‘Tava hepaululilwa ondaka iwa’

“Eenghatu . . . oda wapala ngahelipi keemhunda, daau . . . ta hepaululile ovanhu ondaka iwa.”—JESAJA 52:7.

1, 2. (a) Oinima itilifi ilipi tai ningwa efiku keshe? (b) Ovanhu vahapu ohave linyenge ngahelipi ngeenge tava udu eenghundana dii efimbo alishe?

KUNENA ovanhu mounyuni aushe ova wililwa po keenghundana dii. Ngeenge va patulula oradio, ohava udu omahokololo matilifa e na sha nomikifi didipai odo tadi li ovanhu kombada yedu. Ngeenge tava tale eenghundana ko-TV, ohava mono omafano oo itaa dulu okudimbuwa ounona tava fi kondjala, va hala ekwafo. Ohava lesha oifokundaneki shi na sha nomatopo eeboma odo tadi hanauna po omatungo notadi dipaa ovanhu vahapu ve he na ondjo.

² Heeno, oinima itilifa otai ningwa efiku keshe. Olupe lounyuni ou otali lunduluka shili la yuka kowii elela. (1 Ovakorinto 7:31, NW) Oshifokundaneki shimwe shokuEuropa lokOuninginino osha ti kutya omafimbo amwe ohashi monika sha fa kutya ounyuni aushe “ou li pokuhanauka po filufilu.” Hano itashi kumwifa eshi omuvalu wovanhu tau hapupala u udite oudjuu! Omunhu umwe oo a tumbulwa mekonakono li na sha neenghundana doko-TV mOilongo yaHangana, nope he na omalimbililo okwa hokolola omaliudo oo e niwe yo kovanhu omamiliyona, eshi a ti: ‘Konima yokutala eenghundana, ohandi kala nda polimana filufilu. Eenghundana adishe ohadi kala dii. Ohashi kala shi uditife omunhu kutya kape na eteelelo lasha.’

Eenghundana odo keshe umwe a pumbwa okuuda

3. (a) Onghundana iwa ilipi tai shiivifwa kOmbibeli? (b) Omolwashike wa lenga onghundana iwa yOuhamba?

³ Mounyuni ou unyikifa oluhodi, mbela otamu dulu ngoo okuudika onghundana iwa? Heeno, osho naanaa! Otashi hekeleke okushiiva kutya Ombibeli otai shiivifa onghundana iwa. Onghundana oyo oyoyo kutya omikifi, ondjala, ekaulo lonyanga, oita nosho yo omafininiko omaludi aeshe, otai ka xulifwa po kOuhamba waKalunga. (Epsalme 46:10; 72:12) Mbela oyo hayo onghundana oyo keshe umwe a pumbwa okuuda? Eendombwedi daJehova otadi dimine kutya osho lela. Onghee hano, oda shiivika apeshe omolweenghendabala dado tadi twikile dokuudifila ovanhu vomoiwana aishe onghundana iwa yOuhamba waKalunga.—Mateus 24:14.

4. Oitwa ilipi i na sha noukalele wetu hatu ka kundafana moshitukulwa eshi nosho yo osho tashi landula?

⁴ Ndele mbela oshike hatu dulu okuninga, opo tu twikile okukala nehafo notu na ombinga tai ti sha moilonga yokuudifa onghundana ei iwa—nokuli nomoitukulwa omo ovanhu vahapu ihava pwilikine? (Lukas 8:15) Okweendulula pauxupi oitwa itatu ya fimana i na sha noilonga yetu yokuudifa, osha yela kutya otashi ke tu kwafela tu ninge naanaa ngaho. Ohatu dulu okukonakona (1) omalinyengotomheno etu, sha hala kutya, omolwashike hatu udifa; (2) etumwalaka letu, sha hala kutya, osho hatu udifa; nosho yo (3) eenghedi detu, sha hala kutya, nghee hatu udifa. Mokukaleka omalinyengotomheno etu a yuka, etumwalaka letu la yela nosho yo eenghedi detu tadi pondola, ohatu ka yandja omhito kovanhu vahapu ve lili noku lili mounyuni aushe va ude onghundana iwa ku he na vali—onghundana iwa yOuhamba waKalunga.a

Etomheno molwaashi hatu udifa onghundana iwa

5. (a) Komesho yaaishe, oshike hashi tu linyengifa tu kufe ombinga moukalele? (b) Omolwashike taku dulu okutiwa kutya okudulika kwetu kelombwelo lOmbibeli loku ka udifa oku li euliko kutya otu hole Kalunga?

