longo kovakulukadi ovo ve na ovashamane vehe li moshili, a ti: ‘Dulikeni kovalumenhu veni, opo naavo yo inava dulika kondjovo, va findwe keenghedi dovakainhu nande eendjovo kadi po eshi ve wete, nhumbi hamu ende moukoshoki nometilokalunga. Omidjalo deni doulenga diha kale odo dokombada ngaashi omapando eexwiki nokulimangela eenyemba doshingoldo ile okudjala oikutu youlenga, ndelenee omunhu womeni womomutima omokuhaxula po kwomhepo yombili noyelimweneneno oyo i nondilo koshipala shaKalunga.’ — 1 Pet. 3:1-4.

Petrus okwa popya kutya omushamane ota dulu okutomhwa koshihopaenenwa shelihumbato liwa lomukulukadi waye. Metwokumwe nomayele oo e li momushangwa oo, omumwameme wedina Christa okwa kala ta kendabala e linyengife omutima womushamane waye nelihumbato laye liwa okudja eshi a ninginifwa mo 1972. Nonande omushamane waye pomhito imwe okwa li ha konakona Ombibeli nEendombwedi, fiyo opaife ina ninga oshili yaye mwene. Okwa li ngoo ha i kokwoongala omalupita nokwa li e na ekwatafano liwa novamwatate meongalo. Ashike navo ova fimaneka oufemba waye wokuninga omatokolo. Mbela Christa okwa li a kendabala ngahelipi opo a hange omutima womushamane waye?

Christa okwa ti: “Onda li nda tokola toko okukala omudiinini kwaasho Jehova ta ti. Pefimbo opo tuu opo, ohandi kendabala ndi finde omushamane wange ‘nande eendjovo kadi po’ okupitila melihumbato liwa. Ohandi kendabala opo ndi mu ningile keshe osho ta pula ngeenge itashi nyono omafinamhango Ombibeli. Ashike onda fimaneka emanguluko laye lokuninga omatokolo nokweefela oinima momake aJehova.”

Oshihopaenenwa shaChrista otashi ulike nghee sha fimana okukala hatu tifuka. Okwa kala e na onghedindjikilile iwa yokuninga oinima yopamhepo, mwa kwatelwa okwoongala pandjikilile nokukufa ombinga moukalele wopaKriste monghedi tai ti sha. Natango, okwa li e shii kutya kaume kaye kopahombo oku na okuulikilwa ohole, okukala efimbo pamwe naye noku mu pa elitulemo. Oshi li pandunge kukeshe oo e na ovapambele vehe fi ovaitaveli a kale ha tifuka nokwa fimaneka omaliudo avo. Ombibeli oya ti: “Ashishe shi notundi yasho.” Osho osha kwatela mo efimbo lokukala noilyo yomaukwaneumbo etu, unene tuu ookaume ketu kopahombo ovo vehe fi ovaitaveli. Okukala pamwe efimbo ohaku xumifa komesho ekwatafano liwa. Oimoniwa otai ulike kutya okukala pamwe efimbo ohaku va ningifa vaha kale ve udite owike, vehe niwe navo ile vaha kale va twa ondubo. — Omuud. 3:1.

INO KANIFA ETEELELO

Holger oo xe a ka ninginifwa ashike konima yomido 20 okudja eshi oilyo ikwao youkwaneumbo ya ninginifwa okwa ti: “Osha fimana okuulika kutya otu hole oilyo youkwaneumbo wetu noku i ilikanena.” Christa okwa weda ko a ti kutya ‘oku na alushe omukumo kutya efiku limwe lomomafiku omushamane waye ota ka ama kombinga yaJehova nokutambula ko oshili.’ Otu na okukala alushe netaleko liwa li na sha novapambele vetu, tu na elineekelo kutya efiku limwe onava ka tambule ko oshili.

Natu shi ninge elalakano letu okukala tu na ekwatafano liwa novapambele vetu, nokungaho ohatu ke va pa omhito va didilike mo oshili nokuhanga omitima davo netumwalaka lOmbibeli. Natu ninge oinima aishe ‘nengungumano netilo.’ — 1 Pet. 3:15.