Efaneko lonhafi

9, 10. (a) Oshitwa shilipi Jesus a li a divilika mefaneko lonhafi? (b) Ombibeli luhapu ohai longifa onhafi okufaneka shike, nepulo lilipi hatu ka kundafana shi na sha nokulongifa kwaJesus onhafi mefaneko laye?

⁹ Ovanhu haalushe hava kala ve wete nghee ekulo tali ningwa. Oshitwa osho osha divilikwa mefaneko laJesus lonhafi. Jesus okwa ti: “Ouhamba wokeulu wa fa onhafi, omukainhu e i kufa ndee te i pilulile moufila woimbale itatu, fiyo aushe wa pya.” (Mat. 13:33) Onhafi otai faneke shike, naasho oshi na ekwatafano ngahelipi nekulo lOuhamba?

¹⁰ Luhapu mOmbibeli, onhafi ohai longifwa pafaneko, tai ulike koulunde. Omuyapostoli Paulus okwa li a longifa onhafi pafaneko, a li ta popi kombinga yenwefemo lii olo omunyoni wonhumba a li ta eta meongalo lomuKorinto shonale. (1 Kor. 5:6-8) Ndele mbela Jesus okwa li a longifa onhafi mefaneko laye okuulika koshinima shii?

11. Onhafi oya li hai longifwa ngahelipi muIsrael shonale?

¹¹ Fimbo inatu nyamukula epulo olo, natu kalekeni momadiladilo oitwa itatu ya fimana oyo tai landula. Shotete, nonande Jehova ka li a pitika onhafi i longifwe poshivilo shOpaasa, okwa li a pitika i longifwe momayambo oo kwa li haa yambwa pomafimbo amwe e lili. Onhafi oya li hai longifwa mokulongekida omapanduloyambo (omayambo ekwatakanifo), oo kwa li haa yambwa nehalo liwa opo omunhu a pandule Jehova omolwomanangeko noupuna mahapu oo a mona. Okwa li hashi kala omhito ihafifa neenghono okukufa ombinga mokulya omayambo a tya ngaho. — Lev. 7:11-15.

12. Oshike hatu lihongo monghedi omo Ombibeli hai longifa oinima yonhumba pafaneko?

¹² Oshitivali, nonande oshinima shonhumba osha longifwa mOmishangwa peemhito dimwe okuulika koshinima shii, otashi dulika shi longifwe yo peemhito dimwe okuulika koshinima shiwa. Pashihopaenenwa, 1 Petrus 5:8 okwa faafanifa Satana nonghoshi, molwaashi okwa nyika oshiponga. Ndele mepingafano naasho, Ehololo 5:5 ola faafanifa Jesus nonghoshi, la ti kutya Jesus oku li “onghoshi yomepata laJuda.” Pomhito oyo, onghoshi oya longifwa okufaneka oukwatya wokuwanifa po ouyuki nouladi.

13. Efaneko laJesus li na sha nonhafi otali tu hongo shike kombinga yekulo lopamhepo?

¹³ Oshititatu, eshi Jesus a longifa onhafi mefaneko laye, ina tya kutya oya nyonauna olumbololo alishe ndele tali kala itali dulu okulongifwa okuteleka omingome. Ponhele yaasho, Jesus okwa li ashike ta popi osho hashi ningwa po ngeenge omukainhu a hala okuteleka omingome. Onhafi oya li hai pilaulilwa molumbololo onhomenawina opo i fulike olumbololo. Ndelenee omukainhu ka li ha mono nhumbi onhafi tai fulike olumbololo. Osho otashi tu dimbulukifa efaneko lomukuni oo ha kunu ombuto ndele ta ka kofa konguloshi. Jesus okwa popya shi na sha nomukuni oo, a ti kutya, “ombuto otai mene, ndee tai kulu, ye mwene e he shii nhumbi tai ningi.” (Mark. 4:27) Olo kali fi tuu efaneko li li paunafangwa, olo tali yelifa nghee ekulo lopamhepo hali ningwa monghedi omo itatu dulu oku shi mona nghee tashi ningwa! Nonande potete ihatu kala tu wete nghee ekulo tali ningwa, oidjemo ohatu kala tu i wete.

14. Oshike tashi fanekwa kokupifa kwonhafi olumbololo alishe loufila?

¹⁴ Nonande ekulo olo ihali monika nomesho okomutwe kutya ohali ende ngahelipi, otali ningwa mounyuni aushe. Oshitwa osho nasho osha divilikwa mefaneko laJesus lonhafi. Jesus okwa ti kutya onhafi oya pifa olumbololo ‘loufila woimbale itatu.’ (Luk. 13:21) Ngaashi onhafi, oilonga yokuudifa Ouhamba, oyo tai etifa ekulo lopamhepo, oya tamunuka mo neenghono, nomolwaasho etumwalaka lOuhamba otali udifwa ‘fiyo okominghulo dounyuni.’ (Oil. 1:8; Mat. 24:14) Kau fi tuu oufembanghenda munene okukala hatu kufa ombinga moilonga yokuudifa Ouhamba oyo tai tamunuka mo monghedi ikumwifi!

20, 21. (a) Oshike twe lihonga momafaneko aJesus shi na sha nekulo? (b) Owa tokola toko okuninga shike?

²⁰ Fiyo opapa, oshike twe lihonga shi na sha nekulo momafaneko aJesus oo twa konakona moshitukulwa eshi? Shotete, ekulo lombuto yoshinapi otali faneke ekulo likumwifi loinima yOuhamba kombada yedu. Kape na ou ta dulu okuya moshipala etamunukemo loilonga yaJehova. (Jes. 54:17) Kakele kaasho, ovo hava ‘tungile oiyadi yavo momudile’ womuti moshinapi ohava kala va amenwa pamhepo. Oshitivali, omafaneko oo okwa divilika oushili oo kutya Kalunga oye ha kulike. Ngaashi ashike ihatu kala tu wete eshi onhafi tai pifa olumbololo loufila alishe, haalushe hatu kala tu wete ile tu udite ko nghee ekulo lopamhepo tali ningwa. Oshititatu, otwe lihonga kutya haaveshe ovo tava pwilikine etumwalaka lOuhamba tava ka kala eeshi diwa. Vamwe otava ka kala va fa eeshi dii domefaneko laJesus.