Ekulilo otali tu kwafele tu ka xupifwe
“Ou ta itavele Omona, oye e nomwenyo waalushe; ndelenee ou iha dulika kOmona, ita ka mona omwenyo, ndelenee ehandu laKalunga otali kala kombada yaye.” — JOH. 3:36.
1, 2. O-Zion’s Watch Tower oya li ya nyanyangidwa omolwetomheno limwe lilipi?
OSHIFO oshitine shOshungonangelo shaOktoba 1879, osha ti: “Ngeenge omunhu okwa konakona Ombibeli noukeka, ota ka mona kutya efyo laKristus ola fimana.” Oshitukulwa osho osha xulifa neendjovo edi tadi ti: “Natu kaleni twa angala keshe osho tashi ti kutya efyo laKristus kali fi lopayambo ile kutya itali dimi po omatimba.” — Lesha 1 Johannes 2:1, 2.
2 O-Zion’s Watch Tower oya li ya nyanyangidwa oshikando shotete muJuli 1879, omolwetomheno limwe vali olo kutya, i popile ehongo lOmbibeli li na sha nekulilo. Oshifo osho osha li hashi yandje “oikulya pefimbo [layo],” molwaashi lwopexulilo lo 1800, ovanhu vahapu ovo va li tave liti Ovakriste ova li va hovela okulimbililwa shi na sha nongeenge efyo laJesus oli li ngoo ekulilo lomatimba. (Mat. 24:45) Pefimbo opo, ovanhu vahapu ova li va hovela okwiitavela mehongo loevolusi, olo li li omhinge noushili oo kutya ovanhu ova kanifa ewaneneno. Ovanhu ovo va itavela moevolusi ohava ti kutya ovanhu otava xwepopaleke onghalamwenyo yavo kuvo vene noinava pumbwa ekulilo. Onghee hano, ovanhu ovo ova li va pumbwa okudulika komayele omuyapostoli Paulus oo a li a pa Timoteus, taa ti: “Tuvikila nokudiinina eshi we shi pewa, ove yepa omapopyaano a nyata noongaho neemhata doipupulu hadi tiwa eshiivo vati, eshiivo eli la itavelwa kuvamwe, ava ve liteeka eitavelo.” — 1 Tim. 6:20, 21.
3. Ohatu ka kundafana omapulo elipi?
3 Nopehe na omalimbililo, owa tokolatoko uhe ‘liteeke eitavelo.’ Ndele opo u kale u na eitavelo la kola, oshiwa okukonakona omapulo aa: Omolwashike nda pumbwa ekulilo? Ekulilo ola pula eliyambo li fike peni? Ongahelipi handi dulu okumona ouwa mefiloshisho li na ondilo la tya ngaho olo tali dulu okuxupifa nge mehandu laKalunga?
Ohatu dulu oku ka xupifwa mehandu laKalunga olo tali uya
4, 5. Oshike tashi ulike kutya Kalunga okwa handukila onghalelo ei yoinima youkolokoshi?
4 Ombibeli nosho yo ondjokonona yovanhu otai ulike kutya Kalunga okwa kala a ‘handukila’ ovanhu aveshe okudja eshi Adam a nyona. (Joh. 3:36) Osho oshi liwetikile molwaashi kape na oo ta dulu okuhenuka efyo. Satana oo ta kondjele eenghonopangelo okwa nyengwa filufilu okwaamena ovanhu komaupyakadi oo hae va hange, nokape na epangelo lopanhu la dula okuwanifa po eemhumbwe da fimana dovapangelwa valo aveshe. (1 Joh. 5:19) Onghee hano, ovanhu otava twikile okumona oixuna koita, kekaulonyanga nosho yo koluhepo.
5 Osha yela kutya onghalelo ei yoinima youkolokoshi inai nangekwa noupuna kuJehova. Nomolwaasho Paulus okwa ti kutya “ehandu laKalunga tali holoka tali di meulu li hange ouhenakalunga aushe.” (Rom. 1:18-20) Onghee hano, ovo tava longo oulunde nopehe na okulivela ombedi otava ka hangwa koilanduliko yelihumbato lavo. Kunena, ehandu laKalunga otali shiivifwa okupitila metumwalaka letokolo olo tali tilwa kombada younyuni waSatana, netumwalaka la tya ngaho otali hangwa moishangomwa yetu ihapu ye likolelela kOmbibeli. — Eh. 16:1.
