Okukala twa hokiwa kuKalunga otashi ke tu pefa omwenyo waalushe

“Omuyuki Ove to mu nangeke noupuna, Omwene, to mu dingilile nohokwe yoye ngaashi oshikelelifo.” — EPS. 5:13.

1, 2. Elia okwa a li a indila omufiyekadi wokuSarfat e mu pe shike, nokwa li e mu pa eshilipaleko lilipi?

POMHITO imwe, omufiyekadi wokuSarfat nomonamati waye nosho yo omuprofeti umwe waKalunga ova li va fya ondjala. Fimbo omufiyekadi oo a li ta tyava oikuni a ka teleke, omuprofeti Elia okwa li e uya kuye ndele te mu indile omeva nomungome. Omukainhu oo okwa li a halelela okupa Elia omeva okunwa, ndele okwa li ashike e na “oufila eshambekela limwe alike moshiyuma nomaadi manini moshanga.” Omufiyekadi oo okwa li a lombwela omuprofeti oo kutya ita dulu nandenande oku mu pa oikulya. — 1 Eeh. 17:8-12.

² Elia okwa twikila okwiindila natango omufiyekadi oo a ti: “Pakele nge po tete okamungome u ka etele nge. Opo nee tamu lipakele po nye nomumati. Osheshi Omwene Kalunga kaIsrael ta ti ngaha: Oufila moshiyuma itau ka pwa mo nomaadi moshanga itaa ka pwa mo.” — 1 Eeh. 17:13, 14.

3. Etokolo la kwata moiti lilipi tu na okuninga?

³ Omufiyekadi oo okwa li e na okuninga etokolo la kwata moiti lihe fi ashike okutokola kutya otava ka tukula naElia oikulya inini oyo a li e na ile hasho. Mbela omukainhu oo ota ka kala ngoo e na elineekelo kutya Jehova ote ke mu xupifa nomonamati waye, ile ota ka pitifa komesho oiniwe yaye ponhele yokukendabala okukala a hokiwa kuJehova nokupanga oukaume naye? Nafye otu na okuninga etokolo la faafana. Mbela ohatu ka ulika ngoo kutya otwa halelela neenghono okukala twa hokiwa kuJehova shi dulife okukonga eameno lopamaliko? Otu na omatomheno a kola okukala twe lineekela muJehova nosho yo oku mu longela. Ope na yo eenghatu odo hatu dulu okukatuka opo tu kale twa hokiwa kuye.

‘Oove wa wana okulongelwa’

4. Omolwashike Jehova a wana okulongelwa kufye?

⁴ Jehova oku na oufemba wokukala a teelela ovanhu ve mu longele monghedi oyo ta hokwa. Ongudu yovapiya vaKalunga vomeulu oya koleka oushili oo eshi ya li tai popi i li omuko umwe, tai ti: “Omwene wetu naKalunga ketu, Ove wa wana okutambula efimano nefimaneko nepangelo, osheshi Ove wa shita oinima aishe, ndele kehalo loye i li po noya shitwa.” (Eh. 4:11) Doshili, Jehova okwa wana okulongelwa kufye molwaashi oye Omushiti wetu.

5. Omolwashike ohole yaKalunga yoku tu hola i na oku tu linyengifa tu mu longele?

⁵ Etomheno limwe molwaashi tu na okulongela Jehova ololo kutya oku tu hole neenghono. Ombibeli oya ti: “Kalunga okwa shita omunhu oshifeka shaye; oshifeka shaye Ye e mu shita: omulumenhu nomukainhu Ye e va shita.” (Gen. 1:27) Kalunga okwa pa ovanhu emanguluko lokuninga omatokolo nosho yo okutokola ngeenge otave ke mu longela ile hasho. Jehova okwa ninga Tate yetu eshi e tu pa omwenyo. (Luk. 3:38) Ngaashi xe omunahole, Jehova okwa ninga keshe shimwe opo a pe ovanamati novanakadona vaye osho va pumbwa opo va dule okuhafela onghalamwenyo. Jehova ‘oha pitifa etango laye noha lokifa odula’ opo edu li tu menifile oikulya ihapu noli kale la wapala. — Mat. 5:45.

