Etukulwa 18
Shi ninga elalakano loye u longele Kalunga fiyo alushe
1, 2. Kakele ashike kokukala neshiivo lokushiiva Kalunga, oshike tashi pulwa?
NATU tye nee ngeno owa fikama wa taalela omuvelo wa patwa oo wa ya monduda i na omamona e na ondilo. Natu tye nee omunhu oo e na oufemba okwe ku pa oshipatululo ndele te ku lombwele u kufe moinima ei i na ongushu. Oshipatululo osho itashi ke ku kwafela ngeenge ito shi longifa. Sha faafana, ou na okulongifa eshiivo ngeenge owa hala li ku etele ouwa.
2 Eshi osho yo shi li ngaho unene tuu shi na sha neshiivo lokushiiva Kalunga. Doshili, eshiivo lashili lokushiiva Jehova Kalunga naJesus Kristus otali ti omwenyo waalushe. (Johannes 17:3) Ndelenee, etimaumbwile olo itali dulu okumonika mokukala ashike u na eshiivo. Ngaashi naanaa to ka longifa oshipatululo shi na ongushu, owa pumbwa okutula moilonga eshiivo lokushiiva Kalunga monghalamwenyo yoye. Jesus okwa ti kutya ovo tava longo ehalo laKalunga otava ka ‘ya mouhamba.’ Ovanhu va tya ngaha otava ka pewa oufembanghenda wokulongela Kalunga fiyo alushe!—Mateus 7:21; 1 Johannes 2:17.
3. Ehalo laKalunga li na sha nafye olilipi po?
3 Konima yokulihonga kutya ehalo laKalunga olilipi po, osha fimana unene oku li longa. Mbela oto diladila kutya ehalo laKalunga olo oshike kwoove? Otashi dulu okukwatelwa kumwe neendjovo edi: Okuhopaenena Jesus. Petrus wotete 2:21 ote tu lombwele ta ti: “Osheshi osho tuu eshi mwe shi ifanenwa, osheshi naKristus yo okwe mu hepekelwa nokwe mu fiila oshihopaelelwa mu shikule oshikoti shaye [filufilu, NW].” Hano opo u longe ehalo laKalunga, owa pumbwa naanaa okushikula oshihopaenenwa shaJesus filufilu ngaashi tashi dulika. Osho nee u na okutula moilonga eshiivo lokushiiva Kalunga ngaho.
NGHEE JESUS A LONGIFA ESHIIVO LOKUSHIIVA KALUNGA
4. Omolwashike Jesus e shii shihapu ngaho shi na sha naJehova, nongahelipi kwa li a longifa eshiivo eli?
4 Jesus Kristus okwa shiiva lelalela Kalunga e dule keshe umwe e lili. Okwa kala pamwe naJehova Kalunga nokwa longa pamwe naye meulu oule womafelemido manga ine uya kombada yedu. (Ovakolossi 1:15, 16) Ndele Jesus oshike a ninga neshiivo alishe olo? Ka li a mbilipalelwa mokukala ashike e li na. Jesus okwa kala metwokumwe nalo. Omolwaasho a li omunalukeno, omulididimiki nomunahole mokuviyauka novanhu vakwao. Kungaha Jesus okwa hopaenena Xe yomeulu nokwa katuka metwokumwe neshiivo laye lokushiiva eendjila daJehova nosho yo oukwatya waye.—Johannes 8:23, 28, 29, 38; 1 Johannes 4:8.