6, 7. Oilonga ilipi tai kwatelwa komesho kOvakriste ovavaekwa, novanhu ovo ve li oshitukulwa shounyuni waSatana ove na omhito natango yokuninga shike?
6 Mbela ovanhu otava dulu ngoo okumanguluka ko kepangelo laSatana nokukala ve na ekwatafano naKalunga? Heeno, ove na natango omhito yokupanga ombili naJehova. Ovakriste ovavaekwa ovo ve li ‘ovatumwa ponhele yaKristus’ otava kwatele komesho oilonga yomomapya oyo ovanhu vomoiwana aishe tava shivwa okupitila muyo taku ti: “Itaveleni mu hanganifwe naKalunga.” — 2 Kor. 5:20, 21.
7 Omuyapostoli Paulus okwa ti kutya Jesus ‘ote tu xupifa mehandu olo tali uya.’ (1 Tes. 1:10) Ovalunde ovo inave livela ombedi otava ka hanaunwa po filufilu eshi Jehova te ke va handukila lwaxuuninwa. (2 Tes. 1:6-9) Ndele mbela oolyelye tava ka xupifwa? Ombibeli oya ti: “Ou ta itavele Omona, oye e nomwenyo waalushe; ndelenee ou iha dulika kOmona, ita ka mona omwenyo, ndelenee ehandu laKalunga otali kala kombada yaye.” (Joh. 3:36) Aveshe ovo tava ka hangwa momwenyo ve na eitavelo tali longo mekuliloyambo laJesus otava ka xupifwa eshi Kalunga ta ka xulifa po onghalelo ei.
Nghee ekulilo hali longo
8. (a) Adam naEva ova li ve na etimaumbwile likumwifi lilipi fimbo va li inava nyona? (b) Jehova Kalunga okwa li a ulika ngahelipi kutya oha ulike ouyuki waye monghedi ya wanenena?
8 Adam naEva ova li va shitwa va wanenena. Ngeno ova dulikile kuKalunga, ngeno kombada yedu okuyadi oludalo lavo la hafa li li pamwe navo mOparadisa. Ndele shinyikifa oluhodi, ovadali vetu votete ova li va nyona oipango yaKalunga owina. Oshidjemo, ova tokolelwa efyo laalushe nova li va tewa mo mOparadisa oyo ya li ko pehovelo. Eshi Adam naEva va hovela okudala ounona, oulunde owa kwata ovanhu aveshe, nokudja opo, Adam naEva ova kulupa ndele tava fi. Osho otashi ulike kutya Jehova oha wanifa po eendjovo daye. Kakele kaasho, Kalunga oha ulike ouyuki waye monghedi ya wanenena. Jehova okwa li a londwela Adam kutya ngeenge okwa li komuti oo wa dilikwa ota ka fya, naasho osho sha li sha ningwa shili.
9, 10. (a) Omolwashike oludalo laAdam hali fi? (b) Ongahelipi hatu dulu okuhenuka efyo laalushe?
9 Molwaashi otu li oludalo laAdam, otwa fyuulula omalutu inaa wanenena oo e na eamo lokulonga oulunde nohaa fi. Eshi Adam a nyona, otwa li natango molutu laye, oku shi popya pafaneko. Onghee hano, nafye otwa kwatelwa mo mehandukilo lefyo. Ngeno Jehova okwa li a xulifa po efyo nopehe na okuyandja ekulilo, ngeno ina wanifa po eendjovo daye. Paulus okwe tu popila ko atusheni, eshi a ti: “Osheshi tu shi shii omhango oyopamhepo, ndelenee aame owo pambelela, nda landelwa oulunde, ndi kale koshi yawo. Aame omunhu mwii, olyelye ta mangulula nge molutu eli lefyo?” — Rom. 7:14, 24.
