OSHILESHWA 54
Onghandangala oyo “omupiya omudiinini nomunaendunge” ta dana
Jesus oye omutwe weongalo lopaKriste. (Ovaefeso 5:23) Kunena Jesus ota wilike ovashikuli vaye kombada yedu okudja meulu, te shi ningi okupitila ‘momupiya omudiinini nomunaendunge.’ (Lesha Mateus 24:45.) Nonande “omupiya” oo okwa pewa eenghonopangelo donhumba kuKristus, oku na okukala ha dulika kuKristus nokuyakula ovamwaxe vaye. Omupiya oo oye lyelye, nohe tu file oshisho ngahelipi?
1. Olyelye “omupiya omudiinini nomunaendunge”?
Jehova okwa kala alushe ha longifa omulumenhu, ile okangudu kovalumenhu, opo a yandje ewiliko koshiwana shaye. (Malakia 2:7; Ovaheberi 1:1) Konima yefyo laJesus, ovayapostoli nosho yo ovakulunhu muJerusalem ovo va kala tava kwatele komesho. (Oilonga 15:2) Sha faafana nokunena, okangudu kanini kovakulunhuongalo, Olutuwiliki lEendombwedi daJehova, ohaka yandje eendja dopamhepo nokuwilika oilonga yokuudifa. Okangudu oko oke li ‘omupiya omudiinini nomunaendunge oo a nangekwa po kuJesus.’ (Mateus 24:45a) Oilyo aishe yOlutuwiliki oi li Ovakriste va vaekwa nomhepo, ovo va teelela oku ka pangela pamwe naKristus mOuhamba womeulu, ngeenge ova mane oweenda wavo wokombada yedu.
2. Omupiya omudiinini oha yandje eendja dopamhepo dilipi?
Jesus okwa ti kutya omupiya omudiinini ota ka pa Ovakriste vakwao “eendja pefimbo la wapala.” (Mateus 24:45b) Ngaashi ashike oikulya oyo hatu li hai tu kwafele tu kale tu na eenghono nosho yo oukolele palutu, eendja dopamhepo, sha hala okutya omayele okudja mEendjovo daKalunga, ohadi tu pe eenghono odo twa pumbwa, opo tu kale ovadiinini kuJehova notu wanife po oshilonga osho Jesus e tu pa. (1 Timoteus 4:6) Ohatu mono eendja dopamhepo da tya ngaho okupitila pokwoongala, poyoongalele inini naayo ya kula nosho yo okupitila moileshomwa ya kanghamena kOmbiibeli nomouvidio ovo have tu kwafele tu ude ko kutya ehalo laKalunga olilipi, notu pameke oukaume wetu naye.
KONAKONA MOULE
Tala kutya omolwashike twa pumbwa “omupiya omudiinini nomunaendunge,” oo e li Olutuwiliki.
Olutuwiliki ohali yandje eendja dopamhepo, ewiliko nosho yo ekwafo tali wapalele Eendombwedi daJehova mounyuni aushe
3. Oshiwana shaJehova osha pumbwa okukala sha unganekwa
Olutuwiliki ohali unganeke oilonga yEendombwedi daJehova metwokumwe newiliko olo hali pewa kuJesus. Jesus okwa li ha wilike Ovakriste vopefimbo lonale monghedi ya faafana. Dana OKAVIDIO.
Lesha 1 Ovakorinto 14:33, 40, ndele tamu kundafana epulo tali landula:
Eevelishe odo oda ulika ngahelipi kutya Jehova okwa hala Eendombwedi daye di kale da unganekwa?
4. Omupiya omudiinini oha unganeke oilonga yetu yokuudifa
Okuudifa okwa li oshilonga sha fimanenena osho sha li hashi longwa kOvakriste vopefimbo lonale. Lesha Oilonga 8:14, 25, ndele tamu kundafana omapulo taa shikula:
Olyelye a li ha wilike oilonga yokuudifa mokati kOvakriste vonale?
Petrus naJohannes ova li ve linyenga ngahelipi kewiliko olo va li va pewa kovayapostoli vakwao?
Okuudifa oku li oshilonga sha fimanenena, osho sha unganekwa kOlutuwiliki. Dana OKAVIDIO.
Jesus okwa divilika nghee oilonga yokuudifa ya fimana. Lesha Markus 13:10, ndele tamu kundafana omapulo taa shikula:
Omolwashike Olutuwiliki la tala ko oilonga yokuudifa ya fimanenena?
Omolwashike twa pumbwa “omupiya omudiinini nomunaendunge,” opo a unganeke oilonga yokuudifa mounyuni aushe?
5. Omupiya omudiinini oha yandje ewiliko
Olutuwiliki ohali yandje ewiliko kOvakriste aveshe mounyuni. Ohali tokola ngahelipi kutya ewiliko lilipi li na okuyandja? Konakona nghee olutuwiliki lOvakriste vopefimbo lonale la li hali shi ningi. Lesha Oilonga 15:1, 2, ndele tamu kundafana epulo tali shikula:
Omhata ilipi ya li ya ningifa Ovakriste vopefimbo lonale vaha twe kumwe?
Paulus, Barnabas nosho yo vamwe ova li va ka konga ewiliko peni, opo omhata oyo i pongololwe po?
Lesha Oilonga 15:12-18, 23-29, ndele tamu kundafana epulo tali shikula:
Olutuwiliki lonale ola li hali tale kushike, ngeenge tali kongo ewiliko kuKalunga moshinima shonhumba, ofimbo inali ninga etokolo?— Tala ovelishe 12, 15 nosho yo 28.
Lesha Oilonga 15:30, 31 nosho yo 16:4, 5, ndele tamu kundafana omapulo taa shikula:
Ovakriste vopefimbo lonale ova li have linyenge ngahelipi, ngeenge va pewa ewiliko kolutuwiliki?
Jehova okwa li e va nangeka noupuna ngahelipi omolwokudulika kwavo?
Lesha 2 Timoteus 3:16 nosho yo Jakob 1:5, ndele tamu kundafana epulo tali shikula:
Kunena, Olutuwiliki ohali kongo ewiliko kulyelye, ngeenge tali ningi omatokolo?
VAMWE OHAVA TI: “Ngeenge oho pwilikine kOlutuwiliki, kungaho oto shikula ashike ovanhu.”
Oshike she ku tomha kutya Jesus oye ta wilike Olutuwiliki?
ENGONGO
Olutuwiliki oli li “omupiya omudiinini nomunaendunge,” oo a nangekwa po kuKristus. Ohali yandje ewiliko neendja dopamhepo kOvakriste mounyuni aushe.
Eendululo
Olyelye a nangeka po “omupiya omudiinini nomunaendunge”?
Olutuwiliki ohali tu file oshisho ngahelipi?
Mbela owa itavela ngoo kutya Olutuwiliki olo “omupiya omudiinini nomunaendunge”?
TALA OUYELELE WA WEDWA PO
Tala nghee Olutuwiliki la unganekwa li wanife po oilonga yalo.
“Oolyelye ve li Olutuwiliki lEendombwedi daJehova?” (Oshitukulwa shi li ko jw.org)
Lihonga nghee Olutuwiliki hali shilipaleke kutya otwa pewa eendja dopamhepo di shii okulineekelwa.
Oilyo yOlutuwiliki oi uditile ngahelipi oilonga oyo Jesus e i pa i longe?
Okwoongala kwetu nosho yo oyoongalele ohai ulike ngahelipi kutya Jehova ota wilike Olutuwiliki?