Okuvalululwa ohaku ningwa ngiini?

JESUS ina popya owala naNikodemus kombinga yesimano lyokuvalululwa nosho wo kombinga yaangoka he ku ningitha nelalakano lyako, ihe okwa popi wo kutya otaku ka ningwa ngiini. Jesus okwa ti: “Kape na omuntu ta vulu okuya [muukwaniilwa waKalunga], ngele ina [valwa] momeya nomOmbepo.” (Johannes 3:5, yelekanitha KB.) Onkee ano, omuntu oha valululwa momeya nomombepo. Uutumbulilo “momeya nomOmbepo” otawu ti shike?

‘Omeya nombepo’ oshike?

Molwaashoka Nikodemus okwa li omulongwantu gwopalongelokalunga, osha yela kutya okwa li e shi nawa omukalo moka Omanyolo gOshihebeli haga longitha uutumbulilo “ombepo yaKalunga,” sha hala okutya, oonkondo dhaKalunga tadhi longo ndhoka tadhi vulu okunwetha mo aantu ya longe iilonga yi ikalekelwa. (Genesis 41:38; Eksodus 31:3; 1 Samuel 10:6) Onkee ano, sho Jesus a longitha oshitya ‘ombepo,’ Nikodemus okwa li e shi uva ko kutya okwa li ta popi kombinga yombepo yaKalunga nenge oonkondo dhe tadhi longo.

Ongiini kombinga yomeya ngoka Jesus a li a popi? Dhiladhila kombinga yaashoka sha ningwa po manga Jesus inaa kundathana naNikodemus nosho wo konima yaashoka. Ehokololo otali ulike kutya Johannes Omuninginithi nosho wo aalongwa yaJesus oya li taya ninginitha aantu momeya. (Johannes 1:19, 31; 3:22; 4:1-3) Okuninginitha hoka okwa li kwa tseyika nawa muJerusalem. Onkee ano, sho Jesus a li a popi kombinga yomeya, Nikodemus okwa li e shi shi kutya Jesus inu ulika komeya kehe, ihe okomeya ge na ko nasha neninginitho.

Okuninginithwa ‘nombepo’

Ngele “okuvalwa momeya” otashi ulike kokuninginithwa momeya, ‘okuvalwa mombepo’ otashi ti ngiini? Manga Nikodemus inaa kundathana naJesus, Johannes Omuninginithi okwa li a tseyitha kutya hameya owala taga ka dhana onkandangala meninginitho, ihe nombepo wo. Okwa li a ti: “Ngame otandi mú [ninginitha] nomeya, ihe ye ote mú [ninginitha] nOmbepo Ondjapuki.” (Markus 1:7, 8, yelekanitha NW.) Omunyoli gwevaangeli Markus okwa li a hokolola oshikando shotango sho eninginitho lya tya ngaaka lya ningwa. Okwa ti: “Pomasiku ngeyaka Jesus okwa zi kuNasareti shomuGalilea nokwa [ninginithwa, NW] kuJohannes momulonga gwaJordan. Opo tuu mpoka Jesus sho a zi momeya, okwa mono egulu lye eguluka, nOmbepo ya fa onguti oye mu lambele.” (Markus 1:9, 10) Sho Jesus a ninginithwa muJordan, okwa li a ninginithwa nomeya. Pethimbo ndyoka sho ombepo ya fa onguti ya zi megulu ya li ye mu lambele, okwa li a ninginithwa nombepo ondjapuki.

Oomvula ndatu lwaampono konima yeninginitho lye, Jesus okwa li a shilipaleke aalongwa ye a ti: “Konima yomasiku gamwe otamu ka [ninginithwa, NW] nOmbepo Ondjapuki.” (Iilonga 1:5) Eninginitho ndika olya ningwa uunake?

Mesiku lyaPentekoste momumvo 33 E.N., aalongwa 120 yaJesus oya li ya gongala megumbo muJerusalem. “Ombadhilila aantu oyu uvu oshihomo oshinene tashi zi kegulu noshu udhitha ondjugo moka ya li ya kuutumba. Oyo oya mono ihe omalaka ga fa gomulilo . . . . Oyo ayehe oyu udhithwa ihe Ombepo Ondjapuki.” (Iilonga 2:1-4) Esiku olyo tuu ndyoka, yamwe muJerusalem oya li ya ladhipikwa ya ninginithwe momeya. Omuyapostoli Petrus okwa li a lombwele ongundu yaantu a ti: “Itedhululeni, mu ethe uulunde, kehe gumwe gwomune polwe, mu [ninginithwe, NW,] medhina lyaJesus Kristus. Nena Kalunga ota dhimi po oondjo dheni note mú pe omagano gOmbepo Ondjapuki.” Oya li yi inyenge ngiini? “Oyendji yomuyo oyi itaale oohapu dhe noya [ninginithwa, NW]. Esiku ndyoka Omuwa okwa gwedhele ko ongundu yooitaali, aantu ye thike pomayuvi gatatu.”—Iilonga 2:38, 41.

Omuntu oku na okuninginithwa momikalo mbali opo a valululwe

Omaninginitho ngoka otagu ulike shike kombinga yokuvalululwa? Otagu ulike kutya omuntu oku na okuninginithwa momikalo mbali opo a valululwe. Ndhindhilika kutya Jesus okwa li a ninginithwa tango momeya. Konima yaashoka okwa li a pewa ombepo ondjapuki. Sha faathana, aalongwa yotango oya li ya ninginithwa tango momeya (yamwe okuJohannes Omuninginithi) nokonima yaashono oya li ya pewa ombepo ondjapuki. (Johannes 1:26-36) Aalongwa aape 3 000 nayo oya li ya ninginithwa tango momeya nokonima yaashoka oya pewa ombepo ondjapuki.

Mokukaleka momadhiladhilo omaninginitho ngoka ga ningwa pOpentekoste 33 E.N., mbela otwa tegelela okuvalululwa ku ningwe ngiini kunena? Opamukalo gwa faathana naangoka gwaayapostoli yaJesus naalongwa ye yotango. Tango, omuntu ohi iyele ombedhi omolwoondjo dhe, ohi itedhulula nokweetha ondjila ye ya puka, ohi igandjele Jehova e mu longele nohe shi ulike montaneho okupitila mokuninginithwa momeya. Opo nduno, ngele Kalunga ote mu hogolola a ninge omupangeli mUukwaniilwa we, ota gwayekwa nombepo ondjapuki. Omuntu ye mwene oye ha tokola okuninginithwa pamukalo ngoka gwotango (nomeya), ihe Kalunga oye ha tokola opo a ninginithwe pamukalo ngoka omutiyali (nombepo). Ngele omuntu okwa ninginithwa pamikalo ndhika mbali, nena okwa valululwa.

Ihe omolwashike Jesus a longitha uutumbulilo ‘okuvalwa momeya nomombepo’? Okwe shi ningi opo a tse omuthindo kutya mboka taya ka ninginithwa nomeya nonombepo onkalamwenyo yawo otayi ka lunduluka thiluthilu. Oshitopolwa tashi landula ko otashi kundathana kombinga yelunduluko ndika.

[Ethano pepandja 9]

Aaisraeli mboka yi iyela ombedhi oya li ya ninginithwa momeya kuJohannes