Exunganeko 3. Omikifi
“Ovanhu otava ka . . . hepekwa komikifi dinyanyalifi.”— LUKAS 21:11, pa-Contemporary English Version.
● Ndokotola umwe wepangelo wedina Bonzali womoshilongo shimwe shomuAfrika osho sha mona oixuna koita yopashiwana okwa li a ninga ngaashi ta dulu opo a hakule ovanailonga vomomina vomodoolopa yavo ovo va li va kwatwa komukifi wedina Marburg.a Eshi a li a indila ekwafo okudja kovanambelewa vokoshilando eshi sha kula, kava li ve mu nyamukula. Xuuninwa, ekwafo ola ka tumwa konima eshi pa pita eemwedi nhee, ashike pefimbo opo Bonzali okwa hangwa a fya nale. Naye okwa li a kwatwa komukifi oo hau etifwa keendjima eshi a li ta kendabala okukwafela ovanailonga vomomina.
OMAUMBANGI OTAA ULIKE SHIKE? Oshimela, O-HIV/AIDS, o-TB, malaria nosho yo omikifi odo hadi kumu oifudifo (ngaashi oshitoma) odo dimwe domomikifi da nyika oshiponga odo da kala tadi hepeke ovanhu neenghono. Otaku tengenekwa kutya omikifi odo di li meendodo dopatano oda dipaa ovanhu eemiliyona 10,7 lwaapo omudo wa ya. Natu shi yelife vali monghedi imwe, omikifi odo oda kala tadi dipaa konyala omunhu umwe moule weesekonde nhatu momukokomoko wodula aishe.
OSHO OVANHU VAHAPU HAVA TI: Apa ngoo pe fike omuvalu wovanhu tau ende tau hapupala mounyuni, opo ngoo pe fike ehapupalo lomikifi. Onghee hano, ovanhu vahapu otava dulu okukwatwa komikifi da tya ngaho.
EPOPYO OLO OLOSHILI NGOO? Ehapupalo lovanhu mounyuni ola londa pombada neenghono shili. Kakele kaasho, ovanhu ova ninga exumokomesho lopaunamiti, tava dulu okukonakona omikifi, oku di kelela noku di panga. Ndele mbela kashi li pandunge okufika pexulifodiladilo kutya omikifi nosho yo okutandavela kwado ngeno otaku ninipikwa? Nonande ovanhu ova ninga exumokomesho lopaunamiti, inava dula okuxulifa po omikifi ile oku di ya moshipala diha tandavele.
OVE OTO TI NGAHELIPI? Mbela ovanhu otava hepekwa ngoo shili komikifi dinyanyalifi ngaashi Ombibeli ya xunganeka?
Omakakamo edu, ondjala nosho yo omikifi oda twaalela eemwenyo dovanhu omamiliyona. Ovanhu vali vamwe omamiliyona otava hepekwa kovanhu vakwao, vahapu otava hepekwa nokuli kovanhu ovo ngeno ovo ve na oku va amena. Natu ka tale kwaasho Ombibeli ya xunganeka moshitukulwa tashi landula.
[Eshangelo lopedu]
a Omukifi oo hau ifanwa Marburg Hemorrhagic Fever ohau etifwa kombuto youdu oyo ya faafana nomukifi wEbola.
[Eendjovo dididilikwedi pepandja 6]
“Ngaashi ashike hashi kala shinyikifa oluhodi okulika po konghoshi ile koshilyani shonhumba, ohashi kala yo shinyikifa oluhodi okutukwa komukifi wonhumba omudipai okudja meni lolutu nokutala nghee tau mane po olutu loye alishe.” — EPIDEMIOLOGIST MICHAEL OSTERHOLM.
[Odjo yefano pepandja 6]
© William Daniels/Panos Pictures