6, 7. (a) Adam okwa etela oludalo laye oilanduliko ilipi? (b) Ekuliloyambo laKristus otali ka etela ovanhu ouwa ulipi ovo hava lalakanene okukala va hokiwa kuKalunga?

⁶ Jehova okwe tu mangulula yo koilanduliko youlunde ya kwata moiti. Adam eshi a nyona, okwa ninga ashike ngaashi omundoboli oo hava ke po oimaliwa yoilyo youkwaneumbo waye opo a ka te omashina. Eshi Adam a tukulila Jehova oshibofa, okwa imba oludalo laye li kale la hafa fiyo alushe. Oikala yaye yokuliholamwene oya ningifa ovanhu va ye moupika wokuhawanenena. Nomolwaasho, ovanhu aveshe ohava vele, hava nyika oluhodi nohauxuuninwa ohava fi. Opo omupika a mangululwe moupika, ohapa yandjwa oikulila yonhumba. Onghee hano, Jehova okwa yandja oikulila opo e tu mangulule moupika woulunde nefyo. (Lesha Ovaroma 5:21.) Jesus Kristus okwa li a katuka metwokumwe nehalo laXe eshi a yandja “omwenyo waye u ninge oikulila yavahapu.” (Mat. 20:28) Mafiku ovanhu ovo va hokiwa kuKalunga otava ka mona omauwa ekuliloyambo pauyadi.

⁷ Omushiti wetu, Jehova, okwe tu ningila ouwa muhapu e dule omunhu keshe opo tu dule okukala tu na onghalamwenyo ihafifa noi na eityo. Ngeenge otwa hokiwa kuKalunga, ohatu ka dula okumona nghee ta ka xulifa po okumona oixuna akushe oko kwa kala taku hepeke ovanhu. Jehova ota ka twikila oku tu ulikila pauhandimwe kutya oha pe ‘ondjabi ovo tave mu kongo.’ — Heb. 11:6.

‘Oshiwana shoye oshe lilongekida nehalo liwa’

8. Oshimoniwa shaJesaja otashi tu hongo shike shi na sha nokulongela Kalunga?

⁸ Opo tu kale twa hokiwa kuKalunga otu na okukala hatu longifa nawa emanguluko letu lokuninga omatokolo. Osho osho shi li ngaho, molwaashi Jehova ihe tu kondjifa tu mu longele. Pefimbo laJesaja, Kalunga okwa li a pula a ti: “Olyelye handi mu tumu? Nolyelye te tu ile ko?” Jehova okwa li a ulika kutya okwa fimaneka omuprofeti Jesaja eshi e mu efa a ninge etokolo kuye mwene. Diladila shi na sha nanghee Jesaja a li e udite eshi a nyamukula nehafo a ti: “Aame ou, tume nge!” — Jes. 6:8.

9, 10. (a) Otu na okulongela Kalunga noikala ya tya ngahelipi? (b) Omolwashike tu na okulongela Jehova nomwenyo wetu aushe?

⁹ Ovanhu ove na emanguluko lokuhoolola kutya otava longele Kalunga ile hasho. Jehova okwa hala tu mu longele nehalo liwa. (Lesha Josua 24:15.) Iha hokwa ovo tave mu longele nomunyengutima; noina hokwa ovo ve mu liyapulila ndele paulelalela ova hala ashike okuwapalela ovanhu vakwao. (Kol. 3:22) Kalunga ita ka kala e tu hokwa ngeenge ohatu ‘ongaonga’ oku mu longela oilonga iyapuki molwaashi twa efa oinima younyuni i ye moshipala elongelokalunga letu. (Ex. 22:29) Jehova oku shii kutya ohatu ka mona ouwa ngeenge otwe mu longele nomwenyo wetu aushe. Moses okwa li a kumaida Ovaisrael va hoolole omwenyo mokukala ve ‘hole Omwene Kalunga kavo nokupwilikina ondaka yaye nokukanyatela kuye.’ — Deut. 30:19, 20.

