Omolwashike sha fimanenena ‘okukala oupafi’?

POMHITO imwe, ovahongwa vaJesus okwa li ve mu pula tava ti: “[Edidiliko] lokuuya kwoye nolexulilo lefimbo lounyuni olilipi?” (Mat. 24:3) Opo nee, Jesus okwa li a nyamukula ovahongwa vaye moku va pa ouyelele muhapu nowokondadalunde u na sha nedidiliko olo. Okwa li e va pa ouyelele wa yela nawa, tau dulu okudidilikwa mo noupu noitau dulu okutumhakanifwa, oo tau hangwa muMateus 24, Markus 13 nomuLukas 21. Konima yaasho, okwa li a weda ko vali a ti: “Kaleni oupafi”! — Mat. 24:42.

Ndele ngeenge edidiliko olo ola li tali ka didilikwa mo noupu, mbela omolwashike Jesus a li a yandja elondwelo la wedwa po? Natu ka taleni komatomheno avali kutya omolwashike tashi dulika a li a yandja elondwelo olo. Lotete, ovanhu vamwe otashi dulika va kale tava piyaanekwa koinima yonhumba oyo tai va ningifa ve lipwililikile edidiliko olo, nokungaho, itava ka kala vali ve li oupafi pamhepo. Etivali, Omukriste otashi dulika a kale e shii kutya oinima yonhumba i na sha nedidiliko olo otai wanifwa, ndele otashi dulika a kale e udite kutya inai mu kuma lelalela molwaashi ashike itai ningwa moshitukulwa shavo. Otashi dulika a kale ta tomhafana kutya “oudjuu unene” oo Jesus a xunganeka ou li kokule, onghee hano, ina pumbwa ‘okukala oupafi’ natango. — Mat. 24:21.

“Inave shi shiiva”

Jesus okwa li a dimbulukifa ovashikuli vaye shi na sha noikala yovanhu vopefimbo laNoa. Ovanhu ovo ova li va mona nghee Noa a li ta udifa, ta tungu ongulu yomomeva inenenene nova li yo va mona nghee elongifo leenghono la hapupala. Ndele nande ongaho, vahapu kava li ve “shi shiiva.” (Mat. 24:37-39) Ovanhu vokunena navo ohave lipwililikile omalondwelo. Pashihopaenenwa, meendjila dihapu omwa tulwa omadidiliko a yela nawa okuwilika ovashingi voihauto opo ngeno vaha shinge onhapo ya pitilila, ndele nande ongaho, vahapu ohave lipwililikile omadidiliko a tya ngaho noihava dulika kuo. Luhapu ovapangeli ohava tulifa nokuli oitunhu meendjila domeedolopa opo va ningife ovashingi voyeendifo va shunife onhapo yavo pedu. Sha faafana, Omukriste naye otashi dulika a kale e shii kutya otu li momafiku axuuninwa, ndele otashi dulika oinima oyo e lipyakidila nayo itai ulike kutya okwa nongela efimbo olo tu li mulo. Pashihopaenenwa, omunyasha umwe womido omulongo nasha womoilongo yokOuninginino waAfrika wedina Arielle okwa li a ningilwa oshinima sha tya ngaho.

Arielle okwa li e hole okutala oudano umwe wovakainhu ko-TV hau ifanwa handball (etanga lokomake). Lwanima, pofikola yavo opa ka totwa ospana yetanga olo. Ndele molwaashi okwa li a halelela okukufa ombinga moudano oo, okwa li e lishangifa a ninge omukwati womokoola nopehe na okudiladila shi na sha nanghee okukufa ombinga moudano wa tya ngaho taku ka kuma oupamhepo waye. Mbela oshike sha ka ningwa po? Okwa ti: “Oukadona vamwe vomospana yetu ova li ve na ovamati ovo hava longifa oingangamifi nohava shili omakaya. Okwa li hava sheke nge molwaashi nda li ihandi ningi ngaashi vo, nonda li handi diladila kutya ohandi dulu okuungaunga nonghalo ya tya ngaho. Ndele nande ongaho, oupamhepo wange owa li ashike wa nyonwa po kokukufa ombinga moudano oo. Oudano oo owa li wa yange nai komwenyo. Shimha tu li mokwoongala kwopaKriste, omadiladilo ange kaa li haa kala mo mOlupale lOuhamba. Ponhele yaasho, onda li ashike handi kala handi diladila okapale oko hatu danaukile etanga letu. Onda li yo nda kanifa omaukwatya opaKriste. Molwaashi onda li ndi hole oudano oo, onda ka kala ashike handi danauka nelalakano lokufindana. Onda li handi lideula nda mana mo molwaashi nda kwatwa komhepo yefiyafanepo. Oudano oo owa li yo wa etela nge oshisho sha pitilila nowa li wa nyona po ekwatafano letu navamwe.”

