Mefelemudo lotete, Andreas oye wotete oo a li a didilika kutya Jesus oye Messias. Mbela okwa ka lombwela lyelye diva eshi e shi didilika mo? Ombibeli oya ti: “Ye [Andreas] okwa shakena tete nomumwaina Simon, ndee ta ti kuye: Fye otwa mona Messias, otashi ti Kristus.” Andreas okwa li a twala Petrus kuJesus, nokungaho okwa li a kwafela Petrus a ninge umwe womovashikuli vaJesus. — Joh. 1:35-42.

Oshike hatu lihongo monghedi omo Andreas naKornelius va ungaunga novapambele vavo?

Andreas naKornelius ova li va katuka eenghatu va kwafele ovapambele vavo. Pashihopaenenwa, Andreas okwa li a twala Petrus kuJesus, naKornelius okwa li a ninga omalongekido opo ovapambele vaye ve uye va pwilikine kwaasho Petrus a li ta popi. Ashike Andreas naKornelius kava li va fininika ovapambele vavo ile ve va heke opo va ninge ovashikuli vaKristus. Mbela oshike hatu lihongo mwaasho? Otashi ka kala shiwa ngeenge nafye otwa katuka monghedi ya faafana. Otashi dulika tu mone omhito yokulombwela ovapambele vetu kombinga yoshili yOmbibeli nokukonga eemhito ve lishiive novaitaveli vakwetu. Ashike pefimbo opo tuu opo otwa fimaneka emanguluko lavo lokuninga omatokolo nokuhenuka oku va fininika. Opo tu mone kutya ongahelipi hatu dulu okukwafela ovapambele vetu, natu ka taleni koshihopaenenwa shaJürgen naPetra, ovalihomboli vokuNdowishi.