¹⁰ Ohamba David yomuIsrael shonale oya tanga Jehova ya ti: “Oshiwana shoye oshe lilongekidila nehalo liwa unene mefiku lehomono loye: momidjalowapeko diyapuki ovanyasha voye tave iluka ngaashi omume mekolo leluwa.” (Eps. 110:3) Ovanhu vahapu kunena ohava kongo eameno moinima yopamaliko nohava pitifa komesho omalihafifo. Ndele ovo ve hole Jehova ohava pitifa komesho oilonga iyapuki. Ouladi wavo wokuudifa onghundana iwa oo hau ulike kutya oshike va pitifa komesho monghalamwenyo yavo. Ove lineekela filufilu kutya Jehova ote ke va wanifila po eemhumbwe davo dakeshe efiku. — Mat. 6:33, 34.

Omayambo oo Kalunga ta hokwa

11. Ouwa ulipi Ovaisrael va li hava mono ngeenge ova yambele Jehova omayambo?

¹¹ Koshi yehangano lOmhango, oshiwana shaKalunga osha li shi na okuyamba omayambo oo taa wapalele opo shi kale sha hokiwa kuJehova. Leviticus 19:5 ota ti: “Ngenge tamu tomene Omwene epanduloyambo, nye mu noku li yamba ngaha, mu shiive oku mu wapalela.” Membo laLeviticus omwa popiwa yo taku ti: “Ngenge tamu etele Omwene ehambeleloyambo, nye mu noku li yamba ngaha mu wapalele Omwene.” (Lev. 22:29) Ngeenge Omuisrael a li ta yambe koaltari eyambo loshinamwenyo olo Jehova a hokwa, omwifi oo wa li hau di ko Kalunga kashili okwa li he u tale ko wa fa “edimba liwa.” (Lev. 1:9, 13) Kalunga okwa li ha kala a tunhukwa nokwa pepelelwa ngeenge oshiwana shaye sha li tashi mu ulikile kutya oshi mu hole. (Gen. 8:21) MOmhango oyo omu na efinamhango olo tali longo yo nokunena. Jehova oha hokwa ovo have mu yambele omayambo oo ta hokwa. Mbela omayambo elipi Jehova ha tambula ko? Natu ka konakoneni eembinga mbali domokukalamwenyo kwetu: okupopya nosho yo elihumbato letu.

12. Elihumbato lilipi tali ka ningifa ‘omayambo omalutu etu’ aha kale a hokiwa kuJehova?

¹² Omuyapostoli Paulus okwa popya monhumwafo oyo a li a shangela Ovaroma a ti: ‘Yandjeni omalutu eni eyambo liyapuki li nomwenyo, la wapalela Kalunga, [noku mu longela oilonga iyapuki neenghono deni dokudiladila, NW].’ (Rom. 12:1) Opo omunhu a kale a hokiwa kuKalunga, olutu laye oli na okukala tali wapalele Kalunga. Ngeenge omunhu okwe linyateke mokushila omakaya, epangwe, oingangamwifi ile mokunwa omalodu sha pitilila, kungaho, eyambo laye itali ka kala li na ongushu. (2 Kor. 7:1) Shimwe vali, molwaashi “omuhaeli ota nyono kolutu laye mwene,” elihumbato laye inali koshoka otali ka ningifa omayambo aye a kale inaa hokiwa kuJehova. (1 Kor. 6:18) Onghee hano, opo omunhu a kale a hokiwa kuKalunga, oku na ‘okuninga omuyapuki mokukala kwaye akushe.’ — 1 Pet. 1:14-16.

13. Omolwashike sha wapala okutanga Jehova?

¹³ Eyambo limwe olo Jehova a hokwa olo okupopya kwetu. Ovo ve hole Jehova ohave mu popile alushe mouwa kutya nee omoipafi ile ongeenge ve li momaumbo avo. (Lesha Epsalme 34:2-4.) Lesha Epsalme 148-150, nokudidilika kutya oikando ingapi omapsalme oo atatu e tu ladipika tu tange Jehova. Doshili, “oshe mu wapalela, ovakoshoki nye, mu mu imbile ehambelelo.” (Eps. 33:1) Omuhopaenenwa wetu, Jesus Kristus, naye okwa divilika efimano lokutanga Jehova okupitila moilonga yokuudifa onghundana iwa. — Luk. 4:18, 43, 44.

14, 15. Hosea okwa li a ladipika Ovaisrael va yandje omayambo oludi lilipi, naJehova okwa li e linyenga ngahelipi kuo?