“Pomhito imwe eshi ovadanauki vospana oyo twa li hatu kondjifafana nayo va li va pewa opelendi, onda li nda mona filufilu kutya oupamhepo wange owa nghundipala neenghono. Pomhito oyo, aame nda li handi kwata etanga, ndele onde lihaluka ashike handi ilikana kuJehova a kwafele nge ndiha efele mo etanga olo mokoola. Oshiningwanima osho osha li sha ningifa nge ndi mone kutya onda nghundipala pamhepo neenghono. Ndele mbela oshike sha li sha kwafela nge ndi xwepopaleke oupamhepo wange?

“Onda talele nale oka-DVD Young People Ask—What Will I Do With My Life?a Onghee hano, onda li nda tokola oku ka tala vali okavidio oko nokuninga eenghendabala da mana mo ndi tule moilonga osho nde lihonga. Shihokwifa, oupyakadi wange owa li wa faafana naao waAndré, omulumenhu omunyasha oo a hokololwa moka-DVD oko. Onda li nde linyengifwa unene tuu ndi tule moilonga omayele oo André a li a pewa komukulunhuongalo umwe, a ti kutya na leshe Ovafilippi 3:8 nokudilonga kombinga yaasho a lesha. Naame osho naanaa nda li nda ninga ngaho, nokonima yaasho, onda ka efa po okudanauka pamwe nospana oyo.

“Osho osha li sha kwafela nge neenghono! Onda li nda efa po omhepo yefiyafanepo nokanda li vali ndi udite nda wililwa po koisho. Onda li nda panga oukaume wopofingo nOvakriste vakwetu, nonda kala nda hafa unene. Paife onda lenga neenghono oinima yopamhepo. Ohandi pwilikine nawa ngeenge ndi li pokwoongala nohandi ku hafele ngaashi nale. Oukalele wange nao owa xwepopala. Paife ohandi kufa oukwafelikokolindjila efimbo nefimbo.”

Ngeenge ope na oshinima shonhumba osho tashi ku imbi u yandje elitulemo kedidiliko olo Jesus a li a yandja, katuka eenghatu da mana mo ngaashi Arielle. Oto dulu okuninga oinima ei tai landula apa: Okukonga omauyelele mo-Watch Tower Publications Index oyo haku tiwa kutya oi li ngaashi okaalita oko take ku ulikile oko ku na omamona a holekwa. Otai ke ku ulikila opo to dulu okuhanga omayele opandunge nosho yo oimoniwa ya ningwa shili yaavo va li va ungaunga nomayeleko a faafana naao wa taalela. Kala yo ho lilongekidile nawa okwoongala nokukala ho ningi omadidilikoshango opo u dule okumona mo ouwa pauyadi. Vamwe ohava mono ouwa mokukala omutumba koipundi yokomesho mOlupale lOuhamba. Kendabala okukala ho yandje omatyekosha lwopehovelo loitukulwa oyo tai pula ovapwilikini va kufe ombinga. Shimwe vali, kala ho tale ile ho lesha kombinga yoiningwanima italala oyo i li oshitukulwa shedidiliko nosho yo oinima ikwao oyo tai ulike kutya otu li ‘momafiku axuuninwa’ opo u kale u li oupafi pamhepo. — 2 Tim. 3:1-5; 2 Pet. 3:3, 4; Eh. 6:1-8.

“Kaleni mwe lilongekida”

Edidiliko lomafiku axuuninwa ola kuma ounyuni aushe nosho yo “oiwana aishe.” (Mat. 24:7, 14) Ovanhu omamiliyona ove li moitukulwa oyo ya dengwa neenghono koinima ngaashi omikifi dolutapo, eendjala, omakakamo omadu nosho yo oiningwanima ikwao oyo ya xunganekwa. Ashike ovanhu moitukulwa imwe inava kumwa unene koinima ya tya ngaho notashi dulika ngoo ve na ombili mokati kavo. Ndele ngeenge ino kumwa natango koinima oyo i li oshitukulwa shedidiliko, mbela osho oshi na oku ku ningifa u fike pexulifodiladilo kutya oudjuu munene ou li kokule natango? Ahowe, kashi li pandunge okutomhafana monghedi ya tya ngaho.