5. Omolwashike Jesus a ninginifwa, nongahelipi a kala metwokumwe neityo leninginifo laye?
5 Eshiivo laJesus ole mu linyengifa yo a katuke eenghatu da fimana neenghono. Okwa dja kuGalilea, ndele te uya komulonga waJordan, oko a ninginifwa kuJohannes. (Mateus 3:13-15, NW) Eninginifo laJesus otali faneke shike? E li Omujuda okwa li a dalwa e li oshilyo shoshiwana she liyapulila Kalunga. Onghee hano, Jesus kakwa li a pumbwa vali okuliyapulila Kalunga. (Exodus 19:5, 6) Eshi a ya a ka ninginifwe, okwa li te liyandje ye mwene kuJehova a longe ehalo laYe okudja pefimbo opo. (Ovaheberi 10:5, 7) Ndele Jesus okwa kala metwokumwe neityo leninginifo laye. Okwa kala e litula moilonga yaJehova, ta tukulilafana novanhu eshiivo lokushiiva Kalunga pomhito keshe. Jesus okwa mona ehafo mokulonga ehalo laKalunga, nokwa popya nokuli kutya eshi osha li ngaashi oikulya kuye.—Johannes 4:34.
6. Omonghedi ilipi Jesus kwa li e lixupula?
6 Jesus okwa shiiva filufilu kutya okulonga ehalo laJehova otashi ke mu pula shihapu—nonokutya otashi ke mu pula nokuli nomwenyo waye. Nande ongaho, Jesus okwe lixupula nokwa tula eemhumbwe daye mwene pondodo onhivali. Okulonga ehalo laKalunga okwa li alushe oshinima shotete kuye. Ongahelipi hatu dulu okushikula oshihopaenenwa shaJesus sha wanenena moshinima eshi?
EENGHATU ODO TADI TWALA KOMWENYO WAALUSHE
7. Eenghatu dimwe dilipi odo omunhu e na okukatuka opo a kale a wana okuninginifwa?
7 Fye inatu wanenena ngaashi Jesus nohatu dulu ashike okuhanga oshitwa sheninginifo konima yokukatuka eenghatu dikwao da fimana. Eshi otashi hovele mokutula eshiivo lashili lokushiiva Jehova Kalunga naJesus Kristus momitima detu. Ngeenge ohatu shi ningi otashi ke tu kaleka neitavelo tali longo nokukala nohole inene yokuhola Kalunga. (Mateus 22:37-40; Ovaroma 10:17; Ovaheberi 11:6) Okuwanifa po eemhango, omafinamhango nosho yo omifikamhango daKalunga oshi na oku tu linyengifa tu livele ombedi nokuulika oluhodi lopakalunga molwomatimba etu onale. Eshi otashi twala melidilululo, sha hala kutya, okulialuluka nokweekelashi ondjila keshe ya puka oyo kwa li twa landula nale fimbo kwa li tu he na eshiivo lokushiiva Kalunga. (Oilonga 3:19) Doshili, ngeenge natango ohatu longo oilonga youlunde wonhumba meholeko ponhele yokulonga osho sha yuka inatu lialuluka shili nokatu shii Kalunga oulai. Jehova oha mono mo ounaihelele aushe.—Lukas 12:2, 3.
8. Eenghatu dilipi u na okukatuka ngeenge owa hala okukufa ombinga moilonga yokuudifa Ouhamba?
8 Paife eshi wa kala to mono eshiivo lokushiiva Kalunga, inashi wapala mbela okukonakona oinima yopamhepo panghedi yopaumwene? Otashi dulika wa hala nokuhalelela u lombwele ovakwanedimo loye, ookaume koye noovakwao osho to lihongo. Doshili, otashi dulika we shi ninga nale, ngaashi naanaa Jesus a tukulilafana onghundana iwa navamwe monghedi yohangelela. (Lukas 10:38, 39; Johannes 4:6-15) Ndele paife otashi dulika wa hala okuninga shihapu. Ovakulunhuongalo Ovakriste otava ka kala va hafa okupopya naave opo va mone nokutya ove owa wana okukala alushe nombinga moilonga yokuudifa Ouhamba yEendombwedi daJehova. Ngeenge owa wana, ovakulunhuongalo otava ka ninga omalongekido opo u ye pamwe nOndombwedi imwe moukalele. Ovahongwa vaJesus ova shikula omalombwelo aye opo va dule okuwanifa po oukalele wavo panghedi yelandulafano. (Markus 6:7, 30; Lukas 10:1) Naave oto ka mona ouwa mekwafo la faafana eshi to kufa ombinga mokutandavelifa onghundana yOuhamba mokuya eumbo neumbo nosho yo meenghedi dikwao.—Oilonga 20:20, 21.
