Natu amene omufika wetu wopaKriste

“Onye eendombwedi dange, Omwene ta ti.”—JESAJA 43:10.

1. Ovanhu voludi lilipi Jehova ha nanene kuye?

NGEENGE u li pOlupale lOuhamba, didilika nawa ovo hava kala po. Oolyelye ho mono po ponhele oyo yokulongela Kalunga? Otashi dulika u mone ovanyasha ovaladi ovo tava pwilikine nawa kounongo wopamishangwa. (Epsalme 148:12, 13) Osha yela kutya oto ka mona yo omitwe domaukwaneumbo tadi kendabala okuhafifa Kalunga nonande odi li mounyuni ou tau xutula onghalamwenyo youkwaneumbo. Otashi dulika u mone ovanamido ovaholike ovo tava diinine okukala metwokumwe neliyandjo lavo kuJehova nonande ope na omikifi odo hadi etwa koukulupe. (Omayeletumbulo 16:31) Aveshe ove hole Jehova neenghono. Nokwa hafa eshi e na ekwatafano navo. Omona waKalunga okwe shi koleka a ti: “Kape na ou ta dulu okuuya kuame okuninga Tate, ou a tuma nge, te mu shili.”—Johannes 6:37, 44, 65.

2, 3. Omolwashike tashi dulu okukala eshongo okudiinina omufika wetu wopaKriste?

² Mbela inatu hafa okukala oshitukulwa shoshiwana osho sha hokiwa kuJehova nokwe shi nangeka noupuna? Ndele okudiinina omufika wetu tu li Ovakriste ‘momafimbo aa madjuu,’ oshi li eshongo. (2 Timoteus 3:1) Osho oshoshili unene tuu kovanyasha ovo tava tekulwa momaukwaneumbo opaKriste. Omunyasha umwe okwa dimina a ti: “Nonande onda kala handi i kokwoongala kwopaKriste, inandi kala nomalalakano opamhepo okondadalunde nokanda li nda kulika ehalo lokomutima lokulongela Jehova.”

³ Nonande vamwe ove na ehalo tali di komutima lokulongela Jehova, otashi dulika va piyaanekwe komafininiko manene oomakula, komanwefemo ounyuni nosho yo keamo loulunde. Ngeenge hatu fininikwa, otashi dulika shi tu ningife tu kanife kanini nakanini omufika wetu wopaKriste. Pashihopaenenwa, vahapu mounyuni kunena ohava tale ko omifikamhango dopaenghedi dOmbibeli di li donghuluyonale ile di he fi doshili mounyuni wetu woshinanena. (1 Petrus 4:4) Vamwe ove udite kutya inashi fimanenena okulongela Kalunga monghedi oyo a tula po. (Johannes 4:24) Monhumwafo yaye kOvaefeso, Paulus okwa popya kutya ounyuni ou na ‘omhepo’ ile oikala oyo tai u didilikifa. (Ovaefeso 2:2) Omhepo ya tya ngaho otai fininike ovanhu va twe kumwe nokudiladila kwoulikumwe wovanhu ovo inava shiiva Jehova.

4. Jesus okwa divilika ngahelipi omhumbwe yokwaamena omufika wetu we likalekelwa tu li Ovakriste?

⁴ Ndelenee tu li ovapiya vaJehova ve liyapula, otwa dimina kutya otashi ka kala sha nyika oshiponga kukeshe umwe womufye—kutya nee omunyasha ile omukulunhu—okukanifa omufika wetu wopaKriste. Okukala tu na etaleko lopandjele shi na sha nomufika wetu wopaKriste otaku dulu ashike okukala kwe likolelela komifikamhango daJehova nosho yo kwaasho a teelela kufye. Osho osha yuka, molwaashi otwa shitwa oshifeka shaye. (Genesis 1:26; Mika 6:8) Ombibeli otai faafanifa omufika wetu wopaKriste we likalekelwa noshikutu, osho hashi djalwa opo shi monike kwaaveshe. Jesus okwa londwela shi na sha nefimbo letu, a ti: “Tala, Ame ohandi uya ngaashi omulunga. Omunelao [oyoo] ha kala oupafi noha diinine oikutu yaye, a ha ende hamuhele, ohoni yaye i ha monike.”a (Ehololo 16:15) Inatu hala okweekelashi omaukwatya nomifikamhango detu dopaKriste di na sha nelihumbato nokweefa ounyuni waSatana u tu vyule. Ngeenge osho osha ningwa, ohatu ka kanifa “oikutu” oyo. Nonghalo ya tya ngaho otai ka kala i nyemateka noififa ohoni.

