Pefimbo opo, omonamati oo a kula okwa hangika mepya. Jesus okwa popya kombinga yaye a ti: “Eshi a fika popepi neumbo, okwa uda ovanhu tava imbi notava dana. Opo nee okwa ifana umwe womovapiya, ndele te mu pula kutya oshike shi li meumbo. Omupiya oo okwa tya kuye, ‘Mumwanyoko okwe uya, naxo okwe mu tomena onhana ya ondoka molwaashi okwa aluka e li nawa.’ Ndele omonamati oo okwa handuka noka li a hala okuya meumbo. Opo nee xe okwe uya kuye ndele te mu ladipike va ye naye meumbo. Okwa tya kuxe, ‘Tala, onde ku longela omido dihapu nonda kala alushe handi dulika kwoove, ndele ku na fiku wa pele nge ngoo nande okakombwena ndi hafele pamwe nookaume kange. Ndele omonamati woye oo a hanauna po eliko loye neembwada, owe mu tomena diva onhana ya ondoka eshi a aluka.’” — Lukas 15:25-30.

Ngaashi omonamati oo a kula, oolyelye va li va tokola Jesus eshi a li a ulikila onghenda ovanhu vongaho nosho yo ovalunde? Ovanongo vomishangwa nOvafarisai. Okutokola kwaavo Jesus eshi a tambula ko ovalunde okwa li kwe mu ningifa a yandje efaneko olo. Keshe oo ha tokola Kalunga ngeenge ta ulikile vamwe onghenda okwa pumbwa okulihonga oshilihongomwa mefaneko olo.

Jesus ka li a holola osho omonamati oo a kula a ka ninga po. Ashike konima yefyo nenyumuko laJesus ‘ongudu inene yovapristeri oya li ya ninga ovaitaveli.’ (Oilonga 6:7) Otashi dulika mwa kwatelwa vamwe ovo va li va uda efaneko olo la fimana li na sha nomonamati oo a li a kana. Navo ova li tava dulu okumona kutya inava katuka pandunge nokulidilulula nokwaalukila kuKalunga.