Ulika olupandu laasho Jehova naJesus ve ku ningila

Oho kala u udite ngahelipi, ngeenge kaume koye e ku pa omaano mawa? Oho kala wa hafa neenghono, noho kala wa hala okuulikila kaume koye kutya owa pandula omaano oo. Jehova naJesus ove tu pa omaano a denga mbada kuhe na vali. Omaano oo oelipi, nongahelipi hatu dulu okuulika kutya otwe a pandula?

1. Omonghedi ilipi hatu dulu okuulika kutya otwa pandula osho Kalunga naKristus ve tu ningila?

Ombiibeli oya udaneka kutya ‘keshe ou ta itavele Jesus’ ota ka kala nomwenyo fiyo alushe. (Johannes 3:16) Okukala tu na eitavelo osha hala okutya ngahelipi? Otwa pumbwa okuninga shihapu, shihe fi ashike okwiitavela muJesus. Otu na okuulika kutya otu na eitavelo okupitila momatokolo nosho yo moinima oyo hatu ningi. (Jakob 2:17) Ngeenge otwa ulike eitavelo letu okupitila mwaasho hatu ningi naasho hatu popi, ohatu ka pameka oukaume wetu naJesus nosho yo Xe, Jehova.— Lesha Johannes 14:21.

2. Oshiningwanima she likalekelwa shilipi tashi tu kwafele tu ulike olupandu letu li na sha naasho Jehova naJesus ve tu ningila?

Jesus okwa lombwela ovashikuli vaye oufiku oo wa tetekela efyo laye kombinga yonghedi imwe omo tava dulu okuulika olupandu omolwekuliloyambo laye. Okwa dika po edano le likalekelwa olo Ombiibeli ya popya kutya oli li “Ouvalelo wOmwene,” noli shiivike yo li li Edimbuluko lefyo laKristus. (1 Ovakorinto 11:20) Jesus okwe li dika po, molwaashi okwa li a hala ovayapostoli vaye nosho yo aveshe ovo va li tava ka ninga Ovakriste vashili va dimbuluke kutya okwa yandja omwenyo waye omolwavo. Onghee okwe va lombwela a ti: “Kaleni hamu shi ningi okudimbuluka nge.” (Lukas 22:19) Ngeenge u li pEdimbuluko, oto ulike kutya ou na olupandu li na sha nohole inene oyo Jehova naJesus ve tu ulikila.

KONAKONA MOULE

3. Olupandu ohali tu linyengifa tu katuke eenghatu

Diladila nee ngeno shi na sha nomunhu oo e ku xupifa, eshi wa li to hale okufya omeva. Mbela oto ka dimbwa diva osho omunhu oo e ku ningila? Ile oto ka tala kutya omeenghedi dilipi to ka ulika kutya owa pandula osho omunhu oo e ku ningila?

Otu na oshikolo shomwenyo kuJehova. Lesha 1 Johannes 4:8-10, ndele tamu kundafana omapulo taa shikula:

• Omolwashike ekuliloyambo laJesus li li oshali ye likalekelwa?

• Ou uditile ngahelipi osho Jehova naJesus ve ku ningila?

Ongahelipi hatu dulu okuulika olupandu li na sha naasho Jehova naJesus ve tu ningila? Lesha 2 Ovakorinto 5:15 nosho yo 1 Johannes 4:11; 5:3. Konima eshi mwa lesha omushangwa keshe, kundafaneni epulo tali shikula:

• She likolelela komushangwa oo, oshike hatu dulu okuninga, opo tu ulike olupandu letu?

4. Hopaenena Jesus

Onghedi imwe omo hatu dulu okuulika olupandu letu omokuhopaenena Jesus. Lesha 1 Petrus 2:21, ndele tamu kundafana epulo tali shikula:

• Omeenghedi dilipi to dulu okulandula eenghatu daJesus filufilu?

5. Kala ho kala pEdimbuluko lefyo laKristus

Opo u mone kutya oshike sha li sha ningwa po pedano lotete lOuvalelo wOmwene, lesha Lukas 22:14, 19, 20. Opo nee tamu kundafana omapulo taa shikula:

• Oshike sha li sha ningwa pOuvalelo wOmwene?

• Omungome nomaviinyu otaa faneke shike?— Tala ovelishe 19 nosho yo 20.

Jesus okwa li a hala ovahongwa vaye va kale hava dana Ouvalelo wOmwene lumwe momudo mefiku olo a fya. Onghee hano, Eendombwedi daJehova ohadi ongala omudo keshe, opo di dimbuluke efyo laKristus, ngaashi a popya. Opo u lihonge kombinga yokwoongala oko kwa fimana, dana OKAVIDIO. Ndele tamu kundafana epulo tali shikula.

OKAVIDIO: Edimbuluko lefyo laJesus (1:41)

• Oshike hashi ningwa pEdimbuluko?

Omungome nomaviinyu oi li omadidiliko. Omungome otau faneke olutu laJesus lopanhu la wanenena olo a yamba po omolwetu. Omaviinyu otaa faneke ohonde yaye

ENGONGO

Ohatu ulike kutya otu na olupandu shi na sha naasho Jesus e tu ningila, mokukala tu na eitavelo muye nokukala pEdimbuluko lefyo laye.

Eendululo

• Omolwashike Jesus a file?

• Ongahelipi to dulu okuulika olupandu loye li na sha naasho Jehova naJesus ve ku ningila?

• Ongahelipi efyo laJesus tali dulu oku ku etela ouwa?

TALA OUYELELE WA WEDWA PO

Efyo laKristus otali tu linyengifa tu ninge shike?

Okwa longifa olutu laye opo a fimanekife Jehova (9:28)

Lihonga shihapu kombinga yeitavelo nanghee to dulu oku li ulika.

“Kala u na eitavelo tali longo momaudaneko aJehova” (Oshungonangelo, Oktoba 2016)

Lesha nghee onghalamwenyo yomukainhu umwe ya xwepopala, eshi a uda ko kutya ekuliloyambo laKristus otali ti shike kuye.

“Ombibeli ohai lundulula onghalamwenyo yovanhu” (Oshungonangelo, 1 Auguste 2011)

Lihonga kutya omolwashike ovo hava kufa ombinga mokulya nokunwa pEdimbuluko ve li ashike omuvalu munini.

“Omolwashike Eendombwedi daJehova hadi dana Ouvalelo wOmwene monghedi ya yooloka ko kwaayo yomalongelokalunga amwe?” (Oshitukulwa shi li ko jw.org)