5, 6. Omolwashike okukala twa pama pamhepo kwa fimanenena?

⁵ Okukala tu uditile etumba neenghono omufika wetu wopaKriste otaku dulu okunwefa mo neenghono onghedi yetu yokukalamwenyo. Omolwashike mbela? Ngeenge omulongeli waJehova okwa dimbwa omufika waye we likalekelwa, otashi dulika a piyaanekwe, sha hala okutya, ita ka kala nomalalakano okondadalunde. Ombibeli otai londwele lwoikando shi na sha nokukala nomitima mbali. Omuhongwa Jakob okwa londwela a ti: “Ou ta limbililwa, a fa ekufikufi tali twalwaatwalwa notali telaanifwa komhepo. Omunhu a tya ngaha ina diladila kutya, ota pewa sha kOmwene, omulumenhu womitima mbali nomutengauki meendjila daye adishe.”—Jakob 1:6-8; Ovaefeso 4:14; Ovaheberi 13:9.

⁶ Ongahelipi hatu dulu okwaamena omufika wetu wopaKriste? Oshike tashi dulu oku tu kwafela tu kale twa lenga oufembanghenda wetu munene wokukala ovalongeli vOmukombadambada? Konakona oitwa tai landula.

Pameka omufika woye wopaKriste

7. Omolwashike shi na ouwa okwiilikana Jehova e tu konakone?

⁷ Twikila okupameka ekwatafano loye naJehova. Emona li na ondilo inene olo Omukriste e na olo ekwatafano laye naKalunga. (Epsalme 25:14; Omayeletumbulo 3:32) Ngeenge otwa hovele okukala tu na omalimbililo shi na sha nomufika wetu wopaKriste, natu konakoneni nawa oukwatya nonghalo yekwatafano letu naKalunga. Osha yeleka eshi omupsalme a ilikana a ti: “Omwene, yeleke nge, u konakone nge, shipulula eefiyo dange nomutima wange.” (Epsalme 26:2) Omolwashike ekonakono la tya ngaho la fimanenena? Omolwaashi fye itatu dulu okukala ovakonakoni ve shii okulineekelwa vomalinyengotomheno etu omoule nosho yo eamo letu lomutima. OJehova ashike ta dulu okuuda ko ounhu wetu womeni—omalinyengotomheno etu, omadiladilo nosho yo omaliudo etu.—Jeremia 17:9, 10.

8. (a) Ongahelipi okuyelekwa kuJehova taku dulu oku tu etela ouwa? (b) Owa kwafelwa ngahelipi u ninge exumokomesho u li Omukriste?

⁸ Mokupula Jehova e tu konakone, ohatu mu pula e tu yeleke. Otashi dulika a efe eenghalo donhumba di holoke po odo tadi holola omalinyengotomheno etu ashili nosho yo onghalo yomitima detu. (Ovaheberi 4:12, 13; Jakob 1:22-25) Otu na okutambula ko omayeleko oo molwaashi otae tu pe omhito tu ulike kutya oudiinini wetu kuJehova ou fike peni. Osho otashi dulu okuulika ngeenge otwa ‘wana tu he na oshipo, notu he na eshi twa pumbwa.’ (Jakob 1:2-4) Ofimbo hatu yelekwa, ohatu dulu okukula pamhepo.—Ovaefeso 4:22-24.

9. Mbela okulishilipaleka shi na sha noshili yOmbibeli oku li ehoololo lomunhu ye mwene? Shi yelifa.

⁹ Konakona opo u dule okwiitavela oshili yOmbibeli. Omufika wetu wopaKriste tu li ovapiya vaJehova otau dulu okunghundipala ngeenge inau likolelela filufilu keshiivo lOmishangwa. (Ovafilippi 1:9, 10) Omukriste keshe—kutya nee omunyasha ile omukulunhu—okwa pumbwa okushilipaleka ye mwene kutya osho a itavela oshi li lela oshili yOmbibeli. Paulus okwa ladipika ovaitaveli vakwao a ti: “Konakoneni aishe, nye mu diinine eshi shiwa.” (1 Ovatessaloniki 5:21) Ovanyasha Ovakriste ovo ve li momaukwaneumbo ovatilikalunga ove na okukala ve shi shii kutya itava dulu okukala Ovakriste vashili molwaashi ashike olo eitavelo lovadali vavo. Salomo okwa ladipikwa kuxe David, a ti: ‘Kalunga kooxo, kala u mu shii, noku mu longela nomutima aushe.’ (1 Omafimbo 28:9) Kasha li sha wana komunyasha Salomo okutala nghee xe a kulika eitavelo muJehova. Okwa li e na okushiiva Jehova kuye mwene, nosho a ninga. Okwa ilikana Kalunga a mana mo, a ti: “Pe nge hano paife ounongo nomayele opo ndi dule okufikama nokwaaluka komesho yoshiwana eshi.”—2 Omafimbo 1:10.