Diladila kwaasho Jesus a xunganeka shi na sha “neendjala noudu wolutapo.” (Luk. 21:11) Shotete, Jesus ina tya kutya oiningwanima oyo otai ka ningwa pefimbo limwe moitukulwa aishe ile monghedi ya faafana. Ndele ponhele yaasho, okwa ti kutya oinima oyo otai ka ningwa “keenhele neenhele.” Onghee hano, inatu kala twa teelela oiningwanima ya tya ngaho i ningwe pefimbo limwe, moitukulwa aishe. Oshitivali, diva konima eshi Jesus a tumbula eendjala okwa li yo a popya kutya ovashikuli vaye vamwe otava ka pumbwa okukala va lungama opo vaha pwile mokulya sha pitilila, a ti: “Lipashukileni, omitima deni di ha lolokifwe koitendele.” (Luk. 21:34) Onghee hano, Ovakriste aveshe kave na okukala va teelela va kumwe koinima aishe oyo i li oshitukulwa shedidiliko. Ponhele yaasho, Jesus okwa ti: ‘Ngeenge tamu mono ei ya ningwa, shiiveni ouhamba waKalunga ou li popepi.’ (Luk. 21:31) Omakwatafano opashinanena okwe shi ninga tashi shiiva opo tu dule okumona nghee oinima aishe oyo i li oshitukulwa shedidiliko tai ningwa keenhele neenhele, kashi na nee mbudi kutya fye otwa kumwa ile inatu kumwa kuyo pauhandimwe moshitukulwa shetu.

Natu dimbulukeni yo kutya Jehova okwa tula po nale “efiku olo notundi” opo oudjuu munene tau ka hovela. (Mat. 24:36) Oiningwanima oyo tai ningwa kombada yedu itai dulu okulundulula efiku olo.

Jesus okwa ladipika Ovakriste aveshe, kashi na nee mbudi kutya ove li moshitukulwa shilipi, a ti: “Kaleni mwe lilongekida.” (Mat. 24:44) Onghee hano, otu na okukala alushe twe lilongekida. Oshoshili kutya itatu dulu okukala twe lipyakidila noinima yopauteokratika keshe efiku nosho yo momukokomoko wefiku alishe. Kakele kaasho, kape na umwe womufye oo e shii kutya ohatu ka hangwa hatu ningi shike eshi oudjuu munene tau ka hovela. Vamwe otashi dulika va hangwe ve lipyakidila noilonga yomomapya ile noinima yakwalukeshe. (Mat. 24:40, 41) Ndele ngeenge osho shi li ngaho, mbela oshike tu na okukala hatu ningi opo tu ulike kutya otwe lilongekida?

Natu ka taleni koshihopaenenwa shaEmmanuel, Victorine novanakadona vavo vahamano hava di moshitukulwa shonhumba muAfrika. Oukwaneumbo oo owa li u udite kutya inau kumwa naanaa koiningwanima oyo i li oshitukulwa shedidiliko. Onghee hano, ova li va tokola okukala hava kundafana oinima yopamhepo keshe efiku opo shi va kwafele va kale ve lilongekida. Emmanuel okwa ti: “Osha li shidjuu kufye okumona efimbo olo tali tu wapalele atushe okuninga eenghundafana da tya ngaho. Hauxuuninwa, otwa li twa hoolola okukala hatu shi ningi okudja pohamano fiyo opetata loheyali yongula. Shimha twa mane okukundafana omushangwa wefiku, ohatu lilongekida outendo vonhumba mushimwe shomoishangomwa oyo tai ka konakonwa meongalo moshivike osho.” Ndele mbela elongekido olo ola li ngoo le va kwafela opo va dule okukala oupafi? Heeno! Paife Emmanuel ota longo e li omuunganeki wolutu lovakulunhuongalo meongalo lavo. Victorine oha kufa oukwafelikokolindjila lwoikando nokwa kwafela vahapu ve uye moshili. Ovanakadona vavo aveshe otava ningi lela exumokomesho lopamhepo.

Jesus okwe tu kumaida a ti: “Kaleni mwa lungama, pashukeni.” (Mark. 13:33) Onghee hano, inatu pitika nande osha shi tu piyaaneke noku tu ningifa tuha kale vali oupafi pamhepo. Ponhele yaasho, natu kale hatu tula moilonga omayele mawa oo hatu pewa okupitila moishangomwa yetu nosho yo pokwoongala kweongalo ngaashi Arielle a li a ninga. Natu kaleni yo hatu ningi eenghendabala tu ninge oinima yopamhepo keshe efiku ‘nokukala oupafi’ ngaashi oukwaneumbo waEmmanuel hau ningi. Kungaho, ohatu ka ulika kutya otwe lilongekida shili.

[Eshangelo lopedu]

[Efano pepandja 4]

Okukundafana oinima yopamhepo efiku keshe osha kwafela Emmanuel noukwaneumbo waye va ‘kale ve lilongekida’