9. Ongahelipi omunhu he liyapulile Kalunga, nongahelipi eliyapulo hali nwefa mo onghalamwenyo yomunhu?
9 Okuudifa onghundana iwa kovanhu vomaludi aeshe oo e li meengaba doshitukulwa sheongalo oyo onghedi yokumona ovo ve hole ouyuki noshi li yo shimwe shomoilonga iwa oyo tai ulike kutya ou na eitavelo. (Oilonga 10:34, 35; Jakob 2:17, 18, 26) Okukala alushe pokwoongala kwopaKriste nokukala nombinga tai ti sha moilonga yokuudifa odi li yo eenghedi dokuulika kutya owe livela ombedi nowe lialuluka nonokutya paife owa tokola okukala metwokumwe neshiivo lokushiiva Kalunga. Onghatu imwe ya shikula ko yopandunge oilipi? Oyo okuliyapulila Jehova Kalunga. Eshi otashi ti kutya oto lombwele Kalunga meilikano tali di komutima kutya ou na ehalo liwa nosho yo kutya nomutima aushe oto yandje onghalamwenyo yoye kuye u longe ehalo laye. Ei oyo onghedi yokuliyapulila Jehova nokutambula ko ondjoko ipu yaJesus Kristus.—Mateus 11:29, 30.
ENINGINIFO—OSHO TALI TI KWOOVE
10. Omolwashike u na okuninginifwa konima eshi we liyapulila Jehova?
10 PaJesus, aveshe ovo tava ningi ovahongwa vaye ove na okuninginifwa. (Mateus 28:19, 20, NW) Omolwashike eshi sha pumbiwa konima eshi we liyapulila Kalunga? Molwaashi owe liyapulila Jehova, oku shii kutya ove ou mu hole. Ndele kape na omalimbililo kutya oto ka kala wa hala okukatuka eenghatu da wedwa po opo u shiivifile vamwe shi na sha nohole yoye yokuhola Kalunga. Hano, eninginifo otali ku pe omhito opo u shiivife okuliyapulila kwoye Jehova Kalunga moipafi.—Ovaroma 10:9, 10.
11. Eninginifo otali ti shike?
11 Eninginifo oli na eityo la fimana lopafaneko. Eshi to ninginifwa ile to “pakwa” koshi yomeva, osha fa wa fya shi na sha nonghalamwenyo yoye yonale. Eshi to di momeva osha fa to i monghalamwenyo ipe, oyo tai pangelwa kehalo laKalunga ndele haloye mwene. Doshili, eshi inashi hala kutya ito ka ninga vali omapuko, molwaashi atusheni inatu wanenena nohatu nyono efiku keshe. Ndelenee u li omupiya waJehova e mu liyapulila nokwa ninginifwa, oto ka kala u na ekwatafano le likalekelwa naye. Molwokulivela ombedi kwoye nosho yo okuliyandja kwoye nelininipiko u ninginifwe, Jehova okwa hala oku ku dimina po omatimba oye pakanghameno lekuliloyambo laJesus. Hano eninginifo otali twala meliudo la yela koshipala shaKalunga.—1 Petrus 3:21.
