“Omhango nOvaprofeti ova xulila muJohannes. Ndele okudja opo, onghundana iwa yOuhamba waKalunga otai udifwa, novanhu vomaludi aeshe otava ningi eenghendabala va ye mOuhamba oo. Eulu nedu otai dulu okuxula po, ndele mOmhango itamu di nande okapambu kamwe kondada inaka wanifwa.” (Lukas 3:18; 16:16, 17) Ongahelipi eendjovo daJesus da li da ulika kutya otapa ningwa omalunduluko?

Omhango yaMoses oya wanifa po osho sha xunganekwa kombinga yaMessias. Ashike inashi pumbiwa vali okudulika kuyo. Pashihopaenenwa, Omhango oya li ya pitika umwe a teye ohombo omolwomatomheno onhumba, ashike Jesus okwa li a yelifa kutya “keshe ou ta teya ohombo nomukulukadi waye ndele ta hombola umwe ota haele, naau ta hombola omukainhu oo a teya ohombo nomushamane waye ota haele.” (Lukas 16:18) Osho osha li sha handukifa Ovafarisai ovo va li ve hole okutula po eemhango.