¹⁴ Okuudifa nouladi ohaku yandje oumbangi kutya otu hole Jehova nosho yo kutya otwa hala okukala twa hokiwa kuye. Pashihopaenenwa, diladila kunghee omuprofeti Hosea a li a kumaida Ovaisrael ovo va li va ya melongelokalunga loipupulu nokava li vali va hokiwa kuKalunga. (Hos. 13:1-3) Hosea okwa li e va lombwela va indile tava ti: “[Jehova] dima po omatimba aeshe. Tu tambulila mefilonghenda loye, opo nee hatu ke ku yambela eyambo [leemhedi dinyasha domilungu detu, NW].” — Hos. 14:2, 3.

¹⁵ Ongobe yomhedi oyo oshinamwenyo shi na ondilo neenghono osho Ovaisrael va li tava dulu okuyambela Jehova. Onghee hano, “eyambo leemhedi dinyasha domilungu detu” otali ulike kokutanga Kalunga kashili neendjovo di li paushili noda diladilwa nawa. Mbela Jehova okwa li e linyenga ngahelipi komayambo a tya ngaho? Okwa ti: “Okehalo lange mwene ondi mu hole.” (Hos. 14:5) Jehova oha dimine po ovo hava yambe omahambeleloyambo a tya ngaho, oha kala yo e va hokwa noha pange oukaume navo.

16, 17. Ngeenge eitavelo lokwiitavela muJehova ole linyengifa omunhu a hovele okuudifa onghundana iwa, Jehova oha tale ko ngahelipi omahambeleloyambo aye?

¹⁶ Okutanga Jehova moipafi okwa kala ku li oshitukulwa sha fimanenena shelongelokalunga lashili. Omupsalme umwe okwa li a lenga neenghono okutanga Kalunga kashili, nomolwaasho a li a indila Kalunga a ti: “Omayambo e he nafindilo omokanya kange, nae ku wapalele, Omwene.” (Eps. 119:108) Ndele mbela ongahelipi shi na sha nokunena? Jesaja okwa xunganeka shi na sha nongudu inene yovanhu vopefimbo letu a ti: ‘Otava hepaulula nehafo oilonga yOmwene yetumbalo. Omayambo avo a wapala otaa londo koaltari’ yaKalunga kange. (Jes. 60:6, 7) Exunganeko olo otali wanifwa kunena eshi ovanhu omamiliyona hava yambele Kalunga “omahambeleloyambo nokutya, oshiimati shomilungu edi tadi pandula edina laye.” — Heb. 13:15.

¹⁷ Ndele mbela ongahelipi shi na sha naave? Oho yambele ngoo Kalunga omayambo oo ta hokwa? Ngeenge hasho, mbela ito dulu okuninga po omalunduluko oo a pumbiwa opo u hovele okutanga Jehova moipafi? Ngeenge eitavelo loye ole ku linyengifa u hovele okuudifa onghundana iwa, eyambo loye ‘otali ka pandika kOmwene, li dule eemhedi.’ (Lesha Epsalme 69:31, 32.) Kala wa shilipalekwa kutya Jehova ota ka uda “edimba liwa” lomahambeleloyambo oye nota ka kala e ku hokwa. (Hes. 20:41) Osho otashi ke ku etela ehafo linene.

‘Jehova oha nangeke noupuna ovayuki’

18, 19. (a) Ovanhu vahapu kunena ove na etaleko lilipi li na sha nokulongela Kalunga? (b) Okukala inatu hokiwa kuJehova otaku ka eta oilanduliko ilipi?

¹⁸ Kunena, ovanhu vahapu ohava fiki pexulifodiladilo la faafana naalo lovanhu vamwe vopefimbo laMalakia, ovo va ti: “Okulongela Kalunga itaku kwafa sha, notwa mona shike mokudiinina kwetu onghedimhango yaye?” (Mal. 3:14) Molwaashi ovanhu va tya ngaho ova pitifa komesho ohole yokuhola omaliko, ohava diladila kutya elalakano laKalunga itali ka wanifwa nosho yo kutya eemhango daye kadi na vali ongushu. Ohava tomhafana yo kutya okuudifa onghundana iwa ehepifo ashike lefimbo noku li oshinima shikenyeneka.