12. Otashi ti shike okuninginifwa (a) “medina laXe”? (b) ‘medina lOmona’? (c) ‘medina lomhepo iyapuki’?
12 Jesus okwa lombwela ovashikuli vaye opo va ninginife ovahongwa vape ‘medina laXe nolOmona nolomhepo iyapuki.’ (Mateus 28:19) Jesus okwa li a hala okutya shike? Okuninginifwa “medina laXe” otashi ulike kutya omunhu oo ta ninginifwa okwa itavela nomutima aushe kutya Jehova Kalunga oku li Omushiti noku na oufemba wokukala Omunamapangelo weshito alishe. (Epsalme 36:9; 83:18, KB-1955; Omuudifi 12:1) Okuninginifiwa ‘medina lOmona’ otashi ti kutya omunhu okwa dimina Jesus Kristus—na unene tuu ekuliloyambo laYe—li li olo alike odjo yexupifo ya yandjwa kuKalunga. (Oilonga 4:12) Okuninginifwa ‘medina lomhepo iyapuki’ otashi ulike kutya omuninginifwa okwa dimina omhepo iyapuki yaJehova ile eenghono daye tadi longo di li oshilongifo shokuwanifa po omalalakano aYe nokupameka ovapiya vaYe va longe ehalo laYe louyuki mekwatafano nehangano laYe tali wilikwa komhepo yaye.—Genesis 1:2; Epsalme 104:30; Johannes 14:26; 2 Petrus 1:21.
OWE LILONGEKIDILA ENINGINIFO?
13, 14. Omolwashike tu he na okukala tu na oumbada okuninga ehoololo lokulongela Jehova Kalunga?
13 Molwaashi eninginifo otali ti sha shihapu noli li oshitwa sha fimana neenghono monghalamwenyo yomunhu, mbela oli li onghatu oyo u na okukala wa tila okukatuka? Hasho nandenande! Nonande etokolo lokuninginifwa kali na okutalika ko la hamakasha, kape na omalimbililo olo etokolo lopandunge ku he na vali olo to dulu okuninga.
14 Eninginifo ohali yandje oumbangi wehoololo loye okulongela Jehova Kalunga. Diladila kovanhu ovo u shii. Mbela keshe umwe iha longele omuhona wonhumba monghedi imwe ile yonhumba? Vamwe otava longele omaliko. (Mateus 6:24) Vamwe otava lalakanene nouladi omaifano avo ile tave lilongele vo vene mokukaleka ewanifo lomahalo avo olo li li oshinima sha fimanenena monghalamwenyo yavo. Ope na natango vamwe ovo tava longele oikalunga. Ndele ove owa hoolola okulongela Kalunga kashili, Jehova. Kape na umwe ha ulike olune, olukeno nohole i fike opo ngaashi ye. Kalunga okwa tumbaleka ovanhu moku va pa oilonga i na elalakano oyo tai va ulikile kexupifo. Ota yandje ondjabi yomwenyo waalushe kovapiya vaye. Doshili, okushikula oshihopaenenwa shaJesus nosho yo okuyandjela omwenyo woye Jehova kaku fi onghatu oyo i na okutilika. Doshili, oyo aike ondjila oyo ya hokiwa kuKalunga noi li lela pandunge.—1 Eehamba 18:21.
15. Omandangalati aapeshe amwe elipi ngeenge tashi uya peninginifo?
15 Ndelenee eninginifo kali fi onghatu oyo i na okukufwa molwenwefemo lavamwe. Oyo oshinima shopaumwene pokati koye naJehova. (Ovagalati 6:4) Eshi wa ninga exumokomesho lopamhepo otashi dulika u lipule to ti: “Oshike tashi kelele nge ndi ha [ninginifwe, NW]?” (Oilonga 8:35, 36) Ou na okulipula ove mwene kutya: ‘Mbela epataneko lovakwanedimo olo tali kelele nge? Mbela natango ohandi kufa ombinga moinima yonhumba i he li pamishangwa ile moilonga youlunde? Otashi dulika mbela omolwaashi nda tila okukala inai pandika kovanhu vomomudingonoko?’ Ei oyo oinima imwe yomoitwa i shii okukonakonwa nokutalwa paushili.