10. Omolwashike inashi puka okupula omapulo taa di komutima tu na omalinyengotomheno a yuka?

¹⁰ Eitavelo la kola ole likolelela keshiivo. Paulus okwa ti: “Eitavelo ohali di mokuuda.” (Ovaroma 10:17) Mbela okwa li a hala okutya shike eshi a ti ngaho? Okwa li a hala okutya okulipalula nEendjovo daKalunga, ohatu pameke eitavelo letu nelineekelo letu muJehova, momaudaneko aye nosho yo mehangano laye. Okupula omapulo taa di komutima kombinga yOmbibeli, otaku dulu okumonifa omunhu omanyamukulo taa shilipaleke. Natango, mOvaroma 12:2 ohatu hange mo omayele aPaulus taa ti: ‘Shiiveni okukonakona ehalo laKalunga, naashi shiwa, sha wapalela nosha wana.’ Ndele mbela osho ohatu dulu oku shi pondola ngahelipi? Omokumona ‘eshiivo loshili.’ (Titus 1:1) Omhepo yaJehova otai dulu oku tu kwafela tu ude ko nokuli noinima oyo idjuu. (1 Ovakorinto 2:11, 12) Otu na okwiilikana Kalunga e tu kwafele ngeenge tu na oupyakadi okuuda ko oshinima shonhumba. (Epsalme 119:10, 11, 27) Jehova okwa hala tu ude ko Eendjovo daye, tu di itavele notu dulike kudo. Oha tambula ko omapulo taa di komutima oo a pulwa nelinyengotomheno la yuka.

Kala wa tokola toko okuhafifa Kalunga

11. (a) Ehalo lopaushitwe lilipi tali dulu oku tu yula? (b) Ongahelipi hatu dulu okukala tu na ouladi okukondjifa omafininiko oomakula?

¹¹ Lalakanena okuhafifa Kalunga, ndele havanhu. Oshi li paushitwe okukala twa hala okukala twa talika ko tu li oshitukulwa shongudu yonhumba. Keshe umwe okwa pumbwa ookaume, nokukala twa tambulwa ko ohashi tu hafifa. Pefimbo lounyasha nosho yo moukulunhu—omafininiko oomakula otaa dulu okukala e na eenghono, taa etifa ehalo linene lokuhopaenena vamwe ile oku va hafifa. Ndele ookaume noomakula ihava kala alushe ve na ko na sha nouwa wetu. Omafimbo amwe ova hala ashike vamwe ve limbwange mumwe navo mokulonga osho sha puka. (Omayeletumbulo 1:11-19) Ngeenge Omukriste te liyandje komafininiko mai oomakula, luhapu oha kendabala okuhaholola omufika waye. (Epsalme 26:4) Omuyapostoli Paulus okwa londwela a ti: “Inamu hopaenena elihumbato lounyuni oo we mu dingilila.” (Ovaroma 12:2, The Jerusalem Bible) Jehova oha yandje eenghono dokomutima odo twa pumbwa opo tu kondjife enwefemo lavamwe.—Ovaheberi 13:6.

12. Efinamhango noshihopaenenwa shilipi tashi dulu oku tu pameka ngeenge elineekelo letu muKalunga tali yelekwa?

¹² Ngeenge omafininiko oo taa di kuvamwe tae tu fininike tu nyone po omufika wetu wopaKriste, oshiwa okudimbuluka kutya oudiinini wetu kuKalunga owa fimana neenghono u dule etaleko lovanhu ile oikala yavahapu. Eendjovo daExodus 23:2 odi li efinamhango tali amene, odo tadi ti: “Ino shikula ouhapu weemhunga u longe owii.” Eshi Ovaisrael vakwao vahapu va li va limbililwa okudula kwaJehova okuwanifa po omaudaneko aye, Kaleb okwa anya filufilu okutwa kumwe navo. Okwa li e na oushili kutya omaudaneko aKalunga oku shii okulineekelwa, nokwa li a nangekwa noupuna munene omolwonghatu yaye. (Numeri 13:30; Josua 14:6-11) Mbela naave ou na ehalo okukondjifa omafininiko omadiladilo avahapu opo u amene ekwatafano loye naKalunga?