10 Jehova Kalunga oye aeke ta dulu okuyandja osho tashi pulwa pamhango opo a dule oku tu dimina po omatimba etu monghedi i li pauyuki noku tu mangulula mehandukilo lefyo laalushe. Osho Jehova okwe shi ninga mokutuma Omona waye omuholike okudja meulu opo a dalwe e li omunhu a wanenena, ta dulu okuyandja omwenyo waye opo e tu kulile. Mepingafano naAdam, Jesus ina kanifa ewaneneno. Jesus “ina longa oulunde washa” nandenande. (1 Pet. 2:22) Onghee hano, Jesus okwa li ta dulu okudala ounona va wanenena. Ndele ponhele yaasho, Jesus okwa li a efa ovatondi vaKalunga ve mu dipae opo a dule okuninga xe yoludalo li lunde laAdam noku shi ninge tashi shiiva opo ovo ve na eitavelo tali longo muye va ka mone omwenyo waalushe. Omishangwa oda ti: “Kalunga Oye umwe nopokati kaKalunga novanhu oumwe, omunhu Kristus Jesus, ou e liyandya Ye mwene oikulila yaaveshe, ndele sha li shi nokuhepaululwa mefimbo lasho.” — 1 Tim. 2:5, 6.
11. (a) Omauwa oo a etifwa kekulilo otaa dulu okufaafanifwa nashike? (b) Omauwa ekulilo otaa ka monika yo nokoolyelye?
11 Onghedi omo ekulilo hali longo otai dulu okufaafanifwa nonghalo yovanhu ovo va kengelelwa kombaanga yonhumba oyo ya lya po oimaliwa yavo aishe oyo va li va tuvikila ndele tava i meendjo. Konima yaasho, oovene vombaanga oyo ova li va pewa ehandukilo li li pauyuki va kale modolongo oule womido. Ndele mbela ongahelipi shi na sha novanhu vehe na ondjo ovo va lilwa oimaliwa yavo? Molwaashi ova ninga eehepele, kave na eshi tava dulu okuninga po shi na sha nonghalo yavo, okuninga shapo omulumenhu wonhumba omunalukeno noku li oshipuna ta kufa po ombaanga oyo nokwaalulila ovanhu oimaliwa yavo aishe, ndele te va kufa meendjo. Sha faafana, Jehova Kalunga nosho yo Omona waye omuholike ova kulila oludalo laAdam nokudima po omatimba avo pakanghameno lohonde yaJesus ya tika. Nomolwaasho Johannes Omuninginifi okwa li a dula okupopya kombinga yaJesus a ti: “Tala, Odjona yaKalunga tai kufa po omatimba ounyuni.” (Joh. 1:29) Ounyuni oo wa diminwa po omatimba inau kwatela mo ashike ovanhu ovo ve na omwenyo ndele naavo yo va fya.
Ekulilo ola pula shi fike peni?
12, 13. Oshike hatu lihongo moshiningwanima shi na sha naashi Abraham a li a halelela okuyamba po Isak?
12 Itatu dulu okuuda ko filufilu kutya ekulilo ola pula Tate yetu womeulu nosho yo Omona waye omuholike shi fike peni. Ndele Ombibeli otai hokolola oiningwanima imwe oyo tai dulu oku tu kwafela tu dilonge kombinga yoshinima osho. Pashihopaenenwa, diladila kutya Abraham okwa li e udite ngahelipi eshi a li molweendo lomafiku atatu ta i kuMoria opo a ka wanife po elombwelo laKalunga olo tali ti: “Kufa Isak, omumwoye ewifa, ou u mu hole, ndee inda kedu laMoria. Ndee oko mu yamba exwikiloyambo komhunda imwe oyo ame ohandi ke ku ulikila.” — Gen. 22:2-4.
