Petrus te lidimbike Jesus keumbo laKajafas

Eshi Jesus a li a kwatwa po moshikunino shaGetsemane, ovayapostoli ova li ve mu fiya po nokufaduka po omolwoumbada. Ashike vavali vomuvo ova li va alukila kuye. Ovayapostoli ovo oPetrus “nomuhongwa mukwao umwe,” Johannes. (Johannes 18:15; 19:35; 21:24) Otashi dulika va li va landula Jesus eshi a li ta twalwa keumbo laHannas. Eshi Hannas a tuma Jesus komupristeri munene Kajafas, Petrus naJohannes ova li ve mu shikula ve li konima kokule. Otashi dulika va li va tila kutya otava ka dipawa nova li tave lipula osho tashi ka ningilwa Omwene wavo.

Johannes okwa li e shiivike komupristeri munene nomolwaasho a li a dula okuya momukala weumbo laKajafas. Petrus okwa li a fyaala pondje fiyo osheshi Johannes a aluka nokupopya nokakadona kamwe okapiya. Nolwanima, okwa li a efelwa mo.

Onguloshi oyo okwa li kwa talala, naavo va li momukala ova li tava xuxumukwa pomundilo. Petrus okwa li omutumba puvo ofimbo a teelela “a tale osho tashi ningwa po” shi na sha naJesus. (Mateus 26:58) Oo a li a efela mo Petrus okwa li te mu tale nawa molwaashi opa li ouyelele womundilo. Omupiya okakadona oo okwa ti: “Hano naave ku fi omuhongwa womulumenhu ou?” (Johannes 18:17) Ndele hako akeke kali ka dimbulula Petrus nokupopya kutya okwa li pamwe naJesus. — Mateus 26:69, 71-73; Markus 14:70.

Osho osha li sha handukifa Petrus. Molwaashi ka li a hala ovanhu ve mu dimbuluke, okwa li a dja mo momukala. Petrus okwa li e likala kutya ka li naJesus, a ti: “Nghi mu shii, nokandi udite kutya oto popi kombinga yashike.” (Markus 14:67, 68) Okwa li a hovela “okulifingaela nokwaana,” sha hala okutya okwa li a ana kutya eendjovo odo a popya odoshili nokwe lilongekidila oilanduliko ngeenge kadi fi doshili. — Mateus 26:74.

Jesus okwa li natango ta pangulwa komhangu yOvajuda, tashi dulika monhele oyo ya li pombada yomukala weumbo laKajafas. Ofimbo Petrus nosho yo vamwe va teelela, otashi dulika va li ve wete eembangi odo da li de uya okuyandja omahokololo ado.

Omutono welaka laPetrus owa li wa ulika kutya ota popi oipupulu. Natango, umwe womongudu oyo okwa li omupambele waMalkus, oo a li a tetwa okutwi kuPetrus. Onghee Petrus okwa li a pulwa komupambele oo, a ti: “Hano inandi ku mona u li naye moshikunino?” Eshi Petrus e lidimbika Jesus oshikando oshititatu, ekondobolo ola kwena ngaashi sha li sha xunganekwa. — Johannes 13:38; 18:26, 27.

Pefimbo opo, Jesus okwa hangwa e li monduda yopombada ta tale momukala pedu. Omwene okwa li a punguluka nokutala kuPetrus, naasho osha li sha denga Petrus pomutima. Okwa li a dimbuluka osho Jesus a li e mu lombwela eshi va li monduda yopombada konima yeevili dinini. Diladila ashike kunghee Petrus a li e udite eshi a dimbuluka osho a ninga! Petrus okwa li a ya pondje nokwa lila nokulililila. — Lukas 22:61, 62.

Mbela osho osha ningwa ngahelipi? Osha enda ngahelipi Petrus, oo a li a pama nomudiinini, e likale Omwene waye? Oshili oya li ya pengifwa, na Jesus okwa li a talika ko e li omukolokoshi. Petrus okwa li ta dulu okupopila Omwene waye oo ehe na ondjo, ndele ponhele yaasho okwe lidimbika oo e na “eendjovo domwenyo waalushe.” — Johannes 6:68.

Oshihopaenenwa shaPetrus otashi ulike kutya nonande omunhu oku na eitavelo nomudiinini, ota dulu okuliyandja komayeleko nosho yo komapataneko oo tae mu hange ombadilila ngeenge ine lilongekida. Oshihopaenenwa shaPetrus oshi li elondwelo kovapiya aveshe vaKalunga.