13. Omolwashike shi li onghatu yopandunge okushiivifa omufika wetu tu li Ovakriste?

¹³ Shiivifa omufika woye wopaKriste. Epopyo olo kutya okuliamena kwa denga mbada oko okukatuka onghatu tete, otali ti sha ngeenge tashi uya pokupopila omufika wetu wopaKriste. Eshi Ovaisrael ovadiinini va li va taalelwa komapataneko omolweenghendabala davo dokulonga ehalo laJehova pefimbo laEsra, ova ti: “Fye ovapiya vaKalunga komeulu nokopedu.” (Esra 5:11) Ngeenge ohatu lipula nomalinyengo nosho yo omakembaulo ovatondi, ohatu dulu okufindwa koumbada. Oikala yokukala twa hala okuwapalela keshe umwe otai ka nyona po okupondola kwetu. Onghee hano, ino tilifwa. Oshiwa alushe okushiivifila vamwe nawa kutya ove ou li umwe womEendombwedi daJehova. Oto dulu okuyelifila vamwe omifikamhango doye, osho wa itavela nosho yo omufika woye u li Omukriste, monghedi yefimaneko ndele owa kwata moiti. Shiivifila vamwe kutya owa tokola toko okudiinina omifikamhango daJehova dopombada di na sha noukoshoki wopaenghedi. Yelifa kutya ito dulu okweefa po oudiinini woye wopaKriste. Ulika kutya ou uditile etumba omifikamhango doye dopaenghedi. (Epsalme 64:10) Okukala wa yooloka ko u li Omukriste omudiinini otaku dulu oku ku pameka, oku ku amena notaku ke linyengifa nokuli vamwe va pule kombinga yaJehova nosho yo oshiwana shaye.

14. Mbela omasheko nomapataneko oku na oku tu teya omukumo? Shi yelifa.

¹⁴ Heeno, vamwe otashi dulika ve ku sheke ile ve ku pataneke. (Judas 18) Ngeenge vamwe itave linyenge nawa keenghendabala doye doku va yelifila omifikamhango doye, ino teka omukumo. (Hesekiel 3:7, 8) Kashi na nee mbudi kutya owa tokola toko shi fike peni, ito ka itavelifa nande ovanhu ovo inava hala okwiitavelifwa. Dimbuluka Farao. Kapa li ehandukilo ile oshikumwifilonga—nokuli nefyo loshiveli shaye—ya dula oku mu tomha kutya Moses okwa li ta popile ko Jehova. Onghee hano, ino efa u kwatwe koumbada wokutila ovanhu. Elineekelo nosho yo eitavelo muKalunga otai dulu oku tu kwafela tu finde oumbada.—Omayeletumbulo 3:5, 6; 29:25.

Lihonga koinima ya pita, tunga onakwiiwa

15, 16. (a) Efyuululo letu lopamhepo oshike? (b) Ongahelipi hatu dulu okumona ouwa mokudilonga kefyuululo letu lopamhepo hatu longifa Eendjovo daKalunga?

¹⁵ Kala wa lenga efyuululo loye lopamhepo. Mokulongifa Eendjovo daKalunga, Ovakriste otava ka mona ouwa mokudilonga kefyuululo lavo linene lopamhepo. Efyuululo olo ola kwatela mo oshili yEendjovo daJehova, eteelelo lomwenyo waalushe nosho yo oufembanghenda woku mu kalela po tu li ovaudifi vonghundana iwa. Mbela ou wete onghandangala oyo to dana mokati kEendombwedi daye, mongudu yovanhu ovo ve likalekelwa nova pewa oshilonga shokuxupifa eemwenyo shokuudifa Ouhamba? Dimbuluka kutya, Jehova oye a koleka a ti: “Onye eendombwedi dange.”—Jesaja 43:10.

¹⁶ Oto dulu okulipula omapulo ngaashi aa: ‘Mbela efyuululo lopamhepo olo ola fimana shi fike peni kwaame? Mbela onde li tala ko la fimana nomolwaasho onda ninga okulonga ehalo laKalunga oshilalakanenwa shotete monghalamwenyo yange? Mbela ondi na ngoo olupandu linene la wana okupameka nge ndi kondjife eyeleko keshe olo tali dulu okukanififa nge efyuululo olo?’ Efyuululo letu lopamhepo otali dulu yo oku tu ningifa tu kale tu udite lela tu na eameno lopamhepo olo tali dulu ashike okuhafelwa mehangano laJehova. (Epsalme 91:1, 2) Okweendulula oiningwanima ikonekwedi yondjokonona yokunena i na sha nehangano laJehova, otaku dulu oku tu pameka kutya kape na omunhu ile oshinima tashi dulu okuhanauna po oshiwana shaJehova kombada yedu.—Jesaja 54:17; Jeremia 1:19.

