Oshike tashi dulu okukwafela oukwaneumbo weni u kale wa hafa?— Oshitukulwa 1

Ovo opo va hombola ohava kala ve na elineekelo kutya otava ka kala va hafa fiyo alushe mohombo yavo, ngaashi ashike va li mefiku lohango yavo. Osho otashi shiiva. Ovakriste, ovo va kala mohombo oule womido nohava dulika alushe komayele Ombiibeli, ove na oushili mwaasho.

1. Ombiibeli otai yandje omayele elipi kovashamane?

Jehova okwa nangeka po ovashamane va kale omitwe domaukwaneumbo. (Lesha Ovaefeso 5:23.) Okwa teelela omushamane a ninge omatokolo, oo taa etele oukwaneumbo ouwa. Ombiibeli oya ti: “Ovashamane, kaleni mu hole ovakulukadi veni.” (Ovaefeso 5:25) Osho osha hala okutya shike? Omushamane omunahole oha ungaunga nolukeno nomukulukadi waye meumbo nosho yo pokati kovanhu. Ohe mu amene koinima oyo tai dulu oku mu etela oshiponga nohe mu file oshisho palutu nopamaliudo. (1 Timoteus 5:8) Naasho sha fimanenena, oha kwafele omukulukadi waye a kale e na ekwatafano liwa naJehova. (Mateus 4:4) Pashihopaenenwa, oha ilikana nokulesha Ombiibeli pamwe naye. Ngeenge omushamane oha file oshisho pahole omukulukadi waye, Jehova ota kala e mu hokwa.— Lesha 1 Petrus 3:7.

2. Ombiibeli otai yandje omayele elipi kovakulukadi?

Ombiibeli oya ti: “Omukulukadi oku na okukala a fimaneka neenghono omushamane waye.” (Ovaefeso 5:33) Ongahelipi ta dulu okuninga ngaho? Ota dulu okudiladila komaukwatya mawa omushamane waye nokeenghendabala odo ha ningi, opo e mu file oshisho nosho yo ovana vavo. Ota dulu yo okuulika kutya okwa fimaneka omushamane waye mokuyambidida omatokolo aye, okukala ha popi naye nonghenda noku mu popila mouwa, nokuli nonande iha longele Jehova.

3. Ongahelipi ovalihomboli tava dulu okupameka ohombo yavo?

Ombiibeli oya popya shi na sha novalihomboli ya ti: ‘Otava ningi onhumba imwe.’ (Mateus 19:5) Osho osha hala okutya ove na okuhenuka oshinima keshe osho tashi dulu okunghundipaleka ekwatafano lavo. Otava ka pameka ekwatafano lavo mokukala pamwe efimbo nokulombwelafana omadiladilo nomaliudo avo va mangulukilafana, tave shi ningi pahole. Kave na okweefa nande osha, ile omunhu wonhumba, kakele kaJehova, a kale a fimanenena e dule kaume kavo kopahombo. Ove na okukala va lungama, opo vaha kale ve na ekwatafano lopofingo nomunhu umwe e lili, kakele kakaume kavo kopahombo.

KONAKONA MOULE

4. Ovashamane, kaleni mu hole nokufila oshisho ovakulukadi veni

OKAVIDIO: Ovashamane, holeni ovakainhu veni ngaashi mu lihole nye vene (9:53)

• Omeenghedi dimwe dilipi omushamane ta dulu okuulika kutya oku hole noha file oshisho omukulukadi waye?

Lesha Ovakolossi 3:12, ndele tamu kundafana epulo tali shikula:

• Ongahelipi omushamane ta dulu okuulika omaukwatya oo mohombo yavo?

