8, 9. Paulus okwa li e linyenga ngahelipi, eshi Ovajuda va li ve mu pataneka, eshi a li e va udifila nouladi, nokudja opo okwa li a ka udifila peni?

⁸ Oushili oo kutya Paulus okwa li a tala ko kutya oilonga yokulikongela omboloto oya li ashike tai mu kwafele a wanife po oukalele waye ou liwetikile, eshi Silas naTimoteus va li ve mu etela eeshali nehalo liwa okudja kuMakedonia. (2 Kor. 11:9) Diva, Paulus okwa li a “hovela okuudifa nouladi eendjovo daKalunga.” (Oil. 18:5) Ashike Paulus okwa li a patanekwa kOvajuda, eshi a li e va pa oundombwedi nouladi. Okwa li a pupula oikutu yaye, opo a ulike kutya ke na ondjo, eshi Ovajuda inava tambula ko etumwalaka li na sha naKristus tali xupifa eemwenyo, ndele ta lombwele ovapataneki vaye ovo ta ti: “Ohonde yeni nai kale kombada yeni; ame nghi na etimba. Paife ohandi i kovanhu vomoiwana imwe.”—Oil. 18:6; Hes. 3:18, 19.

10. Oshike tashi ulike kutya Paulus ka li ashike a tokola okuudifila ovanhu vomoiwana imwe ovo aveke?

¹⁰ Mbela eshi Paulus a ti kutya okudja nena eli ohandi i kovapaani, okwa li a efa po filufilu okuudifila Ovajuda aveshe nosho yo ovo va ninga veitavelo lOshijuda, nokuli naavo va li ve na ohokwe? Hasho nandenande. Pashihopaenenwa, “Krispus omukulunhu woshinagoga okwa itavela Omwene pamwe novaneumbo laye aveshe.” Osha yela kutya ovanhu vahapu ovo va li hava i koshinagoga ova li va ninga ngaashi Krispus, molwaashi Ombiibeli oya ti: “Ovakorinto vahapu ovo va uda onghundana iwa ova itavela, ndele tava ninginifwa.” (Oil. 18:8) Kungaho, eumbo laTitus Justus ola li la ninga onhele omo mwa li hamu ongalele eongalo lipe lopaKriste muKorinto. Ngeenge ehokololo lembo lOilonga ola shangwa monghedi yaLukas yokuhokolola oiningwanima, sha hala okutya, okuhokolola oinima palandulafano layo, osha yela kutya okulidilululifwa kwOvajuda, ile ovo va ninga veitavelo lOshijuda okwa li kwa ningwa konima eshi Paulus a li a pupula oikutu yaye ondwi. Oshiningwanima osho otashi ulike kutya omuyapostoli oo okwa li ha tifuka she likolelela keenghalo.