Jesus oye lyelye?

Jesus oye omunhu oo a fimanenena mondjokonona aishe yovanhu. Nonande ovanhu vahapu ove shii edina laye, kave shii naanaa shihapu kombinga yaye, nove na omadiladilo a yoolokafana kutya oye naanaa lyelye. Ombiibeli oya popya shike kombinga yaye?

1. Jesus oye lyelye?

Jesus oku li oshishitwa shopamhepo oshinaenghono osho shi li meulu. Oye a shitwa tetetete kuJehova Kalunga komesho yoinima aishe, nomolwaasho taku tiwa “oye a shitwa tete koishitwa aishe.” (Ovakolossi 1:15) Ombiibeli oya popya kutya Jesus “Omona waKalunga Ewifa,” molwaashi oye aeke a shitwa kuJehova odikilila. (Johannes 3:16) Jesus okwa kala ta longo pamwe naXe, Jehova, noku mu kwafela mokushita oinima aishe ikwao. (Lesha Omayeletumbulo 8:30.) Natango, Jesus ota twikile okuhafela ekwatafano liwa naJehova. Oku li “Ondjovo,” ile tu tye omupopikalelipo waKalunga, oo ha yandje omatumwalaka nosho yo omalombwelo aYe.— Johannes 1:14.

2. Omolwashike Jesus a li e uya kombada yedu?

Oule womido 2 000 da pita, Jehova okwa li a longifa omhepo yaye iyapuki eshi a kufa omwenyo waJesus meulu noku u tula moshidalelo shokakadona kedina Maria pashikumwifilonga. Nokungaho, Jesus okwa li a dalwa e li omunhu wopambelela. (Lesha Lukas 1:34, 35.) Jehova okwa li a tuma Jesus kombada yedu e li Messias, ile Kristus omuudanekwa, opo a xupife ovanhu.a Omaxunganeko Ombiibeli e na sha naMessias okwa li a wanifwa okupitila muye; osho osha li sha kwafela ovanhu va didilike mo Jesus kutya oye “Kristus, Omona waKalunga omunamwenyo.”— Mateus 16:16.

3. Jesus oku li peni paife?

Konima eshi Jesus a fya e li omunhu wopambelela, Kalunga okwe mu nyumuna e li omweengeli, nokwa shuna meulu. Eshi a ya meulu, “Kalunga okwe mu lenga eshi e mu pa ondodo yopombada elela.” (Ovafilippi 2:9) Paife, Jesus oku na ondodo ya tumbala, e li omutivali a shikula Jehova.

4. Jesus ke fi Kalunga Omunaenghono adishe

Nonande Ombiibeli otai hongo kutya Jesus oku li oshishitwa oshinaenghono meulu, oha dulika kuJehova Kalunga, oo e li Xe. Omolwashike hatu tile ngaho? Dana OKAVIDIO, opo u shiive osho Ombiibeli tai hongo kombinga yeyooloko olo li li pokati kaJesus naKalunga Omunaenghono adishe.

OKAVIDIO: Mbela Jesus Kristus oKalunga? (3:22)

Omishangwa tadi landula otadi tu kwafele tu ude ko ekwatafano olo li li pokati kaJehova naJesus. Lesha omushangwa keshe, ndele tamu kundafana omapulo taa shikula.

Lesha Lukas 1:30-32.

• Ongahelipi omweengeli umwe a yelifa ekwatafano olo li li pokati kaJesus naJehova Kalunga, ‘Omukombadambada’?

Lesha Mateus 3:16, 17.

• Ondaka oyo ya li ya udika okudja meulu peninginifo laJesus oya li ya popya shike?

• Mbela oto diladila kutya ondaka oyo oya li yalyelye?

Lesha Johannes 14:28.

• Olyelye a kula noku na eenghonopangelo dihapu? Oxe, ile omona?

• Jesus okwa li a hala okutya shike eshi a ifana Jehova Xe?

Lesha Johannes 12:49.

• Mbela Jesus oha kala e udite kutya ye naXe ove li omunhu umwe? Ove oto ti ngahelipi?

5. Mbela oshike tashi ulike kutya Jesus oye a li Messias?

OKAVIDIO: Jesus okwa wanifa po omaxunganeko (3:03)

Lesha omaxunganeko aa Ombiibeli, ndele tamu kundafana omapulo taa shikula:

Lesha Mika 5:2, opo u lihonge kutya openi Messias a li ta ka dalelwa.b

• Mbela okudalwa kwaJesus okwa li kwa wanifa po exunganeko olo?— Mateus 2:1.

Lesha Epsalme 34:20 nosho yo Sakaria 12:10, opo u mone omauyelele oo a li a xunganekwa shi na sha nefyo laMessias.

• Mbela omaxunganeko oo okwa li ngoo a wanifwa?— Johannes 19:33-37.

• Mbela oto diladila kutya Jesus okwa li ta dulu okuninga po sha, opo omaxunganeko oo a wanifwe?

• Mbela osho otashi yandje oumbangi ulipi kombinga yaJesus?

ENGONGO

Jesus oku li oshishitwa oshinaenghono shopamhepo. Oye Omona waKalunga noku li yo Messias.

Eendululo

• Omolwashike Jesus a popiwa kutya “oye a shitwa tete koishitwa aishe”?

• Jesus okwa li ha ningi shike ofimbo ine uya kombada yedu?

• Otu shi shii ngahelipi kutya Jesus oye Messias?

TALA OUYELELE WA WEDWA PO

Lihonga shihapu kombinga yonghandangala oyo Jesus a dana e li Messias.

“Omaxunganeko opaMessias otaa holola ngoo kutya Jesus oye Messias?” (Oshitukulwa shi li ko jw.org)

Tala ngeenge Ombiibeli otai hongo kutya Kalunga okwa dala Jesus ngaashi ashike ooxe vopanhu hava dala ounona.

“Omolwashike Jesus ta ifanwa Omona waKalunga?” (Oshitukulwa shi li ko jw.org)

Lihonga kutya omolwashike Oukwatatu uhe fi ehongo lopaMbiibeli.

“Mbela Jesus oye Kalunga?” (Oshungonangelo, 1 Aprili 2009)

Lesha kombinga yanghee onghalamwenyo yomukainhu umwe ya lunduluka konima eshi a konakona osho Ombiibeli tai ti kombinga yaJesus.

“Omukainhu Omujuda ta yelifa kutya omolwashike a talulula eitavelo laye” (Kala oupafi!, Mei 2013)