5, 6. (a) Omafaneko avali elipi e li pauxupi oo Jesus a hokolola? (b) Omafaneko oo otaa holola shike kombinga yaJehova?

⁵ Opo a honge ovapwilikini vaye etaleko laJehova li na sha naavo va puka mo mondjila, Jesus okwa yandja omafaneko avali e li pauxupi. Limwe ola li li na sha nomufita. Jesus okwa ti: “Olyelye ou womunye e na eedi efele limwe ndee ta kanifa mo imwe, ita fii po ngeno odo 99, ndee ta ka shikula inya ya kana fiyo te i mono? Ndele ngenge te i mono, ote i humbata komapepe aye nokunyakukwa. Ndele ngenge te uya keumbo, ota ifana ookaume novashinda vaye, ndele ote va lombwele: Hafeni pamwe naame, osheshi odi yange ya li ya kana onde i mona. Ohandi mu lombwele: osho yo meulu tamu ka kala ehafo lokuhafela omulunde umwe e lidilulula, li dule olo lokuhafela ovayuki 99 ava itava pumbwa elidilululo.”—Lukas 15:4-7.

Ya kana ndele oi na ondilo

8. (a) Ongahelipi omufita nosho yo omukainhu ve linyenga kwaasho va li va kanifa? (b) Oshike osho elinyengo lavo tali tu lombwele shi na sha nanghee kwa li va tala ko oiniwe yavo oyo kwa li ya kana?

⁸ Momafaneko aeshe avali oshinima shonhumba okwa li sha kana, ndele didilika elinyengo loovene voinima. Omufita ina tya kutya: ‘Odi imwe oshike, ngeenge ondi na natango eedi 99? Ohandi dulu okuxupa ndi he i na.’ Omukainhu ina tya kutya: ‘Omolwashike ndi na okulipula noshimaliwa osho shimwe? Onda wanenwa naayo omuwoi oyo ndi na natango.’ Ponhele yaasho, omufita okwa konga odi yaye oyo kwa li ya kana sha fa kutya oyo aike kwa li e na. Nomukainhu okwa li a udifwa nai koshimaliwa shaye osho sha kana a fa a ha li e na nande oimaliwa imwe. Momafaneko aeshe avali oshinima osho sha kana osha kala natango shi na ondilo momadiladilo amwene washo. Osho mbela otashi faneke shike?

9. Oshike sha fanekwa kokunakonasha oko kwa ulikwa komufita nosho yo komukainhu?

⁹ Didilika exulifodiladilo laJesus momahokololo aeshe oo, tali ti: “Osho yo meulu tamu ka kala ehafo lokuhafela omulunde umwe e lidilulula” nosho yo “ohandi mu lombwele, osho tuu tamu ningi ehafo movaengeli vaKalunga omolwomulunde umwe e lidilulula.” Onghee hano monghedi inini, okunakonasha kwomufita nosho yo kwomukainhu otaku ulike kunghee Jehova nosho yo oishitwa yaye yomeulu ve udite. Ngaashi ashike osho kwa li sha kana sha kala natango shi na ondilo momesho omufita nosho yo omukainhu, sha faafana ovo va twalwatwalwa nova kanifa ekwatafano noshiwana shaKalunga ove na natango ondilo momesho aYe. (Jeremia 31:3) Oohandimwe va tya ngaho otashi dulika va kale va nghundipala pamhepo, ndelenee itashi ti lelalela kutya ovanashibofa. Nonande ove li monghalo ya nghundipala, otashi dulika tava diinine oiteelelwa yaJehova fiyo oponghatu yonhumba. (Epsalme 119:176; Oilonga 15:29) Onghee hano, ngaashi momafimbo a pita, Jehova oha ende kashona fimbo “ine va ekelashi.”—2 Eehamba 13:23.

10, 11. (a) Otwa hala okukala hatu tale ko ngahelipi ovo va twalwatwalwa okudja meongalo? (b) She likolelela komafaneko aJesus avali, ongahelipi hatu dulu okuulika kutya otu na ko nasha navo?