⁵ Natu konakoneni oshitwa shotete—omalinyengotomheno etu. Omolwashike hatu udifa onghundana iwa? Etomheno limwe alike naalo la li le linyengifa Jesus a udife. Okwa ti: “Ame ondi hole Tate.” (Johannes 14:31; Epsalme 40:9) Komesho yaaishe, ohatu linyengifwa kohole yokuhola Kalunga. (Mateus 22:37, 38) Ombibeli otai ulike kutya ohole yokuhola Kalunga oya kwatafana noukalele, molwaashi oya ti: “Ohole yokuhola Kalunga oyo tuu ei nokutya, tu diinine oipango yaye.” (1 Johannes 5:3; Johannes 14:21) Mbela oipango yaKalunga oya kwatela mo elombwelo ‘lokuya noku ka ninga ovanhu ovahongwa’? (Mateus 28:19) Osho. Doshili, eendjovo odo oda li da popiwa kuJesus, ndele odjo yado paulelalela oJehova. Omolwashike hatu dulu okutya ngaho? Jesus okwa yelifa a ti: “Ihandi longo sha muame mwene, ndelenee osho Tate e shi . . . longa nge, osho ashike handi shi tongo.” (Johannes 8:28; Mateus 17:5). Onghee hano, mokudulika kelombwelo loku ka udifa, ohatu ulikile Jehova kutya otu mu hole.

6. Omeenghedi dilipi ohole yokuhola Kalunga hai tu linyengifa tu udife?

⁶ Natango, ohole yokuhola Jehova ohai tu linyengifa tu udife molwaashi otwa hala okukondjifa oipupulu oyo Satana ta tandavelifa shi na sha naye. (2 Ovakorinto 4:4) Satana okwa shonga oufemba waKalunga wokupangela. (Genesis 3:1-5) Tu li Eendombwedi daJehova, otwa halelela okunyaneka pomutenya omalundilo aSatana nokuyapulifa edina laJehova mokati kovanhu. (Jesaja 43:10-12) Kakele kaasho, ohatu kufa ombinga moukalele, molwaashi otwa shiiva omaukwatya aJehova nosho yo eendjila daye. Otu udite twa ehena popepi naye notu na ehalo linene okulombwela vamwe shi na sha naye. Doshili, ouwa waJehova neendjila daye douyuki ohai tu etele ehafo, nomolwaasho itatu dulu okweefa okupopya kombinga yaye. (Epsalme 145:7-12) Otwe linyengifwa tu mu hambelele notu hepaululile ovo tava pwilikine ‘oilonga yaye yefimano.’—1 Petrus 2:9; Jesaja 43:21.

7. Kakele kohole yokuhola Kalunga, etomheno limwe vali la fimana lilipi hali tu kufifa ombinga moilonga yokuudifa?

⁷ Ope na natango etomheno limwe la fimana olo tali tu ningifa tu twikile okukufa ombinga moukalele: Otwa halelela shili okutwaalela epepelelwo oohandimwe ovo va wililwa po keenghundana dii dihapu nosho yo ovo tava mono oixuna omolwomatomheno onhumba ile ongadi. Kungaha, ohatu kendabala okuhopaenena Jesus. Pashihopaenenwa, tala kwaasho tashi hokololwa muMarkus etukulwa eti-6.

