2. Oinima ilipi ya kala tai ningwa mounyuni, novanhu ova kala tave lihumbata ngahelipi okudja mo 1914?

Ovahongwa vaJesus ove mu pula va ti: ‘Oshike tashi ka kala edidiliko lokukala po kwoye nolomafiku axuuninwa ounyuni ou?’ (Mateus 24:3) Jesus okwa xunganeka kombinga yoinima ihapu oyo ya li tai ka ningwa, ngeenge okwa hovele okupangela meulu e li Ohamba yOuhamba waKalunga. Oinima oyo oya kwatela mo oita, ondjala nosho yo omakakamo edu. (Lesha Mateus 24:7.) Ombiibeli oya xunganeka yo kutya oikala yovanhu “momafiku axuuninwa” otai ka ningifa onghalamwenyo i kale ‘idjuu okukaliwa muyo.’ (2 Timoteus 3:1-5) Eenghalo odo nosho yo oikala yovanhu oya kala i liwetikile nawa, unene tuu okudja mo 1914.

3. Omolwashike eenghalo dounyuni da hovela okunaipala okudja eshi Ouhamba waKalunga wa hovela okupangela?

Diva konima eshi Jesus a ninga Ohamba yOuhamba waKalunga meulu, okwa lwifa Satana neendemoni daye. Satana okwa findwa moita oyo. Ombiibeli oya ti kutya ‘okwa umbilwa kombada yedu pamwe novaengeli vaye.’ (Ehololo 12:9, 10, 12) Satana okwa handuka neenghono, molwaashi oku shii kutya ota ka hanaunwa po. Onghee okwa etifa omaudjuu nokumona oixuna kuhapu kombada yedu. Osho otashi tu kwafele tu ude ko kutya omolwashike eenghalo dounyuni da naipala neenghono. Ashike mafiku, Ouhamba waKalunga otau ka xulifa po omaupyakadi aeshe oo.