“Moshilando eshi ondi na mo ovanhu vahapu” (Oil. 18:9-17)

12. Paulus okwa li a pewa eshilipaleko lilipi okupitila memoniko?

¹² Ngeenge Paulus okwa li e na omalimbililo shi na sha nokutwikila oukalele waye muKorinto, otashi dulika a li a dja momalimbililo, moufiku omo a li e lihololelwa kOmwene Jesus memoniko, ndele te mu lombwele ta ti: “Ino tila, ove ino sholola, ndele twikila okuudifa osheshi moshilando eshi ondi na mo ovanhu vahapu.” (Oil. 18:9, 10) Kala li tuu emoniko tali tu omukumo! Omwene okwa li a shilipaleka Paulus kutya ota ka amenwa koiponga nonokutya omu na ovanamitimadiwa vahapu moshilando osho. Paulus okwa li e linyenga ngahelipi kemoniko olo? Ombiibeli oya ti: ‘Okwa kala mo oule womudo neemwedi hamano, te va hongo eendjovo daKalunga.’—Oil. 18:11.

16. Omolwashike twa pumbwa okukaleka momadiladilo eendjovo dOmwene odo tadi ti “ino sholola, ndele twikila okuudifa. Ondi li pamwe naave,” ngeenge tu li moukalele?

¹⁶ Dimbuluka kutya konima eshi Ovajuda va li inava tambula ko etumwalaka laPaulus, Omwene Jesus okwa li a shilipaleka Paulus a ti: ‘Ino tila, ove ino sholola, ndele twikila okuudifa. Ondi li pamwe naave.’ (Oil. 18:9, 10) Otu na okukaleka eendjovo odo momadiladilo, unene tuu ngeenge ovanhu itava tambula ko etumwalaka letu. Otu na yo okudimbuluka kutya Jehova oha konakona omitima noha nanene ovanamitimadiwa kuye. (1 Sam. 16:7; Joh. 6:44) Itashi tu tu tuu omukumo okukala twe lipyakidila moukalele wetu! Omudo keshe ohaku ninginifwa ovanhu 300 000 lwaapo, sha hala kutya, oupokati wovanhu 800 lwaapo efiku keshe. Jesus okwa shilipaleka ovo hava dulika koshipango ‘shokuninga ovanhu vomoiwana aishe ovahongwa,’ a ti: “Ondi li pamwe nanye alushe fiyo omomafiku axuuninwa ounyuni ou.”—Mat. 28:19, 20.