8. Ehokololo laMarkus etukulwa eti-6 otali holola shike kombinga yanghee Jesus kwa li ha kala e uditile ovanhu?

⁸ Eshi ovayapostoli va aluka koshikonga shokuudifa, ova hokololela Jesus aishe oyo va ninga nova honga. Jesus okwa li e wete kutya ovayapostoli ova li va loloka nokwe va lombwela va ye naye va ka “tulumukwe po kanini.” Onghee ova ya mowato, ndele tava i konhele ye likalela. Ovanhu ove va landula, tava tondoka tava kunghula nomunghulofuta nove va hanga diva. Mbela Jesus okwa ninga po shike? Ehokololo otali ti: ‘Okwa mona ko ovanhu vahapu, ndele okwe va udila olukeno, osheshi ova li va fa eedi di he na omufita, ndele okwa hovela oku va longa oinima ihapu.’ (Markus 6:31-34) Olukeno ola li le linyengifa Jesus a twikile okuudifila ovanhu onghundana iwa, nonande okwa li a loloka. Osha yela kutya Jesus okwa li ha kala e uditile ovanhu oukwao wananghali. Okwa li he va yavelele.

9. Oshike hatu lihongo mehokololo olo li li muMarkus etukulwa eti-6 shi na sha nelinyengotomheno la yuka li na sha nokuudifa?

⁹ Oshike hatu lihongo mehokololo olo? Tu li Ovakriste, otu na oshinakuwanifwa shokuudifa onghundana iwa nokuninga ovanhu ovahongwa. Otu udite tu na oshinakuwanifwa shokuudifa onghundana iwa, molwaashi Kalunga okwa hala “ovanhu [vomaludi aeshe] va xupifwe.” (1 Timoteus 2:4, yelekanifa NW.) Ndele ihatu tale ko oukalele wetu u li ashike oshinakuwanifwa, ndele ou li yo oilonga yolukeno. Ngeenge otu uditile ovanhu olukeno ngaashi Jesus a li e va udila, omitima detu otadi ke tu linyengifa tu ninge keshe osho hatu dulu, opo tu twikile oku va udifila onghundana iwa. (Mateus 22:39) Okukala nomalinyengotomheno mawa a tya ngaho shi sha na nokukufa ombinga moukalele, otashi ke tu linyengifa tu udife onghundana iwa nope he na okwoongaonga.

Etumwalaka letu—onghundana iwa yOuhamba waKalunga

10, 11. (a) Jesaja okwa hokolola ngahelipi etumwalaka olo hatu udifa? (b) Ongahelipi Jesus a li a hepaululila ovanhu ondaka iwa, nongahelipi ovapiya vaKalunga kunena hava landula oshihopaenenwa shaJesus?

¹⁰ Ongahelipi shi na sha noshitwa oshitivali shi na sha noukalele wetu—etumwalaka letu? Oshike hatu udifa? Omuprofeti Jesaja okwa hokolola nawa etumwalaka olo hatu udifa, a ti: “Eenghatu daau ha popi eenghundana dehafo, oda wapala ngahelipi keemhunda, daau ta udifile ovanhu ombili, ndee ta hepaululile ovanhu ondaka iwa, daau ta udifa ekulilo, ou ta lombwele Sion, ta ti: Kalunga koye Oye ohamba.”—Jesaja 52:7.

¹¹ Outumbulilo wa fimanenena momushangwa oo kutya “Kalunga koye Oye ohamba,” otau tu dimbulukifa etumwalaka olo tu na okuudifa, onghundana iwa yOuhamba waKalunga. (Markus 13:10) Didilika yo nghee ovelishe oyo tai hokolola enenediladilo lihokwifa letumwalaka letu. Jesaja ota longifa omautumbulilo ngaashi “ekulilo,” “eenghundana dehafo,” “ombili,” nosho yo “ondaka iwa.” Omafelemido konima yefimbo laJesaja, mefelemudo lotete O.P., Jesus Kristus okwa wanifa po exunganeko olo monghedi ikonekwedi mokutula po oshihopaenenwa shouladi shi na sha nokuhepaululila ovanhu ondaka iwa—okuuya kwOuhamba waKalunga. (Lukas 4:43) Kunena, unene tuu okudja mo 1919, Eendombwedi daJehova oda landula oshihopaenenwa shaJesus mokuudifa nouladi onghundana iwa i na sha nOuhamba waKalunga wa dikwa po nosho yo omanangeko noupuna oo Ouhamba tau ka etela ovanhu.