16. Ongahelipi to ka mona ouwa mokulongela Jehova?
16 Kashi li pandunge okutala kutya okulongela Jehova otashi ka kosha shi fike peni ndele ito konakona omauwa okulongela Jehova. Pashihopaenenwa, diladila koshinima shepataneko lovakwanedimo. Jesus okwa udaneka kutya nokuli nande ovahongwa vaye ova kanife ovakwanedimo molwaashi ve mu shikula, otava ka mona oukwaneumbo wa kula wopamhepo. (Markus 10:29, 30) Ovaitaveli vakweni ava otave ke ku ulikila ohole yopaumwainafana, otave ke ku kwafela u lididimikile omahepeko notave ke ku yambidida mondjila oyo tai twala komwenyo. (1 Petrus 5:9) Unene tuu ovakulunhuongalo otava dulu oku ku kwafela opo u lididimikile omaupyakadi nokukondjifa omashongo nomupondo. (Jakob 5:14-16) Shi na sha nokuhahokiwa mounyuni ou, oshi li nawa ngeenge to lipula ove mwene kutya: ‘Oshike tashi dulu okuyelekwa nokukala nda hokiwa kOmushiti weshito alishe, osho tashi mu ningifa a hafele ondjila yokukalamwenyo oyo nda hoolola?’—Omayeletumbulo 27:11.
OKUKALA METWOKUMWE NELIYAPULO NENINGINIFO LOYE
17. Omolwashike u na okutala ko eninginifo li li ehovelo ponhele yoku li tala ko li li exulilo?
17 Oshi li oshinima sha fimana okudimbuluka kutya eninginifo kali fi exulilo lexumokomesho loye lopamhepo. Olo etameko loilonga yaalushe yokulongela Kalunga u li omukalele e mu liyapulila u li umwe womEendombwedi daJehova. Nande eninginifo ola fimanenena, kali fi eshilipaleko lexupifo. Jesus ina tya: ‘Keshe ou a ninginifwa oye ta xupifwa.’ Ponhele yaasho okwa ti: “Ou te lididimike fiyo exulilo, oye ta xupifwa.” (Mateus 24:13) Onghee hano, oshi li oshinima sha fimanenena u konge tete Ouhamba waKalunga noku u ninga oshinima shotete monghalamwenyo yoye.—Mateus 6:25-34.
18. Omalalakano amwe elipi e shii okulalakanenwa konima yeninginifo?
18 Opo u lididimike moilonga yoye yokulongela Jehova, ou na okulitulila po omalalakano opamhepo. Elalakano limwe la wapala olo okuhapupaleka eshiivo loye lokushiiva Kalunga okupitila mekonakono lopaumwene ihali faula lEendjovo daye. Litulila po efimbo lokulesha Ombibeli efiku keshe. (Epsalme 1:1, 2) Kala alushe pokwoongala kwopaKriste, molwaashi eendafano olo to ka mona po otali ke ku kwafela u mone eenghono dopamhepo. Omolwashike ito shi ningi elalakano loye u yandje omulombo pokwoongala kweongalo nokungaha oto hambelele Jehova noto kendabala yo okutunga vamwe? (Ovaroma 1:11, 12) Elalakano limwe otashi dulika li kale okulundulula oukwatya womailikano oye.—Lukas 11:2-4.
19. Omhepo iyapuki otai dulu oku ku kwafela u ulike omaukwatya elipi?
19 Ngeenge owa hala okukala metwokumwe neityo leninginifo loye owa pumbwa okuyandja elitulemo kwaasho to ningi, nokupitika opo omhepo iyapuki yaKalunga i imike mwoove omaukwatya ngaashi ohole, ehafo, ombili, onheni, olune, ouwa, eitavelo, elininipiko nelipangelo. (Ovagalati 5:22, 23, NW; 2 Petrus 3:11) Dimbuluka, Jehova oha yandje omhepo yaye iyapuki kwaaveshe ovo tave i indile notava dulika kuye ve li ovapiya vaye ovadiinini. (Lukas 11:13; Oilonga 5:32) Hano ilikana kuKalunga e ku pe omhepo yaye noku mu pula e ku kwafele u ulike omaukwatya oo tae mu hafifa. Omaukwatya a tya ngaho otae ke limonikila mokupopya kwoye nomelihumbato loye eshi to linyenge kenwefemo lomhepo yaKalunga. Doshili, keshe umwe pauhandimwe meongalo lopaKriste ota kendabala opo a kulike “omunhu mupe” opo a kale a fa naanaa Kristus. (Ovakolossi 3:9-14) Keshe umwe womufye okwa taalela omashongo e lili noku lili moku shi ninga molwaashi otu li peendodo da yoolokafana dexumokomesho lopamhepo. Molwaashi ove ino wanenena, ou na okulonga noudiinini opo u kale noukwatya wa fa waKristus. Ndele ino teka omukumo shi na sha naashi, molwaashi pakwafo laKalunga otashi shiiva.