17. Kakele kokulineekela efyuululo letu lopamhepo, oshike vali twa pumbwa?

¹⁷ Doshili, itatu dulu okukala ashike twe likolelela kefyuululo letu lopamhepo. Keshe umwe womufye oku na okukulika ekwatafano lopofingo naKalunga. Konima eshi Paulus a longa noudiinini mokutunga eitavelo lOvakriste muFilippi, okwe va shangela a ti: “Onghee hano ovaholike vange, ngaashi mwa kala hamu dulika alushe, longeni shili nokutila nokukakama mu xupifwe, hasheshi ndi li mokati keni ashike, ndelenee unene paife, eshi ndi he po punye.” (Ovafilippi 2:12) Itatu dulu okulineekela momunhu umwe e lili omolwexupifo.

18. Ongahelipi omalipyakidilo opaKriste taa dulu okupameka omufika wetu wopaKriste?

¹⁸ Kufa ombinga pauyadi momalipyakidilo opaKriste. Osha didilikwa mo kutya “oilonga ohai nwefwa mo oukwatya womunhu.” Ovakriste kunena ova pewa oshilonga sha fimanenena shokuudifa onghundana iwa yOuhamba waKalunga wa dikwa po. Paulus okwa ti: “Ngaashi aame omuyapostoli wovapaani, handi fimaneke oshilonga shange.” (Ovaroma 11:13) Oilonga yetu yokuudifa otai tu yoolola ko kounyuni, nokukufa ombinga muyo otaku pameke omufika wetu wopaKriste. Okukufa ombinga pauyadi momalipyakidilo makwao opauteokratika, ngaashi okwoongala kwopaKriste, oprograma yokutunga eenhele delongelokalunga, okukendabala okukwafela ovo ve na omhumbwe nosho yo ikwao, otaku dulu okupameka omufika wetu wopaKriste.—Ovagalati 6:9, 10; Ovaheberi 10:23, 24.

Omufika wetu wopaKriste we likalekelwa ohau eta omanangeko noupuna ashili

19, 20. (a) Omauwa elipi wa hafela pauhandimwe omolwokukala Omukriste? (b) Oshike tashi tu pe ekanghameno lomufika wetu washili?

¹⁹ Diladila ashike pauxupi shi na sha nomauwa mahapu oo hatu hafele molwaashi tu li Ovakriste vashili. Otu na oufembanghenda wokukala tu shiivike kuJehova pauhandimwe. Omuprofeti Malakia okwa ti: “Ava hava tila Omwene ova kundafana kumwe. Ndele Omwene okwe shi dimbulukwa nokwe shi uda. Nokoshipala shaye pa shangwa embo lokudimbulukwa ava [hava] tila Omwene nohava fimaneke edina laye.” (Malakia 3:16) Kalunga ota dulu oku tu tala ko tu li ookaume kaye. (Jakob 2:23) Onghalamwenyo yetu oya wapekwa kokukala i na eityo lashili nosho yo kokukala tu na omalalakano mawa notaa eta ouwa. Otwa pewa yo eteelelo lomwenyo waalushe.—Epsalme 37:9.

²⁰ Dimbulukwa kutya omufika woye washili nongushu yoye u li omunhu oye likolelela kunghee Kalunga he ku tale ko, ndele hakwaasho ovanhu vamwe have ku diladilile. Otashi dulika vamwe ve tu tokole she likolelela komifikamhango dopanhu inadi wanenena. Ndele ohole yaKalunga nokunakonasha kwaye nafye pauhandimwe oi li ekanghameno lashili kutya okwe tu tala ko tu na ongushu, sha hala okutya, fye otwa ye. (Mateus 10:29-31) Natango, ohole yetu yokuhola Kalunga otai dulu oku tu ningifa tu kale tu uditile etumba neenghono omufika wetu nosho yo tu kale tu na elalakano la tongomana monghalamwenyo yetu. “Ou e hole Kalunga, oye a shiivika kuye.”—1 Ovakorinto 8:3.

[Omashangelo opedu]

Oto dimbuluka?

• Omolwashike sha fimanenena kOvakriste okwaamena omufika wavo wopamhepo?

• Ongahelipi hatu dulu okupameka omufika wetu wopaKriste?

• Ngeenge tashi uya pokutokola kutya ohatu hafifa lyelye, oinima ilipi tai dulu oku tu kwafela tu ninge etokolo la yuka?

• Ongahelipi okukala tu uditile etumba neenghono omufika wetu taku nwefa mo onakwiiwa yetu tu li Ovakriste?

[Efano pepandja 21]

Okukufa ombinga pauyadi momalipyakidilo opaKriste otaku dulu okupameka omufika wetu wopaKriste