¹⁰ Ngaashi Jehova naJesus, nafye yo otu na ko nasha unene naavo va nghundipala nova kana mo meongalo lopaKriste. (Hesekiel 34:16; Lukas 19:10) Ohatu kala twa tala ko omunhu oo a nghundipala pamhepo e li ngaashi odi ya kana ndele inatu mu xupula. Ihatu tomhafana hatu ti: ‘Omolwashike tu na okulipula nomunhu oo a nghundipala? Eongalo otali ende ashike nawa li he mu na.’ Ponhele yaasho, ngaashi Jehova, ohatu tale ko ovo va twalwatwalwa ndele ova hala okwaaluka ve na ondilo.

Katuka onghatu

12. Outumbulilo “shikula inya ya kana” otau tu lombwele shike kombinga yoikala yomufita?

¹² Mefaneko lotete lomuo avali, Jesus ota ti kutya omufita okwa “shikula inya ya kana.” Omufita okwa katuka onghatu nokwa ninga eenghendabala dowina opo a konge odi oyo ya kana. Oudjuu, oiponga noshinano inai mu kelela. Ponhele yaasho, omufita okwa twikila “fiyo te i mono.”—Lukas 15:4.

13. Ongahelipi ovalumenhu ovadiinini vomefimbo lonale kwa li ve linyenga keemhumbwe daavo kwa li va nghundipala, nongahelipi hatu dulu okuhopaenena oihopaenenwa ya tya ngaho yomOmbibeli?

¹³ Sha faafana, okukwafela omunhu oo a pumbwa etwomukumo luhapu ohashi pula oo a pama a katuke onghatu. Ovalumenhu ovadiinini vomefimbo lonale okwa li ve shi udite ko. Pashihopaenenwa, eshi Jonatan, omonamati wohamba Saul, a didilika kutya kaume kaye kopofingo David okwa li a pumbwa okutuwa omukumo, Jonatan okwa “fikama ndee ta i kuDavid muHores. Ndele ye e mu nyatipalifa muKalunga.” (1 Samuel 23:15, 16) Konima yomafelemido, eshi omupangeli Nehemia a mona kutya ovamwaxe vamwe Ovajuda ova nghundipala, okwa “kala ofika” nokwe va ladipika va ‘dimbuluke Omwene.’ (Nehemia 4:14) Nafye kunena ohatu ka ‘fikama’—sha hala okutya, ohatu ka katuka onghatu—opo tu pameke ovo va nghundipala. Ndele oolyelye meongalo ve na okuninga ngaho?

14. Oolyelye meongalo lopaKriste ve na okukwafela ovo va nghundipala?

¹⁴ Ovakriste ovakulunhuongalo ovo unene ve na oshinakuwanifwa ‘shokupameka omaoko a wa nokunghonopaleka eengolo da loloka’ nosho yo “[okulombwela] ava ve nomitima di noumbada: Inamu tila, lipamekeni.” (Jesaja 35:3, 4; 1 Petrus 5:1, 2) Ndelenee didilika kutya ekumaido laPaulus ‘lokupopya nehekeleko neemwenyo da polimana nokuyakula oingone’ kala li ashike la yandjwa kovakulunhuongalo. Ponhele yaasho, eendjovo daPaulus okwa li da yukifwa ‘keongalo lOvatessaloniki’ alishe. (1 Ovatessaloniki 1:1; 5:14, yelekanifa NW.) Kungaha, okuyandja ekwafo kwaavo va nghundipala oshinakuwanifwa shOvakriste aveshe. Ngaashi omufita womefaneko, Omukriste keshe oku na okulinyenga a ‘shikule inya ya kana.’ Doshili, osho otashi ningwa unene nomupondo melongelokumwe novakulunhuongalo. Mbela oto dulu okukatuka eenghatu donhumba u kwafele omunhu oo a nghundipala meongalo leni?