12. Onghundana iwa yOuhamba ohai kumu ngahelipi ovo have i tambula ko?

¹² Onghundana iwa yOuhamba ohai kumu ngahelipi ovo have i tambula ko? Kunena, ngaashi ashike sha li pefimbo laJesus, onghundana iwa ohai yandje eteelelo nehekeleko. (Ovaroma 12:12; 15:4) Ohai pe ovo ve na omitima da yuka eteelelo, molwaashi ohave lihongo kutya ope na omatomheno a kola okwiitavela kutya omafimbo mawa elela oku li komesho. (Mateus 6:9, 10; 2 Petrus 3:13) Eteelelo la tya ngaho ohali kwafele ovatilikalunga va kale ve na omukumo shi na sha nonakwiiwa. Omupsalme okwa ti kutya ovanhu va tya ngaho ‘ihava tila eenghundana dii.’—Epsalme 112:1, 7, OB-1986.

Etumwalaka olo tali “mange ava ve na omutima wa nyanyaulwa”

13. Omuprofeti Jesaja okwa hokolola ngahelipi omanangeko noupuna oo taa monika paife kwaavo tava tambula ko onghundana iwa?

¹³ Natango, onghundana iwa oyo hatu udifa, ohai etele ovo hava pwilikine epepelelwo nosho yo omanangeko noupuna paife. Ngahelipi mbela? Amwe omomanangeko noupuna oo okwa hokololwa komuprofeti Jesaja eshi a xunganeka a ti: “Omhepo yOmwene, [Jehova, NW] oi li kombada yange, osheshi Ye okwa vaeka nge ndi udifile omapongo ondaka yehafo, okwa tuma nge ndi mange ava ve na omutima wa nyanyaulwa, okwiingidila eenghwate emangululo naava [ve li] meemango, eyeuluko leedolongo; okuudifa pombada omudo muwa wOmwene nefiku longhone yaKalunga ketu, okuhekeleka aveshe ava va polimana.”—Jesaja 61:1, 2; Lukas 4:16-21.

14. (a) Outumbulilo ‘okumanga ava ve na omutima wa nyanyaulwa’ otau ulike kushike shi na sha netumwalaka lOuhamba? (b) Ongahelipi hatu hopaenene okunakonasha kwaJehova shi na sha naavo ve na omitima da nyanyaulwa?

¹⁴ Paxunganeko olo, mokuudifa onghundana iwa, Jesus kwa li ta “mange ava ve na omutima wa nyanyaulwa.” Kali fi tuu efaneko lihokwifa olo Jesaja a longifa! Pamboitya limwe li na sha nOmbibeli, oshitya shOshiheberi osho sha tolokwa “mange,” “ohashi longifwa luhapu shi na sha ‘nokumanga’ nelapi, to mangele poshipute omuti, opo u velule oo a ninga oshipute.” Omuhakuli e na ko na sha otashi dulika a mange oshilyo sholutu lomunhu oo a yahamekwa opo shi kale sha yambididwa. Monghedi ya faafana, ngeenge ovaudifi ve na ko na sha tava udifa etumwalaka lOuhamba, otava kwafele aveshe ovo tava pwilikine, ovo tava mono oixuna monghedi yonhumba ile yongadi. Nomokukwafela ovo ve na omhumbwe, otava hopaenene okunakonasha kwaJehova. (Hesekiel 34:15, 16) Omupsalme okwa popya shi na sha naKalunga a ti: “Oha twamifa ava ve nomutima wa tekauka, ndee ta mange oipute yavo tai yahama.”—Epsalme 147:3.

Nghee etumwalaka lOuhamba la lundulula vamwe

15, 16. Oihopaenenwa ilipi tai ulike nghee etumwalaka lOuhamba hali yambidida nokupameka ovo ve na eemhumbwe?

