Jesus ka li a tokola eenghedi odo elenga la longifa, ye ka li te li ladipikile oulingilingi u na sha nokungeshefa. Ndele mbela okwa li a hala okutya shike? Okwa li a ladipika ovahongwa vaye a ti: “Likongeleni nemona loulunde ookaume, opo ngeenge ola xulu po ve mu tambule meenhele daalushe.” (Lukas 16:9) Oshilihongomwa oshosho kutya otu na okukala twe lilongekida komesho yefimbo nokukatuka pandunge. Ovapiya vaKalunga, ovo ve li “ovana vouyelele,” ova pumbwa okulongifa oiniwe yavo pandunge ve na momadiladilo eteelelo li na sha nonakwiiwa.

Jehova Kalunga nosho yo Omona waye ovo ashike tava dulu okutambula ovanhu mOuhamba womeulu ile mOparadisa kombada yedu koshi yOuhamba. Onghee otwa pumbwa okuninga eenghendabala tu pange oukaume navo mokulongifa oiniwe yetu tu yambidide oilonga oyo tai xumifa komesho Ouhamba. Ngeenge otwa ningi ngaho, eshi oishiliveli, oingoli noikwamaliko ikwao tai ka xula po, ohatu ka xupifwa nokumona omwenyo waalushe.

Jesus okwa li ta lombwele ovahongwa vaye kutya otava ka pulwa shihapu ngeenge ova ‘tambulwa meenhele daalushe.’ Umwe ita dulu okukala omupiya washili waKalunga, nopefimbo opo tuu opo oku li omupiya wemona loulunde. Opo nee okwa xulifa neendjovo odo tadi di: “Kape na omupiya ta dulu okulongela oovene vavali, osheshi ota tondo umwe ndele ta kala e hole mukwao, ile ta kanyatele kuumwe ndele ta dini mukwao. Itamu dulu okulongela Kalunga pamwe nemona.” — Lukas 16:9, 13.