Jesus okwa ti: “Oiwana otai ka lwifafana, nomauhamba otaa ka kondjifafana. Otaku ka kala omakakamo edu manene, ondjala nomikifi dolutapo keembinga neembinga.” (Lukas 21:10, 11) Oiningwanima aishe oyo oya li tai ka kala edidiliko kutya “Ouhamba waKalunga ou li popepi.” Mbela oiningwanima ya tya ngaho oya ningilwe tuu pefimbo limwe mounyuni aushe? Natu ka tale komaumbangi amwe.

2. OMAKAKAMO EDU

O-Britannica Academic oya popya kutya omudo keshe ohapa ningwa omakakamo edu efele manene oo haa “hanauna po nokuteyaula oinima.” Omakonakono amwe oo a ningwa moAmerika okwa ulika kutya “she likolelela komivalu (okudja mo 1900), otwa teelela omakakamo edu 16 manene omudo keshe.” Vamwe otava diladila kutya omivalu domakakamo edu oda hapupala ashike paife eshi taku longifwa oikwanoipangifo yoku a didilika mo. Kashi na nee mbudi kutya oshike, omakakamo edu manene onghee ngoo taa etifa okumona oixuna nokutwaalela eemwenyo davahapu.

3. ONDJALA

Ondjala luhapu ohai etifwa koita, oulingilingi, ouxupilo tau kande omapunya, okuhalonga oikulya ya wana ile okuhaninga eemhangela omolweenghalo domhepo odo hadi lunduluka. Olaporta yEhangano lokuyandja Oikulya mOunyuni yomo 2018 oya ti: “Mounyuni aushe, ovanhu omamiliyona 821 kave na oikulya ya wana, nomamiliyona 124 vomomuvalu oo otava fi ondjala.” Ounona hanga omamiliyona 3,1 ohava fi komanyutu. Eepelesenda 45 lwaapo dounona ovo va fya mo 2011 ova fya komanyutu.

4. OMIKIFI

Oshifo shEhangano lOukalinawa mOunyuni osha ti: “Mefelemudo eti-21 omwa monika omikifi dihapu. Omikifi odo da kala ko, ngaashi oshimela, oshidu nosho yo o-yellow fever, oda tandavela shi dulife nale nopa monika omikifi dipe, ngaashi eshikisha leedula dopaife, ebola, Zika nomikifi dokoilyo yoifudifi ngaashi o-SARS no-MERS.” Omukifiwekomba wo-COVID-19 opo wa monikia. Nonande ovanongononi neendokotola ove shii shihapu kombinga yomikifi, inava dula okumona epango lomikifi adishe ile oku di kelela filufilu.