13 Abraham osho a ka fika konhele oko a li e na okuya. Ndele diladila ashike kutya Abraham okwa li a nyika oluhodi shi fike peni eshi a li ta mange omake neemadi daIsak noku mu nangeka koaltari oyo Abraham a tunga ye mwene. Abraham kali tuu ta di omaxwilili eshi a li a kufa mo ombele oyo a li ta ka dipaa nayo ngeno omona waye! Diladila yo kutya Isak okwa li e udite ngahelipi eshi a li a nangala koaltari a teelela okuuda ouyahame eshi ta kutulwa omunino nokufya. Ndele omweengeli waJehova okwa li a kelela diva Abraham aha dipae Isak. Osho Abraham naIsak va li va ninga pomhito oyo otashi tu kwafele tu ude ko kutya osha pula Jehova shi fike peni opo a efe ovakalelipo vaSatana va dipae Omona waYe. Okulongela kumwe kwaIsak naAbraham otaku faneke nghee Jesus a li a halelela okumona oixuna noku tu fila. — Heb. 11:17-19.
14. Oshiningwanima shimwe osho sha ningwa monghalamwenyo yaJakob otashi tu kwafele ngahelipi tu ude ko kutya ekulilo ola pula shi fike peni?
14 Oshiningwanima osho sha ningwa monghalamwenyo yaJakob nasho otashi dulu oku tu kwafela tu ude ko kutya ekulilo ola pula shi fike peni. Jakob okwa li unene e hole omona waye Josef. Ndele shinyikifa oluhodi, ovamwaxe vaJosef ova li ve mu twila ondubo nova li ve mu tonde. Ashike nande ongaho, Josef okwa li a hala okutumwa kuxe a ka tale kutya ovamwaxe ove li po ngahelipi. Pefimbo opo, ovamwaxe vaJosef ova li tava lifa oimuna yaxe kokule neumbo lavo olo la li muHebron, opo pa li eekilometa 100 lwaapo okuyuka kolundume. Diladila ashike kutya Jakob okwa li e udite ngahelipi eshi ovana vaye va li ve uya keumbo ve na oshikutu shaJosef shi yadi eehonde! Jakob okwa li a ingida ta ti: “Oshikutu oshomumwange! Oshifitukuti she mu lya! A nyanyaulwa. Josef a nyanyaulwa!” Osho osha li sha kuma Jakob neenghono, oo a li a lila eenghali daJosef oule womafiku mahapu. (Gen. 37:33, 34) Oshoshili kutya Jehova ihe linyenge filufilu keenghalo ngaashi ovanhu inava wanenena. Ndele nande ongaho, ngeenge otwa dilonga koshiningwanima osho, otashi dulu oku tu kwafela tu ude ko kanini kutya Kalunga okwa li e udite ngahelipi eshi Omona waye omuholike a li ta hepekwa nokudipawa efyo tali udifa omunhu omwenyo munyenye, e li omunhu kombada yedu.
Nghee hatu dulu okumona ouwa mekulilo
15, 16. (a) Jehova okwa li a ulika ngahelipi kutya okwa tambula ko ekulilo? (b) Owa mona ouwa ulipi mekulilo?
15 Jehova Kalunga okwa nyumuna Omona waye omudiinini nolutu likumwifi lopamhepo. (1 Pet. 3:18) Omunyumunwa Jesus okwa kala te lihololele ovahongwa vaye oule womafiku 40, opo a pameke eitavelo lavo noku va deule va dule oku ka longa oilonga inene yokuudifa oyo ya li komesho. Konima yaasho, Jesus okwa londa meulu nokwa yandja kuKalunga ongushu yohonde yaye ya tika opo i dule okweetela ouwa ovashikuli vaye vashili ovo ve na eitavelo tali longo mongushu yekuliloyambo laye. Jehova Kalunga okwa li a ulika kutya okwa tambula ko ekulilo laKristus moku mu pa oshinakuwanifwa shokutilila omhepo iyapuki kombada yovahongwa vaye ovo va li va ongala muJerusalem mefiku lOpentekoste 33 O.P. — Oil. 2:33.
16 Ovashikuli vaKristus ovavaekwa ova li va hovela diva okuladipika ovanhu va ye onhapo ehandu laKalunga mokuninginifwa medina laJesus Kristus opo va dule okudiminwa po omatimba avo. (Lesha Oilonga 2:38-40.) Okudja kefiku olo lopandjokonona fiyo okunena, ovanhu omamiliyona va dja moiwana aishe ova nanenwa kuKalunga pakanghameno leitavelo tali longo mekuliloyambo laJesus. (Joh. 6:44) Paife natu ka konakoneni omapulo avali aa taa landula apa: Mbela ope na ngoo umwe womufye e na etimaumbwile lomwenyo waalushe molwaashi ha longo ouwa? Ngeenge otwa pewa eteelelo likumwifi la tya ngaho, mbela oshi na oupu tu li kanife?