20. Omeenghedi dilipi to dulu okuhopaenena Jesus moukalele?
20 Mokati komalalakano oye opamhepo omu na okukala olo lokuhopaenena naanaa oshihopaenenwa shaJesus shehafo. (Ovaheberi 12:1-3) Okwa li e hole oukalele. Hano, ngeenge ou na oufembanghenda wokukufa ombinga momalipyakidilo okuudifa Ouhamba, ino ku efa ku ninge ondjikilile yongaho. Lalakanena okukala wa mbilipalelwa mokuhonga vamwe kombinga yOuhamba waKalunga ngaashi Jesus a ninga. Longifa ehongo olo hali yandjwa keongalo oku ku kwafela u xwepopale u li omuhongi. Ndele kala wa shilipalekwa kutya Jehova ota dulu oku ku pa eenghono opo u wanife po oukalele woye.—1 Ovakorinto 9:19-23.
21. (a) Otu shii ngahelipi kutya ovanhu vadiinini va ninginifwa ove na ongushu kuJehova? (b) Oshike tashi ulike kutya eninginifo ola fimana shi na sha nokuxupa kwetu metokolo laKalunga eshi ta ka tokola onghalelo ei yoinima youkolokoshi?
21 Omunhu e liyandja nokwa ninginifwa oo ta kendabala noudiinini okushikula oshihopaenenwa shaJesus, kuKalunga oku li omunhu e likalekelwa. Jehova oha konakona omitima dovanhu omamiliyona omayovi noku shii kutya ovanhu va tya ngaho ova pumba shili. Ohe va tale ko ve li “omamona.” (Haggai 2:7) Omaxunganeko Ombibeli otaa ulike kutya Kalunga ava ohe va tale ko ve li ovanhu va didilikilwa okuxupa metokolo laye olo li li pokuhanga onghalelo ei yoinima youkolokoshi. (Hesekiel 9:1-6; Malakia 3:16, 18) Mbela ou na “oikala iwa kombinga yomwenyo waalushe”? (Oilonga 13:48, NW) Mbela owa hala nokuhalelela u didilikwe u li umwe oo ta longele Kalunga? Eliyapulo neninginifo olo oshitukulwa shedidiliko olo, noya fimanenena omolwexupifo.
22. “Ongudu inene” oi na omatimaumbwile ashike?
22 Konima yEyelu lounyuni aushe, Noa noukwaneumbo waye ova dja mo monguluwato nokuuya kedu la kosholwa. Sha faafana kunena, “ongudu inene” oyo tai longifa eshiivo lokushiiva Kalunga monghalamwenyo yayo ndele tai hokiwa kuJehova oi na etimaumbwile lokuxupa mexulilo longhalelo yoinima ei youkolokoshi noku ka hafela omwenyo waalushe kombada yedu la kosholwa fiyo alushe. (Ehololo 7:9, 14) Onghalamwenyo oyo mbela otai ka kala ya tya ngahelipi?
KONAKONA ESHIIVO LOYE
Jehova okwa hala u longife ngahelipi eshiivo loye loku mu shiiva?
Eenghatu dimwe dilipi hadi twala meninginifo?
Omolwashike eninginifo li he fi exulilo ndele etameko?
Ongahelipi hatu dulu okukala metwokumwe neliyapulo neninginifo letu?
[Efano pepandja 172]
Mbela owe liyapulila Kalunga meilikano?
[Omafano pepandja 174]
Oshike tashi ku kelele u ha ninginifwe?