5. Ovakulukadi, kaleni mu hole nomwa fimaneka ovashamane veni

Ombiibeli otai ladipike ovakulukadi va kale va fimaneka ovashamane vavo, kutya nee ohava longele Jehova, ile hasho. Lesha 1 Petrus 3:1, 2, ndele tamu kundafana omapulo taa shikula:

• Ngeenge ou na omushamane, oo iha longele Jehova, osha yela kutya owa hala a kale he mu longele. Mbela shilipipo u wete tashi ka pondola, okukala ho mu udifile efimbo keshe, ile okukala u na elihumbato liwa nowe mu fimaneka? Omolwashike to tile ngaho?

Ovashamane novakulukadi otava dulu okuninga omatokolo mawa. Ndele omafimbo amwe, otashi dulika omukulukadi aha twe kumwe nomushamane waye. Ota dulu okupopya omadiladilo aye a ngungumana nosho yo nefimaneko. Ndele oku na okudimbuluka kutya Jehova okwa yandja oshinakuwanifwa komushamane a kale ta ningi omatokolo, oo taa etele oukwaneumbo ouwa. Omukulukadi oku na okuninga ngaashi ta dulu, opo a yambidide etokolo lomushamane waye. Ngeenge okwa ningi ngaho, osho otashi ka kwafela oukwaneumbo aushe u kale wa hafa. Lesha 1 Petrus 3:3-5, ndele tamu kundafana epulo tali shikula:

• Jehova oha kala e udite ngahelipi, ngeenge omukulukadi oha ulike kutya okwa fimaneka omushamane waye?

6. Otamu dulu okukandula po omaupyakadi mohombo yeni

OKAVIDIO: Nghee to dulu okupameka oukaume weni mohombo (5:44)

• Ngaashi sha ulikwa mokavidio, oshike tashi ulike kutya omushamane nomukulukadi kava li ve na ekwatafano liwa?

• Eenghatu dilipi va katuka, opo va pameke ohombo yavo?

Lesha 1 Ovakorinto 10:24 nosho yo Ovakolossi 3:13. Konima eshi mwa lesha omushangwa keshe, kundafaneni epulo tali shikula:

• Ongahelipi okutula moilonga omayele oo taku dulu okupameka ohombo yeni?

Ombiibeli oya ti kutya otu na okukala twa fimanekafana. Okuulika efimaneko okwa kwatela mo okuungaunga nawa nomunhu nosho yo nefimaneko. Lesha Ovaroma 12:10, ndele tamu kundafana omapulo taa shikula:

• Mbela omushamane, ile omukulukadi oku na okuteelela kaume kaye kopahombo oye a ulike tete kutya okwe mu fimaneka? Omolwashike to tile ngaho?

ENGONGO

Omushamane nomukulukadi otava dulu okukala va hafa, ngeenge ove holafane, va fimanekafana, nohava tula moilonga omafinamhango Ombiibeli.

Eendululo

• Oshike osho omushamane e na okuninga, osho tashi va kwafele va kale va hafa mohombo yavo?

• Oshike osho omukulukadi e na okuninga, osho tashi va kwafele va kale va hafa mohombo yavo?

• Ngeenge owa hombola, ile wa hombolwa, efinamhango lopaMbiibeli lilipi u wete tali dulu okupameka ohombo yeni?

TALA OUYELELE WA WEDWA PO

Tala omaetepo oo tae mu kwafele mu kale mwa hafa mu li oukwaneumbo.

Oukwaneumbo weni otau dulu okukala wa hafa (okambo)

Tala okavidio komusika, oko ka divilika omanangeko noupuna, oo haa di mokutula moilonga omayele aKalunga mohombo yeni.

Ondi ku hole shili (4:26)

Konakona kutya osha hala okutya shike okudulika komushamane e li omutwe woukwaneumbo.

“Ovakainhu, omolwashike mu na okudulika kelongekido loukwamutwe?” (Oshungonangelo, 1 Mei 2010)

Tala nghee omayele Ombiibeli e na sha nohombo taa dulu okukwafela ovalihomboli.

Ombiibeli oya xupifa ohombo yetu (7:12)