¹⁵ Ope na oihopaenenwa ihapu oyo tai ulike nghee etumwalaka lOuhamba la kwafela shili ovo va li ve na omitima da nyanyaulwa noku va pameka. Tala koshihopaenenwa shaOreanna, omukainhu omunamido muAmerika lokOlukadi, oo a li ina hala vali okukala nomwenyo. Ondombwedi yaJehova imwe oya hovela okukala hai mu talele po noku mu leshela Ombibeli nosho yo oshishangomwa Embo Lyandje lyOmahokololo gOmbimbeli.b Pehovelo, omukainhu oo a li a polimana okwa li ha pwilikine ashike a nangala kombete nomesho a fifikina, ta fuda noudjuu efimbo nefimbo. Ndele konima yokafimbo, okwa ka hovela okuninga eenghendabala a kale ha kala omutumba kombete fimbo ta leshelwa. Konima yefimbo natango, okwa ka kala ha kala omutumba moseti, a teelela omuhongimbibeli waye e uye. Nokonima, omukainhu oo okwa ka hovela okukala ha kala pokwoongala kwopaKriste pOlupale lOuhamba. Molwaashi okwa li a ladipikwa kwaasho a li te lihongo pokwoongala, okwa hovela okukala ha yandje oileshomwa yopaMbibeli kukeshe oo ta ende popepi neumbo laye. Opo nee, okwa ninginifwa e li umwe womEendombwedi daJehova eshi a li e na omido 93. Etumwalaka lOuhamba ola pepaleka ehalo laye lokukala nomwenyo.—Omayeletumbulo 15:30; 16:24.

¹⁶ Etumwalaka lOuhamba ohali yandje ekwafo olo la pumbiwa nokuli nokwaavo ve shii kutya ove li pokufya omolwomikifi. Diladila koshihopaenenwa shaMaria wokuEuropa lokOuninginino. Maria okwa li ta mono oixuna komukifi omudipai noka li vali e na eteelelo lasha. Okwa li a polimana neenghono pefimbo eshi Eendombwedi daJehova de mu shakeneka. Ndele eshi e lihonga kombinga yomalalakano aKalunga, onghalamwenyo yaye oya ka kala i na eityo vali. Okwa ninginifwa nokwa kala e lipyakidila neenghono moilonga yokuudifa. Pefimbo lomido mbali daxuuninwa dokukalamwenyo kwaye, eteelelo nehafo laye oya li i liwetikile koshipala shaye. Okwa fya e na eteelelo la kola menyumuko.—Ovaroma 8:38, 39.

17. (a) Ongahelipi etumwalaka lOuhamba tali etifa omalunduluko mokukalamwenyo kwaavo tave li tambula ko? (b) Omeenghedi dilipi wa mona pauhandimwe kutya Jehova ota ‘nyongamununa ovo va nyongamekwa koufiye’?

¹⁷ Omahokololo a tya ngaho otaa ulike nghee etumwalaka lOuhamba hali dulu okulundulula okukalamwenyo kwaavo va hala oshili yOmbibeli. Oohandimwe ovo va nyika oufiye omolwefyo lovaholike vavo ohava mono eenghono dipe ngeenge ve lihonga shi na sha neteelelo lenyumuko. (1 Ovatessaloniki 4:13) Ovanhu ovo va hepa notava kendabala okupalula omaukwaneumbo avo ohava kala ve wete ve na oshilonga nohava kala ve na omukumo, ngeenge ve lihongo kutya Jehova ite ke va efa nande ngeenge ova kala ovadiinini kuye. (Epsalme 37:28) Omolwekwafo laJehova, vahapu ovo va wililwa po kepolimano ohava mono kanini nakanini eenghono odo da pumbiwa opo ve lididimike, navamwe ohava findi nokuli omukifi oo. (Epsalme 40:2, 3) Doshili, okupitila meenghono odo hadi di mEendjovo daye, kunena, Jehova oha ‘nyongamununa ovo va nyongamekwa koufiye.’ (Epsalme 145:14) Okumona nghee onghundana iwa yOuhamba hai hekeleke ovo ve na omitima da nyanyaulwa moitukulwa yetu nosho yo meongalo lopaKriste, otashi tu dimbulukifa omafimbo nomafimbo kutya otu na onghundana oyo ya denga mbada kunena!—Epsalme 51:19.

