Okuvalululwa elalakano lyako olyashike?

OYENDJI oyi itaala kutya omuntu oku na okuvalululwa opo a mone ehupitho lyaaluhe. Ihe ndhindhilika shoka Jesus ye mwene a ti kombinga yelalakano lyokuvalululwa. Okwa ti: “Omuntu ngele ita valululwa, ita vulu okumona [uukwaniilwa waKalunga, KB].” (Johannes 3:3) Onkee ano, omuntu okwa pumbwa okuvalululwa opo a ye mUukwaniilwa waKalunga, ihe hakumona ehupitho. Ihe yamwe otashi vulika taya ti: ‘Omautumbulilo ngoka gaali, okuya mUukwaniilwa waKalunga nokumona ehupitho, itagu ulike mbela kondjambi yimwe awike?’ Hasho ngawo. Opo tu uve ko eyooloko pokati kago, natu tale tango kutya uutumbulilo “uukwaniilwa waKalunga” otawu ti shike.

Uukwaniilwa owo oludhi lumwe lwepangelo. Onkee ano, “uukwaniilwa waKalunga” owo “epangelo lyaKalunga.” Ombiimbeli otayi ti kutya Jesus Kristus, ‘Omuna gwomuntu,’ oye Omukwaniilwa gwUukwaniilwa waKalunga nonokutya otapu ka kala mboka taya pangele pamwe naye. (Daniel 7:1, 13, 14, OB-1954; Mateus 26:63, 64) Natango, memoniko ndyoka omuyapostoli Johannes a li a pewa okwa mono kutya aapangeli pamwe naKristus oyo oohandimwe mboka ya hogololwa “momaludhi agehe, momalaka agehe, miigwana ayihe nomomihoko adhihe” notaya ka “pangela ombanda yevi.” (Ehololo 5:9, 10, yelekanitha NW; 20:6) Oohapu dhaKalunga otadhi ulike natango kutya mboka taya ka pangela ye li aakwaniilwa oye li “oshigunda oshishona” shi thike paantu 144 000 mboka “ya kulilwa ko kevi.”—Lukas 12:32; Ehololo 14:1, 3.

Uukwaniilwa waKalunga otawu pangele okuza peni? “Uukwaniilwa waKalunga” ohawu ithanwa wo “uukwaniilwa wegulu,” shoka tashi ulike kutya Jesus naakwaniilwa ooyakwawo otaya ka pangela okuza megulu. (Lukas 8:10, KB; Mateus 13:11, KB) Onkee ano, Uukwaniilwa waKalunga owo epangelo lyomegulu ndyoka lya thikama po muJesus Kristus nongundu yaapangeli pamwe naye mboka ya hogololwa okuza maantu.

Ano Jesus okwa li a hala okutya ngiini sho a ti kutya omuntu oku na okuvalululwa opo ‘a ye muukwaniilwa waKalunga’? Okwa li a hala okutya omuntu okwa pumbwa okuvalululwa opo a ninge omupangeli pamwe naKristus megulu. Oku shi popya paunathangwa, elalakano lyevalululo olyo okulongekidha okangundu kaantu opo ya ka pangele megulu.

Mwaashoka twa kundathana, otwi ilonga kutya evalululo olya simana noonkondo, otali etithwa kuKalunga notali longekidhile okangundu kaantu ya ka pangele megulu. Ihe omuntu oha valululwa naanaa ngiini?

[Oohapu dha simana pepandja 7]

Elalakano lyevalululo olyo okulongekidha okangundu kaantu opo ya ka pangele megulu

[Ethano pepandja 7]

Uukwaniilwa waKalunga owa thikama po muJesus Kristus nongundu yaapangeli pamwe naye mboka ya hogololwa okuza maantu