¹⁹ Oikala ya tya ngaho oya hovela moshikunino shaEden, omo Satana a li a ningifa Eva aha kale vali a lenga onghalamwenyo itunhula oyo Jehova e mu pa noka li vali a hokiwa kuYe. Kunena, Satana oha kendabala okuheka ovanhu va itavele kutya ngeenge ova kala tava longo ehalo laKalunga itava ka mona ouwa washa. Ashike Eva nomushamane waye ova ka didilika kutya okukala inava hokiwa vali kuJehova otashi ka tya efyo kuvo. Ovanhu aveshe ovo tava landula oshihopaenenwa shavo shii navo mafiku otave ke shi didilika mo kutya otava ka mona oilanduliko ya faafana. — Gen. 3:1-7, 17-19.

20, 21. (a) Omufiyekadi wokuSarfat okwa li a ninga po shike, nokwa li a mona oidjemo ilipi? (b) Ongahelipi nomolwashike tu na okuhopaenena omufiyekadi wokuSarfat?

²⁰ Diladila keyooloko olo li li pokati koilanduliko ii oyo Adam naEva va li va mona noshidjemo osho Elia nosho yo omufiyekadi wokuSarfat ovo va hokololwa metetekelo va li va mona. Eshi omufiyekadi oo a li a uda eendjovo daElia tadi tu omukumo, okwa li a telekela tete omuprofeti oo omungome. Opo nee Jehova okwa li a wanifa po eudaneko laye olo a li a udaneka okupitila muElia. Ombibeli oya ti: “[Okwa] lya, ovo naye neumbo laye omafiku mahapu. Oufila moshiyuma inau pwa mo, nomaadi moshanga inaa pwa mo, opandjovo yOmwene, [e] i lombwela Elia.” — 1 Eeh. 17:15, 16.

²¹ Mokati kovanhu omabiliyona ovo ve li ko kunena, omu na ashike ovanhu vanini ovo ve na ehalo lokuninga oshinima osho sha li sha ningwa komufiyekadi wokuSarfat. Omukainhu oo okwa li e lineekela filufilu muKalunga kexupifo, naKalunga okwa li e mu kwafela. Ehokololo olo nosho yo omahokololo amwe Ombibeli otaa koleke oushili oo kutya Jehova oku shii okulineekelwa. (Lesha Josua 21:43-45; 23:14.) Onghalamwenyo yEendombwedi daJehova dokunena otai yandje oumbangi wa wedwa po kutya Jehova ke na efiku a efe po ovo a hokwa. — Eps. 34:7, 8, 18-20.a

22. Omolwashike tu na okuninga eenghendabala nopehe na okwoongaonga tu kale twa hokiwa kuKalunga?

²² Efiku laKalunga letokolo mafiku “otali hange aveshe hava kala kombada yedu alishe.” (Luk. 21:34, 35) Kape na oo ta dulu oku li henuka. Ouwa oo hau di moinima yopamaliko itau dulu nande okuyelekanifwa naasho tashi ka popiwa kOmutokoli oo a nangekwa po kuKalunga eshi ta ka tya: “Onye ovanangekwa noupuna vaTate, ileni, mu ka fyuulule ouhamba ou mwe u longekidilwa.” (Mat. 25:34) Doshili, Jehova ‘omuyuki ote ke mu nangeka noupuna, note mu dingilile nohokwe yaye ngaashi oshikelelifo.’ (Eps. 5:13) Ngeenge osho ngaho, mbela katu na okuninga eenghendabala opo tu kale twa hokiwa kuKalunga?

[Eshangelo lopedu]

Oto dimbuluka?

• Omolwashike Jehova a wana okulongelwa kufye tashi di komutima?

• Jehova oha hokwa omayambo elipi kunena?

• Outumbulilo “eyambo leemhedi dinyasha domilungu detu” otau ulike kushike, nomolwashike tu na okuyambela Jehova omayambo a tya ngaho?

• Omolwashike tu na okuninga eenghendabala opo tu kale twa hokiwa kuJehova?

[Efano pepandja 19]

Omuprofeti waKalunga okwa li a pula omudalakadi omukwanaluhepo a ninge etokolo la fimana lilipi?

[Efano pepandja 21]

Ouwa ulipi hatu mono ngeenge hatu yambele Jehova omahambeleloyambo?

[Efano pepandja 23]

Ngeenge owa kala we lineekela shili muJehova otashi ke ku etelela alushe ouwa