“Handi va indilile kuKalunga”

18. Paulus okwa li e udite ngahelipi eshi Ovajuda inava tambula ko onghundana iwa, nomolwashike?

¹⁸ Nonande etumwalaka letu ola kwatela mo onghundana oyo ya denga mbada, vahapu ihave li tambula ko. Osho otashi dulika shi tu kume ngahelipi? Otashi dulika shi tu ningife tu kale tu udite ngaashi omuyapostoli Paulus a li e udite. Okwa li ha udifile luhapu Ovajuda, ndele vahapu vomuvo ova li va anya okutambula ko etumwalaka lexupifo. Naasho okwa li sha udifa nai Paulus neenghono. Okwa dimina a ti: “Ondi noluhodi linene nouyahame alushe momutima wange.” (Ovaroma 9:2) Paulus okwa li a kenukila Ovajuda ovo a udifila. Okwa li she mu nyemateka eshi inava tambula ko onghundana iwa.

19. (a) Omolwashike shi shii okuudiwa ngeenge hatu teka omukumo omafimbo amwe? (b) Oshike sha kwafela Paulus a twikile noilonga yaye yokuudifa?

¹⁹ Nafye ohatu udifa onghundana iwa omolwokuudila ovanhu olukeno. Onghee hano, oshi shii okuudiwa ko ngeenge hatu kala twa teka omukumo omafimbo amwe molwaashi ovanhu itava tambula ko etumwalaka lOuhamba. Omaliudo a tya ngaho otaa ulike kutya otu na ko na sha shili nonghalonawa yaavo hatu udifile. Ndelenee oshiwa okudimbuluka oshihopaenenwa shomuyapostoli Paulus. Oshike sha li she mu kwafela a twikile noilonga yaye yokuudifa? Nonande Paulus okwa li a nyika oluhodi nokwa li a yahama eshi Ovajuda inava tambula ko onghundana iwa, ina sholola okuudifila Ovajuda aveshe, ta diladila ngeno kutya kashi na ekwafo lasha. Okwa li e na elineekelo kutya opa li natango vamwe vomuvo ovo va li tava ka tambula ko Kristus. Onghee hano, shi na sha nomaliudo aye e na sha nOvajuda pauhandimwe, Paulus okwa shanga a ti: “Onda hala nomutima wange, ndele handi va indilile kuKalunga va xupifwe.”—Ovaroma 10:1.

20, 21. (a) Shi na sha noukalele wetu, ongahelipi hatu dulu okushikula oshihopaenena shaPaulus? (b) Oshitwa shilipi shi na sha noukalele wetu tashi ka kundafanwa moshitukulwa tashi landula?

²⁰ Didilika oinima ivali oyo Paulus a divilika. Okwa li e na ehalo lokomutima shi na sha nokuxupifwa kwoohandimwe, nokwa indila kuKalunga shi na sha naasho. Kunena, ohatu shikula oshihopaenenwa shaPaulus. Otu na ehalo lokomutima lokukonga keshe oo tashi dulika e na oikala yokutambula ko onghundana iwa. Ohatu twikile okwiilikana kuJehova tu mone oohandimwe va tya ngaho, opo tu dule oku va kwafela va ende nondjila oyo tai twala kexupifo.—Omayeletumbulo 11:30; Hesekiel 33:11; Johannes 6:44.

²¹ Ndele opo tu lombwele ovanhu vahapu etumwalaka lOuhamba ngaashi tashi dulika, inatu pumbwa ashike okuyandja elitulemo ketomheno kutya omolwashike hatu udifa nosho yo kwaasho hatu udifa, ndele otwa pumbwa yo okuyandja elitulemo kunghee hatu udifa. Osho otashi ka kundafanwa moshitukulwa tashi landula.

[Omashangelo opedu]

Oshike we lihonga?

• Omolwomatomheno elipi hatu kufa ombinga moukalele?

• Etumwalaka la fimanenena lilipi hatu udifa?

• Omanangeko noupuna elipi haa monika kwaavo hava tambula ko etumwalaka lOuhamba?

• Oshike tashi ke tu kwafela tu twikile noukalele wetu?

[Efano pepandja 26]

Eilikano ohali tu kwafele tu lididimike moukalele wetu