17. Ou na okutala ko ngahelipi oufembanghenda mukumwifi wokukala kaume kaKalunga?
17 Itatu dulu nandenande okulongela ekulilo. Ndele nande ongaho, ovanhu omamiliyona kunena ova ninga ookaume kaKalunga nove na eteelelo loku ka kala nomwenyo fiyo alushe moparadisa kombada yedu molwaashi ove na eitavelo tali longo mekulilo. Ashike okupanga oukaume naJehova inashi hala okutya ohatu ka kala alushe tu na ekwatafano liwa naye. Opo tu henuke okuhangwa kehandu laKalunga, otu na okukala alushe hatu ulike olupandu linene ‘omolwekulilo laJesus Kristus.’ — Rom. 3:24; lesha Ovafilippi 2:12.
Twikila okukala u na eitavelo tali longo mekulilo
18. Okukala neitavelo tali longo mekulilo okwa kwatela mo shike?
18 Omushangwa woshipalanyole woshitukulwa eshi, oo u li muJohannes 3:36, otau ulike kutya okukala neitavelo tali longo mOmwene Jesus Kristus okwa kwatela mo okukala hatu dulika kuye. Okukala nolupandu li na sha nekulilo oku na oku tu linyengifa tu kale metwokumwe nomahongo aJesus, mwa kwatelwa osho a honga kombinga yeenghedi. (Mark. 7:21-23) ‘Ehandu laKalunga otali hange’ ovanhu aveshe ovo hava kufa ombinga nopehe na okulivela ombedi moinima ngaashi oluhaelo, omashendjo oulai nosho yo ‘onyata keshe youlunde,’ oyo ya kwatela mo okutala omafano oipala. — Ef. 5:3-6.
19. Omeenghedi diwa dilipi hatu dulu okuulika kutya otu na eitavelo mekulilo?
19 Olupandu li na sha nekulilo oli na oku tu linyengifa tu kale twe lipyakidila ‘noilonga yometilokalunga.’ (2 Pet. 3:11, NW) Natu kale twe litulila po efimbo la wana lokwiilikana twa mana mo, okukonakona Ombibeli paumwene pandjikilile, okuya kokwoongala nopehe na okufaula, okuninga ekonakono loukwaneumbo nosho yo okukufa ombinga moilonga yokuudifa Ouhamba pandjikilile. Natango, inatu ‘dimbwa okulonga ouwa nokutukula mwaayo tu i kwete, osheshi omayambo a tya ngaha Kalunga e a hokwa.’ — Heb. 13:15, 16.
20. Ovanhu aveshe ovo tava twikile okuulika eitavelo tali longo mekulilo ova teelela omanangeko noupuna omonakwiiwa elipi?
20 Eshi ehandu laJehova tali ka hanga onghalelo ei yoinima youkolokoshi, itatu ka kala tuu twa hafa eshi tu na eitavelo tali longo notu na olupandu tali twikile mekulilo! Opo nee, ohatu ka kala twa hafa fiyo alushe mounyuni mupe waKalunga wa udanekwa omolwefiloshisho likumwifi olo le tu xupifa mehandu laYe. — Lesha Johannes 3:16; Ehololo 7:9, 10, 13, 14.
Oto nyamukula ngahelipi?
• Omolwashike twa pumbwa ekulilo?
• Ekulilo ola pula shi fike peni?
• Omauwa elipi a etifwa kekulilo?
• Ongahelipi hatu dulu okuulika kutya otu na eitavelo tali longo mekuliloyambo laJesus?
[Efano pepandja 19]
Ope na natango omhito ya yeuluka yokupanga ombili naJehova
[Omafano pepandja 21]
Okudilonga kombinga yoiningwanima imwe yomonghalamwenyo yaAbraham, Isak nosho yo Jakob otashi tu kwafele tu ude ko kutya ekulilo ola pula shi fike peni